Contra Gaudentium Donatistarum Episcopum (2.10)

In hac ergo ecclesia constituti, quae malorum
siue occultorum siue etiam manifestorum nec potuit nec poterit
perire contagio, nullas de quibuslibet hominibus calumnias
formidamus. si enim mali sunt, procul dubio eos aut ignorant
boni aut suis indiciis manifestatos ecclesiasticis legibus damnant
aut etiam, si nouerunt eos et non apud se accusatos
neque conuictos damnare non possunt, pro ecclesiae pace non
solum inreprehensibiliter, uerum etiam laudabiliter tolerant [*] [*]
nec se propter pisces malos ruptis dominicis retibus ante
tempus litoris damnabiliter separant. si enim hoc facere uelint,
exceptis diuinarum scripturarum innumerabilibus testimoniis,
quibus ne faciant prohibentur, retinet eos certe quem testem
adhibuisti beatissimus Cyprianus clamans atque contestans,
quia, etsi uidentur in ecclesia esse zizania, non
tamen impediri debet aut fides aut caritas nostra,
ut quoniam zizania esse in ecclesia cernimus ipsi
de ecclesia recedamus, non solum uerbo, uerum etiam
exemplo suo nos ammonens, qui collegas suos fundos insidiosis
fraudibus rapientes, usuris multiplicantibus faenus augentes,
quorum auaritiam non leue aliquod uitium sed esse
idololatriam secundum apostolum intellegit, pro unitatis
uinculo pertulit tales nec eorum contagio factus est talis.
discessit ab eis dissimilitudine morum, non diuisione sacramentorum
et immundum non tetigit, sed a factis eorum
abhorrendo, non seorsum populum colligendo. uos autem, dum
carnaliter sapitis quod dictum est per Esaiam prophetam:
discedite et exite de medio eorum et separamini,
dicit dominus, et inmundum ne tetigeritis et alia
quae in scripturis similiter dicta sunt, dum haec, inquam,
non spiritaliter, sed carnaliter sapitis, tales omnino apparetis,
quales eorum ipso propheta praedicante damnantur dicentes:
noli me tangere, quoniam mundus sum.deniquequando
aliena peccata uos peruerse deuitanda esse censuistis, alia
uestra fecistis, sacrilegum schisma populos diuidendo et sacrilegam
haeresim contra dei manifesta promissa et inpleta de
ecclesia toto orbe diffusa nefario spiritu sentiendo. nam si, ut [*] [*]
putas et nos in uerbo reprehendis, una eademque societas
perditorum (non) simul et schisma et haeresis esset, non
dixisset beatissimus Cyprianus in hac ipsa epistula, unde hoc
de zizaniis in ecclesia constitutis posui testimonium, eis confessoribus,
quos gratulabatur a Nouatianorum diuisione fuisse
liberatos: dolebam uehementer et grauiter angebar
quod eis communicare non possem quos semel
diligere coepissem, posteaquam uos de carcere
prodeuntes schismaticus (et haereticus) error excepit.
noli ergo contra apertissimam ueritatem aut utrumque
fallaciter declinare aut unum horum tibi quod tibi mitius
uidetur eligere, cum et schismaticus sis sacrilega discessione
et haereticus sacrilego dogmate.