S. Optati Milevitani libri VII (1.4)

Omnes quidem per singula loca maledicis uocibus perstrepunt,
[quibus ad aliqua de occasione respondeam]; sed
unum quidem uix inuenimus, cum quo per litteras uel hoc
modo loquamur, Parmenianum scilicet fratrem nostrum. si
tamen se a nobis uel hoc nomine nuncupari permittit. et quia [*] [*]

collegium episcopale nolunt nobiscum habere commune. non
sint collegae, si nolunt; tamen, ut supra diximus, fratres
sunt. frater meus igitur Parmenianus, ne uentose ac nude ut
ceteri loqueretur, quicquid sentire potuit, non solum dixit sed
etiam in scriptura digessit. cuius dictis cum respondere ueritate
cogente conpellimur, erit inter nos absentes quoquomodo
conlatio. eodem modo satisfiet et desideriis aliquorum. nam
a multis saepe desideratum est, ut ad eruendam ueritatem ab
aliquibus defensoribus partium conflictus haberetur. et fieri
potuit. sed quoniam et accessum prohibent et aditus intercludunt
et consessum uitant et conloquium denegant, uel
tecum mihi, frater Parmeniane, sit isto modo conlatio, ut,
quia tractatus tuos, quos in manibus et in ore multorum esse
uoluisti, non aspernatus sum neque contempsi, sed omnia a te
dicta patienter audiui, audias et tu humilitatis nostrae responsa.