De Disciplina et bono pudicitiae (5-6)

Pudicitiae, fratres, antiqua praecepta sunt. quare antiqua dico ?
quia cum ipsis hominibus instituta sunt. nam ideo ex uiro suo et [*]

femina est ut praeter eundem alterum nesciat, et ideo uiro reddita
est mulier ut suppleto quod fuerat ei ereptum nihil requirat alienum.
sic et duo inquit erunt in carne una, ut in unum redeat quod
unum fuerat, ne separatio sine reditu occasionem praestet alterius.
inde et apostolus caput mulieris pronuntiauit uirum, ut coniunctione
tione duorum pudicitiam probaret. nam ut alterius caput membris
aptum non potest esse, ita et alieno capiti membra non sua: caput
enim suis conuenit membris et membra capiti suo, utraque naturali
fibula in concordia mutua cohaerent, ne qua oriente discordia de
diuisione membrorum pactum diuini foederis rumperetur. addit tamen
et dicit: quoniam qui uxorem suam diligit, seipsum diligit.
nemo enim carnem suam odio habet, sed nutrit et fouet eam,
sicut et Christus ecclesiam. caritatis cum pudicitia ex hoc magna
praescriptio, si uxores diligendae sunt a uiris suis, sicut Christus
dilexit ecclesiam, et ita uxores maritos debent diligere, ut ecclesia
diligit Christum.

Hanc sententiam Christus quando uxorem dimitti non nisi ob adulterium
dixit interrogatus tantum honorem pudicitiae dedit. hinc nata
est illa sententia: adulteras non sinetis uiuere. hinc apostolus
dicit: haec est uoluntas Dei ut abstineatis uos a
fornicatione. hinc et illud dicit: membra Christi membris
meretricis non esse iungenda. hinc traditur satanae in [*] [*] [*] [*]

interitum carnis qui proculcato iure pudicitiae uitia carnis exercet. hinc
merito regnum caelorum non tenent adulteri, hinc est quod omne
peccatum extra corpus dicit esse, solum adulterum peccare in suum
corpus: hinc ceterae praeceptorum auctoritates quas nunc recolere
omnes non est necesse apud uos praesertim qui illas nostis frequenter
et facitis, quae licet descripta non sint, queruli tamen de illis non
potestis esse. adulter enim non habet excusationem aut habere potuit,
quia ducere licebat uxorem.