ܪܝܫܐ ܕܫܒܥܐ܆ ܕܥܠ ܚ̈ܒ̣ܘܫܝܐ ܘܐܟ̣ܣܘܪܝܐ ܬܘܒ ܕܝܠܗ ܕܝܘܚܢܢ.܀. ܏ܙ ܟܕ ܓܝܪ ܡ̇ܠ̣ܝ ܗܘܐ ܗ̣ܘ ܗܢܐ ܝܘܚܢܢ: ܟܕ ܗܟܢܐ ܚܒ̣ܝܫ ܬܪܥܣܪ̈ ܝܪ̈ܚܐ ܘܬܫܥܐ ܝܘܡ̈ܝܢ: ܡܢ ܒܬܪ ܗ̇ܘ ܚܒܘ̣ܫܝܗ ܕܡܢ ܩܕܝܡ ܕܒܒܝܬ ܐܦܝܣܩܦܝܘܢ ܕܬܪ̈ܬܝܢ ܙܒ̈ܢܝܢ܆ ܗ̇ܝ ܕܝܢ ܬܘܒ ܘܟܕ ܗܟܢܐ ܗܢܐ ܠܐ ܐܬܪܝܚ̣ܬ݀ ܒܝܫ̣ܘܬܗ ܕܝܘܚܢܢ ܣ̣ܪܡܝܐ܆ ܦܩ̣ܕ ܘܫܩ̣ܠܘܗܝ ܡܢ ܐ̣ܟܣܢܕܘܟܝ̣ܢ ܘܐ̇ܦܩ̣ܘܗܝ ܠܓ̇ܙܪܬܐ ܕܝܡܐ ܬܘܒ. ܘܐܦ ܬܡܢ ܗܟܢܐ ܚܒܫ̣ܘܗܝ̣ ܒܐܘܠܨܢܐ ܩܫ̣ܝܐ. ܟܕ ܦܩ̣ܕ ܕܠܐ ܬܘܒ ܢܫܬܒ̣ܩ ܐܢܫ ܡܢ ܝ̇ܕ̈ܘܥܘܗܝ ܕܠܓܡ̣ܪ ܢܡ̇ܠܠ ܥܡܗ. ܘܟܕ ܡ̇ܠ̣ܝ ܘܐܦ ܒܗ̇ ܒܓ̇ܙܪܬܐ ܗܝ̇ ܝܪ̈ܚܐ ܥܣܪ̈ܝܢ ܘܬܡܢܝܐ܆ ܐܕܪܟ̣ܬ݀ ܡ̇ܪܕܘܬܐ ܕܡܢ ܐܠܗܐ܇ ܗܝ̇ ܕܕܚ̣ܝܠܐ ܘܬܡ̣ܝܗܐ ܘܓܢ̣ܝܚܐ ܠܬܪ̈ܝܗܘܢ ܓ̇ܒ̈ܐ. ܘܗܟܢܐ ܒܚܪܬܐ ܫ̣ܕܪܘ ܫܩ̣ܠܘܗܝ ܒܦܘܩܕܢܗ ܕܩܣܪ ܛܒ̣ܪܝܘܣ ܡܢ ܬܡܢ܆ ܘܐ̇ܥܠ̣ܘܗܝ ܠܡܕܝܢܬܐ. ܘܗܟܢܐ ܕܝܢ ܗ̣ܘܐ ܥ̇ܡܪ ܒܡܕܝܢܬܐ ܒܢܛܘ̣ܪ̈ܬܐ܆ ܝܬܝܪ ܡܢ ܬܠܬ ܫ̈ܢܝܢ. ܥܕܡܐ ܠܣܘ̇ܦܢܗ ܕܪܕܘ̇ܦܐ ܝܘܚܢܢ ܣ̣ܪܡܝܐ. ܘܗܠܝܢ ܟܠܗܝܢ ܐܦ ܒܐܓܪ̈ܬܐ ܣܓܝܐ̈ܬܐ ܗܠܝܢ ܕܠܘܬ ܣܓ̈ܝܐܐ ܡܫܬ̈ܟܚܢ ܕܟܬ̣̈ܝܒܢ ܠܗ܆ ܥܡ ܚ̣ܙܘܗ ܕܗ̇ܘ ܥܠܝܡܐ ܕܣ̇ܥܪ ܗܘܐ ܠܗ. ܘܠܐ ܢܬ̇ܕܡܪ ܐ̇ܝܢܐ ܕܦ̇ܓܥ ܒܗܠܝܢ ܩܕܡ̈ܝܬܐ ܘܒܗܠܝܢ ܐܚܪ̈ܝܬܐ܇ ܐܢ ܢܫܟ̣ܚ ܕܡ̈ܫ̣ܚܠܦܢ ܡܢ ܚ̈ܕܕܐ܇ ܘܡ̇ܒܨܪ̈ܢ ܘܡ̇ܘ̈ܣܦܢ. ܡܛܠ ܕܐܦ ܐܠܐ ܐܢ ܒܠܚܘܕ ܒܙܥܘܪ̈ܝܬܐ ܕܡܢܗܝ̣ܢ ܘܐܦܠܐ ܗ̣ܘ ܐܬ̇ܚܫܚ܇ ܐܝܟ ܕܠܬܫܒܘܚܬܐ ܕܐܠܗܐ. ܟܕ ܡܢ ܣܓܝܐ̈ܬܐ܆ ܡܛܠ ܡ̣ܬܚܐ ܣܓܝܐܐ ܐܗ̣ܡܝ̣ ܘܥܒ̣ܪ ܐ̈ܢܝܢ. ܘܐܝܬ ܐ̣ܝܟܐ̣ ܕܒܝܬܝܪ̈ܬܐ ܒܡܢܗܝܢ ܕܡܢܗܝܢ ܕܗܠܝܢ ܕܐܬ̇ܥܗ̣ܕ ܕܐܬ̇ܥܗ̣ܕܘ ܐܬ̇ܚܫܚ. ܘܝܬܝܪܐܝܬ ܒܡܕܡ ܕܒܡܕܡ ܡܕܡ ܕܐܢ ܥܠ ܚ̣ܙܘܐ̣ ܘܐܢ ܥܠ ܫܪܟܐ ܕܐܚܪ̈ܢܝܬܐ. ܐ̣ܝܟܢܐ ܕܐܦ ܠܐ ܗܪܟܐ ܐܠܐ ܐܢ ܒܟ̣ܪ̈ܝܬܐ ܒܠܚܘܕ̣ ܠܐ ܐܬܟ̣ܬܒ. ܐ̣ܝܟܢܐ ܕܐܝܟ ܕܠܥܘܗ̈ܕܢܐ ܙܥܘܪ̈ܐ ܢܗ̈ܘܝܢ. ܘܠܐ ܟܕ ܡ̣ܬܚܐ ܣܓܝܐܐ ܕܬܫ̈ܥ̣ܝܬܐ ܢܬ̇ܢܐ܇ ܠܙܬ̣ܐ ܣܓܝܐܬܐ ܢܬ̇ܚ̈ܫ̣ܒܢ ܠܐܝܠܝܢ ܕܡܢ ܒܬܪܟܢ ܦ̇ܓܥܝܢ ܒܗܝܢ. ܪܝܫܐ ܕܬܡܢܝܐ܆ ܕܥܠ ܥܪܘ̣ܩܝܗ ܕܦܘܠܘܣ ܡܢ ܒܝܬ ܐܦܝܣܩܦܝܘܢ. ܏ܚ ܟܕ ܗܟܝܠ ܡܟܝܠ ܐܣܬ̣ܒܪ ܗܘܐ ܠܗ ܗ̣ܘ ܦܘܠܘܣ ܕܐܢܛܝܘܟܝܐ: ܕܡܟܝܠ ܐܬܛ̇ܒܥ ܗܘܐ ܠܗ ܒܬܪܥ̣ܝܬܐ ܕܬܪ̈ܝܝ ܟܝ̈ܢܐ: ܝܘܚܢܢ ܕܝܢ ܦܛܪܝܪܟܐ ܟܕ ܣ̇ܓܝ ܫ̇ܚܪ ܗܘܐ ܡܢܗ: ܚ̇ܕܐ ܗܘܐ ܕܢܣ̣ܩ ܠܗ ܚܘܫ̣ܒܐ ܘܢܥ̣ܪܘܩ: ܘܠܐ ܡܟܝܠ ܡܬܢ̣ܛܪ ܗܘܐ܆ ܘܟܕ ܙܒܢܐ ܡ̇ܠ̣ܝ ܒܒܝܬ ܐܦܝܣܩܘܦܝܘܢ܆ ܢܚ̣ܬ ܒܚܕ ܡܢ ܝܘ̈ܡܝܢ ܒܠܠܝܐ ܒܝܢܬ ܥܡܐ̣ ܘܥ̣ܪܩ ܘܐ̣ܙܠ ܘܐܬ̇ܛܫܝ ܒܕܘܟܬܐ ܕܣܬ̣ܝܪܐ. ܘܒܥܕܢܐ ܐܬܒ̣ܥܝ̣ ܘܠܐ ܐܫܬ̣ܟܚ. ܐ̣ܝܟܢܐ ܕܟܕ ܕܚ̣ܠ ܝܘܚܢܢ ܡܢ ܡ̇ܠܟܐ܆ ܥܠ ܒܪ ܫܥܬ̣ܗ ܘܐ̇ܘܕܥܗ̣ ܥܠ ܥܪ̣ܘܩܝܗ ܕܦܘܠܐ. ܐ̣ܝܟܢܐ ܕܟܕ ܫ̣ܡܥ܆ ܬܘ̣ܗ ܘܐܬܡ̣ܠܝ ܘܐܬܡ̣ܠܝ ܘܐܬܡ̣ܠܝ ܪܘܓܙܐ. ܘܦܩ̣ܕ ܕܢܬ̇ܬܚܕܘܢ ܟܘܠܗܘܢ ܥܒ̣ܪ̈ܐ̣ ܘܢܬ̇ܒܥܪ̈ܢ ܟܠܗܝܢ ܐ̈ܠ̣ܦܐ. ܘܟܠܗܘܢ ܒܬ̈ܐ ܕܥܒ̣ܪܐ ܕܟܠܗ̇ ܡܕܝܢܬܐ. ܘܦܪ̈ܣܛܘܬܐ̣ ܘܕܝܪ̈ܬܐ ܟܠܗܝܢ. ܘܥܕܡܐ ܠܩܒܪ̈ܐ ܡܬ̇ܦܬܚܝܢ ܗܘܘ. ܘܒܓܘ ܫܩ̣̈ܐ ܕܡܠ̣ܝܢ ܡ̈ܝ̣ܬܐ̣ ܡ̇ܒܥܪܝܢ ܗܘܘ ܡܛܠܬܗ. ܘܒܚܪܬܐ ܚܦܝ̣ܛܐܝܬ ܐܬܟ̣ܬܒ ܠܟܠ ܐܬܪ ܘܡܕܝܢܐ. ܠܐܦܝ̈ܣܩܦܐ ܘܠܐ̇ܪ̈ܟܢܛܣ܆ ܟܕ ܐܦ ܐܬܘ̈ܬܗ ܡ̈ܬ̇ܟ̣ܬܒܢ ܗ̈ܘܝ. ܕܢܬ̣ܝܕܥ ܘܢܬܠ̣ܒܟ̣ ܘܠܐ ܐܫܬ̣ܟܚ. ܘܒܚܪܬܐ ܐܬܠ̣ܒܟ ܐ̇ܚܘܗܝ ܕܐܝܬܘܗܝ ܗܘܐ̣ ܩ̣ܡܝܣ ܕܐ̣̈ܠܦܐ܆ ܘܗܘ̣ܐ ܒܐܘܠܨܢܐ. ܗ̣ܘ ܕܝܢ ܗܘ̣ܐ ܡ̇ܛܫܝ ܒܓܘ ܡܕܝܢܬܐ ܐܝܟ ܕܐܡ̇ܪܝܢ܆ ܒܦ̇ܪܕܣܩܐ ܕܩ̣ܒܝܥ ܒܐ̣ܣܬܐ܆ ܬܫܥܐ ܝܪ̈ܚܝܢ. ܘܗ̇ܝܕܝܢ ܒܬܪܟܢ ܢܦ̣ܩ ܘܐ̣ܙܠ ܐܣܬ̇ܬܪ ܒܐܬܪܐ ܕܐ̇ܪܒܝܐ܆ ܒܝܕܥܬܗܘܢ ܕܒܝܬ ܡܢ̣ܕܪ ܒܪ ܚ̇ܪܬ܆ ܥܕܡܐ ܠܙܒܢ ܡ̇ܪܕܘܬܐ ܕܚܝܠ̣ܬܐ ܗ̇ܝ ܕܡܢ ܠܥܠ ܐܬܐܡ̣ܪܬ݀. ܪܝܫܐ ܕܬܫܥܐ܆ ܕܥܠ ܡ̇ܫܒܚܐ ܐ̇ܢܕܪܐܘܣ ܩܘܒܩܠܪܐ ܘܣܩ̇ܠܪܐ ܕܡ̇ܠܟܬܐ܆ ܘܥܠ ܐ̈ܓܘܢܐ ܕܐܬ̇ܟܬܫ. ܏ܛ ܒܗ ܗܟܝܠ ܒܙܒܢܐ: ܟܕ ܟܠܢܫ ܒܕܚ̣ܠܬܐ ܡܬܬ̣ܚܕ ܗܘܐ: ܡܢ ܓ̇ܙܡ̈ܐ ܩܫ̣̈ܝܐ ܘܕܚܝ̣̈ܠܐ ܕܡ̇ܠܟܐ ܣܓ̈ܝܐܐ ܐܬܬܙ̣ܝܥܘ: ܘܠܫܘܬ̇ܦܘܬܐ ܡܬ̣ܪܡ̣ܝܢ ܗܘܘ܆ ܐܦ ܦܩ̣ܕ ܗܘܐ ܓܝܪ ܡ̇ܠܟܐ ܒܝܘܡܐ ܕܥܐܕܐ܆ ܕܟܠ ܠܡ ܡ̇ܢ ܕܠܐ ܡܬ̇ܩܪܒ ܥܡܝ܆ ܠܐ ܢܬ̣ܠ ܠܝ ܫܠ̣ܡܐ. ܘܣܓ̈ܝܐܐ ܒܝܕ ܗܕܐ ܐܬܬ̣ܙܝܥܘ܆ ܘܐܬܕܒ̣ܪ̈ܘ ܠܫܘܬ̇ܦܘܬܗܘܢ̣ ܣ̣ܛܪ ܡܢ ܙܥܘܪ̈ܐ ܒܠܚܘܕ. ܘܗܠܝ̣ܢ ܟܕ ܦܣ̣ܩܘ ܡ̇ܘܬܐ ܥܠ ܢܦܫܗܘܢ. ܘܗܟܢܐ ܐܬܬܚ̣ܕܘ ܣܓ̈ܝܐܐ ܡܢ ܕܚ̣ܠܬܐ.܀. ܗ̣ܘ ܕܝܢ ܐ̇ܢܕܪܐܘܣ ܣܩ̇ܠܪܐ ܗܢܐ ܕܐܬ̣ܐܡܪ܆ ܚ̇ܪܝܦ ܗܘܐ ܘܫ̣ܓܝܪ ܒܛܢܢ̣ܐ ܕܗܝܡܢܘܬܐ̣ ܘܚܦ̣ܝܛ ܒܕܘܒ̇ܪ̈ܐ ܕܡ̇ܝܬܪܘܬܐ ܡܢ ܛܠܝܘܬܗ. ܘܒܨܘܡܐ̣ ܘܒܨܠܘܬܐ ܐܡ̣ܝܢ ܗܘܐ. ܡܢܗ ܕܝܢ ܕܫ̇ܘܪܝܗ ܕܪܕܘܦ̣ܝܐ: ܟܕ ܣܓܝܐ̈ܐ ܡܢ ܩܒܘܩܠܪ̈ܐ ܘܩܒܘܩܠܪ̈ܝܬܐ: ܡܢ ܕܚܠ̣ܬܐ ܘܐܦ ܗ̣ܘ ܦ̣ܪܦܣܝܛܘܣ ܕܝܠܗ̇ ܕܡ̇ܠܟܬܐ: ܕܫܡܗ ܗܘܐ ܐܣ̣ܛܦܢܐ: ܕܐ̣ܝܬܝܗܘܢ ܗܘܘ ܐܪ̈ܬܕܘܟܣܐ ܡܢ ܝܘ̈ܡܝ ܬܐܕܘܪܐ ܡ̇ܠܟܬܐ܆ ܐܬܕܒ̣ܪܘ ܘܐܬܪ̈ܡ̣ܝܘ ܠܫܘܬ̇ܦܘܬܐ ܕܣܘܢܗ̈ܕܝܛܐ ܕܥܡ ܡ̇ܠܟܐ. ܗܢܐ ܕܝܢ ܒܠܚܘܕܘܗܝ ܥ̇ܙܝ ܘܩ̣ܡ ܓܢܒܪܐܝܬ܇ ܒܬܘܟ̇ܠܢܐ ܕܬܟܬ̇ܘܫܐ ܗ̇ܘ ܕܥܡ ܡ̇ܘܬܐ܇ ܟܕ ܡܟܝܠ ܗ̣ܢܘܢ ܡ̈ܠܟܐ ܥܡ ܫܪܟܐ ܕܟܠܗܘܢ ܩܒܘܩܠܪ̈ܐ ܕܬܪ̈ܝܗܘܢ ܓ̈ܒܐ ܟܕ ܒ̇ܥܝܢ ܕܢܫܬ̇ܦܪ̈ܘܢ ܠܗܘܢ܇ ܣ̣ܕܝܪܝܢ ܗܘܘ ܥܡܗ ܒܩܪܒܐ ܘܒܕܪܫ̇ܐ. ܘܠܓܡ̣ܪ ܡܢ ܟܠܗܘܢ ܠܐ ܚܐ̇ܓ ܗܘܐ܆ ܘܠܐ ܫ̇ܠܐ ܗܘܐ ܡܢ ܬܟܬ̇ܘܫܐ ܕܠܘܩܒܠ ܟܘܠܗܘܢ ܐ̇ܘ ܡܬ̇ܪܦܐ. ܐܝܟܢܐ ܕܗ̣ܘ ܡ̇ܠܟܐ ܒܓ̇ܙܡ̈ܐ ܕܚܝ̣̈ܠܐ ܘܩ̈ܫ̣ܝܐ ܕܡ̇ܘܬܐ̣ ܠܘܬܗ ܡܬ̇ܚܫܚ ܗܘܐ ܒܟܠܥܕܢ. ܗ̣ܘ ܕܝ̣ܢ ܐܦܠܐ ܚܕܐ ܡܠܬܐ ܠܓܡ̣ܪ ܡ̇ܫܦ ܗܘܐ܇ ܐ̇ܘ ܡܬ̣ܪܟܢ ܠܗ܇ ܐ̇ܘ ܚܐ̇ܓ ܡܢܗ ܥܕܡܐ ܠܐ̣ܝܟܐ ܕܢܬܚ̇ܡܬ. ܘܚܕܐ ܙܒ̣ܢ ܡܚ̣ܝܗܝ ܗ̣ܘ ܒܐ̣ܝ̈ܕܘܗܝ ܡܢ ܟܒ̣ܕܗ܇ ܕܩܐ̇ܡ ܗܘܐ ܠܩ̣ܘܒܠܗ ܒܦܪܗܣܝܐ ܡ̇ܪܚܐܝܬ܇ ܟܕ ܐܡ̇ܪ ܗܘܐ ܘܫܡ̇ܥ ܥܡܗ. ܘܗܘ̣ ܬܒ̇ܥ ܗܘܐ ܠܗ ܕܢܬ̇ܩܪܒ ܡܢ ܗ̇ܢܘܢ ܕܠܣܘܢܗܕܣ ܐ̇ܚ̣ܝܕܝܢ ܗܘܘ܆ ܘܗ̣ܘ ܡܬܚ̣ܪܐ ܗܘܐ ܘܩܐ̇ܡ ܠܩܘܒ̣ܠܗ ܟܕ ܐܡ̇ܪ܆ ܕܡ̇ܘܕܐ ܐܢܐ ܕܡ̇ܪ̈ܝ ܐ̣ܝܬܝܟܘܢ ܘܥܒ̣ܕܟܘܢ ܐ̣ܝܬܝ. ܘܦܓܪܝ̣ ܒܐ̣̈ܝܕܝܟܘܢ ܐ̣ܝܬܘܗܝ. ܕܡܕܡ ܕܨ̇ܒܝܢ ܐ̣ܢܬܘܢ ܬܥ̣ܒܕܘܢ ܒܗ. ܥܠ ܢܦܫܝ ܕܝܢ ܠܐ ܫܠܝܛܝܢ ܐܢܬܘܢ܆ ܕܒܐ̣̈ܝܕܝ ܐܠܗܐ ܐ̣ܝܬܝܗ̇. ܘܗܝܡܢܘܬܝ ܠܥܠܡ܆ ܘܠܐ ܐ̣ܢܬܘܢ̣ ܘܠܐ ܐܚܪܝܢ ܠܐ ܡ̇ܚܠܦܝܢ ܐܢܬܘܢ܆ ܡܛܠ ܕܒܐܠܗܐ ܗ̇ܝܡܢܬ. ܥܡ ܣܓܝܐ̈ܬܐ ܕܟܠ ܝܘܡ ܕܕܠܐ ܣ̣ܟܐ ܒܝܢܬܗܘܢ ܡܬ̇ܐܡܪ̈ܢ ܗܘ̈ܝ. ܘܡܛܠ ܕܡ̇ܚܒܝܢ ܗܘܘ ܠܗ ܬܪ̈ܝܗܘܢ ܡ̈ܠܟܐ ܡܛܠ ܚܐ̣ܪܘܬܗ ܘܡ̇ܝܬܪܘܬܗ: ܘܐܦ ܡܛܠ ܗܘܢܗ ܘܝ̣ܕܥܬܗ܆ ܚܦ̣ܝܛܝܢ ܗܘܘ ܡ̇ܠܘܢ ܕܢܫܥ̇ܒܕܘܢܝܗܝ܆ ܘܠܐ ܢ̇ܦܩܘܢܝܗܝ ܡܢ ܦܠܛܝܢ ܕܝܠܗܘܢ. ܐ̣ܝܟܢܐ ܕܠܥܝܢ ܣܓ̈ܝܐܐ ܗ̣ܘ ܡ̇ܠܟܐ ܐܡ̇ܪ ܗܘܐ܆ ܕܡ̇ܢܐ ܠܡ ܢܥܒ̣ܕ ܠܗ ܠܗܢܐ ܡ̇ܪܚܐ ܕܩܐ̇ܡ ܠܩ̣ܘܒܠܢ ܘܠܐ ܡܬܛܦ̣ܝܣ ܠܢ. ܕܗܘܢܐ ܘܡ̣ܘܚܐ ܐܝܟ ܕܝܠܗ܆ ܐܚܪܝܢ ܗܪܟܐ̣ ܠܝܬ ܠܢ. ܘܕܢ̇ܦܩܗ̣ ܠܐ ܒ̇ܥܝܢ ܗܘܝܢ. ܘܬܘܒ ܕܢܫܒ̣ܩܗ ܟܕ ܠܐ ܡܬܛܦ̣ܝܣ ܠ̣ܢ ܠܝܬ ܦܘ̣ܪܣܐ. ܘܗܟܢܐ ܙܒܢܐ ܠܐ ܙܥܘܪ ܛܥ̣ܝܢܝܢ ܗܘܘ ܠܗ ܥܠ ܣ̣ܒܪܐ ܕܡܗ̣ܦܟܝܢ ܠܗ. ܘܟܕ ܠܐ ܐܬ̣ܪܟܢ ܠܗܘܢ ܘܠܐ ܐܬ̇ܪܦܝ܆ ܒܚܪܬܐ ܒܦ̇ܣ̈ܝܩܬܐ ܓ̣ܙܪܘܢ ܥܠܘܗܝ ܟܕ ܐܡ̇ܪܝܢ܆ ܕܐ̇ܘ ܠܡ ܐܬܛܦ̣ܝܣ ܠܢ ܘܣ̣ܒ ܥܡܢ ܩ̣ܘܪܒܢܐ܆ ܐ̇ܘ ܦܘ̣ܩ ܡܢ ܦܠܛܝܢ ܕܝܠܢ.܀. ܗ̣ܘ ܕܝܢ ܒܥܓܠ ܟܕ ܚ̣ܙܐ܆ ܫܠ̣ܚ ܦܪܓ̣ܘܕܝܢ ܕܝܠܗ ܘܫ̣ܕܐ ܩܕܡܝܗܘܢ ܟܕ ܐܡ̇ܪ܆ ܕܠܐ ܡܬܘܡ ܥܒ̣ܕܬܘܢ ܒܝ ܛܝܒܘܬܐ ܕܪܒܐ ܡܢ ܗܕܐ܇ ܕܦܪܩ̇ܝܢ ܐܢܬܘܢ ܠܝ ܡܢ ܬܫܡ̣ܫܬܐ ܕܥܒ̣ܕܘܬܐ ܕܒ̈ܢܝ ܐܢܫܐ܇ ܘܥ̇ܒܕܝܢ ܐܢܬܘܢ ܠܝ ܕܒܬܫܡ̣ܫܬܐ ܘܥܒ̣ܕܘܬܐ ܕܗ̇ܘ ܕܒ̣ܪܢܝ ܘܐ̇ܝܬ̣ܝܢܝ ܠܥܠܡܐ ܐ̇ܩܘܡ܇ ܘܠܗ ܒܠܚܘܕܘܗܝ ܐ̇ܦܠܘܚ ܥܒ̣ܕܘܬܐ. ܘܗܟܢܐ ܢܦ̣ܩ ܡܢ ܦܠܛܝܢ܆ ܘܐ̣ܙܠ ܐܬܚܒ̣ܫ ܒܐܘܠܨܢܐ ܒܦܠܛܝܢ ܕܡܬ̇ܩܪܝܐ̣ ܕܗܘܪܡܝܙܕܐ. ܘܒܬܪ ܝܘܡ̈ܬܐ ܣܓ̈ܝܐܐ܆ ܐܫܬ̇ܕܪ ܠܘܬܗ ܩܘ̣ܪܛܘܪ ܕܡ̇ܠܟܐ܇ ܐܝܟ ܕܢܫ̇ܓܫܝܘܗܝ ܘܐܦ ܢܕܚ̇ܠܝܘܗܝ܇ ܘܢܚ̣ܙܐ ܐܢ ܐܬ̇ܪܦܝ܇ ܕܥܡܗܘܢ ܢܬ̇ܩܪܒ ܘܠܐ ܢܘ̇ܒܕ ܕܘܟܬܗ.܀. ܗ̇ܘ ܕܟܕ ܐܙ̣ܠ ܘܒܣܓܝܐ̈ܬܐ ܐܬ̇ܚܫܚ ܠܘܬܗ: ܟܕ ܡ̇ܪܬܐ ܘܡܫ̇ܕܠ ܘܡܦ̣ܝܣ ܠܗ: ܘܟܕ ܚ̣ܙܐ ܕܠܐ ܡܬ̇ܪܦܐ܆ ܫ̇ܪܝ ܒܓ̇ܙܡ̈ܐ ܘܒܕܘ̇ܚ̈ܠܐ ܟܕ ܐܡ̇ܪ܆ ܕܚ̣ܙܝ ܠܡ ܢܦܫܟ܇ ܕܕܡ̣ ܐܬܐ̣ܠܨ ܕܐ̇ܣܥܘܪ ܠܘܬܟ ܗ̇ܘ ܡܕܡ ܕܐܬ̇ܦܩܕܬ. ܗ̣ܘ ܕܝܢ ܡܚ̣ܕܐ ܐܪ̣ܟܢ ܨ̇ܘܪܗ܆ ܘܦ̣ܫܛ ܩܕܠܗ ܩܕܡܘܗܝ. ܟܕ ܐܡ̇ܪ ܕܠܝܬܝܟ ܡܢ ܒ̈ܢܝ ܐܢܫܐ ܕܚ̣̈ܝܝܢ܆ ܘܠܐ ܢܩ̇ܒܠ ܐܠܗܐ ܛܝܒܘܬܟ܇ ܐ̣ܢ ܠܐ ܐܬ̇ܐ ܣܝܦܟ ܥܡܟ. ܘܗܐ ܩܕܠܝ̣ ܐܪܝܡ̣ܝܗܝ. ܠܐ ܕܝܢ ܬܛܥ̣ܐ. ܘܠܐ ܐܢܬ̣ ܘܠܐ ܗܠܝܢ ܕܫ̣ܕܪܘܟ. ܕܠܓܡ̣ܪ ܠܥܠܡ ܫܘܬ̇ܦܘܬܐ ܥܡ ܡ̈ܦ̇ܠܓܢܘܗܝ ܕܡܪܢ ܝܫܘܥ ܡܫܝܚܐ ܠܬܪ̈ܝ̣ܢ ܘܠܐ ܗܘ̣ܬ ܠܝ܆ ܘܠܐ ܬܘܒ ܗ̇ܘܝܐ ܠܝ̣ ܚܣ ܡܢ ܩܕܡ ܡܪܝܐ. ܘܠܐ ܢܩ̇ܒܠ ܐܠܗܐ ܛܝܒܘܬܟܘܢ܇ ܐܢ ܠܐ ܡ̣ܚܕܐ ܡ̣ܪ̈ܝܡܝܢ ܐܢܬܘܢ ܪܝܫܝ܇ ܘܥ̇ܒܕܝܢ ܐܢܬܘܢ ܠܝ ܠܡ̇ܓܗܝܘ ܡܢ ܚ̈ܝܐ ܗܠܝܢ ܕܠܙ̣ܬܐ.܀. ܟܕ ܕܝܢ ܗܠܝܢ ܫܡ̣ܥ ܩ̣ܘܪܛܘܪ̣ ܥ̣ܠ ܐ̇ܘ̣ܕܥ ܐ̈ܢܝܢ ܠܡ̈ܠܟܐ. ܘܗ̣ܢܘܢ ܟܕ ܫܡ̣ܥܘ ܬܗ̣ܪ̈ܘ ܒܗ܆ ܘܐܦ ܐܬܬܥܝ̣ܩܘ ܡܛܘܠܬܗ. ܘܬܘܒ ܥܠ ܣܒ̣ܪܐ ܕܡܬܛܦܝܣܢܘܬܗ ܦܩ̣ܕܘܢ܆ ܕܒܕܝܪܐ ܕܡܬ̇ܩܪܝܐ ܕܕܠܡ̣ܛܝܘ܇ ܕܕܠܡ̣̈ܛܝܘ ܕܐ̣ܝܬܝܗ̇ ܠܥܠ ܡܢ ܟܠܗܝܢ ܕܝܪ̈ܬܐ ܕܒܡܕܝܢܬܐ ܘܕܒܟܠܗܘܢ ܚ̣ܕܪ̈ܝܗ̇܆ ܢܐ̣ܙܠ ܢܬܚ̣ܒܫ.܀. ܘܗܟܢܐ ܐ̇ܦܩ̣ܘܗܝ ܘܐܘܒ̣ܠܘܗܝ ܒܐܝܡܡܐ܆ ܠܥ̣ܝܢ ܟܠܢܫ̣ ܐܝܟ ܕܠܕܚ̣ܠܬܐ. ܗ̣ܘ ܕܝܢ ܚ̇ܕܐ ܗܘܐ ܘܦ̣ܨܝܚ̣ ܘܡ̇ܘܕܐ ܠܐܠܗܐ܇ ܟܕ ܠܒܝ̣ܟܝܢ ܠܗ ܘܥ̇ܒܪ ܒܡܕܝܢܬܐ ܒܝܢܬ ܟܠܗ ܥܡܐ܇ ܕܢܐ̣ܙܠ ܘܢܬܚ̣ܒܫ ܚܠܦ ܫܪܪܐ ܕܗܝܡܢܘܬܐ. ܟܕ ܪܗ̣ܝܛܝܢ ܐܟܠ̣ܘܣ ܣܓܝܐܐ ܕܢ̣ܚܙܘܢ ܠܣܩ̇ܠܪܐ ܕܡ̇ܠܟܬܐ܇ ܕܫܠ̣ܚ ܘܫ̣ܕܐ ܫܘܠܛܢܗ ܕܥܠܡܐ܇ ܘܕܒܝ̣ܪ ܠܚܒ̣ܘܫܝܐ ܕܚܠܦ ܗܝܡܢܘܬܐ ܕܫܪܪܐ.܀.܀. ܐ̣ܝܟܢܐ ܕܟܕ ܟܠܢܫ ܬܗ̇ܝܪ ܗܘܐ ܒܗ: ܘܣܓ̈ܝܐܐ ܫ̇ܒܚܘ ܠܐܠܗܐ ܕܚ̇ܝܠܗ ܕܗܟܢܐ ܢܒ̇ܣܪ ܥܠ ܥܠܡܐ: ܘܐܫܬ̇ܪܪܘ ܒܗܝܡܢܘܬܐ ܣܓ̈ܝܐܐ: ܕܗܟܢܐ ܚ̇ܙܝܢ ܗܘܘ ܠܗ ܕܦ̣ܨܝܚ ܘܚ̇ܕܐ܆ ܘܡ̇ܫܒܚܝܢ ܠܐܠܗܐ. ܕܝܕ̈ܝܐ ܕܝܢ ܘܐܚܪ̈ܢܐ ܗ̇ܢܘܢ ܕܕܒܝ̣ܪܝܢ ܗܘܘ ܠܗ܆ ܡܬܬ̣ܠܝܢ ܗܘܘ ܒܟ̣ܘܣܝܬܐ ܕܒܐ̣ܪܘܢܗ ܕܢܚ̇ܦܐ ܪܝܫܗ. ܘܗ̣ܘܓ̇ܠܐ ܗܘܐ ܠܗ̣̇ ܟܕ ܐܡ̇ܪ܆ ܕܠܝ ܫܘܒ̇ܗܪܐ ܗܘ ܪܒܐ܇ ܕܡܛܠ ܫܪܪܗ ܕܡܫܝܚܐ ܐ̇ܡܘܬ܆ ܘܕܠܐ ܐܢܫ ܫܘܒ̇ܗܪܝ ܢܣ̇ܪܩ. ܘܗܟܢܐ ܐ̣ܙܠ ܘܐܬܚܒ̣ܫ ܒܗ̇ ܒܕܝܪܐ̣ ܙܒܢܐ ܕܬܠܬ ܫ̈ܢܝܢ. ܘܗܟܢܐ ܒܚܪܬܐ ܒܬܪ ܡ̇ܪܕܘܬܐ܆ ܐܫܬܪܝ̣ ܘܐܫܬ̣ܒܩ ܠܒܪ ܡܢ ܦܠܛܝܢ. ܪܝܫܐ ܕܥܣܪܐ܆ ܕܥܠ ܡ̇ܪܚܡܢܝܬܐ ܣܘ̣ܦܝܐ ܡ̇ܠܟܬܐ ܕܐܪܬܕܘܟܣܬܐ ܗܘܬ. ܏ܝ ܡܢ ܙܒ̈ܢܝܗ̇ ܙܒ̈ܢܝܗ ܗܟܝܠ ܕܢܝ̣ܚܬ݀ ܢܦܫܐ ܬܐܕܘܪܐ ܡ̇ܠܟܬܐ ܚܠ̣ܬܗ̇: ܘܐܦ ܗܝ̣ ܡܪܚܡܢܝܬܐ ܣܘ̣ܦܝܐ ܡ̇ܠܟܬܐ܆ ܡܢ ܙܒ̈ܢܝ ܥܠܝܡܘܬܗ̇ ܘܥܕܡܐ ܠܬܠܬ ܫ̈ܢܝܢ ܕܩܕܡ ܕܬ̇ܡܠܟ܆ ܥܡ ܐܖ̈ܬܕܟ̣ܣܘ ܫ̇ܩܠܐ ܗܘܬ ܩܘ̣ܪܒܢܐ. ܟܕ ܠܓܡ̣ܪ ܡܢ ܟܠܗ̇ ܫܘܬ̇ܦܘܬܐ ܕܥܡ ܣܘܢܗ̈ܕܝܛܐ܇ ܗ̇ܢܘ ܕܝܢ ܕܬܪ̈ܝܝ ܟܝ̈ܢܐ ܥ̇ܪܩܐ ܗܘܬ. ܗܕܐ ܕܟܠ ܐܢܫ ܝ̇ܕܥ ܠܗ̇ ܓܠܝ̣ܐܝܬ. ܟܕ ܐܦ ܩܫܝܫܐ ܚܕ ܕܫܡܗ ܗܘܐ ܐܢܕܪܐܘܣ܇ ܥܐ̇ܠ ܥܐ̇ ܗܘܐ ܘܡ̇ܩܪܒ ܒܒܝܬܗ̇. ܘܝܗ̇ܒ ܗܘܐ ܠܗ̣̇ ܘܠܟܠܗܘܢ ܒ̈ܢܝ ܒܝܬܗ̇. ܘܡܐ ܕܡ̇ܚܡܠ ܗܘܐ ܩ̣ܘܪܒܢܐ܆ ܚ̣ܕܐ ܡ̇ܪܓܢܝܬܐ ܐܡ̇ܪܐ ܗܘܬ ܠܗ ܕܢܗܘܐ ܫ̇ܒܩ ܒܦ̣ܝܢܟܐ ܘܣܐ̇ܡ ܬܚ̣ܝܬ ܦ̣ܪܣܐ. ܟܕ ܐܢܫ ܐܚܪܝܢ ܠܐ ܝ̇ܕܥ ܗܘܐ܇ ܕܡ̣ܢܘ ܗ̇ܘ ܕܢܣ̇ܒ ܠܗ̇ ܠܡ̇ܪܓܢܝܬܐ ܗܝ̇ ܕܦܝ̇ܫܐ ܗܘܬ܆ ܐܠܐ ܐܢ ܗܝ̣ ܦܛܪܝܩܝܐ ܣܘ̣ܦܝܐ. ܘܡܢ ܗܕܐ ܡܣ̣ܬܒܪ ܗܘܐ ܠܟܠܢܫ܆ ܕܗ̣ܘ ܡ̇ܪܚܡܢܐ ܝܘܣܛܝܢܐ ܫ̇ܩܠ ܗܘܐ ܠܗ̇ ܒܟ̣ܣܝܐ܇ ܟܕ ܥ̇ܪܩ ܘܐܦ ܗ̣ܘ ܡܢ ܫܘܬ̇ܦܘܬܐ ܕܬܪ̈ܝܝ ܟ̈ܝܢܐ. ܗܕܐ ܕܚ̣ܢܢ ܕܢܣ̣ܗܕ ܥܠ ܫܪܪܗ̣̇ ܠܐ ܡܨ̣ܝܢܢ. ܐܠܐ̣ ܡܢ ܫܡ̣ܥܐ ܕܡܣ̣ܒܪܢܘܬܐ ܕܥܡ ܟܠܢܫ̣ ܠܘܬ ܪܘܫܡ̣ܐ ܐ̇ܝܬ̣ܝܢܗ̇.܀. ܗܝ̇ ܕܝܢ ܕܗܝ̣ ܠܫܘܬ̇ܦܘܬܐ ܕܬܖ̈ܝܝ ܟܝ̈ܢܐ ܐܬ̣ܬ: ܡܢ ܥܠ̣ܬܐ ܗ̣ܘܬ̣ ܕܕܐܝܟ ܗܕܐ. ܕܟܕ ܠܣܓ̈ܝܐܐ ܡܦ̣ܝܣܝܢ ܗܘܘ ܕܢܦܝ̣ܣܘܢܝܗܝ ܠܢܝ̣ܚ ܢܦܫܐ ܝܘܣܛܝܢܝܢܐ: ܕܢܥ̣ܒܕܗ ܠܝܘܣܛܝܢܐ ܒܪ ܚܬܗ ܩܣ̣ܪ܆ ܗ̣ܘ ܕܝܢ ܒܗܕܐ ܡ̇ܗܡܐ ܗܘܐ̣ ܘܡ̇ܫܕܐ ܠܟܠܢܫ. ܒܚܪܬܐ ܕܝܢ ܐ̣ܙܠ ܠܘܬܗ̇ ܬܐܕܘܪܐ܇ ܗ̇ܘ ܕܥܒ̣ܝܕ ܗܘܐ ܐܦܝܣܩܘܦܐ ܒܩܣܪܝܐ܇ ܗ̇ܘ ܕܐܠܗܐ ܒܠܚܘܕ ܝ̇ܕܥ ܠܗ ܠܓܙܪ ܕܝ̣ܢܐ ܕܥܠܘܗܝ܇ ܡܛܠ ܒܝ̣̈ܫܬܗ ܣܓ̈ܝܐܬܐ܆ ܘܐܡ̣ܪ ܠܗ̇. ܕܗܘ̣ܝܬܘܢ ܝ̇ܕܥܝܢ܆ ܕܟܕܘ ܠܐ ܕܠܐ ܫܡ̇ܥ ܠܐܢܫ ܬܐ̣ܝܘܣ ܕܝܠܟܘܢ ܘܥ̇ܒܕ ܠܗ ܠܒܪ ܚܬܗ ܩܝܣܪ. ܥܠ ܕܡܥ̣ܩ ܠܘܬܟ̇ܝ ܕܥ̣ܒܕܬܝ ܠܩ̣ܘܒܠܗ܇ ܘܥܡ ܗܠܝܢ ܕܠܩ̣ܘܒܠܗ ܡܬܩ̣ܪܒܬ̇ܝ܇ ܘܥܡܗ ܠܐ ܡܬܩ̣ܪܒܬ̇ܝ. ܘܐ̇ܝܟܢ ܐܝܬ ܠܗ ܕܢܝܬܟܘܢ ܠܕܪܓܐ ܕܡ̇ܠܟܘܬܐ ܥܡܗ܇ ܟܕ ܠܩܘ̣ܒܠܗ ܡܬ̣ܚܙܝܢ ܐܢܬܘܢ ܕܐܝ̣ܬܝܟܘܢ. ܐܠܐ ܫܡ̣ܥܝܢܝ ܘܙܠ̣ܝ ܐܬ̇ܩܪܒܝ ܒܥܕܬܐ܆ ܘܡܢ̣ܝܚܬܝ ܠܗ ܠܡ̇ܠܟܐ܆ ܘܡܢ̣ܝܚ ܠܟܘܢ̣ ܐܦ ܗ̣ܘ. ܘܗܟܢܐ ܠܗܢܐ ܐܬܛܦܝ̣ܣܬ݀܆ ܐܬܛܦܝ̣ܣܬ݀ܝ ܘܩܕܡ ܬܠܬ ܫ̈ܢܝܢ ܒܠܚܘܕ ܕܬ̇ܡܠܟ܆ ܐܬܩ̣ܪܒܬ݀ ܐܬܩ̣ܪܒܬ݀ܝ ܒܣܘܢܗܕܘܣ̣ ܠܫ̈ܢܝܐ ܣܓܝܐ̈ܬܐ.܀. ܪܝܫܐ ܕܚܕܥܣܪ̈܆ ܕܥܠ ܬܠܬܐ ܗ̈ܘܦܛܘ ܕܥ̇ܙܝܘ ܘܐܦ ܗ̣ܢܘܢ ܘܩܡ̣ܘ ܒܫܪܪܗܘܢ ܚܝܠܬܢܐܝܬ. ܏ܝܐ ܗܠܝܢ ܗܟܝܠ ܬܠܬܐ ܗܘ̈ܦܛܘ ܕܫܡ̈ܗܝܗܘܢ ܝܘܚܢܢ ܘܦܛܪܘܣ̣ ܘܐ̣ܘܕܡܘܢ: ܟܕ ܥܠ ܚܝܝ̈ܗܘܢ ܦܓܪ̈ܢܐ ܒ̇ܣܪܘ ܡܛܘܠ ܚ̈ܝܐ ܪ̈ܘܚܢܐ ܕܚܠܦ ܗܝܡܢܘܬܐ ܫܪܝܪܬܐ ܕܒܡܫܝܚܐ: ܘܥ̇ܙܝܘ ܘܩܡ̣ܘ ܘܚ̇ܘܝܘ ܢܦܫܗܘܢ̣: ܕܠܐ ܢܫܬ̇ܘܬܦܘܢ ܠܡ̈ܦ̇ܠܓܢܘܗܝ ܕܡܫܝܚܐ: ܘܗ̣ܘܐ ܥܠܝܗܘܢ ܪܘܓܙܐ ܕܡ̇ܘܬܐ ܘܗ̣ܦܟ ܐ̈ܦܐ ܕܡܢܗܘܢ: ܗ̇ܢܘܢ ܕܟܕ ܡܟܝܠ ܒܟܠܥܕܢ ܠܢ̣ܣܝܘܢܐ ܘܠܐܒ̇ܕܢܐ ܕܐܘ̈ܣܝܣ ܕܝܠܗܘܢ ܘܕܒ̈ܬܝܗܘܢ: ܘܕܟܠ ܕܩ̣ܢܝܢ ܡ̇ܣܟܝܢ ܗܘܘ܆ ܘܗ̇ܟܢܐ ܕܟܘܠܢܫ ܦܣ̣ܩܘ ܥܠܝܗܘܢ ܐܒ̇ܕܢܐ ܕܠܓܡ̣ܪ܆ ܐܠܗܐ ܣ̇ܬܪ ܐܢܘܢ܇ ܕܚ̣ܙܐ ܕܡܛܘܠ ܫܡܗ ܕܚܠܦ ܫܪܪܐ ܕܗܝܡܢܘܬܐ ܫܪܝܪܬܐ ܕܒܗ܇ ܡܬ̇ܟܬܫܝܢ ܥܡ ܡ̇ܘܬܐ.܀.܀. ܡܛܠ ܓܝܪ ܕܣܘܢܩ̣̈ܠܝܛܝܩܘ ܣ̈ܓܝܐܐ ܘܩܘܒܩܠܪ̈ܐ ܘܫܪܟܐ ܕܪ̈ܝܫܢܐ ܐܬܬܚ̣ܕܘ ܡܢ ܙܘ̇ܥܬܐ ܒܫܘܬ̇ܦܘܬܗܘܢ ܕܟܠܩ̈ܕܘܢܝܐ: ܘܪܛܢ̣ܐ ܕܡܛܠ ܩ̣ܛܝܪܐ ܘܐܢܢܩܐ ܕܗ̣ܘܬ ܠܣܓ̈ܝܐܐ ܐܫܬ̣ܡܥ ܠܗ ܠܡ̇ܠܟܐ: ܐܡ̣ܪ ܗܘܐ ܒܚܪܬܐ܆ ܠܥ̣ܝܢ ܣܘܢܩ̈ܠܝܛܘܣ ܟܕ ܒ̇ܥܐ ܕܢܚ̇ܘܐ ܢܦܫܗ: ܕܠܐ ܕܒ̇ܪ ܠܐܢܫ ܒܩ̣ܛܝܪܐ: ܟܕ ܟܠܢܫ ܒܩ̣ܛܝܪܐ ܕܠܐ ܗ̣ܘܐ ܕܩܫ̣ܐ ܡܢܗ ܕܒ̣ܝܪ ܗܘܐ: ܐܪܡ̣ܝ ܐܠܗܐ ܒܪܥܝܢܗ ܕܢܐ̣ܡܪ܆ ܕܗܟܢܐ ܠܡ܆ ܚ̣ܢܢ ܠܐܢܫ ܒܩܛܝܪܐ ܠܐ ܕܒ̣ܪܢ̣ ܘܠܐ ܕܒ̇ܪܝܢܢ. ܕܗܠܝܢ ܕܠܐ ܐܬܛܦܝܣ̣ܘ ܠܢ ܕܢܬ̇ܩܪܒܘܢ ܥܡܢ܆ ܫܒ̣ܩܢ ܐܢܘܢ̣ ܠܨܒܝܢܗܘܢ. ܘܗܕܐ ܡ̇ܚܫܒܬܐ ܘܡܠܬܐ ܐܪܘ̣ܚܬ݀ ܥܠ ܗܠܝܢ܆ ܘܠܐ ܐܬ̇ܢܣ̣ܝܘ ܒܡܕܡ ܒܫܪܒܐ ܕܗܝܡܢܘܬܐ. ܐܠܐ ܒܚܪܬܐ ܘܠܪ̈ܝܫܢ̣ܘܬܐ ܐܬܘ̣ ܘܠܦܪܗܣܝܐ ܪܒܬܐ. ܐ̣ܝܟܢܐ ܕܡ̇ܫܒܚܐ ܐ̣ܘܕܡܘܢ܆ ܕܩܘ̣ܡܝܣ ܩܘ̣ܡܝܣ ܕܦ̣ܪܝܒܛܘܢ ܗ̣ܘܐ. ܘܡ̇ܫܒܚܐ ܝܘܚܢܢ ܕܐ̣ܝܬܘܗܝ ܡܢ ܓܢ̣ܣܗ ܕܐܢܣܛܣ ܡ̇ܠܟܐ: ܘܒܪ ܒܪܬܗ̇ ܬܘܒ ܕܬܐܕܘܪܐ ܡ̇ܠܟܬܐ܆ ܗ̣ܢܘܢ ܘܦܛܪܘܣ ܕܐܦ ܗ̣ܘ ܡܢ ܓܢ̣ܣܐ ܕܒܝܬ ܦܛܪܐ ܦܛܪܝܩܝܣ ܘܩܘܪܛܘܪ ܕܡ̇ܠܟܬܐ܆ ܐܫܬ̇ܕܪܘܢ ܗ̣ܢܘܢ ܒܚܪܬܐ܇ ܕܢܥ̣ܒܕܘܢ ܛܪ̣ܩܛܛܐ ܚܠܦ ܟܘܠܗ̇ ܦܘܠܝܛܝܐ ܕܪ̈ܗܘܡܝܐ ܥܡ ܦܪ̈ܣܝܐ. ܟܕ ܐ̇ܚ̣ܝܕܝܢ ܫܪܪܗܘܢ ܐܝܟ ܕܡܢ ܒܪܫܝܬ̣ ܒܦܪܗܣܝܐ ܪܒܬܐ. ܝܘܚܢܢ ܕܝܢ ܦܛܪܝܪܟܐ ܫܩ̣ܠ ܗܘܐ ܫܡ̈ܗܝܗܘܢ ܡܢ ܕܦ̣ܛܝܟܘܢ. ܕܘܦ̣ܛܝܟܘܢ ܘܗܝ̣ ܗܕܐ ܚ̇ܕܘܬܐ ܪܒܬܐ ܥܒ̣ܕܬ݀ ܠܗܘܢ ܟܕ ܐܡ̇ܪܝܢ܆ ܕܗܫܐ ܗܘ ܝ̣ܕܥܢ ܕܨܒ̣ܐ ܒܢ ܐܠܗܐ܇ ܘܚ̣ܪ ܒܢ ܕܠܐ ܢܬܕܟܪ ܥܠ ܩ̣ܘܪܒܢܐ ܕܗܠܝܢ ܕܡ̇ܦܠܓܝܢ ܠܡܫܝܚܐ ܠܬܪ̈ܝܢ܇ ܡܢ ܒܬܪ ܚܕܝܘܬܐ ܫܪܝܪܬܐ ܘܠܐ ܡܬ̇ܦܠܓܢܝܬܐ.