De Fide et Operibus (29)

Siue ergo in hac tantum uita homines ista patiuntur
siue etiam post hanc uitam talia quaedam iudicia subsequuntur,
non abhorret, quantum arbitror, a ratione ueritatis iste intellectus
huiusce sententiae. uerumtamen etiam si est alius, qui
mihi non occurrit, potius eligendus; istum quamdiu tenemus,
non cogimur dicere iniustis, non subditis, scelestis, contaminatis,
parricidis, matricidis, homicidis, fornicatoribus, masculorum
concubitoribus, plagiariis, mendacibus, peiuris et si quid
aliud sanae doctrinae aduersatur, quae est secundum
euangelium gloriae beati dei: si tantummodo in
Christum credatis et sacramentum baptismi eius accipiatis,
etiamsi uitam istam pessimam non mutaueritis, salui eritis.