De Benedictionibus Patriarcharum Liber Unus (24-27)

Lauabit inquit in uino stolam suam. bona stola est [*]
caro Christi, quae omnium peccata operuit, omnium delicta
suscepit, omnium texit errores, bona stola, quae uniuersos
induit ueste iucunditatis. lauit hanc stolam in uino, quando
cum baptizaretur in Iordane, descendit spiritus sanctus sicut [*] [*]

columba et mansit super eum. quo significatur quod plenitudo
spiritus sancti indiuidua in eo fuerit nec recesserit. unde et
euangelista ait quia plenus spiritu sancto dominus
Iesus regressus est ab Iordane. lauit ergo Iesus stolam [*]
suam, non ut suam quae non erat, sed ut nostram quae erat
sordem ablueret. denique addidit: et sanguine uuae
anaboladium suum, hoc est in passione corporis sui diluit
gentes suo sanguine. etenim uerbi anaboladium gentes sunt,
sicut scriptum est: uiuo ego, dicit dominus, nisi omnes
eos induam sicut uestimentum et alibi: sicut amictum
mutabis eos, et mutabuntur. non ergo sanguine
proprio sua peccata quae non erant, sed nostra quae fecimus [*]
delicta mundauit. et bene unam dixit, quia sicut uua pependit
in ligno. ipse est uitis, ipse uua: uitis ligno adhaerens. uua,
quia lancea militis apertum latus emisit aquam et sanguinem.
sic enim dixit Iohannes quia exiuit de eo aqua et sanguis,
aqua ad lauacrum, sanguis ad pretium. aqua nos abluit,
sanguis nos redemit.

et ideo ait propheta: hilares oculi
eius a uino et dentes candidiores quam lac significans
prophetas et apostolos. alii enim sicut oculi Christi[*]
praeuiderunt et adnuntiauerunt eius aduentum, de quibus ipse
dicit: Abraham diem meum uidit et gauisus est, et
unus de prophetis dicit: uidi dominum Sabaoth, quem
uidentes spiritali laetitia conplebantur: alii uero, hoc est
apostoli, quos dominus ab omni peccatorum labe mundauit, [*] [*]

candidiores super lac facti sunt, quos macula postea nulla
fuscauit. etenim lac temporale est, gratia autem apostolorum
perpetua manet, qui nobis spiritalia illa atque caelestia conficientes
alimenta mentis internae uiscera saginarunt. sunt
etiam qui mandata domini lucida, quae diuino ore deprompta [*]
sunt, sicut lac nobis facta arbitrentur, quibus nutriti ad panis
caelestis peruenimus alimoniam. unde et Paulus ait: lacte
uobis potum dedi, non escam; nondum enim poteratis.
Corinthius in principio fidei potu lactis inbuitur, sancti
illi quorum fides adnuntiatur in uniuerso mundo tamquam,
ablactati esca solidiore firmantur.

Zabulon iuxta mare habitabit et ipse secus [*]
accessus nauium et praetendet usque ad Sidonem.
ipsa nominis interpretatio meliora promittit, eo quod Latina
expressio liberationem significet a nocturnis, quod est utique
bonum et eius qui speret in pinnis domini, quem circumdat.
ueritas eius, ne timeat a timore nocturno et a negotio perambulante
in tenebris.

hic ergo Zabulon iuxta mare inquit [*]
habitabit, ut uideat aliorum naufragia ipse inmunis periculi
et spectet alios fluctuantes in freto istius mundi, qui circumferantur
omni uento doctrinae, ipse fidei radice inmobilis
perseuerans, sicut est sacrosancta ecclesia radicata atque
fundata in fide spectans haereticorum procellas et naufragia [*] [*]

Iudaeorum, quoniam gubernatorem quem habuerant abnegauerunt.
circa fluctus igitur habitat, non fluctibus conmoue.tur
magisque ad subueniendum parata quam periculo obnoxia, ut
si qui tempestatibus acti grauibus confugere ad portum uelint. [*]
praesto sit ecclesia tamquam portus salutis, quae expansis
bracchiis in gremium tranquillitatis suae uocet periclitantes
locum fidae stationis ostendens. ecclesiae igitur in hoc saeculo
tamquam portus maritimi per litora diffusi occurrunt laborantibus
dicentes esse credentibus refugium praeparatum. quo
uentis quassata nauigia possint subducere.