De Spiritu Sancto Libri Duo (1.7)

VII. SPIRITUM PATEIS IPSUM ESSE SPIBITUM SANCTUM.

Sed dicis: ostende mihi, quod in sua essentia subsistat spiritus
sanctus. ubicumque uel quotienscumque lego aut spiritum
patris aut spiritum meum aut spiritum dei, uideo, inquis,
non ad spiritus sancti, sed ad patris referendum esse personam.
primum hinc blasphemiam suae inpietatis accumulant, cum
alterutrum dicant spiritum sanctum dei aut creaturam aut certe
ipsum patrem esse credendum. merito qui spiritum sanctum
non confitetur, usque ad contumeliam patris confusa mente
deuoluitur. utique si factura est, ad patris non potest pertinere
substantiam. si uero eum paternam putas esse potentiam, [*] [*]

quomodo eum usque ad facturae humiliare praesumis iniuriam?
nos uero spiritum dei non de patre dici, sed proprie de spiritu
sancto euidentibus testimoniis demonstrabimus.

Legimus in Esaia super dominum Iesum descendisse spiritum
domini, spiritum sapientiae et intellectus, spiritum consilii et
fortitudinis, spiritum scientiae et pietatis. de hoc itaque spiritu
domini, qui supra saluatorem sacro descendit inlapsu, per Esaiam
filius dicit: spiritus domini super me, et euangelista Matthaeus:
ecce aperti sunt ei caeli et uidit spiritum dei
descendentem super eum sicut columbam. hunc autem
spiritum dei, quem in baptismo saluator accepit, manifeste
spiritum sanctum esse Lucas euangelista perdocuit dicens:
Iesus plenus spiritu sancto regressus est ab Iordane.
legimus in Ioel propheta: in diebus illis effundam de
spiritu meo super omnem carnem. quod dicit de spiritu
meo, de sancto spiritu dictum esse manifestum est, quia, quando
sanctus spiritus super apostolos sacra quinquagesimae sollemnitate
descendit, tunc istud testimonium de propheta apostolus
Petrus adsumpsit.

Ad hoc spiritum patris ipsum esse spiritum sanctum euangelia
diuerso sermone, sed consona ueritate docuerunt. nam
cum Matthaeus dixerit: non enim uos estis, qui loquimini,
sed spiritus patris uestri, qui loquitur in uobis,
hunc spiritum patris aperte spiritum sanctum esse Marcus exposuit
dicens: quod datum uobis fuerit in illa hora, id
loquimini. non enim uos estis loquentes, sed spiritus
sanctus. et Lucas similiter hunc spiritum dei sanctum esse [*] [*]

spiritum demonstrauit dicens: nolite solliciti esse, qualiter
aut quid dicatis. spiritus enim sanctus docebit uos
in illa hora, quae oporteat dicere. secundum haec ergo
quotiens aut spiritum patris aut spiritum dei legeris, specialiter
ad spiritum sanctum esse referendum deposito necesse
est errore fatearis. item Esaias quoque spiritum sanctum unum
in gloria trinitatis adnumerat, quando dicit: uidi dominum
sedentem super solium excelsum et Seraphim stabant
et clamabant alter ad alterum: sanctus, sanctus,
sanctus dominus deus Sabaoth. et in consequenti dicit:
et audiui uocem domini dicentis: uade et dices populo
huic: auditu audietis et non intellegetis et uidentes
uidebitis et non uidebitis. hic dominus Sabaoth, qui per
adsumptam speciem uisus est a propheta uel qui locutus est
in propheta, quis fuerit, in actibus apostolorum Paulus ostendit
dicens: bene spiritus sanctus locutus est per Esaiam
prophetam ad patres nostros: auditu audietis et non
intellegetis et uidentes uidebitis et non uidebitis.

Credamus saltim Paulo praeconi celeberrimo ueritatis, quod
sanctus spiritus fuerit ille dominus exercituum, quem uidit
Esaias et qui locutus est per Esaiam. sed quia trina repetitione
persultat sanctus, sanctus, sanctus, uideamusne hic honor
ad totam respiciat trinitatem. Esaias cum dicit: uidi dominum
Sabaoth, patrem Iudaeis agnoscitur praedicare. Iohannes euangelista
aperte filium probatur adserere ita dicens: propterea
non poterant credere in Iesum, quia dixit Esaias: excaecauit
oculos eorum et obdurauit cor eorum. haec [*] [*]

dixit Esaias, quando uidit gloriam filii dei et locutus est de
eo. quod autem idem Esaias dicit: et audiui uocem domini
dicentis: uade et dic populo huic: uidentes uidebitis
et non uidebitis, hunc dominum apostolus Paulus, ut diximus,
spiritum sanctum esse confirmat. uides ergo, quod sanctus,
sanctus, sanctus, haec uox totam concelebrat trinitatem, et
sicut in his tribus uerbis nulla dissimilitudo, nulla est differentia,
ita in trinitatis uirtute nulla potest esse distantia.