De Gubernatione Dei (3.1-3.4)

I. Bene habet: iacta sunt fundamenta operis pia molitione
coepti et diuini officii amore suscepti: et ideo non sunt solubili
luto posita nec temporali lapide constructa sed sacrarum
expensarum confectione ualida et diuini magisterii arte firmata:
quae, ut ipse in euangelio deus dicit, nec uentis possint
furentibus concuti nec adluuione fluminum subrui nec pluuiarum
infusione dissolui. cum enim opus hoc manus quodammodo
diuinorum uoluminum instruxerit et caelestium scripturarum
compago solidarit, necesse est tam firma haec per dominum
Iesum Christum esse quae facta sunt, quam firma illa sunt
quae fecerunt. aedificium itaque hoc naturam status sui de
stirpe sumit et labefactari saluis auctoribus suis non potest.
sicut enim in terrenis aedificiis deicere parietes nullus potest,
nisi lapides et caementa deiecerit, sic aedificium quod construximus
dissoluere nullus ualet, nisi id, unde structum est
et consummatum, ante dissoluerit: quod quia labefactari utique
nequaquam potest, recte etiam a nobis incolumitas aedificii
praesumitur, cuius status subsidiis immortalibus continetur.

quaeritur itaque, cum haec ita sint, si totum quod in hoc
mundo est cura et gubernaculo et iudicio dei agitur, cur [*] [*]

si scire uis quid tenendum sit, habes litteras
sacras: perfecta ratio est hoc tenere quod legeris. qua causa
autem deus haec de quibus loquimur ita faciat, nolo a me
requiras. homo sum, non intellego secreta dei, inuestigare non
audeo et ideo etiam adtemptare formido, quia et hoc ipsum
genus quasi sacrilegae temeritatis est, si plus scire cupias
quam sinaris. sufficiat tibi quod deus a se agi ac dispensari
cuncta testatur: quid me interrogas, quare alter maior sit
alter minor, alter miser alter beatus, alter fortis alter infirmus?
qua causa quidem haec deus faciat, non intellego,
sed ad plenissimam rationem abunde sufficit, quod a deo agi
ista demonstro. sicut enim plus est deus quam omnis humana
ratio, sic plua. mihi debet esse quam ratio, quod a deo agi
cuncta cognosco. nihil ergo in hac re opus est nouum aliquid
audire: satis sit pro uniuersis rationibus auctor deus. nec licet,
ut de his quae diuino aguntur arbitrio aliud dicas iustum
aliud iniustum, quia quicquid a deo agi uides atque conuinceris,
necesse est plus quam iustum esse fatearis.

haec ergo
de gubernaculo dei atque iudicio expeditissime ac certissime
dici possunt. neque enim necesse est, ut argumentis a me
probetur, quod hoc ipso, quia a deo dicitur, comprobatur.
itaque, cum legimus dictum a deo, quia aspiciat iugiter omnem
terram, hoc ipso probamus quod aspicit, quia aspicere se
dicit: . cum. legimus quod regat cuncta quae fecit, hoc ipso [*]