Severianus Gabalensis: In theophaniam (7-8)

Но речеⷮ кто негли ѡⷮ преⷣстоꙗ҆́щиⷯ: что ꙋбо ко мнѣ людиноу, а҆́ще прⷪ҇рчьствомъ и҆ апⷭ҇льствоⷨ і҆ архїереиствомъ ѡ҆дѣꙗ҆сѧ; что ко мнѣ, иⷤ в людьскомъ чиноу причтен҆н҆омоу; Паⷱ҇ же оу҆бѡ за всѧ чл҃ки бысть чл҃къ чл҃колюбивыи. А҆́ще ли хощеши Того и҆ людина чиⷩ҇ прїемлюща видѣти Тебе ради, посꙋди в себѣ и҆ смотри хотѧще҆сѧ рещи. И҆спо вѣдательное крⷭ҇тѧи не въ странѣ ли е҆сть сщ҃енника, крщ҃ае҆мыи не в чиноу ли людина е҆сть; Зриꙵ оу҆бо І҆ѡ҆а́н҆н҆а, крщ҃аю҆ща в чинꙋ сщ҃ен҆н҆ика, и҆ крщ҃ае҆ма Ха҃ в чинꙋ людина. Днⷭ҇ь бо, бра́тїе, днесь е҆́же водами и҆сполни смотренїе, не ѡⷮ водъ ѡ҆сщ҃ае҆мъ, но водамъ ѡ҆сщ҃енїе подаѧ. И҆ І҆ѡⷩ҇а и҆сполнѧше ѡ҆́бразъ сщ҃ен҆н҆ическїи, пристꙋпае҆тъ і҆ И҆збавитель вселеныа̀ крщ҃аю҆щемоу вꙵ водѣ І҆ѡ҆а́н҆н҆ꙋ, кр҃щаѧиⷯ в Дс҃ѣ, Цр҃ь къ пртⷣчи, Бг҃ъ къ прⷪ҇ркꙋ. Не не оу҆̀разꙋмѣ достои҆ньства смотренїа, не смѧте е҆го ѡ҆́бразъ тѣлесныи, не прельсти е҆го видимаго зрака невидимагѧ си́ла, ю҆́же и҆ невѣдꙋщимъ проповѣдашꙵ. Свѣтилникъ бо бѣ ст҃ыи, ди́вныи свѣтилникъ, ѡ҆ немьⷤ:

оу҆готоваⷯ свѣтилникъ Хоу҃ Мое҆мꙋ

, прⷪ҇ркоⷨ речесѧ. Свѣтилникъⷤ І҆ѡаⷩ҇ преⷣнарицашесѧ, не понеⷤ Бж҃їю Словеси, свѣтꙋ и҆́стин҆н҆омоу, потреба бѣ е҆́же ѡⷮ свѣтилника приложенїа: сл҃нце бо бѣ праведноѐ, но понеⷤ и҆же въ плоти крые҆маⷢ҇ Га҃ познаваше, ꙗ҆ко в нощи, і҆оу҆деи҆скаго ꙋстрое҆́нїа, свѣⷮ ѡ҆блистаѧ бжⷭ҇твенаго Словеси. Нарицае҆тсѧ свѣтиⷧниⷦ҇ в лѣпотоу.

И҆ зриꙵте дивное, братїе. Е҆гда приде на плоⷮское смотренїе, иⷤ к намъ пришедыи Влⷣка, чл҃кь чл҃колюбїа раⷣ ꙵ бывъ, и҆ стран҆н҆ое чюдо: Бг҃ъ въ чл҃цѣⷯ, в рабеⷯ Влⷣка, Творець со творенми, ѡ҆сщ҃ѧѝ съ ѡ҆сщ҃ае҆мыми, тогда І҆ѡаⷩ҇ проповѣдꙋеⷮ достои҆ньство, и҆ бѣ видѣти преславно і҆ оу҆жасно чюⷣ: свѣтилника, прїемлюща сл҃нце праведноѐ, и҆бо всѣⷯ и҆збавителѧ Га҃ и҆збавленїа требꙋѧ и҆ чл҃къ крⷭ҇ти, не дерзостїю преⷣвосхитивсѧ, но повелѣнїю поработи꙽҇сѧ. Тогда бо, тогда стекошасѧ дваꙵ пророческа гласа:

глаⷭ҇ въпїю́щаго в пꙋстыни

, и҆

глаⷭ҇ на водаⷯ

. Проповѣдникъ и҆́стин҆н҆ыи въпїетъ, и҆

Бг҃ъ славы възгремѣ

. И҆ бѣ тамо поклон҆н҆аѧ Трои҆ца, свою славꙋ ѡ҆блистаю҆щи: Ѡ҆ц҃ь свыше Сн҃а проповѣдꙋѧ, Сн҃ъ низꙋ и҆сполнѧа̀ бжⷭ҇твеное смотренїе, Дх҃ъ Ст҃ыи запечатлѣꙗ̀ бжⷭ҇твенное таи҆ньство. И҆ глⷭ҇а толикъ бываеⷮ свѣдѣтельствꙋю҆щꙋ свыше Ѡⷮц҃ꙋ Свое҆мᲂу Е҆динорѡⷣномᲂу, ꙗ҆коже раздратисѧ нб҃семъ:

въсходѧщꙋ бѡ І҆с҃ꙋ ѡⷮ воды, разраⷣ

443

шасѧ нб҃са

: не бо стерпѣша гласа толикаго свѣдѣтеⷧства, ᲂу҆жасшесѧ бжⷭ҇твенаго смотренїа.