The Goddesse of Surrye (41-45)

And in the clos at large pasturen grete boles and hors and egles and beres and lyouns; and thei don no manere harm to men but ben everyche of hem holy and tame.[*]

Prestes thei apoynten withouten nombre, of the whiche some sleen the victimes and some beren the offrynges of licours and some ben cleped Fuyrbereres and some Awtere Prestes. Whan I was there, mo than a 300 weren wont to assemblen hem for sacrifise. Thei ben clothed in whyte robes alle, and thei han a poynted cappe on here hedes.[*] And everyche yeer a newe chefe preste is sett over hem, that allone wereth a robe of purpre and is crouned with a coronale of gold.[*]

And therto is other gret multytude of religious men, of floyteres and piperes and Galles, and also wommen that ben wode and out of here witte.

Twyes each day sacrifise is perfourmed, to the which allecomen. To Iove thei sacrificen withouten ony noys, ne syngynge not ne floytynge; but whan thei presenten offrynges to Iuno, thanne thei syngen and floyten and sounen cymbales. And as to this thei mighte not telle me no thing certeyn.

Ther is also a lak, a lityl fro the temple, in the whiche holy fissches ben norysscht, withouten nombre and of dyverse kyndes. Some of hem ben ful grete, and thise han names and comen whan thei ben