Itinerarium (31-35)

Item reuertentes in Hierusolimam, descendentibus nobis in
uia, quae uadit in Gaza et Ascalona, continuo milia XX de
Hierusolima uenimus in monte Gelbuae, ubi occidit Dauid
Goliam. Ibi et mortuus est Saul et Ionathas. Ibi enim iacet
Golias in media uia, aceruum ligneum ad caput. Congeries
petrarum, mons excelsus, ita ut ad milia XX lapis mobilis
non inueniatur, quia consecratio est, quanticumque uel quotienscumque
transierit, ternas lapides portantes et super ipsum
tumulum iactantes. Nam in ipsis montibus numquam pluit et
nocturnis horis secretum sic: uidentes spiritua inmunda uolui,
oculata fide tamquam uellora lanae aut certe undas maris.

Deinde deuiantes ad latus uenimus in ciuitatem quae dicitur
Eleutheropolis, in loco, in quo Samson cum maxilla asini
occidit mille uiros, ex qua fons processit, quae fons usque
in hodiernum diem inrigat ipsa loca. Nam et ad locum, ubi [*] [*]

Ingressi sumus in Ascalona. Ibi est puteus pacis in latitudine
maior, in modum theatri factus, in quo usque ad aquam
per gradus descenditur. Ibi requiescunt tres fratres martyres
Aegyptii; propria quidem nomina habent, sed uulgariter Aegyptii
uocantur. Ad miliarium ciuitas Sarafia et in proximo ciuitas
Maioma Ascalonitis. Exinde uenimus in ciuitatem Maioma
Gazis, in qua requiescit sanctus Victor martyr. De Maioma
usque in Gaza miliarium unum. Gaza autem ciuitas splendida
deliciosa, homines honestissimi omni liberalitate decori, amatores
peregrinorum. Ad secundum miliarium Gazae requiescit
sanctus pater Hilario. [*]

Et inde uenimus in ciuitate Elusa in caput heremi, qui
uadit ad Sina, in qua etiam ex relatione episcopi quaedam
nobilis puella nomine Maria. Quae dum nupta fuisset, in ipsa
nocte nuptus sui mortuus est sponsus eius. Quae patienter
portauit et intra septimanam illius manumisit omnem familiam
... erogauit pauperibus uel monasteriis. Intrinsecus celebrato
die septimo ipsa nocte sublatum uestimentum sponsi
non est inuenta. De qua dicitur in heremo esse trans Iordanen
inter calamita uel palmita ambulante in finis Segor circa
mare salinarum. In quibus locis inuenimus monasterium puellarum
ultra XVI uel XVII in loco heremi, quas christiani
pabulabant, quae habentes unum asellum, qui illis macinabat,
et nutriebant leonem a pitulo mansuetum, ingentem, terribilem
ad uidendum, qui, dum appropinquassemus cellulae, ante rugitum
illius omnes animales, quos habuimus, minxerunt, ex
quibus aliqui in terram ruerunt. Nam et sic dicebant, quia
ipsum asellum ipse leo in pascua gubernaret. Quibus per me
centum solidos offerebat ille christianissimus, cum quo fui,
sed noluerunt accipere. Sed mittens in Hierusolima adduxit [*]

Proficiscentes de ciuitate Elusa, ingressi heremum. Ad
XX milia est castrum, in quo est xenodochius sancti Georgi,
in quo habent quasi refugium transeuntes uel heremitae stipendia.
Exinde intrantes interiorem heremum uenimus ad loca, de
qua dicitur: Terra in salsugine a malitia inhabitantium
in ea. Ubi uidimus raros homines cum camelos, fugientes nos,
(nam et in Hierusolima uidimus), homines a parte Aethiopiae,.
nares fissos, aures fissos, galliculas calciatos et per digitos in
pedes anulos missos. Requisiti, quare sic, dixerunt: \'Traianus
imperator Romanus signum hoc nobis dimisit.\' [*] [*]