ܪܝܫܐ ܕܥܣܪ̈ܝܢ ܘܬܪ̈ܝܢ܆ ܕܥܠܝܗܝܢ ܕܗܠܝܢ ܕܡܢܗ  ܕܩܬܘܠܝܩܐ ܘܕܥܡܗ ܡ̈ܬܬ̇ܢܝܢ ܗ̈ܘܝ܆ ܘܥܠ ܫܪܟܐ. ܏ܟܒ ܗܠܝܢ ܗܟܝܠ ܟܠܗܝܢ ܬܘܒ ܥܡ ܐܚܪ̈ܢܝܬܐ ܣܓܝܐ̈ܬܐ  ܗ̣ܘ ܩܬܘܠܝܩܐ ܕܕܐ̇ܘܝܢ ܕܒܐܬܪܐ ܕܐ̇ܪܡܢܝܐ ܕܦܪ̈ܣܝܐ܇ ܒܡܕܝܢܬ ܡ̇ܠܟܘܬܐ ܕܝܠܢ ܕܪ̈ܗܘܡܝܐ ܡܬ̇ܢܐ ܗܘܐ܆ ܗ̣ܘ ܘܐ̈ܦܝܣܩܦܐ ܘܒ̈ܢܝ ܚ̣ܐܪ̈ܐ ܣܓ̈ܝܐܐ ܕܥܡܗ̣ ܠܥ̣ܝܢ ܣܓ̈ܝܐܐ. ܗ̇ܘ ܕܟܕ ܐܬ̣ܐ ܗ̣ܘ ܘܫܪܟܐ ܕܐܦܝܣ̈ܩܦܐ: ܘܡܢ ܪ̈ܘܪܒܢܐ ܕܐܬܪܐ ܕܐ̇ܪ̈ܡܢܝܐ܆ ܥܡܗ ܐܬ̇ܩܒܠܘ ܟܠܗܘܢ ܒܐܝܩܪܐ ܪܒܐ܇ ܘܩ̇ܒܠܘ ܡ̇ܘܗ̈ܒܬܐ ܘܐܝܩܪ̈ܐ ܕܡ̇ܠܟܘܬܐ܆  ܘܐܬܝ̣ܗܒ ܘܐܬܝ̣ܗܒܘ ܠܗܘܢ ܪ̈ܝܫܢ̣ܘܬܐ ܪ̈ܘܪܒܬܐ ܠܟܠܗܘܢ ܕܐܬ̣ܘ ܥܡܗ ܡܢ ܬܡܢ. ܘܒ̈ܬܐ ܪ̈ܘܪܒܐ ܘܕܪ̈ܬܐ ܬ̇ܩܝ̈ܦܬܐ ܕܡ̇ܠܟܘܬܐ܆ ܘܐܫܬ̇ܕܪ ܕܗܒܐ ܣܓܝܐܐ ܘܪ̈ܝܫ̣ܢܘܬܐ ܠܐܝܠܝܢ ܕܒܗ ܒܐܬܪܐ܆ ܘܐܦ ܫܘܒܩܢܐ ܬܠܬ ܫ̈ܢܝܢ ܡܢ ܡ̇ܠܟܐ ܕܪ̈ܗܘܡܝܐ܆ ܘܐܬܦܩ̣ܕܘ ܕܢܗܘܘܢ ܡ̇ܥܕܪܝܢ ܠܗܘܢ ܘܡܬ̇ܟܬܫܝܢ ܚܠܦܝܗܘܢ ܥܡ ܦܪ̈ܣܝܐ܇ ܘܚܠܦ ܟܠܗ ܐܬܪܐ ܕܐ̇ܪܡܢܝܐ܇ ܟܕ ܐ̇ܚ̣ܝܕܝܢ ܠܗ ܠܐܬܪܐ. ܗܕܐ ܕܐܦ ܗ̣ܘܬ ܙܒܢܐ ܣܓܝܐܐ܆ ܘܢܦ̣ܠܘ ܥܡܐ ܕܡ̈ܓ̣ܘܫܐ ܩܕܡ ܟܪ̈ܣܛܝܢܐ ܙܒ̣̈ܢܝܢ ܣܓ̈ܝܐܢ ܕܐܪ̈ܡ̣ܝܘ ܥܠܝܗܘܢ. ܘܗܘ̣ܘ ܐ̇ܚܝ̣ܕܝܢ ܩܪ̈ܒܐ ܗܠܝ̣ܢ ܥܕܡܐ ܠܙܒܢܐ ܕܫ̈ܢܝܐ ܫܬ.܀. ܥܠ ܗܠܝܢ ܕܝܢ ܕܒܬܪܟܢ܆ ܒܙܒܢܗܝܢ ܥܠܝܗܝ̣ܢ ܩܠܝܠ ܡܢ ܣ̇ܓܝ ܡܫܬ̇ܥܝܢܢ.܀. ܗ̣ܘ ܕܝܢ ܩܬܘܠܝܩܐ ܡܢ ܒܬܪ ܙܒܢܐ ܕܬܪ̈ܬܝܢ ܫ̈ܢܝܢ܆ ܒܗ̇ ܒܡܕܝܢܬ ܡ̇ܠܟܘܬܐ ܡܝ̣ܬ̣ ܘܠܐ ܢܚ̣ܬ ܠܐܬܪܗ. ܪܝܫܐ ܕܥܣܪ̈ܝܢ ܘܬܠܬܐ܆ ܕܥܠ ܗܝ̇ ܕܒܫ̇ܘܪܝܐ ܟܕ ܐܬ̣ܘ ܐܦܝ̈ܣܩܦܐ ܐ̇ܪ̈ܡܢܝܐ ܠܡܕܝܢܬ ܡ̇ܠܟܘܬܐ܇ ܒܦ̣ܫܝܛܘܬܐ ܥܠ̣ܘ ܘܐܬ̇ܩܪܒܘ ܒܥܕܬܐ ܡܢ ܣܘܢܗ̈ܕܝܛܐ. ܏ܟܓ ܡܢܗ ܗܟܝܠ ܕܫܘ̇ܪܝܐ ܕܡ̇ܥܠܬܗ ܕܩܬܘܠܝܩܐ ܕܐ̇ܪܡܝܢ ܘܫܪܟܐ ܕܐܦܝ̈ܣܩܘܦܐ ܘܪ̈ܘܪܒܢܐ ܕܥܡܗ: ܐܝܟ ܐܢ̈ܫܐ ܕܥ̣ܪ̈ܩܘ ܡܢ ܡ̇ܠܟܘܬܐ ܪܫܝܥ̣ܬܐ ܘܚ̇ܢܦܝܬܐ ܕܡ̈ܓ̣ܘܫܐ: ܘܐܬ̣ܘ ܕܢܬ̇ܓܘܣܘܢ ܒܡ̇ܠܟܘܬܐ ܕܟܪ̈ܣܛܝܢܐ܆ ܡ̣ܚܕܐ ܕܥܠ̣ܘ ܘܐܬ̇ܩܒܠܘ ܘܐܬ̇ܝܩܪ̈ܘ ܪܘܪܒܐܝܬ: ܟܕ ܠܐ  ܡ̇ܥܩܒܝܢ܆ ܥܠ̣ܘ ܘܐܬ̇ܩܪܒܘ ܥܡ ܦܛܪܝܪܟܐ ܕܡܕܝܢܬܐ ܕܠܐ ܥܘܩܒܐ̣ ܬܟܝ̣ܠܐܝܬ. ܟܕ ܠܐ ܪ̈ܓܝ̣ܫܝܢ ܗܘܘ ܒܥܠ̣ܬ ܣ̣ܕܩܐ ܘܚ̣ܪܝܢܐ܇ ܕܡܢ ܥܠ̣ܬ݀ ܣ̣ܘܪܚܢܐ ܕܣܘܢܗܕܣ ܕܗܘ̣ܬ ܒܟܠܩܕܘܢܐ܇ ܐܝܬ ܒܟܠܗܝܢ ܥܕܬ̈ܐ ܕܐܬܪ̈ܘܬܐ ܕܒܝܬ ܪ̈ܗܘܡܝܐ. ܐ̣ܝܟܢܐ ܕܟܕ ܒܐܬܪܗܘܢ ܗ̣ܝ ܗܕܐ ܐܫܬܡ̣ܥܬ݀܆ ܪܓ̣ܙܘܢ ܥܠܝܗܘܢ ܘܫܪܟܐ ܕܐ̈ܦܝܣܩܦܐ̣ ܘܟܠܗܘܢ ܒ̈ܢܝ ܐܬܪܐ. ܘܟܬ̣ܒܘ ܠܗܘܢ ܩܫ̈ܝ̣ܬܐ܆ ܗܠܝܢ ܕܙܒܢܐ ܬܒ̇ܥ̣ ܕܒܫܠ̣ܝܐ ܢܬܚ̣̈ܦܝܢ. ܘܗܟܢܐ ܢܓ̣ܕܘ ܘܦܪ̣ܫܘ܆ ܘܡܟܝܠ ܟܠܗܘܢ ܐܟܚܕܐ ܥܒ̣ܕܘܢ ܠܗܘܢ ܟܢ̣ܘܫܝܐ܇ ܒܚ̣ܕܐ ܡܢ ܕܪ̈ܬܐ ܪ̈ܘܪܒܬܐ    ܕܐܫܬܟܢ̣ܬ݀ ܠܚܕ ܡܢ ܪ̈ܘܪܒܢܐ ܕܝܠܗܘܢ. ܘܬܡܢ ܡܬ̇ܟܢܫܝܢ ܗܘܘ ܟܢܘܫ̣ܝܐ ܥܫܝܢܐ܇ ܡܢ ܒܬܪ ܡ̇ܘܬܗ ܕܩܬܘܠܝܩܐ ܕܝܠܗܘܢ.  ܪܝܫܐ ܕܥܣܪ̈ܝܢ ܘܐܪ̈ܒܥܐ܆ ܥܠ ܐܝܠܝܢ ܕܒܚܪܬܐ ܐܣܬ̣ܥܪ̈ܝ܇ ܟܕ ܐ̇ܫ̣ܠܡܘ ܗܘܘ ܐ̇ܪ̈ܡܢܝܐ܆ ܘܥܠ ܗ̇ܝ ܕܡܢ ܥܘ̣ܒܛܐ ܕܣܓܝܐܘܬܗܝܢ܇ ܐ̇ܗ̣ܡܝܢ ܘܐ̇ܦ̣ܝܫܢ ܡܢ ܬ̇ܘܢܝ ܬܫ̈ܥ̣ܝܬܐ ܕܥܠܝܗܝܢ.܀. ܏ܟܕ ܟܕ ܗܟܝܠ ܡܬ̇ܒܝܢܝܢ ܚܢܢ ܕܣܓܝܐ̈ܬܐ ܐ̈ܢܝܢ ܐܝܠܝܢ ܕܒ̇ܙܒ̈ܢܝܢ ܘܒܝܘܡ̈ܬܢ ܓ̣ܕܫ: ܘܝܬܝܪܐܝܬ ܕܝܢ ܗܫܐ ܒܚܪܬܐ: ܘܕܥ̇ܒܪ̈ܢ ܠܬܚ̈ܘܡܐ ܘܠܟܬ̈ܝ̣ܒܬܐ: ܘܝܬܝܪܐܝܬ ܐܝܠܝܢ ܕܡܢ ܒܬܪ ܡܫܠ̣ܡܢܘܬܐ ܕܐ̇ܪܡܢܝܐ ܕܦܪ̈ܣܝܐ ܠܪ̈ܗܘܡܝܐ: ܗܕܐ ܕܗܘ̣ܬ ܒܫܢܬ ܬܡܢܡܐܐ ܘܬܡܢܐܝܢ ܕܐܠܟ̣ܣܢܕܪܣ: ܐ̣ܝܟܢܐ ܕܡܛܘܠ ܗܕܐ ܩܪ̈ܒܐ ܐܡ̈ܝ̣ܢܐ ܘܣܒ̣̈ܝܣܐ ܡܢ ܟܠ ܓ̇ܒ̈ܝܢ ܐܬܬܥ̣ܝܪ̈ܘ: ܘܚ̣ܪܒܐ ܠܚܡ̣ܬܐ ܘܫ̣ܘܦܥ ܕܡܐ ܣܓܝܐܐ ܗܘ̣ܐ: ܘܕܐ̣ܝܟܢܐ ܬܘܒ ܡܓܘ̣ܫܐ ܐܫܬ̇ܩܠ ܒܡ̇ܥܪܡܘܬܗ: ܘܐܪܡ̣ܝ ܥܠ ܚܝ̈ܠܘܬܐ ܕܪ̈ܗܘܡܝܐ ܕܒܐ̇ܪܡܢܝܐ: ܐܝܟ ܕܐܝܟ ܕܣܒ̣ܪ ܕܢܚ̣ܪܘܒ  ܘܢ̇ܘܒܕ ܐܢܘܢ: ܘܟܕ ܗܕܐ ܠܐ ܐܬܡ̣ܨܝ܆ ܐ̇ܣ̣ܛܝ ܡܢܗܘܢ̣ ܘܥܒ̣ܪ ܠܐ̇ܪܡܝܢ ܕܪ̈ܗܘܡܝܐ. ܟܕ ܣ̇ܒܪ ܕܠܩܣܪܝܐ ܕܩܦܕܘܩܝܐ ܢܟܒ̣ܘܫ ܘܢܫܒ̣ܐ. ܘܟܕ ܚܝ̈ܠܘܬܐ ܚ̣ܕܪܘܗܝ ܘܬܟ̣ܣܘܗܝ ܐܦ ܡܢ ܩܦܕܘܩܝܐ܆ ܗܦ̣ܟܘ̣ ܘܐܪܡ̣ܝܘ ܥܠܘܗܝ. ܘܐܪܝܡ̣ܘ ܟܘܠܗ̇ ܐܝܩ̣ܪܬܗ̣ ܡܫܡ̣ܠܝܐܝܬ. ܘܗ̣ܦܟ̣ ܟܕ ܒܗ̣ܝܬ. ܘܐܠܘ ܪ̈ܝܫ̣ܝ ܚ̈ܝܠܘܬܐ ܥܡ ܚ̈ܕܕܐ ܐܫ̣ܬܘܝܘ܆ ܘܐܦܠܐ ܗ̇ܦܟ ܗܘܐ ܒܚܝ̈ܐ. ܘܕܐ̣ܝܟܢܐ ܬܘܒ ܡ̇ܠܟܐ ܕܪ̈ܗܘܡܝܐ ܠܐ̇ܪ̈ܡܢܝܐ ܠܐ̇ܪܡܢܝܐ ܒܕܫ̣̈ܢܐ ܘܒܡ̇ܘܗ̈ܒܬܐ ܘܒܦ̈ܠ̣ܚܘܬܐ ܘܒܦܠ̣ܚܘܬܐ ܐ̇ܥܬ̣ܪ ܘܐ̇ܘ̣ܪܒ: ܘܐ̣ܝܟܢܐ ܬܘܒ ܟܠܗ̇ ܐ̇ܪܡܝܢ ܕܦܪ̈ܣܝܐ: ܟܕ ܐܫܠ̣ܡܬ݀ ܐܬܟܒ̣ܫܬ݀ ܘܐܬܠܒ̣ܟܬ݀ ܐܫܠ̣ܡܬ݀ܝ ܐܬܟܒ̣ܫܬ݀ܝ ܘܐܬܠܒ̣ܟܬ݀ܝ ܡܢ ܪ̈ܗܘܡܝܐ: ܘܟܕ ܙܒ̈ܢ̣ܝܢ ܣܓܝܐ̈ܢ ܐܬ̇ܢܨܚܘ ܘܙܟ̣ܘ ܘܟܒ̣ܫܘ ܥܡ̈ܡܐ ܐܚܪ̈ܢܐ ܕܬ̇ܩܝܦܝܢ ܗܘܘ: ܒܚܪܬܐ ܡܢ ܦܘ̇ܪ̈ܢܣܐ ܒܝ̣̈ܫܐ ܕܪ̈ܝܫ̣ܢܐ: ܐ̇ܘ ܡܛܠ ܕܒܣܓܝܐ̈ܬܐ ܐܪ̈ܓ̣ܙܘ ܠܐܠܗܐ: ܟܕ ܠܐ ܒܨ̣ܝܪܝܢ ܗܘܘ ܡܢ ܡܢܝܢܐ ܕܡܐܐ ܐ̈ܠܦܝܢ܆ ܡܢ ܩܕܡ ܡ̇ܪܙܒܢܐ ܚܕ ܫ̣ܝܛܐ܇ ܕܬܠܬܝܢ ܐ̈ܠܦܝܢ ܥܡܗ ܠܝܬ ܗܘܐ܇  ܙܥ̣ܘ ܘܥ̣ܪܩܘ ܟܠܗ ܚ̇ܝܠܐ ܕܪ̈ܗܘܡܝܐ. ܘܐ̇ܘܒ̣ܕܘ ܙܝܢ̣ܗܘܢ ܘܪ̈ܟܫܗܘܢ̣ ܘܒܗ̣ܬܘ. ܘܡܢ ܒܬܪ ܗܠܝܢ܆ ܐܫܬ̇ܩܠ ܘܐܬ̇ܥܫܢ ܦܪܣܝܐ܆ ܘܠܒ̣ܟ ܘܟܒ̣ܫܗ̣̇ ܠܟܠܗ̇ ܐ̇ܪܡܝܢ. ܘܟܠܗ ܐܬܪܐ ܫܐ̣ܠܘ ܡܢܗ ܡܠܬܐ̣ ܘܝܗ̣ܒ ܠܗܘܢ. ܘܗ̣ܦܟ ܐ̇ܫ̣ܠܡ ܠܗ ܟܠܗ ܐܬܪܐ̣ ܣܛܪ ܡܢ ܐܝܠܝܢ ܕܒܩܘܣܛܢܛܝܢܦܘܠܝܣ ܡܢܗܘܢ ܐܫܬܟ̣ܚܘ ܡܢ ܒܬܪ ܙܒܢܐ܇ ܕܫܒ̣ܥ ܫ̈ܢܝܢ ܕܡ̣ܪܕܘ ܥܠܘܗܝ܇ ܘܐܬ̇ܟܬܫܘ ܥܡܗ.܀. ܘܕܐ̇ܝܟܢܐ ܬܘܒ ܒܬܪ ܗܠܝܢ܇ ܐܝ̈ܙܓܕܐ ܪ̈ܘܪܒܢܝ ܬܪ̈ܬܝܗܝܢ ܡ̈ܠܟܘܬܐ܇ ܐܫܬ̇ܕܪܘ ܠܡܒ̇ܚܢܘ ܣܘܥ̣ܪ̈ܢܐ܇ ܕܒܝܢܬ ܬܪ̈ܬܝܗܝܢ ܡ̈ܠܟܘܬܐ ܐܬܬ̣ܙܝܥܘ܇ ܘܕܢܡ̇ܠܠܘܢ ܬܘܒ ܘܐܦ ܡܛܠ ܫܝ̣ܢܐ. ܗܕܐ̣ ܕܐܦ ܗ̣ܘܬ. ܘܝܬܝܪ ܡܢ ܫܢܬܐ ܚܕܐ ܗ̣ܘܘ ܝܬ̇ܒܝܢ ܠܘܩܒܠ ܚ̈ܕܕܐ܇ ܘܡ̇ܡܠܠܝܢ ܘܡܬ̇ܒܝܢܝܢ ܘܕܝ̇ܢܝܢ ܥܡ ܚ̈ܕܕܐ܇ ܟܕ ܡܕܡ ܠܐ ܣܥ̇ܪܝܢ. ܘܠܘܩܕܡ ܦܪܣܝܐ ܬܒ̇ܥ ܗܘܐ܆ ܕܢ̇ܣܒ ܕܗܒܐ̣ ܘܢܥܒ̣ܕ ܫܝ̣ܢܐ̇. ܘܠܘܩܒܠ ܗܕܐ ܡ̇ܠܟܐ ܕܪ̈ܗܘܡܝܐ ܐܬܬ̣ܥܝܪ ܓܢܒܪܐܝܬ̣ ܟܕ ܐܡ̇ܪ. ܕܗܢܐ̣ ܐܝܟ ܕܡܢ  ܐ̇ܝܢܐ ܕܕܚ̇ܠ ܡܢܗ ܘܡܫܥ̣ܒܕ ܠܗ܇ ܡܢܢ ܕܗܒܐ ܬܒ̇ܥ. ܢܗ̣ܘܐ ܝ̇ܕܥ ܕܚܕ  ܡ̣ܢܝܐ܆ ܘܠܐ ܗ̇ܘ ܕܥܕܡܐ ܠܗܫܐ ܫ̇ܩܠ ܗܘܐ ܡܢܢ܆ ܒܚܝ̈ܝ̣ܢ ܠܐ ܫ̇ܩܠ. ܘܐܢ ܒܐܝܩܪܐ ܫ̣ܘܝܐ ܕܡ̇ܠܟܘܬܐ ܥܡ ܡ̇ܠܟܘܬܐ ܠܐ ܥ̇ܒܕ܆ ܫܝܢ̣ܐ ܥܡܗ̣ ܠܐ ܥ̇ܒܕܝܢܢ. ܘܒܚܪܬܐ ܐܬܪܡ̣ܝ̣ ܐܦ ܠܗܕܐ ܦܪܣܝܐ. ܘܡܕܡ ܠܐ ܗ̣ܘܐ. ܥܡ ܐܚܪ̈ܢܝܬܐ ܣܓܝܐ̈ܬܐ ܕܕܐܝܟ ܗܠܝܢ܇ ܕܟܬ̈ܒܐ ܣܓ̈ܝܐܐ ܠܐ ܡ̇ܣܝܟܝܢ ܬ̇ܘܢܝ ܬܫ̈ܥ̣ܝܬܐ ܕܥܠܝܗܝܢ. ܘܫܪܟܐ ܕܩܪ̈ܒܐ ܘܕܥܠܡܐ ܘܕܥܕܬܐ܇ ܗܠܝܢ ܕܡܢ ܣܓܝܐܘܬܗܝܢ ܡܢܗܝܢ ܐ̇ܦܝ̣ܫܢ. ܪܝܫܐ ܕܥܣܪ̈ܝܢ ܘܚܡܫܐ܆ ܕܥܠ ܡ̇ܪܕܘܬܐ ܕܚܝ̣ܠܬܐ ܘܩܫ̣ܝܬܐ ܕܕܝܢ̣ܐ ܟܐܢܐ ܕܐܠܗܐ܇ ܕܒܗ̇ ܒܥ̇ܙܝܙܘܬܗ ܕܪܕܘܦ̣ܝܐ ܠܬܪ̈ܝܗܘܢ ܓ̇ܒ̈ܐ ܫܘܝ̣ܐܝܬ ܐܕ̣ܪܟ ܒܥܓܠ. ܏ܟܗ ܒܙܒܢܐ ܗܟܝܠ ܗܢܐ܆ ܠܚܡ̣ܐܝܬ ܒܥܒ̇ܕܐ ܡܬ̣ܚܙܐ ܚ̇ܝܠܗ̇ ܘܫܘܡ̣ܠܝܗ̇ ܕܡ̇ܠܦܢܘܬܐ ܫܠܝ̣ܚܝܬܐ ܗ̇ܝ ܕܐܡ̇ܪܐ܇ ܕܡܬܓ̣ܠܐ ܗܘ ܠܡ ܓܝܪ ܪܘܓܙܗ ܕܐܠܗܐ ܕܡܢ ܫܡܝܐ܇ ܥܠ ܟܘܠܗ ܥܘ̣ܠܗܘܢ ܘܪܘܫ̣ܥܗܘܢ ܕܒ̈ܢܝܢܫܐ܇ ܗ̇ܢܘܢ ܕܩܘܫܬܐ ܒܥܘ̣ܠܐ ܐ̇ܚ̣ܝܕܝܢ܇ ܥܡ ܫܪܟܐ. ܡܛܘܠ ܗܟܝܠ ܕܟܪ̈ܣܛܝܢܐ ܪ̈ܕܘܦ̣ܝܐ ܩ̣̈ܫܝܐ ܘܬ̇ܩ̈ܝܦܐ ܡܢ ܥ̈ܠܠ̣ܬܐ ܦܚ̇ܝ̈ܚܬܐ ܥܠ ܟܪ̈ܣܛܝܢܐ ܒܙܒܢܐ ܗܢܐ ܕܠܐ ܪ̈ܚ̣ܡܐ ܘܠܒܪ ܡܢ ܟܘܠܗ̇ ܕܚ̣ܠܬ ܐܠܗܐ ܐ̇ܩܝ̣ܡܘ: ܒܥ̇ܪܝܪܐܝܬ ܘܒ̣ܪܒܪܐܝܬ ܘܠܘ ܟܪܣܛܝܢܐܝܬ: ܟܕ ܕܡ̇ܝܢ ܠܐܪܝܐ ܕܢܗ̇ܡ ܠܡܬ̣ܒܪ: ܘܐܝܟ ܓܘܪܝܐ ܕܐܪܝܐ ܕܝܬ̇ܒ ܒܛܘ̣ܫܝܐ: ܡܛܠ ܕܡܛܠ ܗܕܐ ܩܡ̣ ܡܪܝܐ ܩܕܡ ܐ̈ܦܝܗܘܢ̣ ܘܐ̇ܒ̣ܪܟ ܐܢܘܢ. ܐ̣ܝܟܢܐ ܕܓܠܝ̣ܐܝܬ̣ ܠܥ̣ܝܢ ܟܘܠܢܫ ܐܬܓܠ̣ܝܬ݀ ܘܐܬܝ̣ܕܥܬ݀. ܗܠܝܢ ܕܟܕ ܒܟܠܗ̇ ܡ̇ܥܪܡܘܬܐ ܕܠܐ ܛܟ̣ܣܐ܆ ܠܘܬ ܒ̈ܢܝ ܒܣܪܗܘܢ ܗ̇ܢܘ ܕܝܢ ܠܘܬ ܟܠܗ ܥܡܐ ܕܬܪ̈ܝܨܝ ܫܘܒܚܐ ܒܛܢ̣ܢܐ ܕܪܘܓܙܐ: ܘܠܘ ܒܛܟ̣ܣܐ ܡ̇ܫ̣ܝܢܐ ܟܐܢܐܝܬ ܘܟܪܣܛܝܢܐܝܬ ܡܬ̇ܚܫܚܝܢ ܗܘܘ: ܟܕ ܪ̈ܕܘܦ̣ܝܐ ܚ̇ܣ̈ܝܢܐ ܕܠܐ ܪ̈ܚ̣ܡܐ ܐ̇ܥ̣ܝܪ̈ܘ: ܘܚܒ̈ܘ̣ܫܝܐ ܡ̇ܪ̈ܝܪܐ ܘܚ̈ܫ̣ܘܟܐ ܐ̈ܠܝܨܐ ܦܩ̇ܕܝܢ ܗܘܘ ܥܠ ܥ̣ܒ̈ܕܘܗܝ ܕܐܠܗܐ: ܐܢ̈ܫܐ ܣܒ̈ܐ ܘܟ̣ܪ̈ܝܗܐ ܘܡ̈ܚ̣ܝܠܐ ܘܝܩ̣ܝܪ̈ܐ: ܘܐܟ̣ܣܘܪ̈ܝܣ ܚ̇ܪ̈ܡܬܐ ܘܕܓ̈ܠ̣ܝܙܢ ܡܢ ܟܠܗ̇ ܕܚܠ̣ܬ ܐܠܗܐ ܓ̇ܙܪܝܢ ܗܘܘ ܟܕ ܦܩ̇ܕܝܢ܆ ܕܒܟܦܢ̣ܐ ܘܒܨ̣ܗܝܐ ܘܒܓܠ̣ܝܙܘܬ ܝ̈ܕܘܥܐ ܢܫܬ̇ܢܩܘܢ ܐܝܠܝܢ ܕܡܬ̇ܐܣܪܝܢ ܗܘܘ ܘܡܬ̇ܚܒܫܝܢ ܡܢܗܘܢ. ܘܠܗܠܝܢ ܕܒܕܘܟ̈ܝܬܐ ܕܫ̇ܕܝܢ ܗܘܘ ܠܐܝܠܝܢ ܕܡܫ̣ܬܕܝܢ: ܡܬ̇ܚܡܝܢ ܗܘܘ ܕܕܠܐ ܪ̈ܚܡ̣ܐ ܢܬ̇ܚܫܚܘܢ ܠܘܬܗܘܢ܆ ܟܕ ܐ̇ܠܨܝܢ ܠܗܘܢ ܒܟܠ ܦܘܪ̈ܣܝܢ܆ ܕܗ̇ܘܝܐ ܠܡ ܡܢ ܐ̇ܢܢܩܐ ܘܐ̈ܘܠܨܢܐ ܩ̈ܫ̣ܝܐ ܘܢܣ̣̈ܝܘܢܐ܆ ܢܬ̇ܬܪܡܘܢ ܠܨܒܝܢܗܘܢ ܕܐ̈ܠܘܨܐ. ܘܠܐܚܪ̈ܢܐ ܕܝܢ ܐܠ̣ܨܘ ܘܟܒ̣ܫܘ̣ ܘܫܥ̇ܒ̣ܕܘ ܐܝܟ ܨܒܝܢܗܘܢ. ܟܕ ܐܦ ܟܗܢܘܬܐ ܕܡܢ ܙܒ̈ܢܐ ܢܓ̇ܝܪ̈ܐ ܕܐܢ̈ܫܐ ܐܪ̈ܬܕܟܣܘ܆ ܕܠܐ ܢܡ̇ܘܣ̣ ܘܠܒܪ ܡܢ ܟܠܗ ܛܟ̣ܣܐ ܩܢܘܢܝܐ ܫ̇ܪܝܢ ܗܘܘ܆ ܘܡܢ ܕܪܝܫ ܠܗܘܢ ܥ̇ܒܕܝܢ ܗܘܘ. ܠܟܗ̈ܢܐ̣ ܘܠܪ̈ܝܫ̣ܝ ܟܗ̈ܢܐ. ܘܫܪܟܐ ܕܣܓܝܐ̈ܬܐ ܕܕܐܝܟ ܗܠܝܢ܇ ܐܝܠܝܢ ܕܙܥܘܪ ܠܢ ܙܒܢܐ ܕܥܠܝܗܝܢ ܢܫܬ̇ܥܐ. ܗܠܝܢ ܕܐܝܟ ܕܐܦ ܐܬܝ̣ܕܥܬ݀܆ ܐܦ ܕܐܦ ܠܐ ܗ̣ܝ ܟܐܢܘܬܗ ܕܐܠܗܐ܇ ܛܥܢ̣ܬ݀ ܘܣܝܒ̣ܪܬ݀ ܐ̈ܢܝܢ. ܐܠܐ ܒܥܓܠ ܘܡܣ̣ܪܗܒܐܝܬܓ̣ܙܪ ܕܝ̣ܢܐ ܘܪܘܓܙܐ ܕܡܢ ܫܡܝܐ ܥܠ ܗܕܐ ܟܠܗ̇ ܚ̇ܪܡܘܬܐ ܘܒܥ̇ܪܝܪܝܘܬܐ܇ ܗ̇ܢܘ ܕܝܢ ܥܠ ܗ̇ܢܘܢ ܕܕܠܐ ܦܓ̣ܘ̈ܕܐ ܕܕܚܠ̣ܬ ܐܠܗܐ ܒܗ̇ ܡܬ̇ܚܫܚܝܢ ܗܘܘ ܐܫܬ̇ܕܪ܇ ܗ̇ܢܘ ܕܝܢ ܥܠ ܝܘܚܢܢ ܦܛܪܝܪܟܐ܇ ܘܥܠ ܡ̇ܠܟܐ ܗ̇ܘ ܕܡܢܗ ܡܫ̣ܬܓܫ ܗܘܐ܇ ܘܠܗ ܦܩ̇ܕ ܗܘܐ ܕܒܗܠܝܢ ܢܬ̇ܚܫܚ. ܟܕ ܬܪ̈ܝܗܘܢ ܒܚܕ ܫܒܛܐ ܕܪܘܓܙܐ ܒܠ̣ܥܘ܆ ܘܚܕ ܓܙܪ ܕܝܢ̣ܐ ܕܡܫܬ̇ܠܡܢܘܬܐ ܕܠܪ̈ܘܚܐ ܒܝ̣ܫ̈ܬܐ ܩ̇ܒܠܘ. ܥܡ ܫܪܟܐ ܕܐܝܠܝܢ ܕܒܡܨܥܬܐ ܕܣܓܝܐ̈ܢ ܐ̈ܢܝܢ ܕܕܚ̣ܝ̈ܠܢ ܘܓܢ̣ܝ̈ܚܢ܇ ܐܝܠܝܢ ܕܡܛܠ ܐܝܩܪܐ ܕܟܗܢܘܬܐ ܘܕܡ̇ܠܟܘܬܐ ܡܢܢ ܒܫ̣ܠܝܐ ܕܫܥ̣ܬܐ ܢܬ̇ܚ̈ܦܝܢ܇ ܐܝܠܝܢ ܕܟܕ ܡܢ ܫܐ̈ܕܐ ܗܠܝܢ ܕܐܫܬ̣ܠܡ ܠܗܘܢ ܟܠ ܠܟܠ ܚܕ ܚܕ ܡܢܗܘܢ ܒܙܒܢܐ ܠܐ ܙܥܘܪ ܡܣܬ̇ܥܪ̈ܢ ܗ̈ܘܝ܇ ܘܡ̈ܬ̇ܚܘܝܢ ܘܡ̈ܬ̇ܡܠܠܢ. ܗܠܝܢ ܕܟܕ ܛܒ ܕܚܝ̣̈ܠܢ ܘܝ̣ܩܝܪ̈ܢ܆ ܠܐ ܕܓ̇ܠܢ ܐܝܟ ܣܗܕܘܬܐ ܕܟܠܗܘܢ ܒ̈ܢܝ ܙ̇ܒ̈ܢܝܢ ܗܠܝܢ.܀. ܪܝܫܐ ܕܥܣܪ̈ܝܢ ܘܫܬܐ܆ ܕܥܠ ܫܘܦ̣ܠܐ ܘܫܘ̣ܢܩܐ ܕܐܕܪܟ̣ܗ ܠܝܘܚܢܢ ܣ̣ܪܡܢܐ܇ ܥܡ ܗܝ̇ ܕܡܢ ܫܐܕܐ ܡܬ̣ܪܕܐ ܗܘܐ ܟܠܗ ܙܒܢܐ ܕܚܝ̈ܘܗܝ. ܗ̇ܢܘ ܕܝ̣ܢ ܕܖ̈ܕܘܦ̣ܝܐ ܕܠܐ ܪ̈ܚ̣ܡܝܢ ܐ̇ܩ̣ܝܡ. ܏ܟܘ ܡܢ ܒܬܪ ܕܝܢ ܕܡ̇ܪܕܘܬܐ ܕܚܝ̣ܠܬܐ: ܗ̇ܝ ܕܥܠ ܐܦܝܣܩܘܦܐ ܘܥܠ ܡ̇ܠܟܐ ܐܫܬ̣ܕܪܬ݀ ܗܘܬ: ܗ̣ܘ ܝܘܚܢܢ ܐܦܝܣܩܦܐ ܒܝܕ ܡ̇ܥܒܕܢܘܬܐ ܘܚ̇ܘܦܛܐ ܕܗ̇ܘ ܕܡܢ ܠܓܘ ܡ̇ܥܒܕ ܗܘܐ ܒܗ: ܝܬܝܪܐܝܬ ܠܪܕܘ̣ܦܝܐ ܕܡܗ̈ܝܡܢܐ ܡܬ̇ܥܬܕ ܗܘܐ: ܘܒ̈ܠܘ̇ܚܡܐ ܒ̇ܥܖ̈ܝܪܝܐ ܘܩ̈ܫ̣ܝܐ: ܥܠܝܗܘܢ ܡܢ ܟܠ ܓ̇ܒ̈ܝܢ ܒܟܠ ܝܘ̈ܡܝܢ ܕܠܐ ܒ̇ܘܝܢ ܘܕܠܐ ܡ̇ܚܫܒܬܐ ܡ̇ܛܟܣ̣ܬܐ ܡܬ̇ܥܬܕ ܗܘܐ: ܘܟܕ ܛܒ ܡܢ ܪܘܚܐ ܒܝܫ̣ܬܐ ܡܬ̣ܪܕܐ ܗܘܐ ܒܙܒܢ ܙܒܢ܆ ܐ̣ܝܟܢܐ ܕܐܦ ܝܬܝܪܐܝܬ ܢ̣ܪܓܙ ܥܠܘܗܝ ܗ̣ܘ ܕܝ̇ܢܐ ܕܟܐܢܘܬܐ܇ ܘܢܫ̇ܕܪ ܥܠܘܗܝ ܬܘܒ ܡܚ̣ܘܬܐ ܕܓܘܐ ܘܟܐ̣ܒ ܡ̈ܥܝܐ܇ ܥܡ ܟܐܒܐ ܡ̇ܪܝܪܐ ܕܦܛܓܪܐ܇ ܐ̣ܝܟܢܐ ܕܕܠܐ ܐܣ̣ܝܘ ܡܟܝܠ ܡܬ̇ܢܘܠ ܗܘܐ܇ ܘܟܐ̣ܒܐ ܥܠ ܟܐ̣ܒܐ̣ ܘܡܚ̣ܘܬܐ ܥܠ ܡܚ̣ܘܬܐ܇ ܒܟܠ ܝܘܡ ܡܬ̇ܬܘܣ̣ܦܝܢ ܗܘܘ ܠܗ.  ܟܕ ܝܨ̇ܝܦܘܬܐ ܣܓܝܐܝܬ ܡܢ ܐܣ̇ܘ̈ܬܐ ܣܓ̈ܝܐܐ ܡܬ̇ܩܪܒܐ ܗܘܬ ܠܗ܆ ܘܢܦܐ̣ܫܐ ܘܥܘܕܪܢܐ̣ ܣܟ ܠܐ ܡܬܚ̣ܙܐ ܗܘܐ ܠܘܬܗ. ܐܠܐ ܐ̣ܝܟܢܐ ܕܚ̇ܪ̈ܫܐ ܩܕܡ ܦܪܥܘܢ ܐ̇ܘ̣ܕܝܘ: ܕܨܒܥܗ ܗܝ̣ ܕܐܠܗܐ܆ ܗܟܢܐ ܐܦ ܗܢܐ ܡܟܝܠ ܐܦܢ ܡܢ ܐ̇ܢܢܩܐ܇ ܐܣܬ̇ܟܠ ܒܡ̇ܪܕܘܬܐ ܕܡܢ ܫܡܝܐ ܐܫܬ̣ܕܪܬ݀ ܥܠܘܗܝ܇ ܘܫ̇ܪܝ ܒܕܡ̈ܥܐ ܚ̣̈ܢܝܓܬܐ ܕܢܐܡ̣ܪ ܠܘܬ ܐ̇ܣ̣̈ܘܬܐ܇ ܕܡ̇ܢܐ ܠܡ ܡܟܝܠ ܒ̈ܢܝ ܠܐ̇ܝܢ ܐ̣ܢܬܘܢ ܒܝ ܒܕܘ̇ܝܐ܇ ܕܠܡ̈ܚ̣ܘܬܝ ܐܢܬܘܢ ܕܬ̇ܐܣܘܢ ܠܐ ܡܨ̣ܝܢ ܐ̣ܢܬܘܢ܆ ܡܛܠ ܕܒܓܙܪ ܕܝܢ̣ܐ ܕܟܐܢܘܬܐ ܡܢ ܫܡܝܐ ܡܛܠ ܡ̇ܪܓܙܢܘܬܝ܇ ܐܫܬ̇ܕܪ ܥܠܝ ܗܠܝܢ ܟܠܗܝܢ ܡ̈ܚ̣ܘܬܐ. ܘܒ̈ܢܝܢܫܐ ܕܠܗܝܢ ܢܐ̇ܣܘܢ̣ ܠܐ ܡܨ̣ܝܢ. ܗܫܐ ܗܘ ܓܝܪ ܝܕܥ̇ܬ ܘܐܬ̇ܒܝܢܬ܇ ܕܐ̇ܝܟܢܐ ܕܕܠܐ ܪ̈ܚ̣ܡܐ ܐܢܐ ܡ̇ܚܝܬ   ܠܣܓ̈ܝܐܐ܇ ܗܟܢܐ ܐܢܐ ܒܠܚܘܕܝ ܗܫܐ ܡܢ ܗ̇ܘ ܚܕ  ܒ̇ܠܥܬ ܕܠܐ ܪ̈ܚ̣ܡܐ. ܩܕܡ ܕܝܢ ܙܒܢܐ ܦܣ̣ܩܘ ܗܘܘ ܡܢܗ ܐ̇ܣܘ̈ܬܐ܆ ܐ̣ܝܟܢܐ ܕܐܦ  ܗ̣ܘ ܕܚ̇ܩ ܗܘܐ ܠܗܘܢ܇ ܟܕ ܡܟܝܠ̣ ܘܐܦܠܐ ܣܝ̇ܒܪܬܐ ܡܕܡ ܡܨ̣ܐ ܗܘܐ ܕܢܩ̇ܒܠ. ܘܐܦܢ ܡ̇ܡ̈ܙܓܐ ܢܫ̣ܬܐ ܗܘܐ̣ ܡ̇ܣܩ ܗܘܐ ܠܗܘܢ̣ ܒܥܓܠ. ܒܚܪܬܐ ܕܝܢ ܘܐܦ ܡܐ̈ܢܝ ܥܘܗ ܡܬ̇ܦܬܦܬܝܢ ܗܘܘ̣ ܘܢܚ̇ܬܝܢ. ܘܟܕ ܛܒ ܡ̇ܪܝܪ ܗܘܐ ܘܩܫ̣ܐ ܬܫܢܝ̣ܩܗ܆ ܐܦ ܢܓ̇ܝܪ ܗܘܐ. ܘܟܕ ܡܒ̇ܟܐ ܥܠ ܢܦܫܗ ܐܡ̇ܪ ܗܘܐ ܠܥ̣ܝܢ ܣܓ̈ܝܐܐ܆ ܕܝ̇ܕܥ ܐܢܐ ܠܡ ܡܪܝ ܕܒܝܫ̈ܬ̣ܐ ܩܕܡܝܟ ܥܒ̇ܕܬ܆ ܘܠܘ̈ܛܬܐ ܕܥ̣ܒ̈ܕܝܟ ܐܢ̈ܫܐ ܣܒ̈ܐ ܘܝܩ̣ܝܪ̈ܐ ܐ̇ܕܪ̈ܟ̣ܢܢܝ ܘܐܥ̣ܝܪ̈ܝ ܪܘܓܙܟ ܥܠܝ܇ ܕܕܠܐ ܪ̈ܚ̣ܡܐ ܠܘܬܗܘܢ ܡܬ̇ܚܫܚ ܗ̇ܘܝܬ. ܘܗܢܐ ܟܕ ܡܢ ܒܬܪ ܫ̇ܢܬܐ ܩܕܡܝܬܐ ܕܪܕܘ̇ܦܘܬܗ ܐܡܝ̣ܢܐܝܬ ܡܬ̣ܪܕܐ ܗܘܐ: ܘܟܕ ܪܝܫܗ ܠܐ ܡ̣ܪܝܡ ܗܘܐ: ܘܟܕ ܐܦ ܠܐ ܗܟܢܐ ܐ̇ܦ̣ܝܫ ܡܢ ܩܫ̣ܝܘܬ ܨܢ̣ܥ̈ܬܗ܆ ܒܚܪܬܐ ܟܕ ܫܦ̣ܠܐ ܩܫ̣ܝܐ ܘܬܫ̣ܢܝܩܐ ܗܢܐ ܟܠܐ ܡ̇ܪܝܪܐ ܡ̇ܢܘܠ ܗܘܐ ܠܗ: ܐܝܟ ܙܒܢܐ ܕܬܪ̈ܬܝܢ ܫ̈ܢܝܢ܆ ܗܝ̇ ܕܝܢ ܡܢ ܚܝ̈ܐ ܕܬܢܢ ܛܠ̣ܩ܆ ܒܫܢܬ ܬܠܬܥܣܪ̈ܐ ܕܡ̇ܠܟܘܬܗ ܕܡ̇ܠܟܐ ܝܘܣܛܝܢܐ. ܟܕ. ܗ̣ܘ ܒܗܘܢ ܒܟܘܪ̈ܗܢܘܗܝ ܟܬ̇ܪ. ܘܟܕ ܟܕ ܒܥܒܢ ܙܒܢ ܡܬ̇ܥܕܪ ܗܘܐ܆ ܬܘܒ ܒܟܠܙܒܢ ܡܬ̣ܪܕܐ̣ ܥܕܡܐ ܠܝܘܡܐ ܕܫܘܠܡܗ.