Itinerarium (22-23)

Deinde uenimus in basilica sancta Sion, ubi sunt multa
mirabilia, inter quibus quod legitur de lapide angulare, qui
reprobatus est ab aedificantibus. Ingresso domino Iesu in ipsa [*]

ecclesia, quae fuit domus sancti Iacobi, inuenit lapidem istum
deformem in medio iacentem, tenuit eum et posuit in angulum.
Quem tenes et leuas in manibus tuis et ponis aurem in ipso
angulo et sonat in auribus tuis quasi multorum hominum
murmuratio. In ipsa ecclesia est columna, ubi flagellatus est
Dominus. In qua columna tale est signum: dum eam amplexasset,
pectus eius inhaesit in ipsa marmore et manus ambas
apparent et digiti et palmae in ipsa petra, ita ut pro singulis
languoribus mensura tollatur exinde; et circa collum habent et
sanantur. In ipsa columna est illud cornu, de quo reges unguebantur
et Dauid. Ibi est in ipsa ecclesia et corona de spinis,
qua coronatus est Dominus, et lancea, de qua in latere percussus
est Dominus. Ibi sunt et lapides multae, cum quibus
lapidatus est Stephanus. Ibi est et columnella, in qua crux
posita est beati Petri, in qua crucifixus est Romae. Ibi est
et calix apostolorum, in quo post resurrectionem Domini
missas faciebant, et multa alia miracula, quae non recolo.
Ibi est monasterium feminarum. Vidi testam de homine inclausam
in locello aureo ornatam ex gemmis, quae dicunt quia
de sancta martyra Theodote esset, in qua multi pro benedictione
bibunt et ego bibi.

De Sion uenimus in basilica sanctae Mariae, ubi est [*]

congregatio nimia monachorum, ubi sunt et xenodochia uirorum ac
mulierum, susceptio peregrinorum, mensas innumerabiles, lecta
aegrotorum amplius tria milia. Et orauimus in praetorio, ubi
auditus est Dominus, ubi modo est basilica sanctae Sofiae
ante ruinas templi Salomonis sub platea, quae discurrit ad
Siloam fontem secus porticum Salomonis. In ipsa basilica est
sedis, ubi Pilatus sedit, quando Dominum audiuit. Petra autem
quadrangulis, quae stabat in medio praeturio, in quam leuabatur
reus, qui audiebatur, ut ab omni populo audiretur et uideretur,
in qua leuatus est Dominus, quando auditus est a Pilato, ubi
etiam uestigia illius remanserunt. Pedem pulchrum, modicum,
subtilem, nam et staturam communem, faciem pulchram, capillos
subanellatos, manum formosam, digita longa imago designat,
quae illo uiuente picta est et posita est in ipso praeturio.
Nam de petra illa, ubi stetit, fiunt uirtutes multae; tollentes
de ipsa uestigia pedum mensuram, ligantes pro singulis
languoribus et sanantur. Et ipsa petra ornata est ex auro et
argento.

Et exinde uenimus ad arcum, ubi antiqua porta fuit ciuitatis.