Contra Gaudentium Donatistarum Episcopum (2.1)

Accepi, Gaudenti, responsionem tuam, si tamen responsio
ista dicenda est, quam mihi propterea referre uoluisti, ne,
si tacuisses, diceremus te esse conuictum. sed non hoc est
respondere quod est non tacere. nam si hoc est, respondisti
plane, sed ideo, ut etiam hi, qui de te aliquid possent [*] [*]
sperare, nouerint te non inuenisse, quid respondere deberes, et
tamen respondisse, ne taceres. itaque cum caueres, ne uictus
dicereris, fecisti ut ostendereris. ad quod ostendendum tua
ipsa scripta sufficiunt, si ab intellegentibus legantur et meis
diligenti examine comparentur. ut autem scriptis aliis hoc
doceam, quo etiam ingeniis tardioribus satisfiat, aliquanto
prolixior disputatio necessaria est, quam quidem aggrediar, si
opus fuerit dominusque uoluerit.