De Fuga Saeculi (58)

sic igitur uolate, ut dicatur de uobis: qui sunt
isti, qui sicut nebula uolant et sicut columbae
cum pullis suis? ut nebulae uestrae rorent iustitiam et
columbae pariant simplicitatem. sic nauigate quasi [*] transfretantes
mundum, non pererrantes quasi naues Tharsis, ut in
intellegibiles portus cursum dirigatis et conuehatis diuitias
maris. sic festinate, ut dicatur de uobis: leues facti sunt
super aquilas. ab ira enim uentura fugiendum uidetis,
quam declinare poterunt qui per paenitentiam sibi spem
locauerint euadendi et reconciliationis futurae fidem hauserint,
per dominum nostrum Iesum Christum, cui regnum est a
saeculis et nunc et semper et in omnia saecula saeculorum.
amen. [*] [*]