ܪܝܫܐ ܕܬܪ̈ܝܢ܆ ܕܥܠ ܦܘܠܘܣ ܦܛܪܝܪܟܐ̣ ܘܥܠ ܡ̇ܟܬܒܢܘܬܐ ܕܥܒ̣ܕ ܘܐܬܠܒ̣ܟܬ݀. ܏ܒ ܟܕ ܗܟܝܠ ܗ̣ܢܘܢ ܐܦܝ̈ܣܩܦܐ ܐܩܝ̣ܡܘ ܩܝ̣ܡܐ ܒܝܢܬܗܘܢ: ܘܓ̣ܙܪ̈ܘ ܘܦܣ̣ܩܘ ܥܠ ܢܦܫܗܘܢ: ܕܠܓܡ̣ܪ ܠܥܠܡ ܫܘܬ̇ܦܘܬܐ ܕܥܡ ܣܘܢܗ̈ܕܝܛܐ̣ ܬܘܒ ܠܐ ܬܗܘܐ ܠܗܘܢ: ܘܐܬܚ̣ܪܝܘ ܘܩܡ̣ܘ ܓܢܒܪܐܝܬ ܠܘܩܒܠ ܫܘܠܛܢܐ: ܟܕ ܣܓܝܐ̈ܬܐ ܕܠܐ ܡܣ̇ܬ̈ܝܟܢ ܒܝܢܬܗܘܢ ܒܐܓܘܢܐ ܕܬܟܬ̇ܘܫܐ ܪܒܐ ܐܣܬܥ̣ܪ̈ܝ ܘܐܬ̈ܡ̇ܠܠܝ܆ ܗ̇ܝܕܝܢ ܒܟܒ̣ܕܐ ܡ̇ܪܝܪܬܐ ܐܟ̣ܣܘܪܝܐ ܕܥܠܝܗܘܢ܇ ܥܠ ܟܠܚܕ ܚܕ ܡܢܗܘܢ ܐܬܓ̣ܙܪܬ̣̇ ܕܠܐ ܪ̈ܚ̣ܡܝܢ. ܐ̣ܝܟܢܐ ܕܠܘܩܕܡ ܦܘܠܘܣ ܦܛܪܝܪܟܐ܆ ܒܕܝܪܐ ܕܡܬ̇ܩܪܝܐ ܕܐܒܪܗܡ ܐܫܬ̇ܕܪ ܘܐܬܚ̣ܒܫ. ܐ̣ܝܟܢܐ ܕܟܕ ܐܬܚ̣ܒܫ ܘܐܫ̣ܟܚ. ܐܬܪܐ ܘܢܘܗ̣ܪܐ ܙܥܘܪܐ ܕܡܢ ܒܝܬ ܚܒܘ̣ܫܝܗ: ܘܫ̇ܪܝ ܟܬ̇ܒ ܥܠ ܗܠܝܢ ܕܓ̣ܕ̈ܫܝ ܒܥܕܬܐ ܡܢ ܝܘܚܢܢ ܣ̣ܪܡܝܐ܆ ܗܢܐ ܕܐܬ̣ܢܛܪ ܘܐܬܠ̣ܒܟ̣ ܟܕ ܟܬ̇ܒ. ܘܐܬܬ̣ܪܝܡ ܟܬܒܐ ܡܢܗ: ܟܕ ܠܐ ܥܕܟܝܠ ܐܫܬ̇ܡܠܝ ܗܘܐ܆ ܘܐܘܒܠ̣ܘܗܝ ܠܘܬ ܝܘܚܢܢ. ܘܗ̣ܘ ܒܟܒ̣ܕܐ ܡ̇ܪܝܪܬܐ ܫܩ̣ܠܗ̣ ܘܐ̇ܥ̣ܠ ܩ̣ܪܝܗܝ ܩܕܡ ܡ̇ܠܟܐ. ܐ̣ܝܟܢܐ ܕܐܦ ܗ̣ܘ ܟܕ ܫܡ̣ܥ ܕܥܠܘܗܝ ܘܥܠ ܦܛܪܝܪܟܐ ܟܬ̣ܝܒ ܗܘܐ ܠܗ: ܘܥܠ ܐܝܠܝܢ ܕܣܥ̣ܪ̈ܘ ܠܘܬ ܬܓܡ̣ܐ ܕܐܪ̈ܬܕܟܣܘ܆ ܣ̇ܓܝ ܪܘܓܙܐ ܐܬܡ̣ܠܝ ܘܐܦ ܗ̣ܘ܆ ܘܐܬ̇ܕܠܚ ܥܠܘܗܝ ܕܦܘܠܘܣ. ܘܦܩ̣ܕ ܕܢܣ̇ܒܘܢܝܗܝ ܠܟܬ̣ܒܐ܆ ܘܢܐ̣ܙܠܘܢ ܠܘܬܗ܆ ܘܢܬܒ̣ܥܘܢܝܗܝ ܕܢܘܕܐ ܕܐܢ ܗ̣ܘ ܟ̇ܬܒܗ. ܘܐܢ ܡ̇ܘܕܐ܆ ܢܬܒܥ̣ܘܢܝܗܝ ܢܬܒܥ̣ܘܢܝܗ ܕܢ̇ܪܡܐ ܒܗ ܐܝ̣ܕܐ ܕܗ̣ܘ ܟ̇ܬܒܗ. ܐܢ ܕܝܢ ܟܦ̇ܪ ܘܠܐ ܡ̇ܘܕܐ܆ ܕܢܬ̇ܢܓܕ ܠܡ̇ܘܬܐ̣ ܥܕܡܐ ܕܡ̇ܘܕܐ܆ ܘܢܫ̣ܬܒܩ ܒܗ ܒܚܒ̣ܘܫܝܐ. ܐ̣ܝܟܢܐ ܕܟܕ ܗܠܝܢ ܕܐܬ̇ܦܩܕܘ ܫܩ̣ܠܘܗܝ ܠܟܬܒܐ: ܘܐ̣ܙܠܘ ܠܘܬܗ ܠܕܝܪܐ ܒܚܡ̣ܬܐ ܪܒܬܐ ܘܚ̇ܘܝܘܗܝ ܠܗ܆ ܘܬ̇ܒܥܝܢ ܗܘܘ ܒܐ̣ܝ̈ܕܘܗܝ ܕܢܘܕܐ܇ ܕܐܢ ܗ̣ܘ ܟܬ̣ܒ ܐ̈ܢܝܢ ܠܗܠܝܢ.܀. ܗ̣ܘ ܕܝܢ ܡܛܠ ܕܠܐ ܢܬܬ̣ܚܕ ܒܕܓܠܘܬܐ܆ ܐ̇ܘܕܝ̣ ܕܗ̣ܘ ܟܬ̣ܒܗ. ܘܬܒ̣ܥܘܗܝ ܕܢܟ̣ܬܘܒ ܘܢܘܕܐ ܒܗ ܒܟܬ̣ܒܐ ܒܟ̣ܪܬ̣ ܐ̣ܝ̈ܕܘܗܝ܆ ܕܡ̇ܘܕܐ ܐܢܐ ܐܢܐ ܦܘܠܐ܆ ܕܒܟ̣ܪܬ ܐ̣ܝ̈ܕܝ ܟܬ̇ܒܬ ܟܠܗܝܢ ܐܝܠܝܢ ܕܐܝܬ ܒܟܬܒܐ ܗܢܐ. ܘܗܟܢܐ ܫܒ̣ܩܘܗܝ ܬܡܢ ܟܕ ܚܒ̣ܝܫ܇ ܘܐܙ̣ܠܘ ܐܘܒ̣ܠܘܗܝ ܠܟܬܒܐ ܠܦܛܪܝܪܟܐ ܘܠܡ̇ܠܟܐ. ܘܡܢ ܗܝ̇ܕܝ̣ܢ ܠܘ̇ܚ̈ܡܐ ܕܡ̇ܘܬܐ ܗܘ̣ܘ ܥܠܘܗܝ. ܟܕ ܠܗܕܐ ܘܐܦ ܗ̇ܝ ܕܩ̣ܘܛܪ̈ܓܐ ܕܪܗܘܡܐ ܐ̇ܠܘ̣ܬ ܗܘܐ ܠܗ܇ ܘܐܦ ܓܝܪ ܘܗ̣ܘ ܘܟܠܢܫ ܐ̇ܘ̣ܚܠ ܥܠ ܚܝ̈ܘܗܝ܆ ܘܐܣ̣ܒܪܘ ܥܠܘܗܝ܆ ܕܒܡ̇ܘܬܐ ܒܝ̣ܫܐ ܡܐ̇ܬ ܗܘܐ ܘܐ̇ܒܕ ܡܢ ܚܝ̈ܐ ܕܬܢܢ.܀. ܪܝܫܐ ܕܬܠܬܐ܆ ܕܥܠ ܐ̣ܣܛܦܢܐ ܐܦܝܣܩܘܦܐ ܕܩܘܦܪܣ܆ ܘܥܠ ܩ̇ܪܝܬܗ ܘܡ̇ܥܠܬܗ ܕܦܘܠܘܣ ܕܡܢ ܐܟ̣ܣܘܪܝܐ܆ ܘܥܠ ܥܪܘ̣ܩܝܗ ܕܡܢ ܒܬܪܟܢ. ܏ܓ ܐܣ̣ܛܦܢܐ ܗܢܐ ܕܐܦܝܣܩܦܐ ܐ̣ܝܬܘܗܝ ܗܘܐ ܕܥܗ̣ܕܬܗ ܡܠܬܐ ܡܢ ܩܕܝܡ: ܗ̇ܘ ܕܒܥ̣ܐ ܗܘܐ ܝܘܚܢܢ ܐܦܝܣܩܦܐ ܕܡܕܝܢܬ ܡ̇ܠܟܘܬܐ: ܕܢܫ̣ܪܝܘܗܝ ܘܡܢ ܕܪܝܫ ܢܥܒ̣ܕܗ: ܘܐܬܚ̣ܪܝ ܥܡܗ ܘܩ̣ܡ ܠܩܘ̣ܒܠܗ ܚ̣ܠܝܡܐܝܬ ܘܚܝܠܬܢܐܝܬ: ܘܪܗ̣ܛ ܠܘܬ ܡ̇ܠܟܐ: ܟܕ ܩ̇ܥܐ ܘܡ̇ܒܓܢ ܥܠܘܗܝ ܡܛܠ ܗܕܐ: ܐ̣ܝܟܢܐ ܕܐܦ ܗ̣ܘ ܡ̇ܠܟܐ ܐܣܠ̣ܝܗ̇ ܠܗܕܐ: ܘܥ̣ܕܠ ܣ̇ܓܝ ܐܦ ܗ̣ܘ: ܘܦܩ̣ܕ ܘܗܘ̣ܐ ܛܘ̣ܦܘܣ ܦܪܓܡ̇ܛܝܩܘܢ܆ ܕܠܐ ܬܘܒ ܐܢܫ ܢܡ̇ܪܚ ܕܢܬ̇ܚܫܚ ܒܥ̇ܒܕܐ ܗܢܐ ܕܠܐ ܢܡ̇ܘܣ ܘܕܠܐ ܐܠܗ: ܗܢܐ ܕܟܕ ܦܪܗܣܝܐ ܣܓܝܐܬܐ ܠܘܬ ܡ̇ܠܟܐ ܗܘ̣ܬ ܠܗ: ܘܣܡ̣ܗ ܕܢܐ̣ܙܠ ܐܦܝܣܩܘܦܐ ܠܩܘ̣ܦܪܘܣ ܓ̇ܙܪܬܐ: ܘܝܩ̣ܪܗ ܒܣܓܝܐ̈ܬܐ܆ ܘܐܦ ܫܘܒܩܢܐ ܣܓܝܐܐ ܥܒ̣ܕ ܡܛܠܬܗ ܒܓ̇ܙܪܬܐ ܗ̇ܝ. ܘܡܟܝܠ ܗܢܐ ܟܕ ܫܩ̣ܠ ܦܪܗܣܝܐ܆ ܩ̇ܪܒ ܗܘܐ ܦܝ̇ܣܬܐ ܡܛܠ ܦܘܠܘܣ ܕܢܫܬ̣ܒܩ ܠܗ܆ ܘܕܢܫ̣ܬܪܐ ܡܢ ܗ̇ܘ ܐܘܠܨܢܐ ܩܫ̣ܝܐ ܕܐ̣ܝܬܘܗܝ ܗܘܐ ܒܗ. ܘܫܩ̣ܠ ܡ̇ܠܟܐ ܒܐ̈ܦܘܗܝ ܕܐܣ̣ܛܦܢܐ̣ ܘܐܫܬ̇ܘܕܝ ܠܗ. ܕܐܢ ܥܐ̇ܠ ܘܡܬ̇ܩܪܒ ܥܡܗ܆ ܢܫܬ̇ܒܩܘܢ ܠܗ ܣ̣ܘܪ̈ܚܢܐ ܕܣܥ̣ܪ ܟܠܗܘܢ. ܗ̣ܘ ܕܝܢ ܐ̣ܙܠ ܠܘܬܗ܆ ܘܡ̇ܠܠ ܠܗ ܗܠܝܢ. ܘܗ̣ܘ ܡܢ ܙܘܥ̇ܬܐ ܕܡ̇ܘܬܐ ܗ̇ܝ ܕܐ̇ܚܝ̣ܕܐ ܗܘܬ ܒܗ܆ ܝܗ̣ܒ ܢܦܫܗ ܘܥ̣ܠ ܘܐܬ̇ܩܪܒ ܬܘܒ ܡܢ ܕܪܝܫ܆ ܘܐܬ̇ܩܒܠ ܒܝܬ ܐܦܝܣܩܘܦܝܘܢ. ܗ̣ܘ ܕܝܢ ܝܘܚܢܢ ܟܕ ܨ̣ܒܐ ܕܢܒ̇ܙܚܝܘܗܝ ܩܕܡ ܟܠܢܫ܆ ܥܒ̣ܕ ܕܢܬ̇ܟܢܫܘܢ ܣܓ̈ܝܐܐ ܡܢ ܣܘܢܩ̣̈ܠܝܛܣ ܘܡܢ ܐܠܟ̣ܣܢܕܪ̈ܝܐ: ܡܛܠ ܕܒܓܢ̣ܣܗ ܡܢܗܘܢ ܕܐܠܟ̣ܣܢܕܪ̈ܝܐ ܐ̣ܝܬܘܗܝ ܗܘܐ܆ ܘܩܕܡ ܟܠܗܘܢ ܥܒ̣ܕ ܕܢܬ̇ܩܪܒ ܡܢܗ ܡܢ ܕܪܝܫ. ܕܐܝܟ ܕܐܦܢ ܢܒܥ̣ܐ ܕܢܗܦ̣ܘܟ ܕܢ̇ܗܦ̣ܘܟ ܐܝܟ ܕܣ̣ܒܪ̣ ܕܠܐ ܠܡ ܢܬܡ̣ܨܐ. ܘܗܟܢܐ ܡܟܝܠ ܒܟܠܝܘܡ ܡܩ̇ܒܠ ܗܘܐ ܠܗ ܡ̇ܠܟܐ ܘܡ̇ܡܠܠ ܗܘܐ ܠܗ܆ ܡܛܠ ܣܓܝܐ̈ܬܐ. ܡܛܠ ܕܓܒܪܐ ܗܘܐ ܚܟܝܡܐ ܘܝ̇ܕܘܥܬܢܐ܆ ܘܕܡܢ ܩ̣ܪܝܢܐ ܣܓܝܐܐ. ܘܡܟܝܠ ܡ̇ܠܟܐ ܡܛܠ ܣ̣ܘܥܪ̈ܢܐ ܡܢܗ ܡܠܟܐ ܫܩ̇ܠ ܗܘܐ܆ ܘܒ̈ܥ̇ܕܢܐ ܣܓ̈ܝܐܐ ܥܡܗ ܥ̇ܢ̣ܐ ܗܘܐ ܡ̇ܠܟܐ ܘܡ̇ܡܠܠ ܗܘܐ ܠܗ ܪܐܙܢܐܝܬ܇ ܥܕܡܐ ܠܐ̣ܝܟܐ ܕܠܘ ܒܩܠܝܠ ܗ̣ܝ ܗܕܐ ܠܝܘܚܢܢ ܐܙܝܥ̣ܬܗ܇ ܕܕܡ ܢ̇ܦܩܗ ܠܗ ܘܢܥ̇ܠܗ ܠܦܘܠܐ ܚܠܦܘܗܝ. ܘܡܟܝܠ ܒܐܓܘ̣ܢܐ ܣܓܝܐܐ ܘܒܙܘܥܬܐ ܐ̣ܝܬܘܗܝ ܗܘܐ ܗ̣ܘ ܝܘܚܢܢ. ܘܫ̇ܪܝ ܓܐ̇ܫ ܠܗ ܠܡ̇ܠܟܐ̣ ܟܕ ܐܡ̇ܪ. ܕܐܢ ܦܩ̇ܕܬ ܡܪܝ܆ ܢܫ̇ܕܪܝܘܗܝ ܠܐ̇ܒܐ ܦܘܠܐ ܠܐܘܪܫܠܡ ܐܦܝܣܩܦܐ̣ ܐ̇ܘ ܠܬܣ̇ܠܘܢܝܩܐ. ܡܛܠ ܕܬܪ̈ܝܗܘܢ ܬܪ̈ܘܢܘ ܣܦ̣ܝܩܝܢ. ܗ̣ܘ ܕܝܢ ܡ̇ܠܟܐ ܟܕ ܝܕܥ̣ ܚ̣ܪܥܘܬܗ ܐܝܟ ܕܝܬܝܪܐܝܬ ܢ̇ܪܥܠܝܘܗܝ̣ ܐܡ̣ܪ ܠܗ. ܕܠܐ̇ܒܐ ܦܘܠܐ ܐܪ̣ܦܐ ܠܗ܆ ܕܗܪܟܐ̣ ܡ̣ܬ̇ܒܥܐ ܠܢ. ܗܕܐ̣ ܕܝܬܝܪܐܝܬ ܐܙܝܥ̣ܬܗ. ܘܡܟܝܠ ܟܕ ܒܡܣ̣ܒܪܢܘܬܐ ܗܕܐ ܗ̣ܘܐ ܡ̇ܫܪܪܐܝܬ ܐܬ̣ܬ̣ܚܕ̣ ܘܐܬ̇ܕܘܕ. ܘܡܟܝܠ ܪܦ̇ܝ ܠܗ ܠܦܘܠܐ ܕܐܢ ܨ̇ܒܐ ܕܢܫ̇ܢܐ܆ ܘܕܠܐ ܢܛܘ̣ܪܬܐ ܫܒܩ̣ܗ ܗܘܐ. ܘܥܐ̇ܠܝܢ ܗܘܘ ܠܘܬܗ ܐܝܠܝܢ ܕܒ̇ܥܝܢ ܗܘܘ܆ ܟܕ ܡܬ̇ܚܫܒ ܗܘܐ ܕܢܗܘܐ ܠܗ ܐܬܪܐ ܕܢܥ̣ܪܘܩ. ܗܕܐ̣ ܕܐܦ ܗܘ̣ܬ. ܘܥ̣ܪܩ ܦܘܠܐ̣ ܘ̇ܐ̣ܬܪܘܚ ܝܘܚܢܢ. ܪܝܫܐ ܕܐܪ̈ܒܥܐ܆ ܕܥܠ ܝܘܚܢܢ ܕܥܠ ܚ̈ܢܦܐ. ܏ܕ ܟܕ ܗܟܝܠ ܦܘܠܘܣ ܒܝܕ ܐܣ̣ܛܦܢܐ ܥ̣ܠ ܘܐܬ̇ܩܒܠ: ܘܡܟܝܠ ܐܦ ܒܬܟ̣ܝܠܘܬܐ ܣܓܝܐܬܐ ܗܘ̣ܘ ܠܘܬܗ ܣܘ̈ܢܗܕܝܛܐ܆ ܡܫܬ̇ܕܪ ܗܘܐ ܐ̣ܣܛܦܢܐ̣ ܘܐܦ ܠܘܬ ܝܘܚܢܢ ܗ̇ܘ ܕܡܬ̣ܩܪܐ ܕܥܠ ܚ̈ܢܦܐ ܘܡܬ̇ܒܪ ܦܬܟܪ̈ܐ܇ ܡܢ ܡ̇ܠܟܐ ܘܡܢ ܦܛܪܝܪܟܐ܇ ܥܡ ܣܘܢܩ̣̈ܠܝܛܘܣ ܘܫܪܟܐ ܕܐܚܪ̈ܢܐ܇ ܠܐܟ̣ܣܢܕܟܝܢ ܕܡܬ̇ܩܪܝܐ ܕܐ̣ܘܒܘܠܘ: ܕܐ̣ܘܒ̈ܘܠܘ ܗ̇ܝ ܕܡܢ ܒܬܪ ܚܒ̣ܘܫܝܐ ܕܬܪ̈ܝܢ ܕܒܒܝܬ ܐܦܝܣܩܦܝܘܢ: ܘܡܢ ܒܬܪ ܕܐܬܦ̣ܪ̈ܫܘ ܟܠܗܘܢ ܡܢ ܚ̈ܕܕܐ܆ ܗ̣ܘ ܝܘܚܢܢ܆ ܒܗ̇ ܒܗ ܐܬܚ̣ܒܫ ܒܒܝܬ ܐ̈ܠܝ̣ܨܐ܆ ܟܕ ܠܐ ܡܬ̣ܚܙܐ ܗܘܐ ܐܢܫ ܡܢ ܝܕ̈ܘܥܘܗܝ ܠܘܬܗ̣ ܠܓܡ̣ܪ. ܠܘܬ ܗܢܐ ܗܟܝܠ ܐܬ̣ܘ ܗܠܝܢ ܕܐܫܬ̇ܕܪ̈ܘ̣ ܟܕ ܐܡ̇ܪܝܢ. ܕܡ̇ܪ̈ܝܢ ܡ̈ܠܟܐ ܙܟ̈ܝ̇ܐ ܘܦܛܪܝܪܟܐ܆ ܘܦܛܖ̈ܝܪܟܐ ܣ̇ܓܝ ܚܒ̇ܝܒܐܝܬ ܫܐ̇ܠܝܢ ܫܠ̣ܡܟ܆ ܘܡܦ̣ܝܣܝܢ ܠܟ܆ ܕܬܫ̣ܪܐ ܢܦܫܟ ܡܢ ܐܘܠܨܢܐ ܗܢܐ܆ ܘܬܐ̣ܬܐ ܬܥܘܠ ܠܘܬ ܐܚ̈ܝܟ ܡܪܝ ܦܘܠܐ ܦܛܪܝܪܟܐ̣ ܘܡܪܝ ܐܠܝܫܥ̣ ܘܬ̇ܚܕܐ ܐܢܘܢ. ܘܠܗܘܢ ܠܡ̇ܪ̈ܚܡܢܐ ܡ̈ܠܟܐ ܘܠܩܕܝܫܐ ܦܛܪܝܪܟܐ܆ ܘܬܡ̇ܠܠܘܢ ܬܘܒ ܡܛܠ ܚܕܝܘܬܐ. ܐ̣ܝܟܢܐ ܕܗ̣ܘ ܝܘܚܢܢ ܡܢ ܐܘܠܨܢܐ ܘܐ̇ܢܢܩܐ ܕܚܒܘ̣ܫܝܐ ܩܫ̣ܝܐ: ܟܕ ܗܠܝܢ ܫܡܥ܆ ܐܬܬ̣ܥܝܪ ܒܛܢ̣ܢܐ ܕܢܦܓ̣ܥ ܒܗܠܝܢ ܕܐܬ̣ܘ ܠܘܬܗ ܙܥܝ̣ܦܐܢܬ ܘܩܫ̣ܝܐܝܬ: ܘܒܚ̣ܪ̈ܡܐ ܘܒܨ̇ܥܪ̈ܐ̣ ܘܠܘܛ̈ܬܐ܆ ܘܣܓܝܐ̈ܬܐ ܕܕܐܝܟ ܗܠܝܢ. ܐܝܠܝܢ ܕܐܬܚ̣ܙܝܬ܆ ܕܝܬܝܪ̈ܬܐ ܐܢ̈ܝܢ ܕܒܟܬ̣̈ܝܒܬܐ ܢܬ̈ܬ̣ܣܝܡܢ. ܘܗܟܢܐ ܢܦ̣ܩܘ ܡܢ ܠܘܬܗ̣ ܟܕ ܡ̣ܪܪܝܢ̣ ܘܫܚ̣ܝܩܝܢ ܥܠܘܗܝ.܀.܀. ܘܬܘܒ ܒܬܪ ܝܘܡܐ ܐܫܬ̇ܕܪܘ ܠܘܬܗ܆ ܟܕ ܡܦ̣ܝܣܝܢ ܠܗ ܒܦܪܨܘܦܐ ܡ̇ܫܝܢܐ ܡܢ ܡ̈ܠܟܐ ܘܦܛܪܝܪܟܐ̣ ܟܕ ܐܡ̇ܪܝܢ. ܕܡܛܠ ܚ̣ܘܝܕܐ ܕܥ̣ܕܬܐ܆ ܗ̣ܒ ܢܦܫܟ ܘܬܐ̣ ܘܢܡ̇ܠܠ. ܘܠܐ ܗܟܢܐ ܬܩ̣ܘܡ ܒܚ̣ܪܝܢܐ ܡܛܠ ܚܕܝܘܬܐ. ܟܕ ܬܘܒ ܘܕܡܢ ܗܠܝܢ ܩܕܡ̈ܝܬܐ ܩ̈ܫ̣ܝܢ ܗ̈ܘܝ ܫܡ̣ܥܘ ܡܢܗ ܟܕ ܐܡ̇ܪ܆ ܕܡܠ̣ܬ ܠܗ ܠܐܠܗܐ ܘܠܒ̈ܢܝ ܐܢܫܐ ܡܢ ܗܝ̇ ܚܕܝܘܬܐ ܩܕܡܝܬܐ: ܕܐܬ̇ܡܠ̣ܠܬ݀ ܘܗ̣ܘܬ ܠܗܦ̣ܟܐ ܘܠܥܩ̣ܘܪܝܐ ܘܠܡ̇ܦܘܠܬܐ܆ ܥܡ ܫܪܟܐ ܕܕܐܝܟ ܗܠܝܢ. ܘܟܕ ܙܒ̈ܢܝܢ ܣܓ̈ܝܐܢ ܐ̣ܙܠܘܢ ܘܐܬ̣ܘ ܘܠܐ ܐܬ̣ܪܡܝ ܐ̇ܘ ܐܬ̣ܛܦܝܣ ܠܗܘܢ܆ ܒܚܪܬܐ̣ ܐܡ̣ܪܘܢ ܠܗ. ܕܚ̣ܢ̣ܢ ܡܛܠ ܕܝ̇ܕܥܝܢܢ ܐܝܠܝܢ ܕܥ̣ܬ̈ܝܕܢ ܥܠܝܟ܇ ܘܫܡ̇ܥܝܢܢ ܓ̇ܙܡ̈ܐ ܕܡ̇ܘܬܐ ܥܠܝܟ܇ ܕܠܘ ܒܡ̇ܘܬܐ ܫܚ̣ܝܡܐ ܥܬ̣ܝܕ ܐܢܬ ܠܡܬ̣ܛܠܩܘ. ܚ̣ܢܢ ܓܝܪ ܡܥ̣ܩܝܢܢ ܥܠܝܟ܆ ܐܡ̇ܪܝܢܢ܆ ܕܡ̇ܚܣܝܢܢ ܡܢ ܒܝ̣ܫ̈ܬܐ ܕܥܬ̣ܝܕ ܐܢܬ ܠܡܣ̣ܒܠ. ܐ̣ܝܟܢܐ ܕܟܕ ܗܠܝܢ ܫܡ̣ܥ܆ ܪܬ̣ܚ ܒܛܢ̣ܢܐ̣ ܘܠ̣ܛ ܐܢܘܢ. ܕܐܠܐ ܒܛܘ̇ܝܐ ܬܐܟ̣ܠܘܢܢܝ ܘܐ̇ܓܗܐ ܡܢ ܚܙܬܟܘܢ܇ ܘܟܢ ܠܡ̇ܘܬܐ ܡ̇ܪܝܪܐ ܐܫ̣ܬܠܡ. ܘܗܟܢܐ ܒܦܣ̇ܝ̈ܩܬܐ ܢܦ̣ܩܘ ܡܢ ܠܘܬܗ܆ ܟܕ ܗ̣ܘ ܐ̣ܣܛܦܢܐ ܒܛܘ̣ܫܝܐ ܠܚܘܕܐܝܬ ܐܬ̣ܐ ܠܘܬܗ܆ ܟܕ ܡ̇ܘܕܥ ܠܗ ܥܠ ܠܘܚ̈ܡܐ ܕܡ̇ܘܬܐ ܕܐܬ̣ܓܙܪ ܥܠܘܗܝ̣ ܘܐܡ̣ܪ ܠܗ. ܕܐܢܐ ܠܡ ܡܟܝܠ܆ ܕܠܐ ܐ̇ܚܙܐ ܒܝ̣ܫ̈ܬܐ ܕܐ̇ܬ̈ܝܢ ܥܠܝܟ܆ ܗܐ ܚ̇ܙܩ ܐܢܐ ܠܝ܆ ܚ̣ܙܝ ܢܦܫܟ. ܘܟܕ ܣܓܝܐ̈ܬܐ ܗ̈ܘ̣ܝ ܘܐܬ̈ܡ̇ܠܠܝ܆ ܚ̣ܠܝܨܘܬܗ ܕܢ̇ܪܦܐ ܠܐ ܐܬܡ̣ܨܝ. ܘܗܟܢܐ ܐ̣ܣܛܦܢܐ ܫܒ̣ܩ ܐܢܘܢ̣ ܘܢܦ̣ܩ ܠܩܘ̣ܦܪܘܣ. ܪܝܫܐ ܕܚܡܫܐ܆ ܕܥܠ ܢܣ̈ܝ̣ܘܢܐ ܕܐܕܪܟ̣ܘܗܝ ܠܗ ܠܝܘܚܢܢ. ܏ܗ ܡܢ ܒܬܪ ܟܢ ܒܐܘܠܨܢܗ ܕܚܒ̣ܘܫܝܗ܆ ܘܥܠ ܪܚ̣ܫܐ ܡ̇ܫ̣ܚܠܦܐ ܕܡ̇ܫܢܩ ܗܘܐ ܠܗ ܒܠܠܝܐ ܘܒܐܝܡܡܐ.܀. ܟܕ ܓܝܪ ܗ̣ܘ ܝܘܚܢܢ ܥܒ̣ܝܕ ܗܘܐ ܒܐܘܠܨܢܐ ܩܫ̣ܝܐ ܘܡ̇ܪܝܪܐ ܕܚܒ̣ܘܫܝܐ܆ ܢܦ̣ܠ ܘܐܦ ܒܐܘܠܨܢܐ ܐܚܪܢܐ ܕܟܐܒ̣ܐ ܡ̇ܪܝܪܐ ܕܪ̈ܓܠܐ ܘܕܐ̣ܝ̈ܕܐ ܕܡܢ ܦ̇ܛܓܪܐ. ܘܡܟܝܠ ܗܘ̣ܐ ܐܝܟ ܡܝ̣ܬܐ ܘܕܠܐ ܡ̣ܨܐ ܕܢܬܗ̇ܦܟ ܐ̇ܘ ܕܢ̇ܪܚܫ ܚܕܐ ܡܢ ܐ̣ܝ̈ܕܘܗܝ ܐܘ ܪ̈ܓܠܘܗܝ: ܘܓܠ̣ܝܙ ܡܢ ܒܛܝ̣ܠܘܬܐ ܐܢܫܝܬܐ ܝܬܝܪܐܝܬ ܕܝ̇ܕ̈ܘܥܘܗܝ: ܘܥܡ ܗܕܐ ܐܦ ܒܢ̣ܣܝܘܢܐ ܕ̣ܪܚ̣ܫܐ ܡ̇ܫܚ̣ܠܦܐ ܡܫܬ̇ܢܩ ܗܘܐ ܒܠܠܝܐ ܘܒܐܝܡܡܐ܆ ܟܕ ܠܘܩܕܡ ܪܦܝ̇ܬ ܒܩ̈ܠܡܐ ܕܠܐ ܣܟ̣ܐ. ܘܥܡ ܗܠܝܢ ܘܦܘܪ̈ܬܥܢܐ ܕܡܠ̣ܝܐ ܗܘܬ ܩ̇ܠܝܬܐ ܗ̇ܝ ܕܚ̣ܒܝܫ ܗܘܐ ܒܗ̇. ܘܒܠܠܝܐ̣ ܘܒܐܝܡܡܐ ܫ̇ܚܩܝܢ ܗܘܘ ܚܝ̣̈ܘܗܝ. ܘܥܡ ܗܠܝܢ ܬܘܒ܆ ܟܠܗ ܐܝܡܡܐ ܫ̈ܠܚ̣ܐ ܕܕܒ̈ܒܐ ܘܕܒ̈ܩܐ ܕܠܐ ܣ̣ܟܐ ܕܟ̇ܢܫܝܢ ܗܘܘ ܥܠܘܗܝ܇ ܡܢ ܙܗ̇ܡܘܬܐ ܕܒܝܬ ܟܖ̣̈ܝܗܐ. ܟܕ ܠܓܡ̣ܪ ܕܢ̇ܪܚܫ ܐ̣ܝ̈ܕܘܗܝ ܘܢ̇ܟܫ ܐܢܘܢ ܡܢܗ̣ ܠܐ ܡ̣ܨܐ ܗܘܐ. ܗ̇ܘܐ ܘܐܢܫ ܕܢ̇ܟܫ ܡܢܗ̣ ܠܝܬ ܗܘܐ ܠܗ. ܢܣ̣ܝܘܢܐ ܕܝܢ ܐܚܪܢܐ ܕܐܪ̈ܒܥܐ ܕܡܢ ܟܠܗܘܢ ܡ̇ܪܝܪ܆ ܕܒܠܠܝܐ ܡܬ̇ܬܘܣܦ ܗܘܐ ܠܗ܆ ܕܐ̣ܝܬܝܗܘܢ ܗܘܘ̣ ܦܫ̈ܦ̣ܫܐ. ܕܗܟܢܐ ܢܦ̇ܩܝܢ ܗܘܘ ܟܠܗ ܠܠܝܐ ܘܡ̇ܚܦܝܢ ܗܘܘ ܠܗ: ܘܠܟܠܗ̇ ܥܪܣܗ ܘܠܦܬ̇ܗ ܘܠܥܝ̈ܢܘܗܝ܆ ܥܕܡܐ ܕܡܬ̇ܪܒܠܐ ܗܘܬ ܦܐ̇ܬܗ ܘܥܝ̈ܢܘܗܝ܇ ܘܥ̈ܒ̇ܝܢ ܘܠܐ ܡܫ̣ܟܚ ܗܘܐ ܕܢܟ̇ܦܪ ܐܢ̈ܝܢ ܡܢܗ. ܘܬܘܒ ܢܣ̣ܝܘܢܐ ܐܚܪܢܐ ܕܚܡܫܐ ܕܒ̈ܩܐ܆ ܕܥܡ ܗܠܝܢ ܟܠܗ ܠܠܝܐ̣ ܐܝܟ ܢܘܪܐ ܡ̇ܘܚܕܝܢ ܗܘܘ ܒܗ: ܝܬܝܪܐܝܬ ܒܐ̈ܦܘܗܝ܇ ܘܒܟܠ ܐ̣ܝܟܐ ܕܡܫ̣ܟܚܝܢ ܗܘܘ ܕܓܠ̣ܐ ܡܢ ܓܘܫܡܗ. ܟܕ ܒ̇ܟܐ ܘܡ̇ܝܠܠ ܡܢ ܐ̇ܢܢܩܐ ܗܕܐ ܟܠܗ̇. ܘܢܘܪܐ ܕܡܢ ܗܠܝܢ ܚܡܫ ܡܚ̣̈ܘܬܐ ܕܚ̣ܕܝܪ̈ܢ ܚ̣ܕܝܪ̈ܢ ܗ̈ܘܝ ܡܢ ܠܓܘ ܘܡܢ ܠܒܪ ܠܟܠܗ ܓܘܫܡܗ܇ ܘܠܝܬ ܒܢܝ̈ܢܫܐ ܕܢܐ̣ܬܘܢ ܠܐ̣ܝܠܗ܇ ܠܐ ܒܠܠܝܐ ܘܠܐ ܒܐܝܡܡܐ܇ ܕܒܗܠܝܢ ܟܠܗܘܢ ܢܣ̣̈ܝܘܢܐ ܕܪܚ̣ܫܐ ܡܬ̇ܝܩܕ ܗܘܐ. ܘܥܡ ܗܠܝܢ ܬܘܒ܆ ܢܣ̣ܝܘܢܐ ܕܫܬܐ ܕܐ̇ܝܬܝ ܥܠܘܗܝ ܣܛܢܐ. ܕܐ̣ܝܬܝܗܘܢ ܗܘܘ ܥܘܩܒܪ̈ܐ܆ ܕܣܠ̣ܩܘ ܥܒ̣ܕܘܢ ܠܗܘܢ ܩܢ̣ܐ܆ ܬܚ̣ܝܬ ܒܣ̣ܕܝܐ ܕܬܚ̣ܝܬ ܪܝܫܗ. ܘܟܠܗ ܠܠܝܐ ܚ̇ܦܪܝܢ ܗܘܘ̣ ܘܡ̇ܨܘܨܝܢ ܬܚ̣ܝܬ ܪܝܫܗ.܀. ܘܗܠܝܢ ܟܠܗܘܢ ܐܘ̈ܠܨܢܐ܆ ܥܠ ܚܒ̣ܘܫܝܗ ܘܟܘ̣ܪܗܢܗ ܐܬܬ̣ܘܣܦ ܠܗ̣ ܘܠܝܬ ܕܡ̇ܥܕܪ. ܓ̇ܕܫܐ ܕܝܢ ܕܐܦ ܠܓܘܚܟܐ ܘܠܡ̇ܘܝܩܐ ܫܩ̇ܠܝܢ ܠܗ ܠܪܘܫ̣ܡܐ ܕܥܘܗܕܢܗܝܢ ܕܥܘܗ̈ܕܢܗܝܢ ܕܗܠܝܢ܇ ܐܝܠܝܢ ܕܠܐ ܐܬ̇ܢܣܝܘ ܘܢܦ̣ܠܘ ܒܗܝܢ. ܗܠܝܢ ܕܐܝܟ ܡܠܬܗ ܕܡܪܢ܆ ܢܬ̇ܬܥܝܪ̈ܘܢ ܘܢܨ̇ܠܘܢ̣ ܕܠܐ ܢܥ̣ܠܘܢ ܠܢ̣ܣܝܘܢܐ. ܪܝܫܐ ܕܫܬܐ܆ ܕܥܠ ܚ̣ܙܘܐ ܘܠܘ ܕܚܠ̣ܡܐ ܐܠܐ ܕܒܫܪܪܐ܇ ܕܐܬ̣ܚܙܝ ܠܗ ܠܝܘܚܢܢ ܒܗ ܒܐܘܠܨܢܗ. ܏ܘ ܟܕ ܗܟܝܠ ܡܢ ܫܘܦ̣ܠܐ ܕܒܝ̣̈ܫܬܐ ܕܒܝܢܬ ܗ̇ܘ ܟܠܗ ܝܩ̣ܕܢܐ ܕܓܘܫܡܗ ܕܡܢ ܗ̇ܘ ܟܠܗ ܪܚܫ̣ܐ ܡ̇ܫ̣ܚܠܦܐ ܘܡ̇ܪܝܪܐ ܕܡܬ̇ܝܩܕ ܗܘܐ ܒܗ: ܐܬ̣ܐ ܗ̣ܘ ܝܘܚܢܢ ܗܢܐ ܕܐܬܐ̣ܡܪ: ܒܝܕ ܗ̇ܝ ܕܥܡ ܟܐ̣̈ܒܐ ܡ̇ܪ̈ܝܪܐ ܕܬܘܒ ܡ̇ܫܢܩܝܢ ܗܘܘ ܠܗ܆ ܘܣ̇ܟܝ ܠܡ̇ܢ ܕܬܟ̣ܪܐ ܠܗ ܘܠܝܬ: ܘܠܡ̇ܒܝܐܢܐ ܘܠܐ ܐܫܬ̣ܟܚ܆ ܗ̇ܝ ܕܝܢ ܠܙܥܘܪܘܬ ܪܘܚܐ ܐܬ̣ܐ ܡܢ ܐ̇ܢܢܩܐ ܕܢ̈ܣ̣ܝܘܢܐ܇ ܐ̣ܝܟܢܐ ܕܐܝܟ ܕܒܚܪܬܐ ܗ̣ܘ ܡܬ̇ܢܐ ܗܘܐ. ܐܦ ܓܝܪ ܒܐܓܪ̈ܬܐ ܣܓܝܐ̈ܬܐ ܘܐܦ ܒܡܦ̣ܩ ܒܪܘܚܐ ܕܥܒ̣ܝܕ ܗܘܐ ܠܗ ܠܣܘܢܗܕܘܣ ܡܕܢܚܝܬܐ ܘܠܟܠܗܘܢ ܬܓ̣ܡ̈ܐ ܕܡܗ̈ܝܡܢܐ܇ ܟܬ̣ܒ ܗܘܐ ܐ̈ܢܝܢ ܠܗܠܝܢ ܟܘܠܗܝܢ܆ ܘܐܦ ܠܚܙ̣ܘܐ ܗܢܐ ܕܚ̣ܙܐ. ܟܕ ܢܦ̇ܩ ܒܪܘܚܐ ܩܕܡ ܐܠܗܐ܆ ܕܠܐ ܢܦ̇ܩ ܠܒܪ ܡܢ ܬܚܘܡܐ ܕܫܪܪܐ܇ ܘܡ̇ܘܣܦ ܚܕܐ ܡܠܬܐ ܥܠ ܗܠܝܢ ܕܣܒ̣ܠ܇ ܐ̇ܘ ܕܥܠ ܚܙ̣ܘܐ ܗܢܐ ܕܓܠܝ̣ܐܝܬ ܐܬܚ̣ܙܝ ܠܗ. ܟܕ ܐܡ̇ܪ ܩܕܡ ܟܘܠܢܫ̣ ܗܟܢܐ. ܕܟܕ ܠܡ ܒܗܠܝܢ ܟܠܗܘܢ ܢܣ̣ܝ̈ܘܢܐ ܡܬ̇ܢܓܕ ܗ̇ܘܝܬ܆ ܘܐܬܟ̣ܪܝܬ݀ ܪܘܚܝ ܘܐܘܚ̣ܠܬ ܘܦܣܩܬ ܥܠ ܚ̈ܝܝ܆ ܒܚܕ ܡܢ ܝܘ̈ܡܝ̣ܢ ܛܠܝܐ ܚܕ ܥܠܝܡܐ ܫܦܝܪ ܚ̣ܙܘܐ ܕܠܒ̣ܝܫ ܟܘܬܝܢܬܐ ܚ̣ܘܪܬܐ ܘܫܦܝܪܬܐ ܢܩ̣ܕܬܐ ܕܦܠ̣ܘ̈ܡܝܐ܆ ܐܬ̣ܐ̣ ܘܥܠ ܠܘܬܝ ܡܢ ܫܠ̣ܝܐ. ܐܝܟ ܕܠܝ ܠܡ ܐܣܬܒ̣ܪܬ݀ ܗܘܬ܆ ܕܐ̣ܝܬܘܗܝ ܗܘܐ ܚܕ ܡܢ ܐܦܪ̈ܝܛܐ ܕܟ̣ܪ̈ܝܗܐ. ܗ̇ܘ ܕܡܢ ܒܬܪ ܫܪܘ̇ܬܐ ܒܗ ܒܛܗܪܐ: ܡܢ ܕܕܡܟ̣ܘ ܟܠܗܘܢ ܘܐܬܬ̣ܚܕܘ ܬܪ̈ܥܐ ܘܗ̣ܘܐ ܫܠ̣ܝܐ ܡܢ ܟܠ ܓܒ̈ܝܢ: ܟܕ ܐܢܐ ܠܡ ܡܬ̇ܝܩܕ ܗ̇ܘܝܬ ܡܢ ܐ̇ܢܢܩܐ ܕܗ̇ܘ ܟܘܠܗ ܪܚ̣ܫܐ ܡ̇ܫܚ̣ܠܦܐ: ܘܥܡ ܟܐ̣̈ܒܐ ܡ̇ܪ̈ܝܪܐ܆ ܗܝ̇ܕܝܢ ܐܬ̣ܐ ܥܠ̣ ܠܘܬܝ ܡܢ ܫܠ̣ܝ̣ ܟܕ ܐܡ̇ܪ. ܫ̇ܠܡ ܠܟ ܐܒ̇ܐ܅ ܡ̣ܢ ܩܠܟ. ܐ̇ܝܟܢ ܐ̣ܝܬܝܟ. ܠܐ ܬܕܚ̣ܠ.܀. ܐܢܐ ܠܡ ܟܕ ܒܗ̇ ܒܟܪ̣ܝܘܬ ܪܘܚܐ ܐ̣ܝܬܝ ܗܘܝܬ܆ ܐܝܟ ܕܡܢ ܐܘܠܨܢܐ ܣܓܝܐܐ ܐ̇ܡܪܬ ܠܗ. ܕܡ̇ܢܐ ܡ̇ܫܐܠ ܐܢܬ ܠܝ ܒܪܝ܅ ܟܕ ܒܗܢܐ ܬܫܢ̣ܝܩܐ ܟܠܗ ܚ̇ܙܐ ܐܢܬ ܠܝ.܀. ܗ̣ܘ ܕܝܢ ܥ̇ܠܝܡܐ ܗ̇ܘ ܐܡ̣ܪ ܠܝ. ܐܬ̇ܠܒܒ ܐ̇ܒܣ.܀. ܘܠܘ ܬܬ̇ܟܪܐ ܪܘܚܟ. ܘܐܘ̣ܕܐ ܠܐܠܗܐ̣ ܕܠܐ ܫܒ̣ܩܟ. ܠܐ ܓܝܪ ܛ̇ܥܐ ܠܗ ܐܘܠܨܢܟ.܀. ܐܢܐ ܠܡ ܬܘܒ̣ ܐ̇ܡܪܬ ܠܗ. ܕܐ̇ܝܢܐ ܠܘܒܒܐ̣ ܐ̇ܘ ܐ̇ܝܢܐ ܒ̇ܘܝܐܐ ܐܝܬ ܠܗ ܕܢܗܘܐ ܠܝ܇ ܕܗܐ ܡܐ̇ܬ ܐܢܐ ܡ̇ܪܝܪܐܝܬ. ܠܐ ܗܘܐ ܒܠܚܘܕ ܕܡܢ ܐ̇ܢܢܩܐ ܕܟܐ̣̈ܒܐ ܩ̈ܫ̣ܝܐ ܕܐܝܟ ܚܛܗ̈ܝ ܕܣܝ̣ܡܝܢ ܥܠܝ܆ ܐܠܐ ܘܡܢ ܗܢܐ ܟܠܗ ܪܚ̣ܫܐ ܕܚ̣ܕܝܪ ܠܝ ܘܡ̇ܛܠܩ ܠܝ܇ ܘܠܝܬ ܠܝ ܒ̈ܢܝܢܫܐ ܕܢܬ̇ܥܗܕܘܢܢܝ܇ ܕܐܦ ܐܢ ܒܚ̣ܙܬܗܘܢ ܐ̇ܬܒܝܐܐ.܀. ܐܡ̇ܪ ܠܝ ܕܝܢ ܠܡ ܗ̣ܘ ܒܬܪ ܗܠܝܢ. ܝ̇ܕܥܝܢ ܚܢܢ ܗܘ ܕܐ̇ܠܝ̣ܨ ܐܢܬ܇ ܘܕܠܝܬ ܐܢܫ ܕܝܨ̇ܦ ܕܝܠܟ܇ ܘܝܬܝܪܐܝܬ ܕܐ̇ܠ̣ܝܨ ܐܢܬ ܡܢ ܟܐ̣ܒܐ ܘܡܢ ܪܚ̣ܫܐ. ܘܡܛܠ ܗܕܐ ܐܢܐ ܗܫܐ ܥ̇ܠܬ ܠܘܬܟ܆ ܕܐܣ̣ܥܪܟ̣ ܘܐܠ̣ܒܒܟ. ܐܦ ܓܝܪ ܝ̇ܕܥ ܐܢܐ ܕܨ̣ܗܐ ܐܢܬ̣ ܘܠܝܬ ܕܡܘ̇ܫܛ ܠܟ ܡ̈ܝܐ. ܡ̇ܝܬܐ ܐܢܐ ܠܟ ܓܝܪ ܡ̇ܡ̈ܙܓܐ. ܡ̇ܥܕܪ ܠܟ ܐܠܗܐ̇ ܐ̇ܬܚܝܠ. ܘܐܝܟ ܟܠܗ ܗܢܐ ܐܘܠܨܢܐ ܕܐ̇ܚ̣ܝܕ ܠܟ܆ ܕܥ̣ ܕܗܟܢܐ ܡ̇ܣܓܐ ܐܠܗܐ̣ ܘܐܦ ܦܘܪܥܢܟ. ܠܐ ܬܬ̇ܟܪܐ܆ ܘܠܐ ܬܬ̣ܡܚܠ. ܐ̣ܝܟܢܐ ܕܟܕ ܗܠܝܢ ܘܐܚܪ̈ܢܝܬܐ ܣܓܝܐ̈ܬܐ ܐܡ̣ܪ̣ ܢܦ̣ܩ ܠܒ̣ܪ. ܘܗ̣ܦܟ ܟܕ ܛܥ̣ܝܢ ܒܝܣ̣ܬܐ ܕܡ̇ܡ̈ܙܓܐ ܬܡ̣̈ܝܗܐ܆ ܕܐܝܟ ܢܘܗ̣ܪܐ ܡ̣ܙܠܓܝܢ ܗܘܘ. ܘܝܗ̣ܒ ܠܝ ܘܐ̇ܫܬܝܬ ܒܣ̇ܝܡܐܝܬ̣ ܘܗ̇ܢܝܐܝܬ. ܘܐܬܬ̣ܢܝܚܬ݀ ܢܦܫܝ ܘܐ̇ܘܕܝܬ ܠܐܠܗܐ܆ ܟܕ ܐܦ ܕܝܠܗ ܕܛܠܝܐ ܗ̇ܘ ܩܒ̇ܠܬ ܛܝܒܘܬܗ. ܟܕ ܐ̇ܡܪܬ ܠܗ܆ ܐܠܗܐ ܢ̇ܪܚܡ ܥܠܝܟ ܒܪܝ܅ ܕܥܒ̣ܕܬ ܒܝ ܗܕܐ ܛܝܒܘܬܐ ܘܣܥ̣ܪܬܢܝ ܘܒܝ̇ܐ̣ܬܢܝ ܘܠܒ̇ܒ̣ܬܢܝ. ܘܟܕ ܒܣܓܝܐ̈ܬܐ ܡ̇ܒܝܐܐ ܗܘܐ ܠܝ̣ ܘܐܡ̇ܪ. ܕܠܡ̣ܚܪ ܬܘܒ̣ ܣ̇ܥܪ ܐܢܐ ܠܟ. ܘܐܙ̣ܠ. ܘܗܟܢܐ ܐܬ̇ܠܒܒܬ ܒܚ̣ܙܬܗ ܘܒܡܠܬܗ ܕܥܠܝܡܐ ܗ̇ܘ܆ ܘܩ̣ܠܘ ܥܠܝ̣ ܟܠܗܘܢ ܟܐ̣̈ܒܝ ܘܐܘ̈ܠܨܢܝ.܀.܀. ܘܠܝܘܡܐ ܬܘܒ ܕܡ̣ܚܪ ܒܗ ܒܥܕܢܐ̣ ܐܬ̣ܐ. ܘܬܘܒ̣ ܡܫܐ̇ܠ ܗܘܐ ܠܝ. ܐ̇ܝܟܢܐ ܗܘ̣ܝܬ. ܐܬ̇ܚܝܠ̣ ܘܠܐ ܬܟ̣ܪܐ ܠܟ. ܕܦܘܪܥܢܐ ܪܒܐ ܐܝܬ ܠܟ ܕܬܩ̇ܒܠ ܚܠܦ ܗܢܐ ܐܘܠܨܢܐ ܟܠܗ܇ ܡܢ ܠܘܬ ܐܠܗܐ. ܘܫ̇ܪܝܐ ܕܡܢ ܗܕܐ ܐ̇ܢܢܩܐ ܗ̇ܘܐ ܠܟ܆ ܘܐܢ̈ܫܐ ܕܝܠܟ ܡܬ̇ܟܢܫܝܢ ܠܘܬܟ. ܘܐܠܗܐ ܥܡܟ ܗܘ̣ ܠܐ ܬܬ̇ܟܪܐ ܪܘܚܟ. ܥܡ ܬܘܒ ܣܓܝܐ̈ܬܐ ܐܚܪ̈ܢܝܬܐ ܕܡ̇ܠܠ ܥܡܝ. ܘܬܘܒ ܐܙܠ.܀. ܠܝܘܡܐ ܕܝܢ ܕܬܠܬܐ: ܟܕ ܡܟܝܠ ܬ̈ܠ̣ܝܢ ܗܘ̈ܝ ܥܝ̈ܢܝ ܘܡ̈ܣ̣ܟܝܢ ܠܡܐ̣ܬܝܬܗ܆ ܠܐ ܐܬ̣ܐ. ܘܣ̇ܓܝ ܠܡ ܐܬ̇ܬܥܝܩܬ ܘܗ̇ܘܝܬ ܒܚܫܐ ܪܒܐ.܀. ܠܝܘܡܐ ܕܝܢ ܕܐܪ̈ܒܥܐ܆ ܒܗ ܒܥܕܢܐ ܬܘܒ ܐܬ̣ܐ ܟܕ ܐܡ̇ܪ܆ ܕܝ̇ܕܥ ܐܢܐ ܕܐܬܬܥ̣ܝܩܬ ܕܠܐ ܐܬ̇ܝܬ ܐܬ̣ܡܠܝ ܠܘܬܟ. ܠܐ ܬܬܥ̣ܝܩ ܠܐ ܫ̇ܒܩ ܐܢܐ ܠܟ. ܘܟܕ ܬܘܒ ܒܣܓܝܐ̈ܬܐ ܡ̇ܪܬܐ ܗܘܐ ܘܡ̇ܠܒܒ ܠܝ܆ ܬܘܒ ܢܦ̣ܩ ܡܢ ܠܘܬܝ. ܘܗܟܢܐ ܗ̣ܘܐ ܐ̇ܙܠ ܘܐ̇ܬܐ ܠܘܬܝ܆ ܬܡܢܝܐ ܝܘ̈ܡܝܢ. ܟܕ ܡܬ̇ܕܡܪ ܗ̇ܘܝܬ ܠܡ ܒܦܐ̇ܝܘܬܗ ܘܒܫܘܦܪܗ ܘܒܨ̣ܘܪ̈ܬܗ܇ ܘܒܡܠܬܗ ܘܝܕܥ̣ܬܗ ܕܥܠܝܡܐ ܗ̇ܘ ܦܐ̣ܐ ܒܚ̣ܙܬܗ. ܒܬܪ ܕܝܢ ܗܠܝܢ ܬܡ̈ܢܐ ܙܒ̈ܢܝܢ ܕܐܬ̣ܐ ܘܐ̣ܙܠ ܠܘܬܝ܆ ܒܚܪܬܐ ܐܬ̣ܐ ܣܘܢܩ̣ܠܣ ܕܦܛܪܝܪܟܐ ܠܡ ܐܝܟ ܕܢܓ̣ܘܫܢܝ. ܘܟܕ ܒܣܓܝܐ̈ܬܐ ܐܬ̇ܚ̇ܫܚ܆ ܐܬ̇ܦܢܝ ܠܗ܇ ܕܦܚ̇ܡܐ ܗܝ ܗܕܐ̣ ܠܦܠ̣ܝܓܘܬ ܗܝܡܢܘܬܟܘܢ܇ ܕܐܝܟ ܚܢ̈ܦܐ ܬܬ̇ܚܫܚܘܢ. ܐ̣ܝܟܢܐ ܕܡܟܝܠ ܕܥ̇ܒܕܐ ܕܚܢ̈ܦܐ ܡ̇ܫܡܠܝܢ ܐܢܬܘܢ܇ ܕܚ̇ܙܝܢ ܐܢܬܘܢ ܠܝ ܒܗܕܐ ܐ̇ܢܢܩܐ ܟܠܗ̇܇ ܘܠܐ ܕܚ̇ܠܝܢ ܐܢܬܘܢ ܡܢ ܐܠܗܐ܇ ܕܬ̇ܬܠܘܢ ܠܝ܇ ܐܦܢ ܚܕ ܡܢ ܛ̈ܠܝܝ ܕܚܒܝ̣ܫܝܢ ܠܟܘܢ܇ ܕܢܩ̣ܘܡ ܩܕܡܝ. ܘܟܕ ܣܓܝܐ̈ܬܐ ܡܬ̇ܢܐ ܗܘܐ ܕܐܬ̈ܡ̇ܠܠܝ ܗ̈ܘܝ ܒܝܢܬܗܘܢ: ܘܕܩܫ̣ܝܐܝܬ ܐܬ̇ܚܫܚ ܠܘܬܗ ܘܐܟ̣ܣܗ: ܢܦ̣ܩ ܡܢ ܠܘܬܗ܆ ܒܚܐ̣ܦܐ ܕܚܡ̣ܬܐ܆ ܘܐ̣ܙܠ ܐ̇ܝ̣ܬܝ ܠܗ ܠܚܕ ܡܢ ܛܠ̣ܝܘ̈ܗܝ̣ ܘܐܡ̣ܪ. ܗܐ ܛܠ̣ܝܟ ܢܫܡܫܟ̣ ܘܠܐ ܬ̇ܚܪܡ ܠܢ. ܘܢܦ̣ܩ ܒܚ̣ܡܬܐ̣ ܘܐ̣ܙܠ. ܐ̣ܝܟܢܐ ܕܡܢ ܕܐܬ̣ܐ ܛܠܝܗ܆ ܬܘܒ ܥܠܝܡܐ ܗ̇ܘ ܠܘܬܗ̣ ܠܐ ܐܬ̣ܐ. ܘܠܐ ܐܬܚ̣ܙܝ ܠܗ ܬܘܒ.܀.܀. ܐ̣ܝܟܢܐ ܕܟܕ ܡܬ̇ܕܡܪ ܘܡܥ̣ܩ܆ ܟܕ ܡܣ̣ܒܪ ܗܘܐ ܥܠܘܗܝ ܕܗܘܦܪܝܛܐ ܗܘ܆ ܐܡ̣ܪ ܠܡܝ̣ܙܛܪܘܣ ܕܢܛ̇ܪ ܗܘܐ ܠܗ. ܛܠܝܐ ܚܕ ܡܢ ܗܘܦܪ̈ܝܛܐ ܕܝܠܟܘܢ ܥܐ̇ܠ ܗܘܐ ܠܘܬܝ ܘܡ̇ܠܒܒ̣ ܘܣ̇ܥܪ ܗܘܐ ܠܝ. ܘܗܐ ܝܘ̈ܡܬܐ ܡܢ ܕܐܬ̣ܐ ܕܝܢ ܛܠܝܐ ܗܢܐ ܕܝܠܝ ܠܘܬܝ܆ ܬܘܒ ܗ̇ܘ ܠܘܬܝ̣ ܠܐ ܐܬ̣ܐ. ܐ̇ܪܐ ܡ̇ܢܐ ܗ̣ܘܝܗܝ. ܕܡ ܐܬܟ̣ܪܗ ܠܗ.܀.܀.܀. ܗ̣ܘ ܕܝܢ ܡ̣ܝܙܛܪܘܣ ܥ̇ܩ̣ܒ ܥܡܗ܆ ܕܡ̣ܢ ܓ̣ܢܣܐ ܐܝܬܘܗܝ ܗܘܐ ܛܠܝܐ. ܘܐܡ̣ܪ ܠܗ ܗ̣ܘ. ܥܠܝܡܐ ܫܦܝܪ ܚ̣ܙܘܐ ܐܝܬܘܗܝ܆ ܘܓܐ̣ܝ ܗܘܐ ܣ̇ܓܝ ܒܓܘܫܡܗ. ܘܢܗ̇ܝܪ ܘܚ̣ܘ̇ܪ ܦܪܨܘܦܗ܆ ܘܠܒ̣ܝܫ ܗܘܐ ܟܬ̣ܝܢܬܐ ܫܦܝܪܬܐ ܢܩ̣ܕܬܐ̣ ܕܬ̈ܠ̇ܝܗ̇. ܘܐܝܬ ܠܗ̇ ܓܝ̈ܓ̣ܠܐ ܕܨ̣ܘܪ̈ܬܐ܆ ܘܠܥܠ̣ ܘܠܬ̣ܚܬ.܀.܀.܀. ܐܡ̇ܪ ܠܗ ܡܝ̣ܙܛܪܘܣ. ܕܗܠܝܢ ܕܡ̣̈ܘܬܐ ܕܝܗܒ̣ܬ ܠܝ܆ ܐܢܫ ܡܢ ܐܦܪ̈ܝܛܐ ܠܐ ܩܢ̣ܝ̣ܢ ܣܟ. ܟܕ ܗ̣ܘ ܬܘܒ ܡ̇ܦܢܐ ܗܘܐ ܘܐܡ̇ܪ ܠܗ. ܕܗ̣ܘܝܬ ܝ̇ܕܥ܆ ܕܬܡܢܝܐ ܝܘܡ̈ܬܐ ܥܐ̇ܠ ܗܘܐ ܘܢ̇ܦܩ ܠܘܬܝ܇ ܘܡ̇ܒܝܐܐ ܘܡ̇ܠܒܒ ܠܝ܇ ܘܡ̇ܡܠܠ ܥܡܝ ܚܟܝܡܐܝܬ̣ ܘܛ̇ܥܡܢܐܝܬ. ܘܬܘܒ ܕܝܢ ܡ̣ܝܙܛܪܘܣ̣ ܐܡ̣ܪ. ܕܠܝܬ ܠܢ ܕܐܝܟ ܗܢܐ ܛܠܝܐ ܕܐܡ̣ܪܬ̣ ܣܟ. ܘܗܝ̇ܕܝܢ ܢܦ̣ܩ ܟ̇ܢ̣ܫ ܐܢܘܢ ܠܟܠܗܘܢ ܛ̈ܠܝܐ܆ ܘܐ̇ܥ̣ܠ ܐܢܘܢ ܩܕܡܘܗܝ. ܟܕ ܐܡ̇ܪ ܕܗܐ ܟܠܗܘܢ ܐܦܪ̈ܝܛܐ ܕܝܠܢ. ܘܐܚܪܝ̣ܢ ܠܝܬ ܠܢ. ܚܙܝ ܐܢ ܚܕ ܡܢܗܘܢ ܐ̣ܝܬܘܗܝ.܀.܀. ܗ̣ܘ ܕܝܢ ܟܕ ܒܟܠܗܘܢ ܐܬ̇ܒܩܝ܆ ܐܡ̣ܪ̣ ܕܐܦ ܠܐ ܚܕ ܡܢ ܗܠܝܢ ܐ̣ܝܬܘܗܝ.܀.܀. ܗܝ̇ܕܝܢ ܗ̣ܘ ܡ̣ܝܙܛܪܘܣ ܟܕ ܫܡ̣ܥ̣ ܐܡ̣ܪ. ܕܚ̣ܙܘܐ ܕܐܠܗܐ ܐܬ̣ܚܙܝ ܠܟ ܘܣܥܪܟ ܐܒܣ܅ ܘܚܕ ܡܢ ܡ̈ܠܐܟܐ܆ ܐ̇ܘ ܚܕ ܡܢ ܩ̈ܕܝܫܐ ܐܫܬ̇ܕܪ ܠܘܬܟ܇ ܕܢܚ̇ܝܠܟ ܘܢ̇ܠܒܒܟ. ܗܪܟܐ ܕܝܢ ܐܢܫ ܕܕܐܝܟ ܕܐܡ̣ܪܬ̣ ܠܝܬ. ܘܗܟܢܐ ܬܡ̣ܗ ܝܘܚܢ̣ܢ ܟܕ ܬ̇ܘܝܪ ܘܡܬ̇ܕܡܪ. ܘܡܬ̇ܒܝܢ ܒܡ̈ܠܘܗܝ ܘܒܚܟܡܬܗ ܘܒܦܬ̈ܓܡܘܗܝ ܕܥܠܝܡܐ ܗ̇ܘ ܬ̣ܡܝܗ ܬ̣ܡܝܗ̇ ܒ̣ܚܙܘܐ. ܟܕ ܐܡ̇ܪ܆ ܕܐܢܐ ܠܡ ܐܝܟ ܚܕ ܡܢ ܐܦܪ̈ܝܛܐ ܚܐ̇ܪ ܗ̇ܘܝܬ ܒܗ. ܐܠܗܐ ܗܘ ܕܝܢ ܝ̇ܕܥ ܕܡ̇ܢܐ ܘܡ̣ܢܘ ܐ̣ܝܬܘܗܝ ܗܘܐ. ܠܝ ܕܝܢ ܒܣܓܝܐ̈ܬܐ ܥ̇ܕܪ. ܘܒܒ̣ܝܣܬܐ ܐ̇ܝܬܝ ܠܝ ܡ̈ܡ̇ܙܓܐ܆ ܗܠܝܢ ܕܐܦ ܐ̇ܬܕܡܪܬ ܒܗܘܢ܇ ܕܟܡܐ ܢܗ̇ܝܪ̈ܝܢ ܗܘܘ ܘܬܡ̣ܝܗܝܢ. ܘܐܬ̣ܪܘܚܘ̣ ܟܠܗܘܢ ܟܐ̣ܒ̈ܝ. ܘܒܡ̈ܠܐ ܕܚܟܡܬܐ ܘܕܬ̇ܩ̣ܢܘܬܐ ܕܡܢ ܦܘܡܗ ܢ̈ܦ̇ܩܢ ܗ̈ܘܝ܆ ܘܐܦ ܐܢܐ ܬܗ̇ܪ ܗ̇ܘܝܬ. ܕܐܢ ܕܕܐܝܟ ܗܢܐ ܡ̇ܫܡܫ ܟ̣ܪ̈ܝܗܐ ܒܐܟ̣ܣܢܕܘܟܝܢ ܕܝܠܟܘܢ. ܕܡܢ ܗܫܐ ܡܟܝܠ܆ ܟܕ ܡܬ̇ܕܡܪܝܢܢ ܒܛܝܒܘܬܐ ܕܐܣܬܥ̣ܪܬ݀ ܒܢ܆ ܕܢܘܕܐ ܚ̇ܝܒܝܢܢ ܠܐܠܗܐ ܣܥ̇ܪ ܟܠ ܒܪ̈ܚ̣ܡܘܗܝ܇ ܗ̇ܘ ܕܗ̣ܘ ܝ̇ܕܥ ܠܗ ܠܚ̣ܙܘܗ ܕܥܠܝܡܐ ܗ̇ܘ܇ ܕܡܢܐ ܐ̣ܝܬܘܗܝ ܗܘܐ܆ ܕܗ̣ܘ ܒܐ̣ܝ̈ܕܘܗܝ ܣܥ̣ܪ ܠܢ ܘܐ̇ܪ̣ܘܚ ܠܢ ܒܐܘ̈ܠܨܢܝܢ.