De Nabuthae (11-15)

clamat propheta: uae his
qui domum ad domum iungunt et uillam ad uillam
et arguit eos inefficacis auaritiae. fugiunt enim cohabitare
hominibus et ideo excludunt uicinos; sed fugere non possunt,
quia cum hos excluserint, alios rursus inueniunt et, cum illos
propulsauerint, ad aliorum necesse est eos uiciniam peruenire; [*]
soli enim super terram habitare non possunt. aues se auibus
adsociant, denique ingentis plerumque agminis uolatu caelum
obtexitur, pecus pecori adiungitur, pisces piscibus, nec damnum
ducunt, sed commercium uiuendi, cum plurimum comitatum
capessunt et quoddam munimentum solacio frequentioris. societatis
adfectant. solus tu, homo, consortem excludis, includis
feras, struis habitacula bestiarum, destruis hominum, inducis
mare intra praedia tua, ne desint beluae, producis fines terrae,[*]
ne possis habere finitimum. [*] [*]

Audiuimus uocem diuitis aliena quaerentis, audiamus uocem
pauperis propria uindicantis: non fiat inquit hoc a deo,
ut dem tibi hereditatem patrum meorum. quasi
quandam contagionem sui pecuniam esse diuitis arbitratur,
quasi dicat: pecunia tua tecum sit in perditionem,
ego autem hereditatem patrum meorum non possum uendere.
habes quod sequaris, diues, si sapias, ut non uendas agrum
tuum pro nocte meretricis, non transfundas ius tuum pro [*]
sumptu comissationis deliciarumque inpensis, non adiudices
domum tuam ad ludum aleae, ne ius hereditariae pietatis
amittas.

his auditis turbatus est auari spiritus regis. et dormiuit
in lecto suo et uelauit faciem suam et non
manducauit panem suum. lugent diuites, si non potuerint
aliena diripere; si suis pauper non cesserit facultatibus,
uim maeroris tegere non possunt. dormire desiderant, uelant
faciem suam, ne quicquam in orbe terrarum alienum uideant, [*]
ne quicquam in hoc mundo non esse suum nouerint, ne
audiant uicinum iuxta se aliquid possidere. ne audiant pauperem
sibi contradicentem: horum sunt animae quibus dicit
propheta: mulieres diuites, exsurgite.