De Nuptiis et Concupiscentia (1.25)

Haec omnino concupiscentia, haec lex peccati
habitans in membris, cui lex iustitiae uetat oboedire dicente
apostolo: non ergo regnet peccatum in uestro mortali
corpore ad oboediendum desideriis eius, neque exhibueritis
membra uestra arma iniquitatis peccato,
haec, inquam, concupiscentia, quae solo sacramento regenerationis
expiatur, profecto peccati uinculum generatione traicit
in posteros, nisi ab illo et ipsi regeneratione soluantur. nam
ipsa quidem concupiscentia iam non est peccatum in regeneratis,
quando illi ad inlicita opera non consentitur, atque
ut ea perpetrent a regina mente membra non dantur, ut si [*] [*]
non fit quod scriptum est: non concupiscas, fiat saltem
quod alibi legitur: post concupiscentias tuas non eas.
sed quia modo quodam loquendi peccatum uocatur, quod et
peccato facta est et peccatum, si uicerit, facit, reatus eius
ualet in generato, quem reatum Christi gratia per remissionem
omnium peccatorum in regenerato, si ad mala opera ei quodam
modo iubenti non oboediat, ualere non sinit. sic autem uocatur
peccatum, quia peccato facta est, cum iam in regeneratis non
sit ipsa peccatum, sicut uocatur lingua locutio, quam facit
lingua, et manus uocatur scriptura, quam facit manus; itemque
sic uocatur peccatum, quia peccatum, si uincit, facit, sicut
uocatur frigus pigrum, non quod a pigris fiat, sed quod
pigros faciat.