ܪܝܫܐ ܕܬܠܬܝܢ ܘܬܪ̈ܝܢ܆ ܥܠ ܐ̣ܝܠܝܢ ܕܡܢ ܐ̇ܪܟܝܕܝܩܘܢ ܕܪܗܘܡܐ ܩܕܡ ܡ̇ܠܟܐ ܩܢܘܢܐܝܬ ܒܦܪܗܣܝܐ܇ ܡܛܠ ܝܘܚܢܢ ܘܐ̣ܘܛܘܟܐ ܩܕܡ ܡ̇ܥܠܬܗ ܐܬ̈ܡ̇ܠܠܝ. ܏ܠܒ ܐܠܗܐ ܢܚܣ̣ܐ ܠܗ̣ ܫܦܝܪ ܐܡ̣ܪ ܘܠܐ ܐܬܩ̇ܒܠ ܐ̇ܪܟܝܕܝܩܘܢ ܗܟܝܠ ܕܪܗܘܡܐ ܡܢ ܒܬܪ ܕܡܝ̣ܬ ܝܘܚܢܢ ܣ̣ܪܡܝܐ: ܘܐܬ̣ܩܪܝ ܘܥ̣ܠ ܐ̣ܘܛܘܟܐ܆ ܒܦܪܗܣܝܐ ܣܓܝܐܬܐ ܐܡ̣ܪ ܩܕܡ ܡ̇ܠܟܐ̣ ܗܟܢܐ܆ ܕܗܘܬ ܠܡ ܝ̣ܕܝܥܐ ܠܡ̇ܪܚܡܢܘܬ̇ܟܘܢ܆ ܕܐܝܟ ܕܡܢ ܩ̈ܢܘܢܐ ܘܛܟ̣ܣ̈ܐ ܥܕ̈ܬܢܝܐ܆ ܐܢ ܝܘܚܢܢ ܦܛܪܝܪܟܐ ܗܘܐ:  ܘܟܠܡܕܡ ܐܝܟ ܦܛܪܝܪܟܐ ܣܥ̣ܪ ܟܠ ܝܘ̈ܡܝ ܚܝ̈ܘܗܝ܆ ܐ̣ܘܛܝܟ ‏    ܦܛܪܝܪܟܐ̣ ܠܐ ܐ̣ܝܬܘܗܝ. ܘܕܢܥ̣ܘܠ ܠܥܕܬܐ ܘܢܠ̣ܒܘܟ ܬ̣ܪܘܢܘܢ܆ ܠܐ ܡ̣ܨܐ̣ ܠܓܡ̣ܪ. ܐܢ ܕܝܢ ܬܘܒ ܐ̣ܘܛܝܟ ܡܬ̇ܩܒܠ ܘܥܐ̇ܠ ܐܝܟ ܦܛܪܝܪܟܐ: ܘܠܒ̇ܟ ܬ̣ܪܘܢܘܢ܆ ܝܘܚܢܢ ܘܟܠܡܕܡ ܕܗܘ̣ܐ ܡܢܗ̣ ܠܒܪ ܡܢ ܟܠܗ̇ ܥܕܬܐ ܐ̣ܝܬܘܗܝ. ܘܒ̇ܛܝܠ ܟܠ ܡܕܡ ܕܗ̣ܘܐ ܡܢܗ. ܘܐܢ ܐܦܝܣܩܦܐ ܘܐܢ ܫܪܟܐ ܕܟܠܗ̇ ܟܪܘܛܢܝܐ ܕܝܠܗ. ܘܐܢ ܡ̇ܥܡܘܕܝܬܐ ܐ̇ܥܡ̣ܕ܆ ܘܐܢ ܥܕܬܐ ܩ̇ܕܫ. ܘܐܢ ܡܕܒܚܐ̣ ܥܡ ܫܪܟܐ ܕܟܠܗܝܢ ܐܝܠܝܢ ܕܡܢܗ ܗ̈ܘ̣ܝ܆ ܫ̣ܪ̈ܝ̣ܢ ܘܒ̈ܛܝܠܢ. ܐ̣ܝܟܢܐ ܕܐܦ ܫܡܗ ܕܝܠܗ ܠܚ̣ܐ܆ ܘܡ̣ܟܪܙ ܡܢ ܥܕܬܗ ܕܐܠܗܐ܆ ܘܢ̇ܦܝܩ ܡܢ ܟܠܗ ܛܟ̣ܣܐ ܕܟܗܢܘܬܐ. ܘܝܬ̇ܝܪܐܝܬ̣ ܡܛܠ ܗܝ̇ ܕܬܪ̈ܝܗܘܢ ܚܕ ܠܚܕ ܫ̣ܪܘ ܘܐܚ̣ܪܡܘ ܡܢ ܥܕܬܐ܇ ܥܡ ܟܠ ܕܡܫܬ̇ܘܬܦܝܢ ܠܗܘܢ. ܘܚܕ ܡܢܗܘܢ ܐܝܟ ܕܡܢ ܩ̈ܢܘܢܐ܆ ܫ̣̇ܪܐ ܗܘ ܘܒ̇ܛܝܠ ܘܒ̇ܛܝܠ ܗܘ ܘܢ̇ܦܝܩ ܡܢ ܥܕܬܐ.܀. ܐ̣ܝܟܢܐ ܕܟܕ ܗܠܝܢ ܟܠܗܝܢ ܡ̇ܠܠ ܐ̇ܪܟܝܕܝܩܘܢ ܩܕܡ ܡ̇ܠܟܐ: ܘܐܡ̣ܪ ܕܦܦܐ ܠܡ ܕܪܗܘܡܐ ܐܚܪܢܝܐܝܬ ܠܐ ܡܩ̇ܒܠ܆ ܐܬܟ̣ܐܝ ܒܗ ܩܫ̣ܝܐܝܬ܆ ܕܢܫܠ̣ܐ ܘܢܗ̇ܡܐ ܡܢ ܐ̇ܩ̣ܪܒܝܐ ܕܩ̈ܢܘܢܐ. ܘܗܟܢܐ ܫܠ̣ܐ̣ ܘܐ̇ܗ̣ܡܝ. ܘܛܟ̣ܣܐ ܕܩ̈ܢܘܢܐ̇ ܐܬ̣ܕܝܫ̣ ܘܐܬܥ̣ܒܪ. ܪܝܫܐ ܕܬܠܬܝܢ ܘܬܠܬܐ܆ ܥܠ ܗܝ̇ ܕܟܕ ܐܬܩ̣ܪܝ ܐ̣ܘܛܝܟ̣ ܠܟܠܢܫ ܣܒ̣ܝܪܐ ܗܘܬ܇ ܕܠܐ ܡܬ̇ܩܒܠ ܗܘܐ ܕܢܥ̣ܘܠ ܘܢ̣ܬܒ ܩܕܡ ܕܬܬ̇ܟܢܫ ܣܘܢܗܕܣ܇ ܘܬ̣̇ܬܒ ܘܬ̇ܒܚܢ ܟܠܗܝܢ ܐܝܠܝܢ ܕܡܢܗ ܘܡܢ ܝܘܚܢܢ ܠܘܬ ܚ̈ܕܕܐ ܐܣܬ̣ܥܖ̈ܝ. ܏ܠܓ ܟܕ ܓܝܪ ܠܟܠܢܫ ܐܣܬܒ̣ܪܬ݀: ܕܒܥ̇ܬܐ ܪܒܬܐ ܥܬܝܕ ܗܘܐ ܐ̣ܘܛܝܟ ܕܢܥ̣ܒܕ: ܟܕ ܐܬܩ̣ܪܝ ܘܥ̣ܠ܆ ܣܠ̣ܩ ܥܠܘܗܘܢ ܒܪܝܫܗܘܢ ܣܠܩ ܝܬ̣ܒ ܥܠ ܬ̣ܪܘܢܘܣ ܕܠܐ ܚ̣ܪܝܢ܆ ܟܕ ܬܛ̣ܪܐ ܕܠܝ̣ܚܐ ܕܚ̣ܪ̈ܡܝܗܘܢ ܕܠܘܬ ܚ̈ܕܕܐ܇ ܗ̇ܢܘ ܕܝܢ ܕܝܘܚܢܢ ܘܕܝܠܗ  ܐܫ̣ܬܝܘ ܘܐ̇ܡ̣ܨܝܘ ܬܪ̈ܝܗܘܢ ܓ̇ܒ̈ܐ܇ ܥܡ ܐܝܠܝܢ ܕܡܫܬ̇ܘܬܦܝܢ ܠܗܘܢ܇ ܐ̣ܝܟܢܐ ܕܐܦ ܐܚ̣ܪܡܘ. ܕܥܠ ܗܠܝܢ ܬܡ̣ܗܐ ܐܚ̣ܕ ܠܟܠܢܫ. ܪܝܫܐ ܕܬܠܬܝܢ ܘܐܪ̈ܒܥܐ܆ ܕܥܠ ܝܘ̈ܩܢܘܗܝ ܕܝܘܚܢܢ ܕܐ̇ܚ̣ܬ ܐ̣ܘܛܝܟ܆ ܘܥܠ ܟܠܗܘܢ ܩ̇ܪ̈ܝܒܘܗܝ ܕܫ̇ܦ̣ܠ ܘܫ̣ܕܐ. ܏ܠܕ ܟܕ ܗܟܝܠ ܥ̣ܠ ܘܠܒ̣ܟ ܐ̣ܘܛܝܟ: ܘܡܢ ܒܥ̇ܬܐ ܩܢܘܢܝܬܐ ܐ̇ܗ̣ܡܝ: ܟܕ ܕܚ̇ܠ ܕܕܡ̣ ܡܢ ܗܕܐ ܣܩ̣ܘܒܠܐ ܡܕܡ ܢܬܬܥܝܪ ܠܩ̣ܘܒܠܗ ܘܢܘ̇ܒܕ ܐ̣ܘܪܝܗ܆ ܗ̇ܝ ܕܝܢ ܣܢܐ̣ܬܗ ܘܛܢ̣ܢܗ ܕܠܘܬܗ ܚ̇ܘܝ: ܟܕ ܦܩ̣ܕ܆ ܕܝܘܩ̈ܢܘܗܝ ܟܠܗܘ  ܢ ܢܬ̇ܥܩܪܘܢ̣ ܘܢ̇ܦܩܘܢ ܡܢ ܒܝܬ ܐܦܝܣܩܦܝܘܢ܇ ܗ̇ܘ ܕܗ̣ܘ ܝܘܚܢܢ ܒܬܪ ܝܩ̣ܕܢܗ ܒܢ̣ܝܗܝ ܗܘܐ ܪܘܪܒܐܝܬ. ܘܝܘܩ̈ܢܘܗܝ ܡܢܗ ܘܡܢ ܟܠܕܘܟ܆ ܡܬ̣ܠܚܝܢ ܗܘܘ̣ ܘܡܬܥ̇ܩܪܝܢ. ܘܫܡܗ ܡܢ ܕܢܬܟ̣ܪܙ ܡܫܬ̇ܠܐ ܗܘܐ܆ ܥܕܡܐ ܕܗܕܐ ܥܠ ܡ̇ܠܟܐ ܠܐ ܫܦ̣ܪܬ݀ ܕܢܒ̣ܛܠ ܫܡܗ. ܘܠܟܠܗܘܢ ܐܢܫܐ ܩ̇ܪ̈ܝܒܘܗܝ ܕܗ̇ܘ ܘܒ̈ܢܝ ܓܢ̣ܣܗ ܛ̣ܪܕ̣ ܘܫ̇ܦ̣ܠ. ܘܨ̇ܥܪ̈ܐ ܘܨ̣ܘܚ̈ܝܬܐ̣ ܒܗ ܙ̇ܠܚ ܗܘܐ. ܘܟܠ ܐ̇ܝܢܐ ܕܨ̇ܒܐ ܕܢܫ̣ܬܦܪ ܠܗ܆ ܟܕ ܚ̣ܙܘ ܦܫ̣ܘܪܘܬܗ̣ ܠܝܘܚܢ̣ܢ ܩܕܡܘܗܝ ܡ̇ܨܚܝܢ ܗܘܘ. ܘܗ̣ܘ ܗ̇ܢܝܐ̣ܝܬ ܫ̇ܡܥ ܗܘܐ. ܒܚܪܬܐ ܠܗܕܐ ܟܠܗ̇ ܫ̇ܛܘܪܘܬܐ ܢܦ̣ܩ: ܐ̣ܝܟܢܐ ܕܓܠܝ̣ܐܝܬ ܠܥ̣ܝܢ ܟܠܢܫ ܢܐ̣ܡܪ܆ ܕܝܘܚܢܢ ܠܡ̣ ܠܘ ܐܦܝܣܩܘܦܐ ܐ̣ܝܬܘܗܝ ܗܘܐ ܕܩܘܣܛܢܛܝܢܦܘܠܝܣ܇ ܐܠܐ ܠܡ ܢܛ̇ܪ ܕܘܟܬܐ ܕܝܠܝ܇ ܟܕ ܗ̣ܘ ܢܘܟܪܝܐ ܗܘܐ.܀. ܘܗܠܝܢ ܟܕ ܡ̇ܡܝܩܝܢ ܟܠܗܘܢ ܐܝܠܝܢ ܕܫ̇ܡܥܝܢ܇ ܕܝ̇ܕܥܢ ܗܘܘ ܕܢܦ̣ܩ ܗܘܐ ܗ̣ܘ ܘܐܫ̣ܬܕܝ܇ ܘܝܘܚܢܢ ܗܘ̣ܐ ܚܠܦܘܗܝ܇ ܘܝܬ̣ܒ ܘܥܒ̣ܕ ܩ̇ܬܪܣܝܣ ܕܝܠܗ. ܪܝܫܐ ܕܬܠܬܝܢ ܘܚܡܫܐ܆ ܕܥܠ ܟܬ̈ܒܐ ܕܪܒܝܥ̣ܝܘܬܐ܇ ܗ̇ܢܘ ܕܝܢ ܕܬܪ̈ܝܝ ܟܝ̈ܢܐ ܕܡܢ ܒܬܪ ܚܕܝܘܬܐ܇ ܕܥܒ̣ܕ ܗ̣ܘ ܐ̣ܘܛܝܟ ܟܕ ܐ̣ܝܬܘܗܝ ܒܐ̣ܟܣܘܪܝܐ. ܏ܠܗ ܟܕ ܓܝܪ ܗ̣ܘ ܐ̣ܘܛܝܟ ܒܐܟ̣ܣܘܪܝܐ ܠܒܪ ܒܕܝܪܗ ܐ̣ܝܬܘܗܝ ܗܘܐ܆ ܟܬ̈ܒܐ ܕܢܘ̇ܬ̈ܫܐ ܐܝܟ ܦܝ̇ܣܐ ܕܡܢ ‏  ܐܒ̈ܗܬܐ ܢܬ̣̇ܫ ܘܣ̣ܡ܇ ܕܡ̇ܠܦ ܪܒܝ̣ܥܝܘܬܐ ܚܠܦ ܬܠܝܬܝܘܬܐ ܩܕܝܫܬܐ܇ ܒܕܡ̣ܘܬܗ̇ ܕܣܘܢܗܕܘܗ ܕܟܠܩܕܘܢܐ܇ ܘܕܛܘ̣ܡܣܗ ܪܫܝ̣ܥܐ ܕܠܐܘܢ. ܗ̇ܢܘ ܕܝܢ ܘܐܦ ܗ̣ܘ ܒܕܡ̣ܘܬܗܘܢ ܕܗܠܝܢ ܡ̇ܠܦ ܟܕ ܐܡ̇ܪ܇ ܕܬܪ̈ܝܢ ܠܡ ܟܝ̈ܢܝܢ ܐ̣ܝܬܝܗܘܢ ܒܡܫܝܚܐ܆ ܘܐܦ ܡܢ ܒܬܪ ܚܕܝܘܬܐ. ܗܟܢܐ ܠܡ̣ ܘܐܦ ܟܠܗܘܢ ܐܒ̈ܗܬܐ ܡ̇ܘܕܝܢ. ܐ̣ܝܟܢܐ ܕܡܚ̣ܕܐ ܡܢ ܒܬܪ ܕܥܠ ܘܐܝ̣ܬܒ ܥܠ ܟܘܪܣܝܗ܆ ܚܦܝ̣ܛܐܝܬ ܘܝܨ̇ܝܦܐܝܬ̣ ܫ̇ܪܝ ܡܫ̇ܕܪ ܠܗܘܢ ܠܟܬ̈ܒܘܗܝ ܠܘܬ ܟܠܗܘܢ ܪ̈ܘܪܒܢܐ ܘܢܫ̈ܐ ܝܕܝܥ̈ܬܐ. ܟܕ ܬ̇ܒܥ ܠܗܘܢ ܕܢܩ̣ܪܘܢ ܘܢܬ̇ܒܝܢܘܢ܆ ܕܬܪ̈ܝܢ ܟܝ̈ܢܝܢ ܢܗܘܘܢ ܡ̇ܘܕܝܢ. ܘܝܬ̇ܝܪܐܝܬ ܘܚܦ̣ܝܛܐܝܬ ܠܗܠܝܢ ܡ̇ܫܕܪ ܗܘܐ܆ ܠܘܬ ܐܝܠܝܢ ܕܟ̣ܫܝܠܝܢ ܗܘܘ ܒܬܘܕܝܬܐ ܕܬܪ̈ܝܝ ܟܝ̈ܢܐ܇ ܟܕ ܒܬܘܕܝܬܐ ܕܚܕ ܟܝܢܐ ܡ̇ܓܫܡ̣ܐ܇ ܥܡ ܟܠܗܘܢ ܐܒ̈ܗܬܐ ܡ̇ܘܕܝܢ ܗܘܘ. ܐ̣ܝܟܢܐ ܕܟܕ ܣܓ̈ܝܐܐ ܩ̣ܪܘ ܘܐܗ̣ܠܘ ܒܦܫ̣ܘܪܘܬܗ̣ ܘܐܦ ܐܦܝܣ̈ܩܦܐ ܕܝܠܗ ܘܫܪܟܐ: ܘܫ̣ܪܝܬ݀ ܟܘܠܗ̇ ܡܕܝܢܬܐ ܡܫܬ̇ܓܫܐ: ܘܝܬܝܪܐܝܬ ܟܠܗܘܢ ܐܝܠܝܢ ܕܠܐ ܐܫ̣ܬܝܘ ܗܘܘ ܡܢ ܬܛ̣ܪܐ ܕܠܝ̣ܚܐ ܕܡ̣ܪܬܗ  ܕܢܣܛܘܪܝܣ܆ ܩܫ̣ܝܐܝܬ ܡ̇ܪܛܢܝܢ ܗܘܘ ܥܠܘܗܝ܆ ܘܝܬܝܪܐܝܬ̣ ܡܢ ܐܦܝ̈ܣܩܦܐ ܕܝܠܗ. ܥܕܡܐ ܠܐ̣ܝܟܐ ܕܠܫ̇ܓܫܐ ܘܪܘ̣ܒܐ ܣܓܝܐܐ ܢܬܬ̣ܥܝܪܘܢ ܠܩ̣ܘܒܠܗ. ܐ̣ܝܟܢܐ ܕܢܬ̇ܟܢܫܘܢ ܠܒܝܬ ܐܦܝܣܩܦܝܘܢ ܘܢܐ̣ܡܪܘܢ ܠܗ܆ ܕܬܗܘܐ ܠܡ ܝ̇ܕܥ܆ ܕܐܢ ܠܐ ܡ̇ܚܡ̣ܠܬ ܟܬ̈ܒܝܟ ܘܫ̇ܠܝܬ ܡܢ ܗܕܐ ܬܪܥܝܬܐ܆ ܣ̣ܕܩܐ ܥ̇ܒܕܬ ܒܥܕܬܗ ܕܐܠܗܐ܆ ܘܐܦ ܒܢ ܕܝܠܢ. ܘܗܟܢܐ ܚ̇ܡ̣ܠ ܐܢܘܢ ܠܟܬ̈ܒܘܗܝ̣ ܘܫ̣ܠܝ ܫܓܘ̣ܫܝܐ. ܟܕ ܗ̣ܘ ܒܗ̇ ܒܬܪܥ̣ܝܬܗ ܟܬ̇ܪ. ܪܝܫܐ ܕܬܠܬܝܢ ܘܫܬܐ܆ ܥܠ ܗ̇ܝ ܕܐܬܗ̣ܦܟ ܗܘܐ ܐ̣ܘܛܝܟ ܠܬܪܥܝܬܐ ܕܗܪܣܝܣ ܕܗܠܝܢ ܕܒܝܬ ܐ̇ܬܢܣܝܘܣ܇ ܕܐܡ̇ܪܝܢ ܕܠܐ ܩܝ̣ܡܝܢ ܗܠܝܢ ܦܓܪ̈ܐ܇ ܐܠܐ ܐܚܪ̈ܢܐ ܚܠܦܝܗܘܢ ܩܝ̣ܡܝܢ. ܏ܠܘ ܒܬܪ ܗܠܝܢ ܕܝܢ ܬܘܒ܆ ܗ̣ܘ ܥ̇ܫܝܢܐ ܐ̣ܘܛܝܟ: ܟܕ ܠܘܩܕܡ    ܒܓ̣ܢܣܗ ܡܢ ܗܪܣܝܣ ܕܣܡ̈ܒ̇ܛܝܢܐ ܐ̣ܝܬܘܗܝ ܗܘܐ܆ ܠܐ ܐ̇ܘܚ̣ܪ ܕܐܦ ܒܦ̣ܚܬܐ ܐܚܪܢܐ ܕܗܠܝܢ ܕܟ̇ܦܪܝܢ ܒܩܝ̣ܡܬܐ ܕܦܓܪ̈ܐ ܗ̣ܘ ܠܗ ܢܫ̣ܕܐ܆ ܟܕ ܡܠ̣ܝܛܐܝܬ ܘܚܦ̣ܝܛܐܝܬ ܘܐܦ ܠܝܘܠܦܢܐ ܗܢܐ ܢܬ̣ܪܡܐ܇ ܠܡ̇ܘܕܝܘ ܘܠܡ̇ܠܦܘ ܓܠܝ̣ܐܝܬ ܟܕ ܐܡ̇ܪ܇ ܕܗܠܝܢ ܠܡ ܦܓܪ̈ܐ ܕܒܢܝ̈ܢܫܐ܇ ܠܩܝ̣ܡܬܐ ܠܐ ܐ̇ܬܝܢ. ܐܠܐ ܠܡ ܐܚܪ̈ܢܐ ܕܚ̣ܕܬܐܝܬ ܡܬ̣ܒܪܝܢ܆ ܗ̣ܢܘܢ ܩܝ̣ܡܝܢ ܒܢܘܚܡܐ. ܘܗܠܝܢ ܠܘ ܒܡܠܬܐ ܫܚ̣ܝܡܬܐ ܡ̇ܠܦ܆ ܐܠܐ ܘܫ̣ܪ̈ܒܐ ܒܟ̈ܬ̣ܝܒܬܐ ܥ̣ܒܕ̣ ܘܐ̇ܦ̣ܩ ܕܡ̣ܣܝܣ. ܘܒܕܪܫ̇ܐ ܕܥܠ ܐ̈ܦܝ ܗܠܝ̣ܢ ܐ̇ܡ̣ܝܢ. ܟܕ ܬܘܒ ܘܐܦ ܡܛܘܠ ܗܕܐ܆ ܫܓ̇ܫܐ ܘܪܛܢ̣ܐ ܘܨܥ̇ܪ̈ܐ ܘܨ̣ܘܚ̈ܝܬܐ ܥܠܘܗܝ ܒܟܠܗ̇ ܡܕܝܢܬܐ ܢܬܬ̣ܥܝܪܘܢ. ܘܝܬܝܪܐܝܬ ܡܢ ܕܝܠܗ̣ ܘܒ̈ܢܝ ܗܝܡܢܘܬܗ. ܟܕ ܐܡ̇ܪܝܢ ܠܗ܆ ܕܐܢ ܠܐ ܬ̇ܫܠܐ ܡܢ ܝܘܠܦܢܐ ܗܢܐ܆ ܟܘܠܢ ܡ̇ܚܪܡܝܢܢ ܠܟ܇ ܘܐܦ ܠܐ ܗܟܢܐ ܐ̇ܗܦܟ̣ܘܗܝ ܡܢ ܬܪܥܝ̣ܬܗ. ܐܠܐ ܫܠ̣ܝ ܡܢ ܕܢ̇ܠܦ܆ ܟܕ ܟܠ ܐܢܫ ܐܝܟ ܗܪܛܝܩܐ ܐ̇ܚ̣ܝܕ ܗܘܐ ܠܗ܆ ܘܐܝܟ ܫ̇ܛܘܪܐ.