ܪܝܫܐ ܕܥܣܪ̈ܝܢ ܘܫܒܥܐ܆ ܥܠ ܗܝ̇ ܕܟܕ ܗ̣ܘ ܝܘܚܢܢ ܪܕ̇ܦ ܗܘܐ܇ ܘܥ̇ܩܪ ܗܘܐ ܘܡ̇ܚܬ ܟܠܗܘܢ ܝܘܩ̈ܢܐ ܕܐܒܗ̈ܬܐ ܐܪ̈ܬܕܟܣܘ ܡܢ ܟܠܗܝܢ ܕܝܪ̈ܬܐ܇ ܘܕܝܠܗ ܩ̇ܒܥ ܗܘܐ. ܏ܟܙ ܐܦ ܓܝܪ ܡܢ ܠܥܠ ܒܥܘ̣ܗܕܢܗ ܕܩܦܠܐܘܢ ܗܢܐ̣ ܒܙܥܘܪ̈ܝܬܐ ܐܬ̇ܚܫܚܢ. ܗܫܐ ܕܝܢ ܕܢܚ̇ܘܐ ܙܕ̇ܩ ܠܢ܆ ܥܠ ܓܙܪ ܕܝܢ̣ܗ ܟܐܢܐ ܕܐܠܗܐ܇ ܗ̇ܘ ܕܠܘ ܒܠܚܘܕ ܒܕܝܢ̣ܐ ܕܥ̣ܬܝܕ܇ ܐܠܐ ܘܐܦ ܡܢ ܗܪܟܐ ܚ̇ܘܝ ܦܘܪܥܢܘܬܐ  ܕܐܝܟ ܥ̇ܒ̈ܕܐ. ܟܕ ܓܝܪ ܝܘܚܢܢ ܕܡܕܝܢܬ ܡ̇ܠܟܘܬܐ: ܗܢܐ ܕܡܢ ܠܥܠ ܐܬܐ̣ܡܪ: ܚܐ̣ܦܐ ܕܒܥ̇ܪܝܪܝܘܬܐ ܪܟ̣ܝܒ ܗܘܐ: ܡܢ ܡ̇ܫܩܠܘܬܐ ܘܬ̇ܙܝܙܘܬܐ̣ ܐܝܟ ܛܠܝܐ ܥ̇ܠܝܡܐ ܢܬܝ̣ܦ ܗܘܐ: ܘܬܘܒ ܕܒܫܘܠܛܢܐ ܡ̣ܕܘܕ ܗܘܐ ܘܪܘܐ ܗܘܐ܆ ܟܕ ܪܕ̇ܦ ܘܟܒ̇ܫ ܕܝܪ̈ܬܐ ܘܐܦ ܥܕ̈ܬܐ ܥܕܬܐ ܕܐܪ̈ܬܕܟܣܘ܆ ܡ̇ܚܬ ܗܘܐ ܘܥ̇ܩܪ ܟܠܗܘܢ ܝܘܩ̈ܢܐ ܕܐܒ̈ܗܬܐ ܐܪ̈ܬܕܟܣܘ܆ ܘܝܘܩ̈ܢܘܗܝ ܕܝܠܗ ܒܟܠ ܕܘܟܐ ܩ̇ܒܥ ܗܘܐ ܘܡ̣ܩܝܡ. ܘܟܕ ܠܐ ܣ̇ܒܪ ܕܡܐ̇ܬ܆ ܒܥܓܠ ܐܕܪܟ̣ܗ ܩܨ̣ܐ ܕܥܘܢܕܢܐ܆ ܘܐܬ̣ܩܪܝ ܘܥܠ ܐ̣ܘܛܝܟ܇ ܗ̇ܘ ܕܡܢ ܩܕܡܘܗܝ ܐܫ̣ܬܕܝ ܗܘܐ܇ ܘܥ̣ܠ ܗ̣ܘ ܚܠܦܘܗܝ. ܗܢܐ ܕܟܕ ܗ̣ܘ ܡ̣ܝܬ ܘܗ̇ܘ ܐܬܩ̣ܪܝ ܘܥ̣ܠ: ܟܕ ܡܢ ܟܠܗܝܢ ܕܗ̈ܘ̣ܝ ܡܢ ܩܕܝܡ ܒܝܢܬܗܘܢ ܫܠ̣ܐ ܘܐܗ̣ܡܝ ܒܝܕ ܦܝ̇ܣܬܐ ܕܡ̈ܠܟܐ܆ ܠܝܘܩ̈ܢܘܗܝ ܕܝܠܗ ܕܝܘܚܢܢ ܗܠܝܢ ܕܒܟܠ ܕܘܟܐ ܣܓܝܐ̈ܝܢ ܗܘܘ܆ ܗ̣ܘ ܐ̣ܘܛܝܟ ܥܛ̣ܐ ܘܐ̇ܦ̣ܩ ܡܢ ܒܝܬ ܐܦܝܣܩܦܝܘܢ ܘܡܢ ܟܠܗܝܢ ܥܕ̈ܬܐ܆ ܥܕܡܐ ܠܚ̇ܕܚ̈ܕܢܐ ܕܒܕܘܟ ܕܘܟ ܡܬܛܥ̣ܝܢ ܗܘܘ ܘܡܫܬ̇ܟܚܝܢ. ܘܐܦ ܓܝܪ ܒܟܠܗܝܢ ܡ̈ܕܝܢܬܐ ܘܒܟ̣ܘܪ̈ܣ ܟܕ ܐܝ̣ܕܥܘ ܨܒܝܢܗ ܕܐ̣ܘܛܝܟ: ܡܛܠ ܕܠܐ ܢܬ̇ܩܛܪܓܘܢ܆ ܠܚ̣ܘ ܟܠܗܘܢ ܝܘܩ̈ܢܘܗܝ ܕܝܘܚܢܢ ܕܒܨܘܪܬܐ ܘܕܒ̇ܕܦ̈ܐ.  ܘܡ̣ܪܝܡܝܢ ܝܘܩ̈ܢܘܗܝ ܘܩ̇ܒܥܝܢ ܗܘܘ ܕܐ̣ܘܛܝܟ ܐܝܟ ܕܐܡ̣ܪܢ. ܥܕܡܐ ܠܙܥܘܪ̈ܐ ܕܒ̣ܕܝܪܐܝܬ ܡܫܬ̇ܒܩܝܢ ܗܘܘ. ܘܦ̣ܪܥܗ ܐܠܗܐ ܠܐܒܝܡܠܟ ܒܝ̣ܫܬܐ ܕܥܒ̣ܕ܇ ܘܩܛ̣ܠ ܘܩܛ̣ܠܘ ܠܐ̇ܚ̈ܘܗܝ ܫ̇ܒܥܝܢ ܓܒܪ̈ܝܢ ܥܠ ܟܐܦܐ ܚܕܐ. ܘܗܟܢܐ ܗܝ̣ ܗܕܐ ܗ̣ܘܬ ܠܬܡ̣ܗܐ ܘܠܬܗ̣ܪܐ܇ ܘܕܘܡ̇ܪܐ ܠܟܠܗܘܢ ܒ̈ܢܝ ܐܢܫܐ܇ ܕܐܝܟܢܐ ܒܥܓܠ ܦܪܥ̣ܗ ܐܠܗܐ ܡܢ ܗܪܟܐ ܠܝܘܚܢܢ܇ ܘܐܝܟ ܕܥܒ̣ܕ ܗܟܢܐ ܐܬܥܒ̣ܕ ܠܗ. ܘܐ̇ܗ̣ܦܟ ܡܪܝܐ ܦܘܪܥܢܗ ܕܢܒ̇ܠ̣ ܒܪܝܫܗ. ܘܗܟܢܐ ܐܬܥ̣ܛܝ ܝܘܩܢܗ ܕܝܘܚܢܢ ܒܬܪ ܡ̇ܘܬܗ܆ ܐܝܟ ܕܐ̣ܡܪܚ ܗ̣ܘ ܘܐܚ̣ܬ ܝܘܩ̈ܢܐ ܕܩ̈ܕܝܫܐ܇ ܘܐܣ̣ܩ ܕܝܠܗ. ܝܬ̣ܒ ܕܝܢ ܥܠ ܟܘܪܣܝܗ̣ ܫ̈ܢܝܢ ܬܠܬܥܣܪ̈ܐ ܝܬܝܪ ܚ̇ܣܝܪ. ܪܝܫܐ ܕܥܣܪ̈ܝܢ ܘܬܡܢܝܐ܆ ܕܥܠ ܬܐܕܘܠܐ ܫܡ̇ܫܐ ܕܐܦ ܗ̣ܘ ܚܕ ܡܢ ܪ̈ܕܘ̇ܦܝܗܘܢ ܥܫ̈ܝܢܐ ܕܟܪ̈ܣܛܝܢܐ ܗܘ̣ܐ܆ ܘܥܠ ܦܘܪܥܢܘܬܐ ܕܕܝ̣ܢܐ ܕܟܐܢܘܬܐ ܕܐܦ ܠܗ ܐܕܪܟ̣ܗ܇ ܟܕ ܒܐܘܠܨܢܐ ܡܫܬ̇ܢܩ. ܏ܟܚ ܬܐܕܘܠܐ ܕܝܢ ‪ ‬‬‬‬‬‬‬‬‬  ܗܢܐ ܡܫܡ̇ܫܢܐ ܕܥܕܬܐ ܡܢ ܛܠܝܘܬܗ ܡܬܚ̣ܙܐ ܗܘܐ܆ ܕܪܟܝ̣ܢ ܘܡ̇ܟܝܟ̣ ܘܫܠ̣ܐ. ܐ̣ܝܟܢܐ ܕܐܦ ܒܡ̇ܝܬܪܘܬܐ ܡܢ ܣܓ̈ܝܐܐ ܢܣ̣ܬܒܪ. ܐ̣ܝܟܢܐ ܕܟܕ ܡ̇ܥܠܢܘܬܐ ܗ̣ܘܬ ܠܗ ܠܘܬ ܡ̇ܠܟܐ ܝܘܣܛܝܢܝܢܐ: ܘܚ̣ܙܐ ܪܟܝ̣ܢܘܬܗ ܘܫܠ̣ܝܘܬܗ܆ ܗܝܡ̣ܢܗ ܕܗܒܐ ܣܓܝܐܐ ܕܢܦ̇ܠܓ ܠܡ̈ܣܟܢܐ܇ ܘܠܚܒ̣̈ܝܫܐ ܘܠܕܝܪ̈ܬܐ ܕܒܚ̣ܕܪ̈ܝ ܡܕܝܢܬܐ܆ ܘܒܟܠܗܘܢ ܥܒ̣ܪ̈ܐ. ܘܐܦ ܩ̇ܢܛܝܢܪ̈ܐ ܝܗ̇ܒ ܗܘܐ ܠܗ ܘܡ̇ܫܕܪ ܗܘܐ ܠܗ ܠܐܬܪ̈ܘܬܐ ܪ̈ܚ̣ܝܩܐ ܕܢ̇ܦܠܓ ܗܘܐ. ܐ̣ܝܟܢܐ ܕܒܩܠܝܠ ܩܠܝܠ̣ ܟܒ̣ܫ ܠܗ ܩ̇ܢܛܝܢܪ̈ܐ ܐܦ ܗ̣ܘ. ̱. ̱. ܒܗ ܕܝܢ ܒܛܟ̣ܣܐ̣ ܘܐܦ ܝܘܣܛܝܢܐ ܬܘܒ ܡ̇ܗܝܡܢ ܗܘܐ ܠܗ. ܘܟܕ ܐܬܬ̣ܥܝܪ ܪܕܘܦ̣ܝܐ ܐܝܟ ܡ̇ܢ ܕܢܫ̣ܬܦܪ܆ ܐܝܟ ܓܒܪܐ ܕܡܗ̣ܝܡܢ܆ ܒܝ̣ܫ̈ܬܐ ܣܓܝܐ̈ܬܐ ܥܡ ܝܘܚܢܢ ܘܫܪܟܐ ܕܐܚܪ̈ܢܐ܇ ܐ̇ܣ̣ܒܠ ܠܟܠܗ ܓ̇ܒܐ ܕܡܗ̈ܝܡܢܐ. ܟܕ ܗ̣ܘ ܠܘܩܕܡ̣ ܠܕܝܪ̈ܬܐ ܡܫܬ̇ܕܪ ܗܘܐ. ܘܒܡ̈ܘ̇ܡܬܐ ܕܢܟܠ̣ܐ ܡ̇ܛܥܐ ܗܘܐ̣  ܠܣܓ̈ܝܐܐ. ܘܒܚܪܬܐ ܒܕܓ̇ܠܘܬܐ ܡܬ̣ܬܚܕ ܗܘܐ. ܘܗܟܢܐ ܝܬܝܪ ܡܢ ܝܘܚܢܢ ܛܢ̣ܢܐ ܕܪܘܓܙܐ ܠܒ̣ܝܫ ܗܘܐ܇ ܕܚܠܦ ܣܘܢܗܕܣ ܘܟܠܗ̇ ܗܪܣܝܣ ܕܬܪ̈ܝܝ ܟܝ̈ܢܐ. ܘܒܫܘܠܛܢܐ ܠܒ̇ܟ ܗܘܐ ܘܚ̇ܒܫ ܘܡܫܬ̇ܢܕ ܐܝܟ ܕܨ̇ܒܐ. ܟܕ ܘܠܘܬ ܡ̇ܠܟܐ ܘܠܘܬ ܦܛܪܝܪܟܐ ܩ̇ܪ̈ܨܐ ܕܟܠܗܘܢ ܡܗ̈ܝܡܢܐ ܐܟ̇ܠ ܗܘܐ܆ ܘܠܪܘܓܙܐ ܩܫ̣ܝܐ ܡܥ̣ܝܪ ܗܘܐ ܠܗܘܢ. ܘܡܩ̇ܒܠ ܗܘܐ ܦܘܩ̈ܕܢܐ ܘܫܘܠܛܢܐ. ܘܐ̣ܝܟܢܐ ܕܨ̇ܒܐ ܗܘܐ ܡܬ̇ܚܫܚ ܗܘܐ. ܘܐܦ ܓܝܪ ܗ̣ܘ ܝܘܚܢܢ܆ ܕܠܐ ܒܙܥܘܪ ܕܚ̇ܠ ܗܘܐ ܘܫ̇ܚܪ ܡܢܗ. ܐܦ ܓܝܪ ܫܘܠܛܢܐ ܫܩ̣ܝܠ ܗܘܐ ܥܠ ܟܠܗܘܢ ܐ̇ܪ̈ܝܢܐ ܕܐܝܬ ܗܘܐ ܒܟܠ ܕܘܟܐ. ܘܟܕ ܗܟܢܐ ܡܫܬ̇ܩܠ ܗܘܐ  ܘܐܦ ܗ̣ܘ ܘܡܬ̇ܚܫܚ ܒܪܕܘܦ̣ܝܐ܆ ܫ̣ܕܪ ܠܗ ܐܠܗܐ ܡ̈ܚ̇ܘܬܐ ܩ̣ܫ̈ܝܬܐ̣ ܘܐܦ ܠܗ܆ ܐ̣ܝܟܢܐ ܕܠܐ ܢܗ̇ܠܟ ܒܩ̇ܘܡܬܐ ܦܫ̣ܝܛܬܐ. ܘܟܕ ܗܟܢܐ ܥܕܟܝܠ ܡ̇ܥܙܐ ܗܘܐ ܘܡܬ̇ܚܦܛ ܒܪܕܘܦ̣ܝܐ ܐܝܟ ܕܒܪܘܓܙܐ܆ ܕܐܦ ܒ̈ܢܝ ܓܢܣ̣ܗ ܕܝܠܗ ܘܕܐܢܬܬܗ ܘܢܘܛ̇ܪܗ ܥܡ ܫܪܟܐ܆ ܟܕ ܒܩ̣̇ܪܒܝܢ ܠܥܒ̣ܪܐ ܕܝܡܐ ܥ̣ܠܘ ܕܢܥ̣ܒܪܘܢ܆ ܛܒܥ̣ܬ݀ ܩ̣̇ܪܒܝܢ ܕܝܠܗܘܢ̣ ܘܐܬܚ̇ܢܩܘ ܒܝܡܐ. ܟܕ ܒܠܚܘܕ ܬܪ̈ܝܢ ܐ̇ܘ ܬܠܬܐ ܦ̣ܠܛܘ ܡܢܗܘܢ. ܘܒܬܪ ܐܒ̇ܕܢܐ ܗܢܐ ܘܬܒ̇ܪܐ ܕܐܕܪܟ̣ܗ܆ ܡܝ̣ܬܬ̣̇ ܘܐܦ ܐܢܬܬܗ. ܘܢܦ̣ܠ ܘܐܦ ܗ̣ܘ ܒܫܘ̣ܦܠܐ ܩܫ̣ܝܐ ܒܥܪܣܐ܆ ܟܕ ܡܫܬ̇ܢܩ ܗܘܐ ܙܒܢܐ ܕܬܠܬ ܫ̈ܢܝܢ. ܟܕ ܡܟܝܠ ܡܢ ܐܘܠܨܢܐ ܕܡ̈ܚ̇ܘܬܐ ܩܫ̣ܝ̈ܬܐ̣ ܡ̇ܘܕܐ ܗܘܐ ܒܕܡ̈ܥܐ ܡ̇ܪ̈ܝܪܬܐ̣ ܟܕ ܐܡ̇ܪ. ܕܘ̣ܝ ܠܝ ܕܠܘ̈ܛܬܐ ܕܪ̈ܕܝܦ̣ܐ ܐ̇ܕܪܟ̣ܢܢܝ܆ ܘܓ̇ܥܬܐ ܕܗܠܝܢ ܕܐ̇ܠܨ ܗ̇ܘܝܬ ܥܠ̣ܬ݀ ܩܕܡ ܐܠܗܐ. ܘܗܢܐ ܟܘܠܗ ܫܘ̣ܦܠܐ܆ ܒܪܘܓܙܐ ܕܡܢ ܫܡܝܐ ܐܫܬ̇ܕܪ ܥܠܝ. ܩܕܡ ܓܝܪ ܩܠܝܠ ܙܒܢܐ ܬܘܒ: ܡܢ ܥܠ̣ܬܐ ܡܕܡ ܕܗ̣ܘܬ ܠܗ: ܘܐ̇ܥܝ̣ܩܗ ܠܒܣ̣ܛܝܪܗ ܗ̇ܘ ܕܟܠܡܕܡ ܕܐܝܬ ܗܘܐ ܠܗ ܠܒ̣ܝܟ ܗܘܐ܆ ܥܠ ܒܟܣ̣ܝܐ̣ ܘܐ̇ܘ̣ܕܥ ܠܡ̇ܠܟܐ ܥܠ ܩ̇ܢܛܝܢܪ̈ܐ ܕܕܗܒܐ ܕܐܝܬ ܠܗ܇ ܐܝܟ ܕܡܬ̇ܐܡܪܐ ܗܘܬ ܗܕܐ. ܕܚ̣ܢܢ ܚ̇ܬܝܬܐܝܬ ܠܐ ܝ̇ܕܥܝܢܢ. ܥܣܪ̈ܝܢ ܘ̇ܐܪ̈ܒܥܐ̣ ܐ̇ܘ ܬܠܬܝܢ. ܗܠܝܢ ܕܟܕ ܫ̣ܕܪ ܡ̇ܠܟܐ ܒܟ̣ܣܝܐ ܘܫ̣ܩܠ ܐܢܘܢ܆ ܫ̣̇ܕܪ ܩܪ̣ܝܗܝ ܠܬܐܕܘܠܐ̣ ܘܐܡ̣ܪ ܠܗ. ܕܡܛܠ ܠܡ ܕܣܢ̣ܝܩܝܢ ܚܢܢ ܕܢܦ̇ܩ ܥܠ ܩܪ̈ܒܐ܆ ܫܡܫܐ܆ ܐܢ ܐܝܬ ܠܟ ܬܪܝܢ ܐ̇ܘ ܬܠܬܐ ܩ̇ܢܛܝܢܪ̈ܐ̣ ܗ̣ܒ ܠܢ ܘܦܪܥ̇ܝܢܢ ܠܗ ܠܟ. ܗ̣ܘ ܕܝ̣ܢ ܐܡ̣ܪ ܠܗ. ܕܠܝ ܡܪܝ̣ ܡܢ ܐ̇ܝܟܐ ܐܝܬ ܠܝ ܩ̇ܢܛܝܢܖ̈ܐ. ܐܡ̇ܪ ܠܗ ܒܚ̣̈ܝܝ ܘܒܦܘܪܩܢܝ ܠܝܬ ܠܟ܆ ܗ̣ܘ ܕܝܢ ܟܦ̣ܪ ܘܐܝ̣ܡܐ̣ ܕܠܐ ܩܢ̣ܐ ܩ̇ܢܛܝܢܪܐ. ܗܝ̇ ܕܝܢ ܦܩ̣ܕ̣ ܘܐܬ̣ܘ ܩ̇ܢܛܝܢܪ̈ܐ ܥܡܗ ܕܒܣ̣ܛܝܪܗ. ܐܡ̇ܪ ܠܗ ܡ̇ܠܟܐ. ܝܕ̇ܥܬ ܠܗܘܢ ܠܗܠܝܢ܆ ܘܐ̇ܝܟܢܐ ܝܡ̣ܝܬ ܘܕܓܠ̣ܬ ܒܢ ܘܒܐܠܗܐ. ܣ̇ܦܩܐ ܠܟ ܒܗ̣ܬܬܟ. ܦ̣ܘܩ ܡܟ̣ܐ.  ܘܗܟܢܐ ܐܝܟ ܒܗ̣ܬܬ ܓܢܒ̇ܐ ܟܪ ܕܡܫ̣ܬܟܚ܆ ܟܕ ܒܗ̇ܝܬ ܢܦ̣ܩ ܘܐܬ̇ܚܦܝ ܡܢ ܒܗ̣ܬܬܐ܆ ܘܗ̣ܘܐ ܚܣ̣ܕܐ ܘܡ̇ܘܝܩܐ ܠܟܠܗܘܢ ܒ̈ܢܝܢܫܐ ܡܢ ܩܕܡܘܗܝ. ܐ̣ܝܟܢܐ ܕܟܕ ܒܗ̣ܬܬܐ ܗܕܐ ܥܠ ܟܠܗ ܫܘܦ̣ܠܗ ܐܬܬܘܣ̣ܦܬ݀ ܠܗ܆ ܗܟܢܐ ܡܟܝܠ ܡܢ ܗܝ̇ܕܝܢ ܣܚ̣ܝܦ ܗܘܐ ܘܫ̣̇ܕܐ܆ ܘܐܦ ܥܕ ܗܫܐ. ܪܝܫܐ ܕܥܣܪ̈ܝܢ ܘܬܫܥܐ܆ ܕܥܠ ܩܐ̣ܣܛܘܪ ܕܡ̇ܠܟܐ܇ ܕܫܡܗ ܗܘܐ ܐܢܣܛܣ. ܏ܟܛ ܐܦ ܓܝܪ ܗܢܐ ܩܐ̣ܣܛܘܪ ܕܡ̇ܠܟܐ: ܕܒܓܢ̣ܣܗ ܡܢ ܒܝܬ ܫܡ̇ܪ̈ܝܐ ܐܦ ܗ̣ܘ ܐ̣ܝܬܘܗܝ ܗܘܐ܆ ܐ̣ܝܟܢܐ ܕܟܕ ܐܬܬ̣ܕܝܢܘ ܫܡ̇ܪ̈ܝܐ ܒܦܠ̣ܣܛܝܢܐ ܡܢ ܦ̣ܘܛܝܘܣ̣ ܩܛ̇ܬܣܬܐ ܥܒ̣ܕܘܗܝ. ܘܗ̣ܘܬ ܦܪܟܣܝܣ ܥܠܘܗܝ ܘܐܬ̣ܐ ܠܡ̇ܠܟܐ܆ ܘܪܗ̣ܛ ܠܟܐ ܘܠܟܐ ܘܫܚ̣ܕ ܠܟܠ ܓܒ̈ܝܢ܆ ܘܐܬܚ̣ܦܝܬ݀ ܦܪܟܣܝܣ܆ ܘܠܐ ܗ̣ܘܬ ܥܠܘܗܝ ܒܥ̣ܬܐ. ܐ̣ܝܟܢܐ ܕܐܦ ܗ̣ܘ ܣ̇ܢܐܐ ܗܘܐ̣ ܘܒܥܠܕܒܒܐ ܩܫܝ̣ܐ̣ ܕܟܠܗܘܢ ܡܗ̈ܝܡܢܐ. ܘܠܚ̣ܝܡ ܗܘܐ ܥܠܝܗܘܢ̣ ܩܫܝ̣ܐܝܬ. ܘܡܩ̇ܛܪܓ ܗܘܐ ܠܗܘܢ̣ ܘܡ̇ܠܒܛ ܥܠܝܗܘܢ ܒܟܠ ܥܕܢ ܟܕ ܥ̇ܒܕ ܕܘܟܬܗ ܕܝܘܚܢܢ ܦܛܪܝܪܟܐ ܟܕ ܪܚ̇ܝܩ. ܡܐ ܕܝܢ ܕܥ̇ܐܠ ܗܘܐ̣ ܬܪ̈ܝܗܘܢ ܡ̇ܠܒܛܝܢ ܗܘܘ ܠܗ ܠܡ̇ܠܟܐ. ܘܟܕ ܡ̇ܫܕܪ ܗܘܐ ܠܗܘܢ ܡ̇ܠܟܐ  ܘܡܩ̇ܒܠ ܡ̈ܠܝܗܘܢ܆ ܡܬܬ̣ܥܝܪ ܗܘܐ ܒܪܘܓܙܐ ܘܦܩ̇ܕ ܗܘܐ ܦܘܩ̈ܕܢܐ ܕܚ̈ܝ̣ܠܐ ܘܩܫ̣̈ܝܐ ܥܠ ܓ̇ܒܐ ܕܡܗ̈ܝܡܢܐ. ܐܦ ܓܝܪ ܕܗܒܐ̣ ܠܐ ܙܥܘܪ. ܐ̣ܝܟܢܐ ܕܠܟܠܢܫ ܝܕܝܥܐ܆ ܒܟܠ ܙܒܢ ܡܩ̇ܒܠ ܗܘܐ ܡܢܗ ܕܝܘܚܢܢ. ܘܐ̣ܝܬܘܗܝ ܡ̇ܠܘܟܐ ܘܡ̇ܚܦܛܢܐ ܕܟܠ ܒ̈ܝ̣ܫܢ܆ ܐܝܟ ܡ̇ܠܦܢܗ ܠܝ̣ܛܐ ܐ̇ܬܪܐܝܣ. ܗ̇ܘ̣ ܕܐܫ̣ܬܩܠ ܕܕܗܢܐ ܕܗܢܐ ܐܝܬܘܗܝ ܗܘܐ ܡܢ ܩܕܝܡ̣ ܣܘ̣ܢܦܢܘܣ. ܘܒܟܠܗܝ̣ܢ ܒܥ̣ܩ̈ܒܬܗ ܕܗ̇ܘ ܚܦ̣ܝܛ ܗܘܐ ܠܡ̣ܪܕܐ.܀. ܟܕ ܠܐ ܬܘܒ    ܛܥ̣ܢܬ ܛܥ̣ܢܬܝ ܟܐܢܘܬܐ̣ ܘܐܦܠܐ ܪܘܫ̣ܥܗ ܕܗܢܐ܇ ܕܟܕ ܟܪܣܛܝܢܐ ܢܦܫܗ ܡ̇ܚܘܐ ܗܘܐ܇ ܐܝܟ ܚ̈ܢܦܐ ܘܫܡ̇ܪ̈ܝܐ ܠܟܪ̈ܣܛܝܢܐ ܐܝܟ ܕܡܢ ܥ̣ܠܬ݀ ܫܘܠܛܢܐ܇ ܒܣ̣ܬܪܐ ܡ̇ܚܐ ܗܘܐ ܒܟܠ ܦܘܪ̈ܣܝܢ ܘܒܟܠ ܥ̈ܠ̣ܠܢ. ܘܥܡ ܫܪܟܐ ܕܚ̈ܢܦܐ ܟܣ̣̈ܝܐ ܪܐܙܗ ܠܡܒ̇ܛܠܘ ܚܕܝܘܬܐ ܕܥܕܬܐ̣ ܩܛܝ̣ܪ ܗܘܐ.܀. ܐ̣ܝܟܢܐ ܕܟܕ ܚ̣ܙܐ ܐܠܗܐ ܢܟܝ̣ܠܘܬ ܨܢ̣ܥ̈ܬܗ: ܘܕܣ̣ܒܪ ܕܢܛ̇ܥܐ ܒܐܠܗܐ ܘܒܒ̈ܢܝ ܐܢܫܐ܆  ܦ̇ܪܣܝ ܢܟ̣ܝܠܘܬܗ ܠܥܝܢ ܟܠܗ̇ ܥܕܬܐ̣ ܒܡ̇ܠܐܗ̇. ܐ̣ܝܟܢܐ ܕܟܕ ܒܝܘܡܐ ܕܣܓ̣ܕܬܗ ܕܨܠܝܒܐ ܩܕܝܫܐ ܕܦܪܘܩܢ: ܟܕ ܢܦ̣ܩ ܘܐܬܬܣ̣ܝܡ ܒܥܕܬܐ ܪܒܬܐ: ܘܟܢ̣ܫܬ݀ ܟܘܠܗ̇ ܣܘܢܩ̣ܠܝܛܘܣ ܘܟܘܠܗ̇ ܡܕܝܢܬܐ ܡܢ ܣ̣ܟܗ̇ ܠܣܓ̣ܕܬܗ: ܘܥ̣ܠ ܗܘܐ ܩܣ̣ܛܘܪ ܥܡ ܣܘܢܩܠ̣ܝܛܘܣ ܕܢܚ̇ܘܐ ܒܐܣܟܡܐ ܕܗܐ ܐܦ ܗ̣ܘ ܣܓ̇ܘܕܐ ܗܘ: ܘܟܕ ܣ̣ܕܝܪ̈ܝܢ ܣ̣ܕܪ̈ܐ ܘܩ̇ܪܒܝܢ ܒܛܟ̣ܣܐ: ܘܡ̣ܛܐ ܗ̣ܘ ܠܘܬܗ ܕܨܠܝܒܐ ܩܕܝܫܐ: ܩܕܡ ܕܢܣ̣ܓܘܕ ܥ̣ܠ ܒܗ ܫܐܕܐ܆ ܘܬܠ̣ܐ ܚܒ̇ܛܗ ܠܐܪܥܐ̣ ܩܕܡܘܗܝ ܕܨܠܝܒܐ ܩܕܝܫܐ܇ ܗ̇ܘ ܕܢܟܝ̣ܠܐܝܬ ܘܠܘ ܫܪܝܪܐܝܬ ܠܣܓ̣ܕܬܗ ܡܬ̇ܩܪܒ ܗܘܐ܇ ܟܕ ܡܒ̇ܙܚ ܒܟܪܣܛܝܢܘܬܐ. ܘܫ̇ܪܝ ܡ̇ܪܥܬ ܟܕ ܡܬ̇ܒܥܟ ܡܢ ܕܝܘܐ ܘܡܒ̇ܪܥܛ ܘܩ̇ܥܐ ܥܕܢܐ ܣܓܝܐܐ܆ ܥܕܡܐ ܕܦ̣ܩܕ ܦܛܪܝܪܟܐ܇ ܘܣ̣ܦܘ ܘܛܥ̣ܢܘܗܝ ܒܝܬ ܣܓ̈ܝܐܐ܇ ܘܐ̇ܥܠ̣ܘ ܫܕܐ̣ܘܗܝ ܒܒܝܬܐ ܓ̇ܘܝܐ ܕܐܝܬ ܗܘܐ ܒܥܕܬܐ. ܟܕ ܟܠܗ̇ ܥܕܬܐ ܒܡ̇ܠܐܗ̇܆ ܩ̇ܥܝܢ ܗܘܘ ܩܘܪܝܠܝܣܘܢ̣ ܥܕܢܐ ܣܓܝܐܐ. ܟܕ ܡܬ̇ܕܡܪܝܢ ܒܦܘ̇ܪܣܝ ܙܐ̣ܦܗ ܕܗܢܐ܇ ܘܒܡ̇ܟܣܢܘܬܐ ܕܥܒ̣ܕ ܠܘܬܗ ܡܪܗ ܕܨܠܝܒܐ ܠܥ̣ܝܢ ܟܢ̈ܫ̣ܐ ܣܓ̈ܝܐܐ. ܘܢܦ̣ܠܬ̇ ܙܘܥ̇ܬܐ ܥܠ ܣ̈ܓܝܐܐ ܛ̈ܥ̇ܝܐ ܘܐܣ̈ܟܡܬܢܐ. ܗ̣ܘ ܕܝܢ ܬܘܒ ܪܝܫܗ̣ ܠܐ ܐ̣ܪܝܡ. ܐܠܐ ܟܕ ܗܟܢܐ ܡܢ ܫܐܕܐ ܗ̇ܘ ܡܬ̣ܪܕܐ ܗܘܐ܆ ܚܝ̣ܐ ܐܝܟ ܫ̇ܢܬܐ ܚܕܐ ܘܦ̣ܠܓܗ̇ ܝܬܝܪ ܚܣܝܪ܆ ܘܗܟܢܐ ܛܠ̣ܩ ܡܢ ܚܝ̈ܐ ܕܬܢܢ.  ܪܝܫܐ ܕܬܠܬܝܢ܆ ܥܠ ܗܝ̇ ܕܟܕ ܐܬܥ̣ܩܪ̈ܝܢ ܥ̈ܕܬܐ ܕܐܪ̈ܬܕܘܟܣܘ ܒܪܕܘܦ̣ܝܐ ܡܢ ܣܘܢܗ̈ܕܝܛܐ܇ ܒܬܪ ܙܒܢܐ ܩܠܝܠ ܘܐܦ ܗ̈ܢ̣ܝܢ ܥ̈ܕܬܐ ܕܐ̇ܚ̣ܝܕܝܢ ܗܘܘ ܗ̣ܢܘܢ ܣܘܢܗ̈ܕܝܛܐ܇ ܐܝܟ ܕܒܓܙܪ ܕܝܢ̣ܐ ܡܕܡ ܕܡܢ ܟܐܢܘܬܐ܇ ܡܢ ܩܕܡ ܒ̣ܪ̈ܒܪܝܐ ܡ̈ܕܒܚܐ ܕܥ̈ܕܬܐ ܕܒܟܠܗ̇ ܬ̇ܪܩܝܐ ܘܥܕܡܐ ܠܫ̣ܘܪܐ ܐܬܥ̣ܩܪ ܘܐܫܬ̇ܠܚ ܘܢܓ̣̇ܠܘ ܡܢ ܩܕܡ ܒܪ̈ܒ̣ܪܝܐ. ܏ܠ ܫܘܒܚܐ ܠܐܠܗܐ ܕܐܗܦܟ ܘܐܣܩ ܥܘ̇ܠܗܘܢ ܒܪܝܫܗܘܢ ܟܕ ܗܟܝܠ ܗܕܐ ܐܬܓ̣ܒܝܬ݀ ܘܐܬܚ̣ܙܝܬ݀ ܠܗܠܝܢ ܕܐ̇ܚ̣ܝܕܝܢ ܗܘܘ ܫܘܠܛܢܐ: ܘܐܢ ܕܥܠܡܐ  ܘܐܢ ܕܥܕܬܐ: ܕܒܝܬ ܟܢܘ̣ܫ̈ܝܐ ܕܡܗ̈ܝܡܢܐ ܢܥ̣ܩܪܘܢ: ܘܡܕܒ̈ܚܝܗܘܢ ܢܣ̣ܚܦܘܢ: ܒܗ ܒܙܒܢܐ ܒܬܪ ܩܠܝܠ܆ ܥܡܐ ܕܒ̣ܪ̈ܒܪܝܐ ܗܠܝܢ ܕܣ̣ܥܪ̈ܝܗܘܢ ܕܡܬ̣ܩܪܝܢ ܐ̇ܒܖ̈ܝܣ: ܟܕ ܥܠ ܡܕܝܢܬܐ ܥܕܡܐ ܠܫ̣ܘܪܐ ܒ̇ܪܝܐ ܐܬܥ̇ܬܕܘ ܘܐܬ̣ܘ: ܘܟܠܗܝܢ ܥ̈ܕܬܐ ܕܒܟܠܗ ܐܬܪܐ ܕܬܪ̣ܩܝܐ ܐܫ̈ܬ̇ܠܚܝܢ: ܘܢܓ̇ܠܘܢ ܡܢ ܩܕܡܝܗܘܢ ܥܡ ܟܘܠܗ ܐܬܪܐ: ܘܡܕܒ̈ܚܝܗܝܢ ܐܫܬ̇ܠܚܘ ܘܐܬ̇ܥܩܪ̈ܘ: ܘܩ̣ܝܒܪ̈ܝܐ ܐܬܥ̣ܩܪ̈ܝ ܘܢܚ̣ܬܝ ܕܥܕܡܐ ܠܫܘ̣ܪܐ ܕܡܕܝܢܬܐ: ܐ̣ܝܟܢܐ ܕܐܢ̈ܫܝܢ ܡܢܗܘܢ ܟܕ ܡܬ̇ܒܝܢܝܢ ܒܕܝܢ̣ܐ ܕܟܐܢܘܬܐ ܐܡ̇ܪܝܢ ܗܘܘ܆ ܕܗ̇ܘ ܡܕܡ ܠܡ ܕܡܢ ܒ̈ܢܝ ܓܒܐ ܕܝܠܢ ܠܘܬ ܗܠܝܢ ܕܠܐ ܫ̇ܠܡܝܢ ܠܢ ܐܬܥ̣ܒܕ ܕܠܐ ܒܙܕܩ̣ܐ: ܕܐܬܥܩ̣ܪ̈ܝܢ ܥܕ̈ܬܗܘܢ܆ ܗܐ ܠܢ ܕܝܠܢ ܡܢ ܐܠܗܐ̣ ܒܪܘܓܙܐ ܐܬܥ̣ܒܕ܇ ܘܐܬܥ̣ܩܪ̈ܝ ܘܐܬ̇ܒ̈ܠ̣ܒܠܝ ܐܦ ܥ̈ܕܬܢ ܕܝܠܢ. ܘܟܠܢܫ ܥܠ ܗܠܝܢ ܡ̇ܬܕܡܪ̣ ܘܡ̇ܫܒܚ ܠܐܠܗܐ܇ ܗ̇ܘ ܕܗ̣ܘ ܦ̇ܪܥ ܠܟܘܠܢܫ ܐܝܟ ܥ̇ܒ̈ܕܘܗܝ.܀.܀.  ܪܝܫܐ ܕܬܠܬܝܢ ܘܚܕ܆ ܕܥܠ ܩܪܝܬ̇ܗ ܘܡ̇ܥܠܬܗ ܕܐ̣ܘܛܝܟ ܦܛܪܝܪܟܐ܇ ܕܡܢ ܒܬܪ ܡ̇ܘܬܗ ܕܝܘܚܢܢ. ܏ܠܐ ܡܢ ܒܬܪ ܕܝܢ ܡ̇ܘܬܗ ܕܝܘܚܢܢ ܦܛܪܝܪܟܐ܆ ܐܬܩ̣ܪܝ ܐ̣ܘܛܘܟܐ ܗ̇ܘ ܕܐܝܬܘܗܝ ܗܘܐ ܡܢ ܩܕܡܘܗܝ܇ ܡܢ ܕܝܪܗ ܕܐ̣ܝܬܝܗ̇ ܒܐ̣ܡܣܝܐ ܐܬܪܐ ܕܓܪܒܝܐ. ܘܥ̣ܠ ܘܐܬ̇ܩܒܠ ܘܡܢ ܡ̈ܠܟܐ̣ ܘܡܢ ܟܠܗ̇ ܡܕܝܢܬܐ ܒܙܘ̇ܚܐ ܪܒܐ. ܟܕ ܐܦ ܡ̇ܛܒܝܢ ܥܠܘܗܝ ܪ̈ܘܪܒܬܐ܇ ܕܬܕܡ̣ܪ̈ܬܐ ܥ̇ܒܕ ܘܚ̇ܝ̈ܠܐ ܣ̇ܥܪ. ܚ̣ܕܝܬ݀ ܕܝܢ ܟܠܗ̇ ܡܕܝܢܬܐ ܒܡ̇ܥܠܬܗ܆ ܐܝܟ ܡ̇ܢ ܕܐ̇ܓܗ̣ܝܘ ܡܢ ܟܘܠܗ̇ ܫ̇ܩܪܘܬܗ ܘܕ̈ܓ̇ܠܘܬܗ: ܘܐܦ̣ܝܬܝܛܘܬܗ ܕܝܘܚܢܢ܇ ܗܝ̇ ܕܕܠܐ ܛܟ̣ܣܐ ܐ̣ܝܬܝܗ̇ ܗܘܬ܇ ܐܝܟ ܡ̇ܢ ܕܛܠܝܐ ܐ̣ܝܬܘܗܝ ܗܘܐ܇ ܘܡܢ ܣܟ̣ܠܘܣ̈ܬܝܩܐ ܐ̣ܝܬܘܗܝ ܗܘܐ܇ ܘܡܢ ܩܕܡ ܩܠܝܠ ܙܒܢܐ ܐܣܬ̇ܦܪ ܘܗ̣ܘܐ ܩܠ̣ܝܪܝܩܐ܇ ܘܡܢ ܫܠ̣ܝ ܬܘܒ ܘܐܦܝܣܩܘܦܐ ܕܡܕܝܢܬ ܡ̇ܠܟܘܬܐ܇ ܘܡܢ ܥܠܝ̣ܡܘܬܗ ܘܡܢ ܟܠܗܝܢ ܕܣܟܠ̣ܘܣ̈ܬܝܩܐ ܠܐ ܐܫܬ̇ܚܠܦ.܀.܀.  ܐ̣ܘܛܘܟ̣ ܕܝܪܝܐ ܢܟ̣ܦܐ ܐ̣ܝܬܘܗܝ ܗܘܐ. ܠܒ̣ܟ ܗܘܐ ܕܝܢ ܬܪܘܢܘܢ ܕܡܕܝܢܬ ܡ̇ܠܟܘܬܐ ܡܢ ܩܕܡ ܡ̇ܦܩܬܗ̣ ܬܪ̈ܬܥܣܪܐ ܫ̈ܢܝܢ. ܘܡܢ ܕܢܦ̣ܩ ܠܒ̣ܟ ܝܘܚܢܢ ܬܘܒ ܬܪ̈ܬܥܣܪܐ ܫ̈ܢܝܢ܆ ܟܕ ܐܦ ܥ̣ܠ ܒܗ̇ܝ ܕܬܠܬܥܣܪ̈ܐ. ܘܗܟܢܐ ܥ̣ܠ ܐ̣ܘܛܝܟ܆ ܟܕ ܣ̇ܒܪ ܗܘܐ܆ ܕܠܐ ܝܬ̇ܒ ܗܘܐ ܥܠ ܟܘܪܣܝܗ܇ ܩܕܡ ܕܢܚ̣ܪܡܗ ܠܝܘܚܢܢ܇ ܘܢܒ̇ܛܠ ܕܘܟܪܢܗ ܡܢ ܥܕܬܗ ܕܐܠܗܐ.