Sententiae Episcoporum (45-49)

Scimus non esse nisi unum baptisma in ecclesia catholica, et
ideo non debemus admittere haereticum, nisi baptizatus aput
nos fuerit, ne se putet extra ecclesiam catholicam baptizatum
esse.

Vna fides, unum baptismum, sed ecclesiae catholicae cui soli
licet baptizare.

Me non mouet, si aliquis ecclesiae fidem et ueritatem non uindicat,
quando apostolus dicat: quid enim si exciderunt
a fide quidam illorum? numquid infidelitas eorum
fidem Dei euacuauit? absit. est enim Deus uerax,
omnis autem homo mendax. si autem Deus uerax est,
quomodo esse aput haereticos baptismi ueritas potest aput quos
Deus non est? [*] [*]

Manifestum est haereticos non posse baptizare et remissam
i eccatorum dare qui potestatem non habent ut aut soluere aut
ligare aliquid in terris possint.

Si maritus peregre proficiscens amico suo commendasset uxorem
suam custodiendam, commendatam sibi ille quanta posset
diligentia seruaret, ne ab aliquo castitas eius et sanctitas adulteraretur.
Christus Dominus et Deus noster ad patrem proficiscens
sponsam suam nobis conmendauit. utrumne eam incorruptam
et inuiolatam custodimus an integritatem eius et castitatem
moechis et corruptoribus prodimus? qui enim baptisma ecclesiae
commune cum haereticis facit sponsam Christi adulteris
prodit.