De Situ Terrae Sanctae (7-8)

In ciuitate Hierusalem ad sepulcrum Domini ibi est Caluariae
locus; ibi Abraham obtulit filium suum holocaustum, et quia
mons petreus est, in ipso monte, hoc est ad pedem montis
ipsius, fecit Abraham altario; super altare eminet mons, ad [*]

quem montem per grados scalatur; ibi Dominus crucifixus
est. De sepulcro Domni usque ad Caluariae locum sunt passus
numero XV; sub uno tecto est. De Caluariae locum usque
in Golgotha passus numero XV, ubi crux Domni inuenta est.
De Golgotha usque in sancta Sion passi numero CC, quae est
mater omnium ecclesiarum; quam Sion domnus noster Christus
cum apostolis fundauit. Ipsa fuit domus sancti Marci euangelistae.
De sancta Sion ad domum Caiphae, quae est modo
ecclesia sancti Petri, sunt plus minus passi numero L. De
domo Caiphae ad praetorium Pilati plus minus passi numero C;
ibi est ecclesia sanctae Sophiae; iuxta se missus est sanctus
Hieremias in lacum. Columna, quae fuit in domo Caiphae, ad
quam domnus Christus flagellatus est, modo in sancta Sion
iusso Domni ipsa columna secuta est, et quomodo eam, dum
flagellaretur, amplexauit, sicut in cera sic brachia eius, manus
uel digiti in eam haeserunt et hodie paret, sed et facies
omnis, mentus, nasus uel oculi eius sicut in caera designauit.

Sanctus Stephanus foras porta Galilaeae lapidatus est; ibi
et ecclesia eius est, quam fabricauit domna Eudocia uxor [*]

Theodosii imperatoris. Piscina Siloe a lacu, ubi missus est
Hieremias propheta, habet passus numero C, quae piscina intra
murum est. De domo Pilati usque ad piscinam probaticam
passus plus minus numero C. Ibi domnus Christus paralyticum
curauit, cuius lectus adhuc ibi est. Iuxta piscinam probaticam
ibi est ecclesia domnae Mariae.