De Nabuthae (44-46)

Quam euidenter expressa est diuitum consuetudo? [*] contristantur,
si aliena non rapiant, renuntiant cibo, ieiunant, non
ut peccatum minuant, sed ut crimen admittant. uideas illos
tunc conuenientes ad ecclesiam officiosos humiles adsiduos,
ut effectum sceleris impetrare mereantur. sed dicit illis deus:
non hoc ieiunium elegi, non si flectas ut circulum
collum tuum, cinerem etiam et cilicium [*] substernas,
nec sic uocabitis ieiunium acceptum. non
tale ieiunium elegi, dicit dominus. sed solue omnem
conligationem iniustitiae, dissolue obligationes
uiolentarum commutationum, dimitte confractos
in remissionem et omnem conscriptionem
iniquam disrumpe. frange panem tuum esurienti
et egenos non habentes tectum induc in domum
tuam. si uideris nudum, uesti et domesticos seminis
tui non despicies. tunc orietur tibi matutinum
lumen tuum, et sanitas tua matura orietur et praecedet
ante te iustitia et maiestas dei circumdabit[*]
te. tunc clamabis, et deus exaudiet te; adhuc te
loquente dicet: ecce adsum.

audis, diues, quid dominus
deus dicat? et tu ad ecclesiam uenis, non ut aliquid largiaris
pauperi, sed ut auferas. ieiunas, non ut conuiuii tui
sumptus proficiat egenis, sed ut spolium de egentibus [*] [*]

adipiscaris. quid tibi uis cum libro et carta et signaculo et conscriptione
et uinculo iuris? non audisti: solue omnem conligationem
iniustitiae, dissolue obligationes [*] uiolentarum
commutationum, dimitte confractos in
remissionem et omnem conscriptionem iniquam
disrumpe. tu mihi tabulas offers, ego tibi recito dei legem:
tu atramento scribis, ego tibi spiritu dei inscripta repeto oracula
prophetarum: tu testimonia falsa conponis, ego testimonium
conscientiae tuae posco, quam iudicem tui effugere et
declinare non poteris, cuius testimonium non poteris recusare
in die, qua reuelabit deus occulta hominum. tu dicis: [*] destruam
horrea: dominus dicit: sine magis quidquid intra
horreum est pauperibus deputari, sine cellas istas egenis prodesse.
tu dicis: maiora faciam et illo congregabo
omnia quae nata sunt mihi: dominus dicit: frange
esurienti panem tuum. tu dicis: tollam pauperi domum
suam: dominus autem dicit ut egenos non habentes tectum
inducas in domum tuam. quomodo uis, diues, ut
deus te exaudiat, cum tu deum non putes audiendum? si non [*]
adquiescatur arbitrio diuitis, scaena conponitur, dei aestimatur
iniuria, si diuitis petitio refutetur.

Deum inquit benedixit et regem, aequalis uidelicet [*]
persona, ut sit aequalis contumelia. benedixit inquit deum [*] [*]
et regem. ne diuitem maledicti nomen offendat et sermonis
ipso laedatur sono, benedictio pro maledicto uocatur. quaeruntur
duo testes iniquitatis. duobus testibus et Susanna est
adpetita, duo testis et synagoga inuenit, qui aduersus Christum
falsa iactarent, duobus testibus pauper occiditur. [*] produxerunt
igitur Nabuthae foras et lapidauerunt
eum. utinam uel in suis ei liceret mori! pauperi ipsam diues
inuidet sepulturam.