John of Ephesus: Ecclesiastical History (Ms V) (3.3.6)

ܡ̇ܠܟܐ ܕܝܢ ܕܦܪ̈ܣܝܐ ܥܡ ܚ̈ܝܠܘܬܐ

ܬܩ̈ܝܦܐ: ܡܚܕܐ ܕܝܠܦ ܕܢܦ̣ܠ ܠܗ ܡܪܩܝܢܐ: ܘܥ̣ܪܩ ܚܝܠܐ ܡܢ ܡܕܝܢܬܐ ܢܨܝܒܝܢ܆ ܡܚܕܐ ܡܢܥ ܘܐܫܟܚ ܐܢܘܢ ܠܟܠܗܘܢ ܡܝܟܢ̈ܝܡܛܐ ܘܠܟܠܗܘܢ ܡ̈ܢܓܢܘܢ ܕܥܒܝܕܝܢ ܗܘܘ ܠܗ ܠܡܪܩܝܢܐ ܦܛܪܩܝܘܣ ܥܠܝܗ̇. ܘܡܚܕܐ ܐܙܠ̣ ܝܬܒ̣ ܥܠ ܕܪܐ. ܟܕ ܫܩܠ ܥܡܗ ܟܠܗܝܢ ܐܘܡ̈ܢܘܬܐ ܕܡܪܩܝܢܐ ܕܗܘ̈ܝ ܥܠ ܢܨܝܒܝܢ. ܘܐܝܬܝ ܢܩ̣ܫ ܐܢܝ̈ܢ ܥܠ ܕܪܐ ܡܕܝܢܬܐ. ܟܕ ܡܢ ܟܠ ܐܘܡ̈ܢܘܢ ܐܝܬܝ ܗ̣ܘܐ ܥܡܗ. ܘܠܘܩܕܡ ܐܝܬܝ ܐܪܡܝ ܦܣ̈ܘܠܐ ܘܫܪܟܐ܇ ܕܢܦܣܩܘܢ ܗܘܘ ܛܘܪܐ ܡܕܢܚܝܐ ܕܠܒܪ ܡܢ ܐܓܘܓܐ. ܘܢܗܦܟܘܢܝܗܝ ܡܢ ܡܕܝܢܬܐ. ܟܕ ܐܝܟ ܕܡܬܐܡܪܐ ܡ̇ܢ܆ ܕܐܫܟܚ ܛܪܢܐ ܩܫܝܐ. ܟܕ ܫ̇ܓܪܝܢ ܗܘܘ ܥܠܘܗܝ ܢܘܪܐ܆ ܘܒܬܪ ܟܢ ܚܠܐ ܪܡ̇ܝܢ ܗܘܘ. ܘܗܟܢܐ ܡܦܚܪܝܢ ܗܘܘ ܠܗ. ܐܩܝܡ ܕܝܢ ܠܘܩܒܠ ܡܕܝܢܬܐ܆ ܟܠܗܘܢ ܡܢܓܢܘܢ ܕܥܒܕ ܗ̣ܘܐ ܡܪܩܝܢܐ ܥܠ ܢܨܝܒܝܢ. ܘܗ̣ܘܐ ܝ̇ܬܒ ܥܠܝܗ̇܆ ܘܡܚܠܦ ܥܠܝܗ̇ ܐܘܡ̈ܢܘܬܐ ܕܩܪܒܐ ܕܢܟ̣ܒܫܝܗ̇ ܙܒܢܐ ܕܝܪ̈ܚܐ ܫܬܐ܆ ܟܕ ܐܦ ܟܘܕ̈ܢܘܬܐ ܬܪܬܝܢ ܒ̣ܢܐ ܗ̣ܘܐ ܥܠܝܗ̇. ܘܡܬܛܟܢܝܢ ܗܘܘ ܪ̈ܗܘܡܝܐ ܘܥܒ̇ܕܝܢ ܘܡܘܩܕܝܢ ܗܘܘ ܠܗܝܢ. ܟܕ ܐܚܝܕܐ ܡܕܝܢܬܐ. ܟܕ ܐܝܬ ܗ̣ܘܐ ܒܗ̇ ܪ̈ܝܫܢܐ܇ ܝܘܚܢܢ ܐܣܛܪܛܠܛܝܣ ܒܪܗ ܫܦܢܝ܇ ܕܐܦ ܗ̣ܘ ܐܣܛܪܛܠܛܝܣ ܐܝܬܘܗܝ ܗ̣ܘܐ ܘܫܪܟܐ: ܣܪܓܝܣ ܕܝܢ ܐܝܟ ܕܐܡܪܝܢ ܗܘܘ܆ ܒܠ̣ܥ ܗ̣ܘܐ ܒܓܐܪܐ̣ ܘܡܝܬ. ܗܘ̣ ܕܝܢ ܡ̇ܠܟܐ ܕܦܪ̈ܣܝܐ ܒܚܪܬܐ ܣܠܩ ܗ̣ܘܐ ܢܩ̣ܫ ܡܫܟܢܗ ܒܛܘܪܐ ܓܪܒܝܝܐ ܕܠܥܠ ܡܢ ܡܕܝܢܬܐ. ܘܟܕ ܝ̇ܬܒ ܚ̇ܐܪ ܗ̣ܘܐ ܒܟܠܡܕܡ ܕܣܥܪܝܢ ܗܘܘ ܒܓܘܗ̇. ܐܝܟܢܐ ܕܐܦ ܬܡܢ ܡܢ ܠܥܠ ܟܘܕܢܬܐ ܦܩ̣ܕ ܘܐܬܒܢܝܬ ܥܠ ܦܘܪܩܣܐ ܪܒܐ ܕܪܡ ܗ̣ܘܐ ܡܢ ܟܠܗܘܢ ܦܘܪ̈ܩܣܐ ܕܫܪܟܐ. ܕܩܪܝܢ ܗܘܘ ܠܗ ܗܪܩܠܝܣ ܗ̇ܘ ܕܡܢ ܠܓܘ ܡܢܐ ܢܥܒܕܘ̣ܢ ܠܝܬ ܗ̣ܘܐ ܠܗܘܢ. ܡܢ ܠܒܪ ܕܝܢ ܐܥܫܢܘܗ̇ ܠܟܘܕܢܬܐ܆ ܘܐܬܗܝܡܢܘ ܥܠ ܡܕܝܢܬܐ. ܟܕ ܩܕܡ ܗܠܝܢ܆ ܡܢ ܟܕܘ ܟܕ ܚ̣ܙܐ ܕܟܡܐ ܥܡ̣ܠ ܘܠܐ ܐܙܝܥܗ̇ ܗ̣ܘܐ ܠܡܕܝܢܬܐ: ܐܝܟܢܐ ܕܐܦ ܫܘܪܐ ܕܠܒ̈ܢܐ ܦܩ̣ܕ ܘܐܟܪܟ ܠܒܪ ܡܢ ܫܘܪܐ ܕܡܕܝܢܬܐ: ܕܐܢܗ̣ܘ ܕܓ̣ܕܫ ܘܢܦܩܝܢ ܗܘܘ ܒܢܝ̈ ܡܕܝܢܬܐ܆ ܢܗܘܐ ܬܟܣ ܗ̣ܘܐ ܠܗܘܢ. ܘܟܕ ܚܙ̣ܐ ܕܟܠܗܝܢ ܨܢܥ̈ܬܗ ܐܬܒ̈ܛܠܝ ܗ̈ܘܝ ܐܝܟ ܕܐܬܐܡܪܬ܆ ܐܬܟܪܗ̇ ܗ̣ܘܐ ܘܐܬܬܙܝܥ ܕܕܡ ܢܡܘܬ ܠܗ. ܘܫܠ̣ܚ ܠܡܕܝܢܬܐ ܕܢܫ̇ܕܪܘܢ ܐܢܫ ܕܢܡܠܠ ܥܡܗ. ܐܝܬ ܗ̣ܘܐ ܕܝܢ ܬܡܢ ܐܢܫ ܝܕܝܥܐ ܘܡܫܡܗ̇ ܕܝܪܡܢܘܛܐ ܕܪ̈ܗܘܡܝܐ ܘܕܦܪ̈ܣܝܐ ܕܫܡܗ ܗ̣ܘܐ ܩܘܡܝܛܐ. ܘܠܗ ܠܗܢܐ ܫܕܪܘ ܒܢ̈ܝ ܡܕܝܢܬܐ ܠܘܬܗ. ܗ̇ܘ ܕܟܕ ܣܓ̈ܝܐܬܐ ܡܠܠܘ ܥܡܗ܆ ܘܐܡܪ ܠܗ. ܕܢܐܡܪ ܠܒܢ̈ܝ ܡܕܝܢܬܐ ܕܢܬܠܘܢ ܠܗ ܚܡܫܐ ܩܢܛܝܢܪ̈ܐ ܦܘܪܩܢܗ̇ ܕܡܕܝܢܬܐ ܘܢܪܚܩ ܡܢܗ̇. ܗ̇ܘ ܕܟܕ ܐܝܟ ܕܐܫܬܘܕܝ ܠܗ ܒܚܪܬܐ: ܟܕ ܐܬܬܟܠ ܗ̣ܘܐ ܕܠܐ ܡܬܟܒܫܐ ܡܕܝܢܬܐ܆ ܠܐ ܐܡ̣ܪ ܗ̣ܘܐ ܠܗܘܢ ܗܕܐ. ܐܝܟܢܐ ܕܟܕ ܚ̣ܙܐ ܡ̇ܠܟܐ ܕܥܒ̣ܪܘ ܝܘܡ̈ܬܐ: ܘܫܛܘܗܝ ܘܠܐ ܥܒܕܘܢ ܠܗ ܐܦܩܪܣܝܣ܆ ܬܘܒ ܝܬܝܪܐܝܬ ܐܬ̇ܥܪܡ ܘܐܬܡܠܝ ܚܡܬܐ ܪܒܬܐ. ܘܣܡ ܬܘܒ ܥܠ ܡܕܝܢܬܐ܆ ܘܬܩܦܗ̇ ܘܚܣܢܗ̇ ܠܟܘܕܢܬܐ ܕܥܒܕ ܒܚܪܬܐ. ܟܕ ܡܟܝܠ ܕܗܘ̈ܡܝܐ ܒܣ̇ܪܘ ܥܠܘܗܝ ܘܐܗܠܘ ܒܗ ܟܕ ܐܡܪܝܢ܆ ܕܒܗ̇ܬ ܗ̣ܘ ܐܝܟ ܕܒܗܠܝܢ ܕܫܪܟܐ. ܘܗܟܢܐ ܡ̇ܢ ܐܗܡܝܘ ܡܢ ܩܪܒܐ ܕܥܠ ܫܘܪܐ. ܘܬܘܒ ܝܬܝܪܐܝܬ܆ ܕܩܘܪܫܐ ܐܝܬܘܗܝ ܥܙܝܙܐ ܘܩܫܝܐ. ܘܢܚܬܘ ܡܢ ܫܘܪܐ܆ ܘܥܠܘ ܐܟ̇ܠܝܢ ܘܫܬܝܢ ܒܓܘ ܒ̈ܬܐ.. ܦܪ̈ܣܝܐ ܕܝܢ ܟܕ ܚܙܘ ܕܐܣܬܦܩ ܫܘܪܐ ܡܢ ܚܝܠܐ ܕܪ̈ܗܘܡܝܐ: ܘܟܘܕܢܬܐ ܕܥܒܕܘ ܥܒܪܬܗ ܠܫܘܪܐ ܠܥܠ܆ ܗܝܕܝܢ ܐܬ̇ܛܟܢܘ ܘܩܛܪܘܢ ܩܝ̈ܣܐ ܘܣܡܟܘ ܥܠ ܫܘܪܐ܆ ܘܥܒܪܘ ܚܝܠܐ ܘܡܠܬ ܟܠܗ ܦܢܝܬܗ ܕܫܘܪܐ. ܘܢܚܬܘ ܠܓܘ ܡܕܝܢܬܐ. ܘܟܕ ܩܥܬܐ ܗܘܬ ܡܢܫܠܝ ܕܗܐ ܟܒܝܫܐ ܡܕܝܢܬܐ: ܘܣܓܝ ܚܝܠܐ ܕܦܪ̈ܣܝܐ ܥܠ ܕܗܘ̈ܡܝܐ܆ ܬܘܗܘ ܘܐܬܬܙܝܥܘ ܘܐܬܕܘܕܘ. ܘܟܠܗܘܢ ܟܢܝܫܐܝܬ ܪܗܛܘܢ ܠܬܪ̈ܥܝܗ̇ ܕܡܕܝܢܬܐ ܕܢܥܪܩܘܢ ܡܢ ܩܕܡܝܗܘܢ. ܐܝܟܢܐ ܕܟܕ ܚܙܘ ܦܪ̈ܣܝܐ: ܣܓܝܐܘܬܗܘܢ܆ ܕܚܠܘ ܘܐܬܬܙܝܥܘ ܐܦ ܗ̣ܢܘܢ. ܘܐܬܬܟ̣ܣܘ ܘܕܦܝܘ ܠܗܘܢ ܠܪ̈ܗܘܡܝܐ ܕܢܥܪܩܘܢ ܘܠܐ ܢܩܘܡܘܢ ܠܘܩܒܠܗܘܢ.. ܟܕ ܓܝܪ ܪ̈ܗܘܡܝܐ ܪܗܛܘ ܠܘܬ ܟܠܗܘܢ ܬܪ̈ܥܐ: ܟܕ ܩ̇ܥܝܢ ܡܛܠ ܩ̈ܠܝܕܐ: ܘܐܬܒܥܝܘ ܘܠܐ ܐܫܬܟܚܘ ܩ̈ܠܝܕܐ: ܡܛܠ ܕܛܫܝܘ ܐܢܘܢ ܪ̈ܝܫܢܐ: ܐܝܟܢܐ ܕܟܕ ܚ̣ܙܘ ܪ̈ܗܘܡܝܐ ܕܚܝܠܐ ܕܦܪ̈ܣܝܐ ܬܩܦ ܠܗܘܐܬܡܠܝܬ ܡܕܝܢܬܐ ܡܢ ܟܕܘ: ܘܗ̣ܢܘܢ ܡܢ ܟܠ ܓܒ̈ܝܢ ܐܙܕܪܒܘ ܘܐܬܟܠܝܘ ܘܠܡܥܪܩ ܠܐ ܡܨܝܢ܆ ܗܝܕܝܢ ܚܡܠܘ ܢܦܫܗܘܢ ܘܐܢ ܠܡܘܬܐ ܘܐܢ ܠܚ̈ܝܐ. ܘܐܪܡܝܘ ܥܠ ܚܝܠܐ ܕܦܪ̈ܣܝܐ. ܟܕ ܚܨܕܝܢ ܠܗܘܢ ܘܫ̇ܕܝܢ ܐܝܟ ܚܨܘ̈ܕܐ ܠܫܒ̈ܠܐ. ܘܬܘܒ ܗܠܝܢ ܠܗܠܝܢ. ܘܗ̣ܘܐ ܚܣܝܢ ܩܪܒܐ ܒܓܘܗ̇ ܕܡܕܝܢܬܐ܆ ܘܚ̇ܪܒܝܢ ܠܚ̈ܕܕܐ ܟܕ ܐܚܝܕܐ ܡܕܝܢܬܐ ܫܒܥܐ ܝܘܡ̈ܝܢ܆ ܥܕܡܐ ܕܡܠܬܗ ܡܕܝܢܬܐ ܫ̈ܠܕܐ ܘܣܪܝܬ. ܘܓ̇ܪܝܢ ܗܘܘ ܘܫ̇ܕܝܢ ܠܗܘܢ ܒܢܗܪܐ ܘܒܓܝܣܛܪ̈ܢܣ ܡܢ ܐܢܢܩܐ. ܐܝܟܢܐ ܕܟܕ ܦܪ̈ܣܝܐ ܚܙܘ ܗܘܘ ܕܡܬܚܪܒܝܢ ܘܠܐ ܡܫܟܚܝܢ ܕܢܥܠܘܢ ܘܢܫܬܠܛܘܢ ܒܒܙܬܐ ܕܡܕܝܢܬܐ: ܟܕ ܐܦ ܐܬܬܙܝܥܘ ܡܢ ܪ̈ܗܘܡܝܐ܆ ܥܪܩܘ̣ ܘܣܠܩܘ ܠܗܘܢ ܠܥܠ ܠܫܘܪܐ. ܘܐܬܚܫܒܘ ܕܒܢܟܠܐ ܢܬܚܫܚܘܢ ܥܡܗܘܢ ܘܠܘܬܗܘܢ. ܟܕ ܫ̇ܠܚܝܢ ܠܗܘܢ ܠܪ̈ܗܘܡܝܐ ܢܟܝܠܐܝܬ܆ ܕܥܠ ܡ̣ܢ ܠܡ ܗܟܢܐ ܚܪܒܝܢܢ ܘܡܓܡܪܝܢܢ ܠܚ̈ܕܕܐ. ܐܠܐ ܬܘ ܢܬܠ ܡܠܬܐ ܠܚ̈ܕܕܐ܆ ܘܢܣܝܡ ܙܝܢܢ ܬܪ̈ܝܗܘܢ ܓܒ̈ܐ. ܘܢܥܒܕ ܫܝܢܐ ܥܡ ܚ̈ܕܕܐ. ܐܝܟܢܐ ܕܟܕ ܡܟܝܠ ܐܘܚܠܘ ܚܝܠܐ ܕܪ̈ܗܘܡܝܐ ܥܠ ܚܝ̈ܝܗܘܢ: ܘܚܙܘ ܕܐܬܚܒ̣ܫܘ ܒܐܘܠܨܢܐ܆ ܩܒܠܘܢ ܘܝܗܒܘܢ ܡܠܬܐ ܘܫܩܠܘ ܡܠܬܐ. ܘܣܡܘ ܙܝܢܗܘܢ. ܘܬܟܝܠܐܝܬ ܡܟܝܠ ܐܬܩܪܒܘ ܠܘܬ ܚ̈ܕܕܐ ܐܝܟ ܕܒܫܝܢܐ. ܗܢܘܢ ܕܝܢ ܕܗܘ̈ܡܝܐ ܡܟܝܠ ܐܬܬܟܠܘ ܥܠ ܡܠܬܐ܆ ܘܕܠܐ ܕܚܠܬܐ ܗܘܘ. ܐܝܟܢܐ ܕܟܕ ܬܟܝܠܐܝܬ ܥܠ ܚܝܠܐ ܬܩܝܦܐ ܕܦܪ̈ܣܝܐ: ܘܚܒܟܘ ܬܪܝܗܘܢ ܓܒ̈ܐ ܒܚ̈ܕܕܐ ܐܝܟ ܕܒܫܝܢܐ: ܘܟܕ ܫ̇ܪܝܘ ܒܒܘܙܬܐ ܕܡܕܝܢܬܐ ܬܪܝܗܘܢ ܓ̈ܒܐ܆ ܗܝܕܝܢ ܐܬܓܠܝ ܙܐܦܗܘܢ ܘܢܟܠܗܘܢ ܕܦܪ̈ܣܝܐ. ܐܬܗܦܟܘ ܗܘܘ ܓܝܪ ܘܕܓܠܘ ܗܘܘ ܒܡܠܬܗܘܢ. ܘܠܒܟܘܢ ܐܢܘܢ ܠܪ̈ܗܘܡܝܐ܆ ܘܠܣܓܝܐܘܬܗܘܢ ܚܪܒ̣ܘ. ܘܫܪܟܐ ܦܟ̣ܪܘ ܐܢܘܢ ܚܕ ܚܕ ܘܐܦܩܘ ܐܢܘܢ ܠܘܬ ܡ̇ܠܟܐ. ܘܠܟܠܗܘܢ ܒ̈ܢܝ ܚ̈ܐܪܐ ܘܚܐܪ̈ܬܐ ܘܪ̈ܝܫܢܐ ܕܡܕܝܢܬܐ ܥܡܗܘܢ. ܘܦܩ̣ܕ ܘܐܬܛܒܥܘ ܟܠܗܘܢ. ܦܩܕ ܕܝܢ ܬܘܒ܆ ܕܟܠ ܕܐܝܬ ܠܗ ܕܗܒܐ ܢܝܬܝܘܗܝ ܠܘܬܗ. ܘܟܠ ܐܝܟܐ ܬܘܒ ܕܡܫܬܟܚ ܕܗܒܐ ܐܘ ܣܐܡܐ ܠܗ ܢܐܬܐ. ܘܗܟܢܐ ܐܬܟܢܫ ܗ̣ܘܐ ܕܗܒܐ ܣܓܝܐܐ. ܐܝܟܢܐ ܕܡܬܐܡܪܐ܆ ܕܥܒ̣ܪ ܠܡܐܐ ܐܘ ܡܐܬܝܢ ܩܢܛܝܢܪ̈ܐ. ܘܐܬܟܢܫ ܩܕܡܘܗܝ܀ ܚܢܢ ܕܝܢ ܡܛܠ ܕܚܬܝܬܐܝܬ ܒܗܠܝܢ ܠܐ ܡܦܣܝܢܢ܆ ܠܐ ܒ̇ܥܝܢܢ ܕܢܦܣܘܩ ܕܓܠܘܬܐ. ܐܠܐ ܗܠܝܢ ܠܐ ܡܦܣܝܢܢ ܒܗܝܢ ܚܬܝܬܐܝܬ܆ ܒܫܠܝܐ ܡܚܦܝܢ ܚܢܢ ܠܗܝܢ܀ ܗ̣ܘ ܕܝܢ ܠܡ ܡ̇ܠܟܐ܆ ܟܕ ܕܗܒܐ ܗ̇ܘ ܟܠܗ ܚ̣ܙܐ܆ ܩܪܐ ܠܪܘܪ̈ܒܢܐ ܕܡܕܝܢܬܐ ܘܐܡ̣ܪ ܠܗܘܢ. ܢܬܒܥ ܐܠܗܐ ܪܒܐ ܕܫܡܝܐ ܒܐܝܕܝ̈ܟܘܢ܇ ܕܡ̇ܐ ܕܗܠܝܢ ܟܠܗܝܢ ܢܦܫ̈ܬܐ.. ܕܐܒܕ ܡܢܢ ܘܡܢܟܘܢ܇ ܕܚܕܐ ܡܢ ܡܐܐ ܡܢ̈ܘܢ ܕܗܢܐ ܟܠܗ ܕܗܒܐ ܕܟܫܐ ܗܪܟܐ ܗܫܐ܇ ܕܬܬܠܘܢ ܦܘܪܩܢܐ ܕܡܕܝܢܬܟܘܢ ܘܐܪܚܩ ܡܢܗ̣̇ ܠܐ ܒܥ̇ܐ ܗܘܝܬ. ܐܝܟ ܕܐܦ ܫ̇ܠܚܬ ܠܟܘܢ ܒܝܕ ܩܘܡܝܛܐ ܘܠܐ ܚܫܒܬܘܢܢܝ. ܐܝܟܢܐ ܕܟܕ ܗܠܝܢ ܫܡܥ̣ܘ ܗܘܘ ܝܡ̣ܘ ܠܗ܆ ܕܠܐ ܡ̣ܡܬܘܡ ܫܡܥܢܢ ܡܠܬܐ ܗܕܐ: ܘܟܕ ܠܩܘܡܝܛܐ ܩ̣ܪܐ ܐܝܟ ܕܢܟ̇ܣ ܐܢܘܢ܆ ܐܡ̣ܪ ܠܗ. ܠܘ ܒܐܝ̈ܕܝܟ ܗܕܐ ܫܠ̇ܚܬ ܠܗܘܢ܆ ܐܡ̇ܪ ܐܝܢ ܡܪܝ܀ ܐܡ̇ܪ ܘܐܡܪܬ ܠܗܘܢ. ܘܐܡܪ ܡܪܝ ܠܐ ܐܡܪܬ ܠܗܘܢ ܡܛܠ ܕܕܚܠܬ. ܐܝܟܢܐ ܕܟܕ ܒܪܘܓܙܐ ܡܘܬܐ ܓ̣ܙܪ ܥܠܘܗܝ܆ ܐܡܪ ܠܗ. ܕܡܛܠ ܠܡ ܕܥܡܠܬ ܥܠ ܐܦ̈ܝ ܬܪܬܝܗܝܢ ܦܘ̈ܠܝܛܝܣ܆ ܠܐ ܩ̇ܛܠ ܐܢܐ ܠܟ. ܘܦܩ̣ܕ ܗܘܐ ܘܐܬܟܚ̈ܠܝ ܬܪܬܝܗܝܢ ܥܝ̈ܢܘܗܝ܀ ܘܗܟܢܐ ܗܘ̣ ܒܙܗ̇ ܠܡܕܝܢܬܐ ܒܙܬܐ ܕܣܓܝܐܐ ܕܠܐ ܡܬܡ̇ܠܠܐ. ܘܫܒܗ̇ ܘܣܦܩܗ̇ ܡܢ ܟܠܗܘܢ ܥܡܘܪ̈ܝܗ̇. ܘܫܒ̣ܩ ܒܗ̇ ܚܝܠܐ ܡܢ ܕܝܠܗ ܘܗܦ̣ܟ ܠܐܬܪܗ. ܒܕܒܪܬܐ ܣܓܝܐܬܐ ܕܠܐ ܕܠܐ ܣܟܐ. ܣܐܡܐ ܘܕܗܒܐ ܕܒܢ̈ܝ ܡܕܝܢܬܐ܆ ܘܕܥ̈ܕܬܐ ܘܕܫܪܟܐ. ܐܦܩ ܡܢܗ ܣܘܓܐܐ ܕܕܒܪܬܐ ܘܕܫܒܝܬܐ. ܫܒܝܬܗ̇ ܕܝܢ ܘܡܫܬܠܡܢܘܬܗ̇ ܕܒܐܝܕܐ ܕܐܬܘܪ̈ܝܐ܆ ܕܡܢ ܒܢܝܢܗ̇ ܕܡܢ ܐܢܣܛܣ ܡ̇ܠܟܐ ܘܥܕܡܐ ܠܫܒܝܬܗ̇. ܡܬܚ̈ܫܒܢ ܕܗܘ̈ܝܢ ܫ̈ܢܝܐ ܫܒܥܝܢ ܘܬܪܬܝܢ ܝܬܝܪ ܚܣܝܪ܀

ܟܕ ܗܟܝܠ ܗ̣ܘ ܡܠܟܐ ܦܪܣܝܐ ܥܕܟܝܠ ܝܬ̇ܒ ܥܠ ܡܕܝܢܬܐ ܕܪܐ: ܘܚ̣ܙܐ ܕܠܝܬ ܐܢܫ ܕܬܟ̇ܣ ܠܗ܆ ܡܚܕܐ ܫܕܪ ܡܪܙܒܢܐ ܕܫܡܗ ܐܕܪܡܗܢ ܥܠ ܐܦܡܝܐ ܡܕܝܢܬܐ܆ ܥܡ ܚܝܠܐ ܣܓܝܐܐ. ܗ̇ܘ ܕܟܒ̣ܫ

ܐܦ ܗ̣ܘ ܩܣܛܪܣ܆ ܘܥܩܪ ܘܐܘܩܕ ܩܘܪ̈ܝܐ ܪܘܪ̈ܒܬܐ ܘܬܩ̈ܝܦܬܐ. ܘܐܙܠ̣ ܘܡܛ̣ܐ ܠܗ̇ ܠܐܦܡܝܐ. ܘܡܛܠ ܕܟܕ ܟܒܫ ܗ̣ܘܐ ܦܪܣܝܐ ܠܐܢܛܝܘܟܝܐ: ܘܫ̣ܪܐ ܥܠ ܐ̇ܦܡܝܐ ܘܐܠܨܗ̇: ܘܐܫܠܡܬ ܠܗ ܐܦ ܗܝ̣ ܐܦܡܝܐ܆ ܟܕ ܫܩ̣ܠܬ ܡܢܗ ܡܠܬܐ܆ ܘܥܠ ܗ̣ܘܐ ܠܗ̇ ܗ̣ܘ ܡ̇ܠܟܐ܆ ܘܚܙ̣ܐ ܒܗ̇ ܐܝܦܝܩܘܣ. ܘܠܐ ܥܩ̣ܪ ܐܘ ܐܘܩܕ ܒܗ̇ ܡܕܡ. ܘܡܛܠܗܕܐ ܐܝܟ ܡ̇ܢ ܕܬܟܝܠܝܢ ܗܘܘ ܥܠܘܗܝ: ܕܐܦܠܐ ܗ̇ܘ ܕܐܬܐ ܣܥ̇ܪ ܠܗܘܢ ܒܝܫܬܐ܆ ܘܥܠ ܗܕܐ ܬܟܝܠܘܬܐ܆ ܢܦܩ̣ܘܢ ܠܘܬܗ ܪܘܪ̈ܒܢܐ ܕܝܠܗ̇ ܕܡܕܝܢܬ̣ܐ ܘܐܦܝܣܩܦܐ. ܘܐܦܩܘܢ ܠܗ ܐܝܩܪܐ. ܗܘ̣ ܕܝܢ ܒܢܟܠܐ ܐܡ̣ܪ ܠܗܘܢ. ܕܡܛܠ ܠܡ ܕܡܕܝܢܬܐ ܕܝܠܢ ܐܝܬܝܗ̇܆ ܦܬܚܘܢ ܠܝ ܬܪ̈ܥܐ ܕܐܥܘܠ ܘܐܚܙܝܗ̇. ܗ̣ܢܘܢ ܕܝܢ ܟܕ ܬܟܝܠܝܢ ܗܘܘ ܥܠܘܗܝ: ܘܠܐ ܣܒܪܝܢ ܗܘܘ ܕܡܕܡ ܕܒܝܫ̣ ܣܥ̇ܪ܆ ܦܬܚܘܢ ܠܗ ܘܥܠ ܠܗ̇ ܠܡܕܝܢܬܐ. ܘܡܚܕܐ ܠܒ̣ܟ ܐܢܘܢ ܠܬܪ̈ܥܐ܆ ܘܫܪܝ ܠܒ̇ܟ ܘܡܦܟܪ ܠܓܒܪ̈ܐ ܘܠܢܫ̈ܐ ܘܒܐ̇ܙ ܠܡܕܝܢܬܐ. ܘܡܦܩܝܢ ܗܘܘ ܟܠܗ̇ ܒܙܬܐ ܘܟܠܗ̇ ܐܢܫܘܬܐ ܘܣܝܡܝܢ ܠܒܪ ܡܢ ܡܕܝܢܬܐ. ܘܟܕ ܒܙܘܗ̇ ܠܟܠܗ ܐܦܡܝܐ ܡܕܝܢܬܐ: ܗ̇ܝ ܕܡܠܝܐ ܗܘܬ ܥܘܬܪܐ ܡܢ ܙܒ̈ܢܐ ܡܬܝܚ̈ܐ: ܘܟܗܝܢܐ ܗܘܬ ܛܒ ܡܢ ܡܕܝ̈ܢܬܐ ܣܓ̈ܝܐܬܐ: ܘܐܦܩܘ ܠܟܠܗ̇ ܐܢܫܘܬܐ ܕܝܠܗ̇ ܘܠܟܠܗ̇ ܒܙܬܗ̇: ܘܐܦ ܠܐܦܝܣܩܘܦܐ ܥܡܗܘܢ܆ ܗܝܕܝܢ ܐܪܡܝܘ ܢܘܪܐ ܘܐܘܩܕܘܗ̇ ܠܟܠܗ̇ ܡܢ ܣܟܗ̇. ܘܗܟܢܐ ܕܒܪܘܢ ܠܟܠܗ ܫܒܝܬܐ: ܘܠܟܠܗ ܒܙܬܐ ܕܡܢܗ̇ ܘܡܢ ܫܪܟܐ܆ ܘܢܚ̣ܬܘ ܠܘܬ ܡ̇ܠܟܐ܇ ܟܕ ܝܬܒ̇ ܥܠ ܕܪܐ. ܘܐܬܡܢܝܬ ܫܒܝܬܐ ܕܐܚܬ ܡܢܗ̇ ܘܡܢ ܫܪܟܐ ܩܕܡܘܗܝ ܕܡ̇ܠܟܐ܆ ܡܐܬܝܢ ܘܬܫܥܝܢ ܘܬܪܝܢ ܐܠܦ̈ܝܢ. ܘܗܟܢܐ ܐܬܦܠܓܬ܆ ܘܥܒܪܬ ܠܒܝܬ ܦܪ̈ܣܝܐ.. ܡܢ ܒܬܪ ܕܝܢ ܕܟܒ̣ܫ ܗ̣ܘ ܡ̇ܠܟܐ ܠܕܪܐ ܘܒܙܗ̇: ܟܕ ܐܫܟܚ ܘܐܦ ܒܗ ܥܘܬܪܐ ܕܠܐ ܣܟܐ: ܕܡܢ ܫܪܟܐ ܕܡܕܝܢܬܐ ܘܡܢ ܟܠܕܘܟ: ܘܐܝܟ ܕܠܒܝܬ ܡܪܕܐ ܕܠܐ ܡܬܟܒ̣ܫ ܥܪܝܩܝܢ ܗܘܘ ܠܗ̇. ܘܐܦ̣ܩܘ ܟܠܗ̇ ܫܒܝܬܐ ܕܠܐ ܣܟܐ܆ ܘܫܩܠܘ ܘܗܦܟܘ ܠܐܬܪܗ:

ܟܕ ܗܟܝܠ ܡ̇ܠܟܐ ܦܪܣܝܐ ܪܘܐ ܗܘ̣ܐ ܒܫܘܒܗܪܐ: ܘܐܫܬܩܠ ܪܥܝܢܗ ܡܢ ܣܘܓܐܐ ܕܒܙܬܐ ܘܕܫܒܝܬܐ: ܕܐܥܕܝ ܡܢ ܒܝܬ ܪ̈ܗܘܡܝܐ: ܦܩ̣ܕ ܕܢܬܓ̈ܒܝܢ ܡܢ ܫܒܝܬܐ܆ ܬܪܝܢ ܐܠܦ̈ܝܢ ܥܠܝܡ̈ܬܐ ܕܡܫܡ̈ܠܝܢ ܒܩܘܡܬܗܝܢ ܘܒܫܘܦܪ̈ܗܝܢ. ܐܝܠܝܢ ܕܟܕ ܐܝܟ ܦܘܩܕܢܐ

ܐܬܓܒܝ ܘܐܬ̈ܝ ܩܕܡܘܗܝ܆ ܦܩ̣ܕ ܕܒܟܠܡܕܡ ܐܝܟ ܟ̈ܠܠܬܐ ܢܨ̈ܛܒܬܢ. ܒܠܒܘ̈ܫܐ ܡܫܒ̈ܚܐ ܘܝܩܝܪ̈ܝ ܕܡ̈ܝܐ. ܘܒܕܗܒܐ ܘܒܣܐܡܐ. ܘܒܚ̈ܘܡܪܐ ܘܒܡܪ̈ܓܢܝܬܐ. ܘܢܫܬܕܪܢ ܐܝܩܪܐ ܠܒܪ̈ܒܪܝܐ ܕܠܓ̣ܘ ܡܢ ܐܬܪܗ ܕܡܬܩܪܝܢ ܐܒܪ̈ܝܣ̣ܐܝܟ ܕܢܫܬܦܪ ܠܗܘܢ ܘܢܢܝܚ ܐܢܘܢ̣ ܕܢܐܓܘܪ ܐܢܘܢ. ܗܠܝܢ ܡ̇ܢ ܕܟܕ ܐܫܬܡܠܝ ܐܝܟ ܕܦܩ̣ܕ. ܘܐܨ̈ܛܒܬܝܢ ܪܘܪܒܐܝܬ܆ ܣܡ ܥܡܗܝܢ ܚܝܠܐ ܥܡ ܡܪ̈ܙܒܢܐ ܬܪܝܢ. ܘܦܩܕ ܠܗܝܢ ܕܦ̈ܢܐ ܪ̈ܝܫܝܬܐ ܘܡܫܪ̈ܬܚܬܐ ܘܫܕܪ ܐܢܝ̈ܢ. ܟܕ ܦܩ̣ܕ ܕܠܐ ܢܬܪ̈ܕܦܢ ܒܐܘܪܚܐ. ܐܠܐ ܒܢܝܚܐ ܢܗ̈ܘܝܢ ܪ̈ܕܝܢ ܘܡܬܬܢܝܚ̈ܢ. ܕܠܐ ܠܡ ܢܒܨܪ̈ܢ ܘܢܣܬܢܝ̈ܢ.. ܗ̈ܢܝܢ ܕܝܢ ܗܠܝܢ ܥ̈ܠܝܡܬܐ: ܥ̈ܠܡܬܐ ܠܘ ܒܠܚܘܕ ܒܦܘܪܫܢܐ ܕܡܢ ܐܒܗܝܗ̈ܝܢ ܘܐܚܝܗ̈ܝܢ ܘܟܠܗܘܢ ܓܢܣܝ̈ܗܘܢ ܡܫܬܢܩ̈ܢ ܗܘ̈ܝ܆ ܐܠܐ ܘܐܦ ܥܠ ܢܦܫ̈ܬܗܝܢ ܕܐܒ̈ܕܢ ܡܢ ܟܪܣܛܝܢܘܬܐ܆ ܘܐܦ ܥܠ ܦܓܪ̈ܝܗܝܢ ܕܡܫܬܠܡܝܢ ܒܐܝ̈ܕܝ ܒܥܪܝܪܝܘܬܐ ܕܝܠܗܘܢ ܕܒܥܠܕܒ̈ܒܐ ܒܪ̈ܒܪܝܐ. ܘܟܕ ܗܠܝܢ ܒܒܟܬܐ ܘܒܐܘ̈ܠܝܬܐ ܬܘܒ ܡ̈ܪܝܪܬܐ: ܒܠܫܢܗܝܢ ܐܟܚܕܐ ܠܚܕ̈ܕܐ ܐܝܟ ܐܚ̈ܘܬܐ ܡܟܝܠ ܡܡ̈ܠܠܢ ܗܘ̈ܝ܆ ܟܠܗܝܢ ܐܟܚܕܐ ܡܘܬܐ ܠܢܦܫܬ̈ܗܝܢ ܚܠܦ ܚ̈ܝܐ ܫ̈ܐܠܢ ܗܘ̈ܝ. ܘܗܠܝܢ ܟܠܗܝܢ ܡ̇ܢܗܝܢ ܠܘܬ ܫܒ̈ܝܐ ܐܚܪ̈ܢܐ ܣܪ̈ܘܝܝܐ܇ ܕܐܝܬܝܗܘܢ ܗܘܘ ܒܢܝ̈ ܐܬܪܗܝܢ ܓܒܪ̈ܐ ܥܡ ܡܪ̈ܙܒܢܐ܆ ܘܗܠܝܢ ܕܫܪܟܐ ܕܣܝܡܝܢ ܗܘܘ ܕܢܘܒܠܘܢ ܐܢܝ̈ܢ ܘܢܫܡܫܘܢ ܐܢܝ̈ܢ ܡܬܝܕ̈ܥܢ ܗ̈ܘܝ ܘܡܬܓ̈ܠܝܢ ܡܢܗܝܢ܆ ܐܝܟ ܕܠܒܢܝ̈ ܐܬܪܗܝܢ ܪܐܙܢܐܝܬ. ܐܝܟܢܐ ܕܐܦ ܠܚܪܬܐ ܠܟܠܢܫ ܐܬܓ̈ܠܝܢ܇ ܘܐܬܝܕܥ ܡܢܗܘܢ ܕܗ̇ܢܘܢ ܒܢܝ̈ ܐܬܪܗܝܢ ܘܠܫܢܗܝܢ.. ܐܝܟܢܐ ܠܡ ܕܟܕ ܥܠ ܚܡܫܐ ܡܣܝܘ̈ܢܝܢ: ܡܢ ܥܡ̈ܡܐ ܗܠܝܢ ܒܪ̈ܒܪܝܐ ܕܡܫܬܕܪ̈ܢ ܗܘ̈ܝ ܠܗܘܢ ܡܢܥ̈ܝܢ܆ ܘܝܠܦܝܢ ܕܡܛܝܢ ܠܗܝܢ ܠܐܬܪ̈ܘܬܐ ܗܠܝܢ ܕܡܫܬܕܪ̈ܢ ܗܘ̈ܝ ܠܗܘܢ܆ ܓܕܫ ܘܦܓ̣ܥ ܒܗܝܢ ܢܗܪܐ ܚܕ ܪܒܐ ܘܬܩܝܦܐ ܕܛܒ܆ ܕܣܓܝ ܠܡ ܥܣܩ ܗ̣ܘܐ ܠܡܥܒܪܗ. ܐܝܟܢܐ ܕܟܕ ܐܝܟ ܕܦܩܝܕܝܢ ܗܘܘ ܕܢܢܝܚܘܢ ܐܢܘܢ ܗܠܝܢ ܕܡܕܒܪܝܢ ܗܘܘ ܠܗܝܢ ܘܠܐ ܢܪܕܦܘܢ ܐܢܝ̈ܢ܆ ܥܠ ܢܗܪܐ ܗ̇ܘ ܚܕ ܝܘܡܐ ܫܪܘ.. ܗܢ̈ܝܢ ܕܝܢ ܟܠܗܝܢ ܥܡ ܚ̈ܕܕܐ ܐܬܡܠܟܝܢ. ܘܒܝܢܬ ܟܠܗܝܢ ܗܘܬ ܗܕܐ ܚܕܐ ܡܚܫܒܬܐ ܚܝܠܬܢܝܬܐ ܘܓܢܒܪܬܐ܇ ܕܥܠ ܡܘܬܐ ܢܩ̈ܠܝܢ. ܘܪܗܛܝܢ ܟܠܗܝܢ ܠܘܬ ܚ̈ܕܕܐ܆ ܘܐܬܡܠܟܝܢ ܒܝܢܬܗܝܢ ܘܐܡܪ̈ܝܢ ܠܚ̈ܕܕܐ. ܕܢܬܒܝܢ ܟܠܢ ܐܟܚܕܐ. ܕܡܐ ܕܛܘܫܢܢ ܢܦܫ̈ܬܢ ܟܠܢ ܒܚܢܦܘܬܐ: ܘܒܡܐܟ̈ܠܬܐ ܛܡ̈ܐܬܐ ܕܒܥܝܪܐ: ܘܕܡܝܬܐ ܘܕܚܢܝܩܐ ܥܡ ܒܪ̈ܒܪܝܐ: ܘܐܘܒܕܢܢ ܟܪܣܛܝܢܘܬܢ܆ ܒܚܪܬܐ ܟܠܢ ܠܡܘܬܐ ܡܫܬܠܡܝܢܢ. ܘܒܚܪܬܐ ܠܕܝܢ̣ܐ ܕܬܫܢܝܩܐ ܐܬܝܢܢ. ܘܡܟܝܠ ܟܠܢ ܐܚ̈ܘܬܐ ܚܢܢ. ܘܟܪ̈ܣܛܝܢܝܬܐ ܘܒ̈ܢܬ ܟܪ̈ܣܛܝܢܐ. ܠܐ ܢܬܦܠܓ ܥܠ ܚܕ̈ܕܐ. ܐܠܐ ܡܟܝܠ ܚܕ ܨܒܝܢܐ ܘܚܕܐ ܢܦܫܐ ܘܚܕܐ ܬܪܥܝܬܐ. ܘܚܕ ܪܥܝܢܐ ܢܗܘܐ ܠܟܠܢ. ܘܩܕܡ ܕܡܢ ܒܪ̈ܒܪܝܐ ܦܓܪ̈ܝܢ ܢܬܛܘܫܘܢ ܘܢܦ̈ܫܬܢ ܢܬܛܢܦܢ: ܘܒܚܪܬܐ ܡܘܬܐ ܢܕܪܟܢ. ܡܟܝܠ ܟܕ ܦܓܪ̈ܝܢ ܕܟܝܢ ܘܢܦܫ̈ܬܢ ܡܢ ܛܡܘܬܐ ܢܛܝܪ̈ܢ܇ ܚܠܦ ܫܡܗ ܘܥܠ ܫܡܗ ܕܡܪܢܝܫܘܥܡܫܝܚܐ܆ ܚܢ̣ܢ ܕܟܝ̣ܐܝܬ ܢܩܪܒ ܠܗ ܢܦܫ̈ܬܢ ܘܦܓܪ̈ܝܢ. ܟܕ ܡܢ ܗܫܐ ܢܦܫ̈ܬܢ ܠܡܘܬܐ ܢܫ̇ܠܡ܇ ܡܛܠ ܗ̇ܝ ܕܡܢ ܒܥܠܕܒ̈ܒܐ ܢܫܬܘܙܒ܇ ܘܚ̈ܝܐ ܕܠܥܠܡ ܥܠܡܝܢ ܢܚܐ܇ܚܠܦ ܛܘܪ̈ܦܐ ܕܢܦܫ̈ܬܢ ܕܒܚܕܐ ܫܥܬܐ ܕܡܛܠ ܟܪܣܛܝܢܘܬܐ܇ ܘܢܛܝܪܘܬ ܕܟܝܘܬܐ ܕܢܦܫ̈ܬܢ ܘܕܦܓܪ̈ܝܢ.. ܘܗܟܢܐ ܟܠܗܝܢ ܚܕܐ ܡܠܬܐ ܘܚܕ ܪܐܙܐ ܘܫܘܘܕܝܐ ܩܛܪܝܢ ܒܝܢܬܗܝܢ܆ ܘܝܡܝܢ ܠܚ̈ܕܕܐ. ܘܐܟܚܕܐ ܟܠܗܝܢ ܫܕ̈ܝܢ ܢܦܫܬܗܝܢ ܒܢܗܪܐ ܗ̇ܘ. ܘܐܟܚܕܐ ܐܬܚܢ̈ܩܝܢ ܟܠܗܝܢ. ܘܠܐ ܢܦܠܝܢ ܒܐܝ̈ܕܝ ܒܪ̈ܒܪܝܐ. ܐܝܟܢܐ ܕܠܟܠܗܝܢ ܫܘܝܐܝܬ ܡܚܫܒܬܐ ܗܕܐ ܫܦܪܬ ܘܐܬܓܒܝܬ. ܘܟܕ ܗܠܝܢ ܕܢܛܪܝܢ ܗܘܘ ܠܗܝܢ ܚ̇ܝܕܝܢ ܒܗܝܢ܆ ܚܫܠܝܢ ܪܐܙܐ ܒܟܣܝܐ. ܟܕ ܡܟܝܠ ܢܛܪ̈ܢ ܗܘ̈ܝ ܥܕܢܐ. ܟܕ ܗܠܝܢ ܡ̇ܢ ܠܘܬܗܝܢ ܐܡܝܢܝܢ ܗܘܘ. ܐܡܪܝܢ ܠܗܘܢ. ܕܚܢܢ ܠܡ ܐܝܢ ܦܩܕܝܬܘܢ܆ ܒܥ̇ܝܢܢ ܕܢܣ̣ܚܐ ܒܣܦܪ̈ܘܗܝ ܕܢܗܪܐ ܗܢܐ. ܗܠܝܢ ܕܝܢܨ̇ܒܝܢ ܗܘܘ ܕܐܝܟ ܕܦܩܝܕܝܢ ܕܦܩܕܝܢ ܗܘܘ ܡ̇ܢ ܕܢܢܝܚܘܢܐܢ̈ܝܢ. ܐܦܣܘܢ ܠܗܘܢ ܕܢܣܚܝ̈ܢ. ܗܢܝ̈ܢ ܕܝܢ ܐܡܪ̈ܝܢ ܠܗܘܢ.ܕܡܬܟܚܕܝܢܢܠܡ ܕܟܕ ܩܝܡܝܬܘܢ ܠܘܬܢ ܘܚ̇ܝܪܝܢ ܐܢܬܘܢ ܒܢ ܕܢܣܚܐ. ܐܠܐ ܦܪܘܩܘܢ ܠܟܘܢ ܩܠܝܠ ܡܢ ܠܘܬܢܘܗܟܢܐ ܣܚܝܢܢ.. ܘܗܟܢܐ ܠܡ ܫܒܩܘܢ ܐܢܝ̈ܢ ܘܐܪܚܩܘܢ ܡܢܗܝܢ ܘܟܕ ܠܚ̈ܕܕܐ ܟܠܗܝܢ ܚܝ̈ܠܝܢ ܘܠܒܒ̈ܝܢ: ܘܟܠܗܝܢ ܚܬܡܝܢ ܢܦܫܗܝܢ ܒܫܡܗ ܕܡܪܢܝܫܘܥܡܫܝܚܐ܆ ܘܫܕܝܢ ܟܠܗܝܢ ܐܝܟ ܚܕܐ ܢܦܫܗܝܢ ܒܚܐܦܐ ܚܛܝܦܐ ܒܢܗܪܐ ܗܘ̇ ܘܐܬܚ̇ܢܩܝܢ. ܘܟܕ ܢܛܘܪܝܗܝܢ ܚܪܘܢ ܒܢܗܪܐ܆ ܚܙܘ ܕܛܝܦܢ ܡܢܗܝܢ ܘܐܙ̈ܠܢ ܒܢܗܪܐ ܐܝܟ ܩܘܦܝܐ. ܘܡܢܗܝܢ ܛܒܥ̈ܝܢ. ܘܟܕ ܪܗܛܘ ܠܕܘܟܬܐ ܗܝ̇ ܕܫܐܠܘ ܡܢܗܘܢ ܕܢܣܚ̈ܝܢ ܒܗ̇܆ ܚܙܘ ܕܠܝܬ ܐܦܠܐ ܚܕܐ ܡܢܗܝܢ ܒ̈ܚܝܐ. ܘܐܝܠܠܘ ܟܠܗܘܢ ܡܪܝܪܐܝܬ܆ ܟܕ ܪܗܛܝܢ ܠܟܐ ܘܠܟܐ. ܕܢܨܠܘܢ ܚܕܐ ܡܢܗܝܢ ܘܠܐ ܐܬܡܨܝܘ. ܘܕܐܝܟܢܐ ܢܥܪܩܘܢ ܠܐ ܐܘܦܝܘ. ܗܠܝܢ ܕܝܢ ܡܚ̈ܝܠܬܐ ܕܗܘ̈ܝ ܚܝ̈ܠܬܢܝܬܐ ܒܡܫܝܚܐ ܚܠܦ ܟܪܣܛܝܢܘܬܗܝܢ܆ ܢܦܫ̈ܬܗܝܢ ܗܟܢܐ ܐܫܠܡ ܒܐܝ̈ܕܝ ܐܠܗܐ. ܘܐܫܬܘܙܒܝ ܡܢ ܛܡܐܘܬܐ ܘܒܥܪܝܪܝܘܬܐ ܕܒܪ̈ܒܪܝܐ ܒܪܘܚܐ ܘܒܦܓܪܐ..