Dictiones (27)

Tandem aliquando qui iudicio nostro responderet inuentus
est, qui de inimico nostro, et dum uincitur, triumpharet
Herculeae uires, nisi eliserint, non iacebunt: quem prouidimus,
et de casibus est superbus. stat propriis magnus uiribus, sed
erit maximus per ruinam. nescio utrum Hercules ualeat par
esse, uel si Antaeum non liceat ulla ratione prosterni: at si
hosti nostro blanditur aduersitas, nos ad laureas peruenimus.
scimus futura, sed conuenit superos loqui quasi humana mortalibus.
prouideat Hercules quid eligat esse faciendum. uincendus
est congrediente inimico, uincendus est et iacente. qui
uenena lusit in cunis, qui pacauit Erimanthi nemora, qui ceruam
uelocitate praecessit, optionem habeat quid sequatur : aut
hostem periturus deiciet aut, si certamen metuerit, (erit) cum suis
cautibus iam sepultus. Lernaeum periculum, nisi fallor, orietur
de consummatione certaminis. quis non credat nihil superesse
quod peragat, cum humi fusus hostis aspicitur? at nostrae
partis intentio de oppressione suscitabitur et augmentandi
roboris causam feliciter pro inimico perfuncta res suggeret. [*]