De Peccatorum Meritis et Remissione et de Baptismo Parvulorum (2.3)

Acute autem sibi uidentur dicere. quasi nostrum hoc
ullus ignoret, quod \'si nolumus, non peccamus, nec praeciperet deus
homini, quod esset humanae inpossibile uoluntati\'. sed hoc minus uident,
quod ad nonnulla superanda, uel quae male cupiuntur uel
quae male metuuntur, magnis aliquando et totis uiribus opus est [*] [*]
uoluntatis, quas nos non perfecte in omnibus adhibituros praeuidit,
qui per prophetam ueridice dici uoluit: non iustificabitur in
conspectu tuo omnis uiuens. tales itaque nos futuros dominus
praesciens quaedam salubria remedia contra reatum et uincula
peccatorum etiam post baptismum dare ac ualere dignatus est,
opera scilicet misericordiae, cum ait: dimittite et dimittetur
uobis; date et dabitur uobis. quis enim cum aliqua spe adipiscendae
salutis aeternae de hac uita emigraret manente illa sententia,
quod quicumque totam legem seruauerit, offendat autem
in uno, factus est omnium reus, nisi post paululum sequeretur:
sic loquimini et sic facite tamquam per legem libertatis
incipientes iudicari. iudicium enim sine misericordia
illi, qui non facit misericordiam; supercxultat autem
misericordia iudicio?