Itinerarium Hierosolymitanum‏ (594-598)

Inde quasi
ad lapidem missum est capta, ubi corpus eius positum fuit [*] [*]

[*] et tertia die resurrexit; ibidem modo iusso Constantini imperatoris
basilica facta est, id est dominicum, mirae pulchritudinis,
habens ad latus excepturia, unde aqua leuatur, et
balneum a tergo, ubi infantes lauantur.

Item ab Hierusalem euntibus ad porta, quae est contra
oriente, ut ascendatur in monte Oliueti, uallis quae dicitur
Iosafath;

ad partem sinistram, ubi sunt uineae, est et petra
ubi ludas Scarioth Christum tradidit, a parte uero dextra est
arbor palmae, de qua infantes ramos tulerunt et ueniente
Christo substrauerunt. Inde non longe quasi ad lapidem missum
sunt monumenta duo monubiles mirae pulchritudinis
facta: in unum positus est Isaias propheta, qui est uere monolitus,
et in alio Ezechias, rex Iudaeorum.

Inde ascendis in montem Oliueti, ubi dominus ante passione
apostolos docuit. Ibi facta est basilica iusso Constantini. Inde
non longe est monticulus. ubi dominus ascendit orare et apparuit
illic Moyses et Helias, quando Petrum et Iohannem
secum duxit.

Inde ad orientem passus mille quingentos est
uilla, quae appellatur Bethania. Est ibi cripta, ubi Lazarus
positus fuit, quem dominus suscitauit.

Item ab Hierusalem in Hiericho milia XVIII.

Descendentibus montem in parte dextra retro monumentum [*]

Antea si qua mulier ex ipsa aqua bibebat, non faciebat
natos. Ad latum est uas fictile. Helyseo misit in in eo sales
et uenit et stetit super fontem et dixit: Haec dicit dominus:
sanaui aquas has; ex eo si qua mulier inde biberit, filios
faciet.

Supra eandem uero fontem est domus Rachab fornicariae,
ad quam exploratores introierunt et occultauit eos,
quando Hiericho euersa est, et sola euasit. Ibi fuit ciuitas
Hiericho, cuius muros girauerunt cum arca testamenti filii
Israel et ceciderunt muri. Ex eo non paret nisi locus, ubi
fuit arca testamenti et lapides duodecim quos filii Israel de
Iordane leuauerunt. Ibidem Iesus filius Naue circumcidit filios
Israel et circumcisiones eorum sepeliuit.

Item ab Hiericho ad mare mortuo milia nouem. Est aqua
ipsius ualde amarissima, ubi in totum nullius generis piscis
est nec aliqua nauis, et si qui hominum miserit se, ut natet,
ipsa aqua eum uersat.

Inde ad Iordane, ubi dominus a Iohanne
baptizatus est milia quinque. Ibi est locus super flumen,
monticulus in illa ripa, ubi raptus est Helias in caelo. [*] [*]

[*] Item ab Hierusalem euntibus Bethleem milia quattuor super
strata in parte dextra est monumentum, ubi Rachel posita
est, uxor Iacob. Inde milia duo a parte sinistra est Bethleem.
Ubi natus est dominus Iesus Christus, ibi basilica facta est
iusso Constantini; inde non longe est monumentum Ezechihel.

Asaph, Iob, et Iesse, Dauid, Salomon, et habet in ipsa cripta
ad latus deorsum descendentibus hebraeis litteris scriptum
nomina supra scripta.