Itinerarium (40-41)

De monte Sina in Arabia in ciuitatem, quae uocatur Abila,
sunt mansiones octo. In Abila autem descendit nauis de India
cum diuersis aromatibus. Nobis autem uisum est per Aegyptum
reuerti et uenientes in Fara ciuitatem, ubi pugnauit Moyses [*]

cum Amalec, ubi est oratorium, cuius altare positum est super
petras illas, quas subposuerunt Moysi oranti. In ipso loco
ciuitas munita muris de lateribus, locus sterilis ualde praeter
aquas et palmas; in qua ciuitate est episcopus. Et occurrentes
mulieres cum infantibus, palmas in manibus portantes et ampullas
cum rafanino oleo, prostratae pedibus nostris unguebant
plantas nostras et capita nostra, lingua Aegyptiaca psallentes
antifonam: \'Benedicti uos a Domino et benedictus aduentus
uester, osanna in excelsis.) Ipsa est terra Madian et ipsi inhabitantes
in ea ciuitate dicitur, quia ex familia Iethro, soceri
Moysi, descendunt. Octingentas condomas militantes in publico
cum uxoribus suis, annonas et uestes de publico accipientes
de Aegypto, nullum laborem habentes, quia nec habent
ubi, eo quod totum harena sit, et praeter singulis diebus
habentes singulas equas Saracenas, qui capitum paleas et hordeum,
de publico accipient, discurrentes cum ipsis per heremum
pro custodia monasteriorum et heremitarum propter insidias
Saracenorum, ante quorum timorem non exagitantur
Saraceni. Nam exeuntes de ipsa ciuitate a foris illi serant et
claues tollent secum. Et illi, qui sunt ab intus, similiter faciunt
propter insidias Saracenorum, quia nec habent, ubi exeant
foris, praeter caelum et harenam. [*]

Exinde uenimus in Sochot et exinde descendimus in Magdalum,
etiam et ad locum ad LXXII palmas et XII fontes,
ubi applicuimus duos dies delectati post tanto labore et uastitate
heremi. In quo loco est castellum modicum, qui uocatur
Surandala; nihil habet intus praeter ecclesiam cum presbytero
suo et duo xenodochia propter transeuntes. In quo loco
arborem piperis uidi et ex ipso collegi. Exinde uenimus ad
locum, ubi filii Israhel transeuntes mare castra metati sunt.
Et illic similiter castellum modicum, infra se xenodochium.
Et inde uenimus ad locum ad ripam, ubi transierunt filii
Israhel. Ubi exierunt de mare, est oratorium Heliae, et transcendentes
in locum, ubi intrauerunt in mare, ibi est oratorium
Moysi. Ibi est et ciuitas modica, quae appellatur Clisma, ubi
etiam et de India naues ueniunt. Quo maris loco, ubi transierunt,
culfus exit de pelago maiore et extendit intus in
multis milibus, qui accessa recessa habet. Recedente mare
omnis praefiguratio, arma Pharaonis uel uestigia rotarum curruum
parent; sed et omnia arma in marmore conuersa. Illic
accepimus nuces plenas uirides, quae de India ueniunt, quas
de paradiso credunt homines esse. Cuius gratia talis est:
quanticumque gustauerint, satiantur. [*]