Liber de Aleatoribus (10)

iNam quod delicti in Deum nulla fit excusatio nec indulgentia ulla
et nemini uenia datur, in euangelio Dominus dicit, si qui, inquit,
dixerit blasphemiam in filium hominis, dimittetur ei:
qui autem peccauerit in spiritum sanctum, non dimittetur
illi, nec hic nec in futuro saeculo. et iterum per
prophetam: si delinquendo peccauerit uir aduersus uirum,
orabitur pro eo ad Dominum: si autem in Deum peccauerit,
quis orabit pro eo? et beatus apostolus procurator et
uicarius Christi ecclesiasticam curam agens ponit et dicit: uos
estis templum Dei, et in uobis Christus habitat: si
quis templum Dei uiolauerit, perdit illum Deus. [*] [*]

et Dominus iterum in euangelio negat peccatores et exprobrat dicens:
recedite a me omnes qui operamini iniustitiam: nescio
uos. et Iohannes apostolus dicit: omnis qui peccat, non est
de Deo, sed de diabolo est: et scitis quoniam ideo
uenturus est filius Dei, ut perdat filios diaboli.
quis Christianus aleator es, tuus et hereditatis tuae inimicus es. quicumque
es desine ab illa dementia tua miser. quid te in laqueum
mortis cum diabolo ultro praecipitas? quid opes et diuitias tuas sordidissimis
aeris amittis? quid te laqueis saecularibus inuoluis ut cum
saeculo iudiceris? quid inimicum tuum fauoribus laudando delinquis,
cum quo necesse est ut puniaris ?.