The Goddesse of Surrye (56-60)

And in the Holy Cytee he is reseeyved

And the sacrifises ben not perfourmed in the temple, but whan he hath presented his victime beforn the awtere, he schedeth offrynge of wyn there on, and thanne he ayen ledeth him on lyve to his logging, and’ whan he is comen there he sacrificeth and preyeth be him self.

Ther is also this other maner sacrifise. Theidressen here victimes with gerlondes and hurlen hem doun the degrees of the entree on lyve, and in fallynge doun thei dyen. And some men hurlen here owne children thens, but not in lyke manere as the bestes. Thei putten hem in a walet and beren hem doun in hond, and thei scornen hem with alle, seyinge that thei ben not children but oxen.[*]

And alle Ieten marke hem, some on the wriste and some on the nekke; and for that skylle alle Assuryens beren markes.[*]

And thei don another thing, in the whiche thei acorden to men of Trosen allone of Grekes, and I schalle telle you what tho don. Men of Trosen han made ordeynaunce as touchinge the maydens and the bachelers, that thei schulle not maryen or thei lette scheren here lokkes for worschipe of Ypolite; and so thei don. That thing is don also in the Holy Cytee. The bacheleres offren of here berdes, and the children from here birthe leten holy crulles growe, the which thei scheren whan thei ben presented in the temple and putten in boystes outher of silver or often tymes of gold, that thei naylen faste in the temple, and than gon here weye; but first thei wryten there on here names everychon. Whan I was yong, I fulfilled that ryte; and bothe my crulle and my name ben yit in the seyntuarye.[*]