Contra Litteras Petiliani (3.61)

Pars quippe epistulae quam scripsit ad suos a capite
usque ad eum locum, ubi dicit: hoc nobis dominus imperat:
cum uos persecuti fuerint homines in ciuitate ista,
fugite in aliam; quodsi et in ea uos persequuntur, fugite
in aliam, primum uenit in manus nostras; huic respondimus.
quae nostra responsio cum etiam in illius uenisset manus,
scripsit hanc contra quam nunc refellimus et eum nostrae non
respondisse monstramus. in illa ergo prima parte scriptorum
eius, quibus primum respondimus, haec sunt testimonia scripturarum,
quae nobis putauit aduersa: arbor bona bonos fructus
facit, et arbor mala malos fructus facit. numquid colligunt
de spinis uuas, et iterum: omnis homo bonus de
thesauro cordis sui profert bona, et omnis homo malus
de thesauro cordis sui profert mala, et iterum: qui baptizatur
a mortuo non ei prodest lauatio eius, his testimoniis
nolens ostendere talem fieri eum qui baptizatur, qualis fuerit
a quo baptizatur. ego contra quemadmodum accipienda essent
haec testimonia et quod eius intentionem nihil adiuuarent ostendi.
cetera uero quae posuit dicta in malos et sceleratos homines non
esse aduersus frumenta dominica, sicut praedicta et promissa [*] [*]