De Situ Terrae Sanctae (26-30)

In prouincia Asia ciuitas Epheso, ubi sunt septem fratres
dormientes et catulus Viricanus ad pedes eorum; nomina
eorum id est: Achellidis, Diomedis, Eugenius, Stephanus,
Probatus, Sabbatius et Quiriacus, quorum mater Caritina
dicitur graece, latine Felicitas. Ibi est sanctus Timotheus,
discipulus domni Pauli.

Iuxta montem Syna in Fara ciuitate, ibi sanctus Moyses
cum Amalech pugnauit. De Hierusalem in Elusath mansiones
III, de Elusath in Aila mansiones VII, quam ille Alexander
Magnus Macedo fabricauit. De Aila usque in monte Syna
mansiones VIII, si compendiaria uolueris ambulare per heremum,
sin autem per Aegyptum, mansiones XXV.

Urbicius dicebatur praepositus imperii, qui ad septem imperatores
praepositus fuit et coronas ipsis imperatoribus in
capite ponebat et ipse eas de eorum capite deponebat et ipse
eos castigabat. Est locus tertio miliario de Hierusalem ciuitate.
Dum domna Maria mater Domni iret in Bethleem, descendit
de asina et sedit super petram et benedixit eam. Ipse uero
praepositus Urbicius ipsum lapidem incidit et fecit eum quadrum
in modum altaris uolens eum Constantinopolim dirigere,
et dum ad portam sancti Stephani ueniret, iam amplius eum
mouere non potuit; quem lapidem unus iugus bonum ducebat,
et dum uiderent, quia nullatenus potuerunt eum in antea [*]

Fabricauit Anastasius in Mesopotamia prouincia ciuitatem,
quae ciuitas Dara dicitur, tenet in longitudinem milia III
propter Persos, quando in prouincia imperatoris ad praedandum
ueniebant, ubi fossato figebant, quia aquae nullatenus inueniuntur
nisi ibi; in qua ciuitate fluuius exit et ad capud
ciuitatis mergit sub terra, quia ipse fluuius omnis muro
cinctus est.

Ciuitas Melitine in Persa Armenia est, ipsa est metropolis.

Alia ciuitas Arauisso, alia Cocusso, alia Germanicia. In Persida
ubi iacet corpus sancti Danihelis, Susa dicitur, XXX
milia de Babylonia; ibi sunt et tres pueri; in qua ciuitate
habitatio hominum non est propter serpentes et ippocentauros.
Hoc Eudoxius diaconus dixit, qui de ipsa prouincia est.