Itinerarium Hierosolymitanum‏ (590-593)

Est ibi et creta ubi Salomon
daemones torquebat. Ibi est angulus turris excelsissimae, ubi
dominus ascendit, et dixit ei his, qui temptabat eum ....
Et ait ei dominus: Non temptabis dominum deum
tuum, sed illi soli seruies. Ibi est et lapis angularis
magnus, de quo dictum est: Lapidem, quem reprobauerunt
aedificantes, hic factus est ad capud anguli.
Et sub pinna turris ipsius sunt cubicula plurima, ubi
Salomon palatium habebat. Ibi etiam constat cubiculus, in
quo sedit et sapientiam descripsit; ipse uero cubiculus uno
lapide est tectus.

Sunt ibi et excepturia magna aquae subterraneae
et piscinae magno opere aedificatae. Et in aede ipsa, [*] [*]

[*] ubi templum fuit, quem Salomon aedificauit, in marmore ante
aram sanguinem Zachariae ibi dicas hodie fusum, etiam parent
uestigia clauorum militum, qui eum occiderunt, per totam
aream, ut putes in cera fixum esse. Sunt ibi et statuae duae
Adriani, est et non longe de statuas lapis pertusus, ad quem
ueniunt Iudaei singulis annis et unguent eum et lamentant
se cum gemitu et uestimenta sua scindunt et sic recedunt.
Est ibi et domus Ezechiae regis Iudae.

Item exeuntibus Hierusalem, ut ascendas Sion, in parte
sinistra et deorsum in ualle iuxta murum est piscina, quae
dicitur Silua; habet quadriporticum; et alia piscina grandis
foras. Haec fons sex diebus atque noctibus currit, septima
uero die est sabbatum; in totum nec nocte nec die currit.

In eadem ascenditur Sion et paret, ubi fuit domus Caifae
sacerdotis, et columna adhuc ibi est, in qua Christum flagellis
ceciderunt. Intus autem intra murum Sion paret locus, ubi
palatium habuit Dauid. Et septem synagogae, quae illic fuerunt,
una tantum remansit, reliquae autem arantur et seminantur,
sicut Isaias propheta dixit.

Inde ut eas foris murum de Sion, euntibus ad porta Neapolitana
ad partem dextram deorsum in ualle sunt parietes,
ubi domus fuit siue praetorium Ponti Pilati; ibi dominus
auditus est, antequam pateretur; a sinistra autem parte est
monticulus Golgotha, ubi dominus crucifixus est.