Contra Gaudentium Donatistarum Episcopum (1.49)

Quapropter quoniam Donatistae se ipsos occidere semper
amauerunt et ipsi ab initio traditores fuerunt, quid mirum, si
traditoris mortem etiam suos posteros amare docuerunt? sed
uitandae huius similitudinis causa uel numquam uel difficillime
se laqueo necauerunt, frustra omnino. nam ille ludam traditorem
id facere compulit, qui et illum puerum, quem sanauit [*] [*]

dominus, in aquam et ignem saepe deiecit et gregem porcorum in
mare praecipitauit et ipsi domino praecipitium de pinna templi
audaci praesumptione suggessit. quamuis itaque diuersis
modis uoluntariam uos praecipitetis in mortem, tamen eiusdem
diaboli instinctu uos ipsos necando imitamini traditorem. quod
etsi uos non estis, eorum tamen qui fuerunt et schisma fecerunt,
in quo libenter estis, etiam hoc in uobis facere, quod in
se traditor fecit, nefando magisterio didicistis. ecce iam qua
iustitia stabitis aduersus eos, qui uos angustiauerunt, ut, si
uestrae mortes uindicabuntur, non nisi in uobis ipsis iustissime
uindicentur.