Itinerarium. Recensio Altera. (11-15)

Tenuimus theophania iuxta Iordane, et ibi fiunt mirabilia, ubi
baptizatus est Dominus, in ipsa nocte. Est ibi tumulus cancellis
circumdatus, et in loco, ubi redundat aqua in alueum suum,
posita est crux lignea intus in aquam ex utraque parte marmoris.
In uigiliis theophaniae grandes fiunt uigiliae, populus
infinitus, et quarta aut quinta uice gallo canente fiunt uigiliae.
Completis matutinis primo diluculo surgentes procedunt ministeria
sub diuo, et diaconi tenentes sacerdotem descendit
sacerdos in fluuium, et ora qua coeperit benedicere aquam,
mox Iordanis cum magno rugitu post se reuertitur, et stat
aqua superior in se, usquedum baptismus perficitur; inferior
uero fugit in mare dicente psalmista: Mare uidit et fugit,
Iordanis conuersus est retrorsum. Tunc omnes Alexandrini
habent ibi suas naues cum hominibus habentes colaphos plenos
aromatibus et balsamo. Et hora, qua benedixerint fontem,
antequam incipiant baptizare, fundunt illos colaphos in fluuium [*] [*]

In illa uero ripa Iordanis est spelunca. in qua sunt cellulae
VII cum septem puellis, que ibi infantulae mittuntur. Et cum
aliqua ex eis mortua fuerit, in ipsa cellula sepelitur. Et alia
cellula inciditur et mittitur ibi alia puella, ut numerus stet,
et habent foris, qui eis cibaria preparet; in quo loco magno
cum timore ingressi sumus ad orationem, nullius ibi faciem
uidimus. In ipso loco dicitur esse sudarium, quod fuit super
caput Iesu. Non multum longe a Iordane, ubi baptizatus est
Dominus, est monasterium sancti Iohannis ualde magnum, in
quo sunt sinodochia duo. In ista uero uel in illa ripa Iordanis
per loca submontana inueniuntur serpentes, de quibus conficitur
tyriaca; inde uenimus ad Iordanem.

De Iordane usque Hiericho milia VI; Hiericho autem in
oculis hominum ita uidetur ut paradisus. A terre motu muri
diruti; domus Raab stat et est sinodochium, sed et cubiculum,
de quo exploratores deposuit, oratorium est sanctae Mariae.
Lapides uero illi, quos leuauerunt filii Israel de Iordane, non
longe a ciuitate Hiericho positi sunt in basilica post altare.
Et ante basilica campus ager Domini, in quo Dominus manu
propria seminauit ferens satum quasi modia tria. Qui etiam [*]

: At uero fons aquae, quem indulcauit Heliseus propheta,
inrigat omnem Hiericho, ubi nascitur uinum potiscon, qui
febricitantibus datur; ibi nascitur dactalum de libra, ex quibus
mecum in prouintia adduxi et dedi inde unum domno Paterio
patritio. Ibi nascitur caedrus de libras quadraginta et uirga
fassioli duo pede longa; ibi est et uitis, unde in ascensione
Domini plenas cistras racemis in monte Oliueti uenales sunt
et inde pentecosten mixtum exinde plena colata proponuntur.

Exeuntibus nobis de Hiericho uenimus contra Hierusolimam;
non longe a Hiericho est illa arbor, in qua Zacheus ascendit,
ut uideret Dominum. Quae arbor infra oratorium inclusa est
et per tectum desuper sicca uidetur. Igitur exeuntes de Hiericho
uenimus contra occidente in sinistra manu et intrauimus uillis
Sodomae et Gomorre. Super qua prouintia descendit semper
obscura nubes cum odore sulphureo. Nam quod dicunt homines
de uxore Loth, eo quod lingendo ab animalibus minuatur,
mendacium est, sed stat in statu, quo fuit.