Michael the Syrian: Testimonies to John of Ephesus's Ecclesiastical History, Part 3 from the Chronicle of Michael the Syrian (9.31.1-9.31.3)

ܒܗܢܐ ܙܲܒܢܐ ܗ̣ܘܐ ܒܲܝܢܬ݀ ܡܗܝ̈ܡܢܐ ܐܘܪ̈ܬܘܕܘܟܣܘ ܡܛܠ ܥܘ̣ܩܒܐ ܥܘ̣ܩܒܐ ܡܛܠ ܗ̇ܢܘܢ ܕܦ̇ܢܝܢ ܡܢ ܟܐܠܩܝ̈ܕܘܢܝܐ. ܘܩܡ̣ܘ ܬܪܝܢ ܓܒ̈ܐ ܠܘ̣ܩܒܠ ܚܕ̈ܕܐ. ܟܕ ܡ̣ܢܗܘܢ ܐܡ̇ܪܝܢ ܗ̱ܘܘ܆ ܕܣܟ ܟܝܪܘܛܘܢܝܐ ܕܗ̣ܘܬ݀ ܡܢ ܣܘܢܕܝ̈ܛܐ܆ ܠܐ ܬ̣ܬܩܲܒܠܝ. ܘܐܚܪ̈ܢܐ ܐܡܪܝܢ ܗ̱ܘܘ. ܕܗܝ̇ ܕܢܗ̣ܘܘܢ ܡܢܕܪܝܫ ܠܐ ܦܐܝܐ. ܟܕ ܕܝܢ ܗܕܐ ܐܬ̣ܒܲܚܢܬ݀ ܒܘ̇ܠܝ̣ܬܐ ܡܢ ܐܚܝ̣̈ܕܝ ܦܘ̣ܪ̈ܢܣܐ ܥܕ̈ܬܢܝܐ. ܟܕ ܡܲܠܦܝܢ. ܕܠܘ ܟܝܪܘܛܘܢܝܐ ܕܣܘܢܕܘܣ ܚܢܢ ܡܩܲܒܠܝ̣ܢܢ. ܘܐܦܠܐ ܓܝܪ ܐܝܟ ܕܡܢ ܠܘܬܢ ܕܝ̣ܠܢ ܟܝܪܘܛܘܢܝܐ ܐܝ̣ܬ ܣܟ ܠܣܘܢܕܝ̈ܛܐ. ܡܛܠ ܣܠ ܗܠܝܢ ܕܐܬܟ̇ܢܫܘ ܗ̱ܘܘ ܒܣܘܢܕܘܣ. ܘܩܕܡ ܣܘܢܕܘܣ ܐܦܝ̈ܣܩܘܦܐ ܐܝ̣ܬ݂ܝܗܘܢ ܗ̱ܘܘ. ܘܠܘ ܒܣܘܢܕܘܣ ܗܘ̣ܘ ܐܦܝ̈ܣܩܘܦܐ. ܐܠܐ ܡܛܠ ܡܲܣܛܝܢܘ̣ܬܐ ܕܒܣܘܢܕܘܣ ܡܣ̣ܬܠܝܢܘ̣ܬܐ ܕܡܢ ܟܗܢܘ̣ܬܐ ܩܲܒܠܘ܆ ܘܢܦ̣ܠܘ ܡܢ ܕܪܓܐ ܕܪ̈ܝܫܝܟܗܢܐ ܬܪ̈ܝܨܝ ܫܘܒܚܐ. ܘܐܬܬܲܚܪܡܘ ܥܡ ܟܠܗܘܢ ܗ̇ܢܘܢ ܕܗ̇ܘܝܢ ܡܢ̣ܗܘܢ. ܐܡ̣ܬܝ ܕܝܢ ܕܠܡ̣ܬܥܲܒܪܢܘ̣ܬܐ ܗܕܐ ܘܡܲܦܩܠܬܐ ܕܡܢ ܫܪܪܐ: ܟܕ ܡ̣ܬܥܲܗܕܝܢ ܐܢܫܝ̈ܢ ܡܢܗܘܢ. ܢ̣ܬ݂ܦܢܘܢ ܘܢܬܓܲܘܣܘܢ ܒܫܪܪܐ: ܘܢܲܚܪܡܘܢ ܠܗ̇ܘ ܥܒ̇ܪ ܢܡܘܣܐ ܕܥܒ̣ܕܘ. ܘܬܗ̣ܘܐ ܥܠܝܗܘܢ ܨܠܘܬܐ ܡܢ ܐܘܪ̈ܬܘܕܘܟܣܘ܆ ܡܩܲܒܠܝܢ ܗ̱ܘܘ ܛܟ̣ܣܐ ܫܪܝܪܐ ܕܟܗܢܘ̣ܬܐ ܗ̇ܝ ܕܢ̣ܦܠܘ ܡ̣ܢܗ̇. ܘܩ̇ܝܡܝܢ ܒܕܪܓܐ ܕܟܗܢܘܬܐ ܫܲܪܝ̣ܪܬܐ ܕܐܘܪܬܘܕܘܟܣܝܐ. ܘܠܘ̣ ܡܢ ܣܘܢܕܘܣ ܡܩܲܒܠܝܢ ܟܗܢܘ̣ܬܐ. ܡܛܠ ܕܟܗܢܘܬܐ ܡܘܗܒܬܐ ܕܡܢ ܫܡܝܐ. ܕܠܫ̈ܠܝܚܐ ܩ̈ܕܝܫܐ ܐܬܝܲܗܒܬ݀. ܘܡ̣ܢܗܘܢ ܪ̈ܕܝܐ ܘܢ̇ܚܬܐ ܠܢ ܥܕܡܐ ܠܚܪܬܐ ܘܫܘ̣ܠܡܐ. ܘܚܢܢ ܠܗܕܐ ܩܲܒܠܢܢ ܘܡܩܲܒܠܝ̣ܢܢ ܘܠܗܠܝܢ ܕܒܲܥܒܪ ܢܡܘܣܐ ܕܡܢ ܐܪ̈ܛܝܩܐ ܗ̇ܘܝܢ. ܡܲܐܣܝܢܢ ܘܡܩܲܒܠܝ̣ܢܢ ܘܟܕ ܛܒ ܗܕܐ ܡܲܠܦܢܘ̣ܬܐ ܗ̣ܘܬ݂݀. ܘܒܲܟܬܒܐ ܠܗ̇ܢܘܢ ܕܒܡܕܢܚܐ ܡܢ ܡܕܝ̣ܢܬ݀ ܡܲܠܟܘܬܐ ܐܫ̣ܬܕܪܬ݀. ܟܕ ܛܘܒ̈ܢܐ ܝܲܥܩܘܒ ܘܬܐܘܕܘܪܐ ܗܘܘ ܡܝܲܒ̈ܠܢܝܗ̇܆ ܚܪ̈ܝܢܐ ܕܠܐ ܙܥܘ̣ܪ ܐܩܝ̣ܡܘ ܠܣ̣ܒܠܗܘܢ܆ ܣܓ̈ܝܐܐ. ܥܕܡܐ ܠܙܒܢܐ ܣܓܝܐܐ. ܘܗܟܢܐ ܒܩܲܠܝ̣ܠ ܩܲܠܝ̣ܠ ܐܬܒܲܝܢܘ ܒܡܠ̣ܟܐ. ܘܩܲܒܠܘ ܡܲܪܕܘ̣ܬܐ. ܟܕ ܝܠ̣ܦܘ. ܕܠܐ ܟܗܢܘ̣ܬܐ ܘܠܐ ܡܲܥܡܘ̣ܕܝ̣ܬܐ ܗ̇ܝ ܕܣܘܢܕ̈ܝܛܐ ܡܬ̣ܩܲܒܠܐ܆ ܘܠܐ ܕܢܥ̣ܡܕܘܢ ܬܘ̣ܒ ܡܢ ܕܪܝܫ ܡܲܨܝܐ. ܡܛܠ ܗܕܐ ܐܬܝ̣ܕ̈ܥܝܢ ܐܪ̈ܣܝܣ. ܕܥܠܝܗܝܢ ܦ̇ܩܕ ܕܬܗܘ̣ܐ. ܐܠܐ ܕܩ̇ܢܘܢܐܝܬ ܬܬ̣ܩܲܒܠܝ. ܐܦܠܐ ܓܝܪ ܗ̇ܢܘܢ ܣܘܢܕܝ̈ܛܐ ܟܠܗܘܢ. ܐܠܐ ܐܢ ܒܥܪܝܪ̈ܝܐ ܘܗܕܝ̈ܘܛܐ ܕܒܗܘܢ. ܩܲܒܠܘ ܕܢܥ̣ܒܕܘܢ ܡܢܕܪܝܫ ܟܗ̈ܢܐ܇ ܠܐܝܠܝܢ ܕܡܢ ܡܗܝ̈ܡܢܐ ܗ̇ܘܝܢ. ܐܠܐ ܒܠܚܘܕ ܐܝܠܝܢ ܕܡ̇ܠ̣ܝܢ ܪܘܓܙܐ ܥܡ ܗ̤ܕܝܘܛܘܬ݂ܐ܇ ܘܒܥܪܝܪܝܘ̣ܬܐ ܫܐܕܢܝܬܐ܀ ܬܚܘ̣ܡܐ ܕܝܢ ܕܬܲܚܡܘ ܐܘܪ̈ܬܘܕܘܟܣܘ܆ ܥܠ ܐܝܠܝܢ ܕܦ̇ܢܝܢ ܡܢ ܐܪܣܝܣ ܕܬܪ̈ܝܝ ܟܝ̈ܢܐ. ܐܝ̣ܬܘܗܝ ܗܟܢܐ. ܬܪܬܝܢ ܫ̈ܢܝܢ ܢܗ̣ܘܘܢ ܒܲܬܝܒܘ̣ܬܐ. ܐܢ ܐܦܝ̈ܣܩܘܦܐ ܘܐܢ ܩܫܝ̈ܫܐ ܘܐܢ ܡܫܡ̈ܫܢܐ ܐܝ̣ܬܝܗܘܢ. ܘܒܫܘ̣ܠܡܐ ܕܬܝܒܘ̣ܬܐ ܬܗ̣ܘܐ ܥܠܝܗܘܢ ܨܠܘܬܐ ܡܢ ܐܦܝܣܩܘܦܐ ܘܬܙ̣ܕܕܩܝ ܠܘܬܗܘܢ ܟܗܢܘ̣ܬܗܘܢ܀

ܒܣܘܢܕܘܣ ܕܦܦܐ ܬܐܘܕܘܣܝܘܣ ܐܫܬ̣ܟܚ ܓܒܪܐ ܩܫܝܫܐ ܕܫܡܗ ܝܘܠܝܢܐ. ܒܗܢܐ ܗ̣ܘܐ ܛܢ̣ܢܐ ܥܠ ܥܡܐ ܕܐܝܬ݂ܘܗܝ ܗܘܐ ܒܬܚܘ̣ܡܐ ܥܠܝܐ ܕܬܐܒܐܝܣ܇ ܡܕܢܚܐ ܕܠܓܘ ܡܢ ܡܨܪܝܢ. ܗܢܐ ܕܡܐܕܬܐ ܫ̇ܩܠ ܗ̣ܘܐ ܡܢ ܪ̈ܘܡܝܐ. ܐܝܟܢܐ ܕܠܐ ܢܥ̣ܘ̇ܠ ܢܫ̣ܒܐ. ܠܗܢܐ ܥܡܐ ܟܕ ܝ̣ܨܦ ܝܘܠܝܢܐ܆ ܐܘܕ݁ܥ̣ ܠܡܠܟܬܢ ܬܐܘܕܘܪܐ ܢܚ̣ܝܬ݂݀ ܢܦ݂ܫܐ.. ܕܝ̇ܨܦܐ ܗ̱ܘܬ݀ ܒܙܒܢܗ̇ ܠܩܘܝ̣ܡܐ ܕܗܲܝܡܢܘ̣ܬܐ. ܘܒܚܲܕܘܬܐ ܐܘܕܥ̣ܬ݀ ܠܡܠܟܐ ܐܟܡ̇ܢ ܕܢܥܕܪ ܥܡܗ̇ ܕܢܫ̣ܬܕܪ ܝܘܠܝܢܐ. ܡܲܠܟܐ ܕܝܢ ܒܥ̣ܐ ܕܐܦܝܣܩܘܦܐ ܟܐܠܩܝܕܘܢܝܐ ܢܫܲܕܪ. ܘܡܣܪܗܒܐܝ̣ܬ ܟܬ̣ܒ ܠܕܘܟܘܣ ܕܬܐܒܝܕܐ. ܐܝܟܢܐ ܕܢܫܕܪ ܚܕ ܡܢ ܐܦܝܣ̈ܩܘܦܐ ܕܬܡܢ. ܡܲܠܟܬܐ ܕܝܢ ܟܕ ܝܠ̣ܦܬ݀ ܫܲܕܪܬ݀ ܐܓܪܬܐ ܠܕܘܟܘܣ ܗܟܢܐ. ܕܐܢ̇ܐ ܘܡܠܟܐ ܐܬ̣ܚܲܫܒܢ ܢܫܕܪ ܠܘܬ ܥܡܐ ܕܢܐܒܕܝܣ. ܘܗܐ ܫ̇ܕܪܬ ܐܢ̇ܐ ܠܝܘܠܝܢܐ. ܘܨ̇ܒܝܐ ܐܢ̣ܐ ܕܗ̣ܘ ܢܥ̣ܘ̇ܠ ܩܕܡܝܐ. ܒܕܓ̣ܘܢ ܥܲܟܪ ܕܘܟܘܣ ܠܐܝܙܓ̈ܕܐ ܕܡܲܠܟܐ. ܥܕܡܐ ܕܝܘܠܝܢܐ ܡ̣ܛܐ ܘܐܙܠ܆ ܘܟܕ ܐܪܓܫ̣ ܐܝܙܓܕܐ ܕܡܲܠܟܐ܆ ܣܲܕܩ ܢܚ̈ܬܘܗܝ ܘܗܝܕܝܢ ܥܠ̣܀

ܐܝ̣ܩܪܗ ܕܡܲܠܟܐ ܡܩܲܒܠܝ̣ܢܢ. ܘܐܝ̣ܩܪ̈ܐ ܡܫܲܕܪܝܢܢ ܠܗ. ܗܝܡܢܘܬܗ ܡܚܲܒܠܬܐ ܠܐ ܡܩܲܒܠܝ̣ܢܢ. ܘܕܐܫ̣ܬܘܝ̣ܢܢ ܕܢܗ̣ܘܐ ܟܪ̈ܣܛܝܢܐ܆ ܒܬܪ ܬܐܘܕܘܣܝܘܣ ܢܩܦܝ̣ܢܢ. ܗ̇ܘ ܕܡܛܠ ܗܲܝܡܢܘܬܐ ܫܲܪܝ̣ܪܬܐ ܢܦ̣ܩ ܡܢ ܟܘ̣ܪܣܝܗ. ܟܕ ܡܢ ܚܲܢܦܘ̣ܬܐ ܥ̣ܪܩܢܢ܆ ܕܢ̇ܦ̣ܠ ܒܒܝ̣ܫܘ̣ܬ ܗܝܡܢܘܬܐ ܚ̣ܣ ܠܢ. ܘܒܕܐܝܟ ܗܠܝܢ ܫ̣ܪܘ ܠܐܝܙܓ̈ܕܐ ܕܡܠܟܐ܀ ܦ̣ܫ ܬܡܢ ܘܥܕܐ ܕܬܪܬܝܢ ܫ̈ܢܝܢ. ܘܡܬܲܢܐ ܗ̱ܘܐ ܡܢ ܓ ܫ̈ܥܝܢ ܥܕܡܐ ܠܥܣܪ. ܟܕ ܫܠܝ̣ܚ ܘܟܒ̣ܝܢ ܣܕܘܢܐ ܒܡܥܪ̈ܐ ܕܡ̈ܠܝܢ ܡ̈ܝܐ ܩ̇ܐܡ ܗܘܐ. ܟܕ ܠܐ ܡܫ̣ܬܟܚ ܠܥܠ ܡܢ ܡ̈ܝܐ ܐܠܐ ܡܫܘܡܝܬܗ ܒܠܚܘܕ. ܘܐܥܡ̣ܕ ܠܡܠܟܐ ܘܠܟܠܗ ܥܡܐ. ܘܟܕ ܕܒܪ ܗ̱ܘܐ ܥܡܗ ܐܦܝܣܩܘܦܐ ܚܕ ܡܢ ܬܐܒܝܕܐ. ܘܟܕ ܐܠܦ ܘܛܟܣ. ܐܫܠ̣ܡ ܐܢܘܢ ܠܐܦܝܣܩܘܦܐ ܗ̇ܘ ܘܗ̣ܘ ܦܢ̣ܐ ܠܡܕܝ̣ܢܬ݀ ܡܲܠܟܘ̣ܬܐ܆ ܘܥܢ̣ܕ.