ܪܝܫܐ ܕܫܒܬܥܣܪ̈܆ ܕܥܠ ܗ̇ܝ ܕܡܟܝܠ ܒܟܘܠ ܐܬܪ ܐܬ̣ܬܥܝܪ ܪܕܘܦ̣ܝܐ.܀. ܏ܝܙ ܡܢ ܥܠ̣ܬ ܗܟܝܠ ܪܕܘܦ̣ܝܐ ܗܢܐ ܕܒܡܕܝܢܬ ܡ̇ܠܟܘܬܐ ܐܬ̣ܬܥܝܪ: ܘܗܟܢܐ ܝܨ̇ܝܦܐܝܬ ܘܡ̇ܫܠܛܐܝܬ ܘܕܠܐ ܦܘ̇ܫܐ ܡܣ̣ܬܥܪ ܗܘܐ܆ ܐܬܬ̣ܥܝܪ ܗܘܐ ܪܕܘܦ̣ܝܐ ܡܟܝܠ ܚ̇ܣܝܢܐ ܒܟܘܠܗܘܢ ܐܬܪ̈ܘܬܐ ܕܪ̈ܗܘܡܝܐ܇ ܟܠ ܐ̇ܝܟܐ ܕܐܪ̈ܬܕܟܣܘ ܫܟܝ̣ܚܝܢ ܗܘܘ. ܐܬܬ̣ܥܝܪ ܗܟܝܠ ܪܕܘܦ̣ܝܐ ܥܠܝܗܘܢ ܒܝܕ ܟܬܝ̈ܒ̣ܬܐ ܕܡܢ ܝܘܚܢܢ ܦܛܪܝܪܟܐ̣  ܘܫܪܟܐ. ܘܙܩ̣ܝܦ ܗܘܐ ܒܕܡ̣ܘܬ ܓ̈ܠܠܝ ܝܡܐ܆ ܘܐܝܟ ܐ̇ܬܘܢܐ ܕܒܒ̈ܠܝܐ ܡܢ ܫܓ̇ܪܐ ܣܓܝܐܐ܇ ܕܠܘ ܒܩ̣̈ܢܝܐ ܘܫܒ̈ܫܬܐ ܘܫܪܟܐ ܕܗܘ̈ܠܣ ܐܝܟ ܗ̇ܘ܇ ܐܠܐ ܗܢܐ ܒܪܘܓܙܐ ܘܚܡ̣ܬܐ ܘܒܛܢ̣ܢܐ ܕܐܒ̇ܕܢܐ ܘܕܩ̣ܛܠܐ܇ ܗܢܐ ܡܫ̣ܬܓܪ ܗܘܐ ܘܡܬ̇ܓܘܙܠ ܕܚܝ̣ܠܐܝܬ ܘܩܫܝ̣ܐܝܬ܇ ܘܐܦ ܐܝܠܝܢ ܕܢܩ̣̈ܝܦܢ ܠܗܝܢ ܠܗܠܝܢ ܟܠܗܝܢ. ܗ̇ܢܘ ܕܝܢ ܒ̣ܙܬܐ ܕܡܪ̈ܗܛܐ܆ ܘܚܛܘ̣ܦܝܐ ܕܢܟ̣̈ܣܐ܇ ܕܒܥ̣ܠܬܐ ܗܕܐ. ܘܕܬܪ̈ܬܝ̣ܢ ܒܚܒ̈ܘ̣ܫܝܐ ܕܒܚܒ̈ܘ̣ܫܝܐ ܐ̈ܠܝ̣ܨܐ ܘܐ̇ܣܘܪ̈ܐ ܩ̈ܫ̣ܝܐ܇ ܘܫ̈ܢ̣ܕܐ ܘܢܓ̣̈ܕܐ ܘܐܟ̣ܣܘܪ̈ܝܣ ܘܫܪܟܐ ܒܟܘܠ ܐܬܪ ܘܡܕܝܢܐ ܘܟܘܪ̈ܣ ܕܝܠܗܝܢ.  ܪܝܫܐ ܕܬܡܢܬܥܣܪ̈܆ ܕܥܠ ܐܝܠܝܢ ܕܡܢ ܩܬܘܠܝܩܐ ܕܕܐ̇ܘܝܢ ܡܕܝܢܬܐ ܕܒܐ̇ܪܡܢܝܐ ܪܒܬܐ ܕܦܪ̈ܣܝܐ܇ ܘܫܪܟܐ ܕܐ̈ܦܝܣܩܘܦܐ ܕܥܡܗ܇ ܐܬ̇ܬܢܝ ܒܡܕܝܢܬ ܡ̇ܠܟܘܬܐ. ܏ܝܚ ܡܛܠ ܗܟܝܠ ܕܥܠ ܐܝܠܝܢ ܕܚ̇ܙܝܝ̈ܗܝܢ ܗ̈ܘ̣ܝܢ: ܘܩ̇ܪ̈ܝܒܝ ܠܢܣ̣ܝ̈ܘܢܐ ܣܒ̣̈ܝܣܐ ܕܒܗܝܢ: ܘܡܢܗܝܢ ܗܘ̣ܝܢ ܒܟܠܗ ܙܒܢܐ ܕܥܠܘܗܝ ܐܫܬ̇ܥܝܢ: ܐܫܬ̇ܘܕܝܢ ܚܢܢ ܒܠܚܘܕ ܠܡܟ̣ܬܒ: ܕܗܫܐ ܕܝܢ ܠܪ̈ܘ̣ܫܡܐ ܕܥܘܗ̈ܕܢܐ ܕܢܝ̇ܬܐ ܐܬܚ̣ܙܝܬ݀ ܠܢ܆ ܐܦ ܐܝܠܝܢ ܕܠܘ ܡܢ ܐ̈ܢܫܐ ܫ̈ܚ̣ܝܡܐ ܘܒ̣ܨܝܪ̈ܐ: ܩܕܡ ܣܓ̈ܝܐܐ ܡ̈ܬ̇ܬܢܝܢ ܗ̈ܘܝ ܒܡܕܝܢܬ ܡ̇ܠܟܘܬܐ ܕܝܠܢ ܕܪ̈ܗܘܡܝܐ ܕܓ̣ܕܫ ܘܐܦ ܒܐܬܪ̈ܘܬܐ ܕܦܪ̈ܣܝܐ: ܕܐܦܢ ܚ̣ܢ̣ܢ ܠܐ ܚ̣ܙܝܢ ܘܠܘ ܝ̣ܕܥܢ ܐ̈ܢܝܢ ܘܠܫܪܪܗܝܢ: ܐܝܟ ܪ̈ܚ̇ܝܩܝ ܡܢ ܐܬܪ̈ܘܬܐ ܕܣܥܘܖ̈ܘܬܗܝܢ ܕܢܣ̣ܗܕ ܠܐ ܡܨ̣ܝܢܢ܆ ܐܠܐ ܐܝܟ ܕܡܢܗ ܕܩܬܘܠܝܩܐ ܪܒܐ ܕܕܐ̇ܘܝܢ ܡܕܝܢܬܐ ܪܒܬܐ ܕܒܐ̇ܪܡܝܢ ܕܦܪ̈ܣܝܐ܇ ܘܫܪܟܐ ܕܐ̈ܦܝܣܩܘܦܐ ܕܥܡܗ ܐܬ̇ܬܢܝ ܩܕܡ ܟܠܢܫ܇ ܟܕ ܥ̣ܪ̈ܩܘ ܘܐܬ̣ܘ ܘܐܬ̇ܓܘܣܘ ܒܡܠܟܘܬܐ ܕܟܪ̈ܣܛܝܢܐ܇ ܘܐܬ̇ܩܒܠܘ ܡܢ ܡ̈ܠܟܐ ܙܟ̈ܝܐ ܒܐܝܩܪܐ ܪܒܐ. ܗ̇ܢܘܢ ܕܐܝܟ ܕܝܡ̇ܝܢ ܗܘܘ ܚܬ̇ܝܬܐܝܬ ܘܠܥ̣ܝܢ ܣܓ̈ܝܐܐ: ܬ̇ܢܝܢ ‏ ܗܘܘ ܐܝܠܝܢ ܕܐܝܬܝܗܝ̣ܢ ܗܠܝܢ.܀. ܕܟܕ ܠܡ ܡ̈ܓܘ̣ܫܐ ܕܗ̇ܢܘܢ ܘܐܦ ܪ̈ܘܪܒܢܐ ܕܡ̇ܠܟܘܬܐ ܕܦܪ̈ܣܝܐ ܝܠܦ̣ܘ: ܕܐܝܟ ܕܡܢ ܦܘܩܕܢܐ ܘܨܒܝܢܐ ܕܡ̇ܠܟܐ ܠܡ ܕܪ̈ܗܘܡܝܐ: ܒܟܠ ܐܬܪ ܘܡܕܝܢܐ ܕܟܠܗ ܐܘܚܕܢܗ: ܬܒ̣ܥ ܠܟܠܗܘܢ ܐܝܠܝܢ ܕܒܟܠܗ̇ ܦܘܠܝܛܐ ܕܝܠܗ܇ ܕܢܫܬ̇ܥܒܕܘܢ ܘܢܐܬܘܢ ܠܗܝܡܢܘܬܐ ܕܝܠܗ: ܘܠܟܠܗܘܢ ܗܠܝܢ ܕܡܬܚ̣ܪܝܢ ܘܠܐ ܡܬܛܦ̣ܝܣܝܢ ܠܦܘܩܕܢܗ ܘܠܨܒܝܢܗ܆ ܦ̣ܩܕ ܕܢܬ̇ܪܕܦܘܢ ܘܢܬܚܒܫܘܢ ܘܢܬ̇ܒܙܙܘܢ܆ ܘܠܚܪܬܐ̣ ܠܐܒ̇ܕܢܐ ܕܡܢ ܚܝ̈ܐ ܢܫܬ̇ܠܡܘܢ. ܘܗܐ ܠܡ ܒܟܠܗܘܢ ܐܬܪ̈ܘܬܐ ܕܪ̈ܗܘܡܝܐ̣ ܗܠܝܢ ܡܣܬ̇ܥܪ̈ܢ. ܘܡܟܝܠ ܙܕ̇ܩ ܐܦ ܠܢ܆ ܕܗܟܢܐ ܘܒܗܠܝܢ ܐܬܪ̈ܘܬܐ ܕܝܠܢ ܢܬ̇ܚܫܚ܇ ܘܢ̇ܦܢܐ ܠܟܠܗܝܢ ܕܚ̣̈ܠܬܐ ܕܐܝܬ ܒܫܘܠܛܢܢ ܠܕܚܠ̣ܬܐ ܕܝܠܢ.  ܪܝܫܐ ܕܬܫܬܥܣܪ̈܆ ܕܥܠ ܐܝܠܝܢ ܕܡܢ ܡ̈ܓ̣ܘܫܐ  ܠܟ̣ܣܪܘܢ ܡ̇ܠܟܗܘܢ ܐܬܐ̣ܡܪ̈ܝ ܘܐܣܬ̣ܥܪ̈ܝ. ܏ܝܛ ܗܝܕܝܢ ܠܡ ܐܬ̇ܟܢܫܘ ܟܠܗܘܢ ܡ̈ܓ̣ܘܫܐ̣ ܘܐܡ̇ܪܝܢ ܠܗ ܠܟ̣ܣܪܘܢ ܡ̇ܠܟܗܘܢ.܀.܀.  ܡ̇ܠܟܐ̣ ܠܥܠܡ ܚ̣ܝܝ. ܗܐ ܝܠܦ̣ܢܢ ܕܩܣܪ ܕܪ̈ܗܘܡܝܐ܆ ܠܟܠܗܘܢ ܕܒܟܠܗ ܐܘܚܕܢܗ܆ ܬܒ̇ܥ ܘܐ̇ܠܨ ܘܡ̇ܫܥܒܕ ܠܗܘܢ܇ ܕܠܕܚ̣ܠܬܗ ܘܠܗܝܡܢܘܬܐ ܕܝܠܗ ܢܐ̣ܬܘܢ. ܘܠܣܓ̈ܝܐܐ ܕܒܟܠܗܘܢ ܐܬܪ̈ܘܬܐ ܕܝܠܗ܆ ܕܢܣ̣ܓܕܘܢ ܕܢܣ̇ܓܕܘܢ ܠܕܚ̣ܠܬܗ ܬܒ̇ܥ. ܘܠܟܠܗܘܢ ܐܝܠܝܢ ܕܠܐ ܡܬܛܦ̣ܝܣܝܢ ܠܗ܆ ܛ̇ܪܕ ܘܪܕ̇ܦ̣ ܡܢ ܟܠܗ ܐܘܚܕܢܗ.܀. ܬ̇ܦܩ̣ܘܕ ܠܡ ܗܟܢܐ ܐܦ ܐܠܗܘܬܟ ܕܝܠܟ܆ ܕܐܦ ܒܐܘܚܕܢܐ ܕܝܠܟ̣ ܗܟܢܐ ܬܗܘܐ. ܕܟܠܗܝܢ ܕܚ̈ܠ̣ܬܐ̣ ܠܕܚܠ̣ܬܐ ܕܝܠܟ ܢܐ̣ܬ̈ܝܢ. ܘܠܣ̣ܓܕܬܟ̣ ܟܘܠܗܘܢ ܕܒܐܘܚܕܢܟ ܢܣ̣ܓܕܘܢ. ܘܐܝܠܝܢ ܕܡ̇ܡܪܚܝܢ ܠܡ̣ܩܡ ܠܘܩܒܠ ܦܘܩܕܢܟ̣ ܠܐ ܢܐ̣ܚܘܢ. ܐ̣ܝܟܢܐ ܕܟܕ ܠܡ ܗܠܝܢ ܫܡ̣ܥ ܟܣ̣ܪܘܢ ܡ̇ܠܟܐ ܡܢ ܡ̈ܓ̣ܘܫܐ܆ ܐܬ̣ܪܡܝ ܠܡ̈ܠܝܗܘܢ ܘܩ̇ܒ̣ܠ ܡܠ̣ܟܗܘܢ. ܘܡܚ̣ܕܐ ܫ̇ܪܝ ܘܐܦ ܗ̣ܘ ܡܢ ܟܪ̈ܣܛܝܢܐ܆ ܘܫ̣ܕܪ ܠܡ ܠܘܩܕܡ ܠܒ̣ܟ ܬܠܬܐ ܐܦܝ̈ܣܩܦܐ܆ ܥܡ ܣܘܓܐܐ ܕܩܠ̣ܝܪܘܣ ܘܥܡܐ ܕܥܡܐ ܣܓܝܐܐ.  ܘܦܩ̣ܕ ܠܗܘܢ ܕܢܟܦ̣ܪܘܢ ܒܗܝܡܢܘܬܗܘܢ܆ ܘܢܣ̣ܓܕܘܢ ܥܡܗ ܠܢܘܪܐ ܘܠܫܡܫܐ ܘܠܫܪܟܐ ܕܕܚ̣̈ܠܬܗ. ܐ̣ܝܟܢܐ ܕܗܠܝܢ ܐܬܚ̣ܪܝܘ ܥܡܗ ܘܩܡ̣ܘ ܠܩ̣ܘܒܠܗ ܓܢܒܪܐܝܬ: ܟܕ ܡ̇ܘܕܝܢ ܘܐܡ̇ܪܝܢ܆ ܕܚ̣ܢܢ ܕܡ̈ܠܟܐ ܟܪ̈ܣܛܝܢܐ ܚ̣ܢܢ. ܘܠܐܠܗܐ ܥ̇ܒܘܕܐ ܕܫܡܝܐ ܘܕܐܪܥܐ ܘܕܝܡ̈ܡܐ ܘܕܟܠ ܕܐܝܬ ܒܗܘܢ ܣܓ̇ܕܝܢܢ ܘܡ̇ܝܩܪ̈ܝܢܢ܆ ܘܠܐ ܫܒ̇ܩܝܢܢ ܠܗ܇ ܕܐ̣ܝܬܘܗܝ ܒ̇ܪܘܝܐ ܕܟ̇ܠܐ܇ ܘܠܒ̣ܪ̈ܝܬܗ ܣܓ̇ܕܝܢܢ. ܠܐ ܬܛܥ̣ܐ ܡ̇ܠܟܐ܅ ܥܠ ܓܝܪ ܦܓܪ̈ܝܢ ܫܠ̣ܝܛ ܠܟ܆ ܕܡܕܡ ܕܨܒ̇ܝܬ̣ ܬܥܒ̣ܕ ܒܗܘܢ. ܢܦ̈ܫܬܢ ܕܝܢ ܕܝܠܗ ܘܒܐ̣ܝ̈ܕܘܗܝ ܐ̣ܝܬܝܗܝܢ܆ ܘܠܟ ܥܠܝܗܝܢ ܫܘܠܛܢܐ̣ ܘܠܐ ܚܕ ܠܓܡ̣ܪ ܐܝܬ ܠܟ. ܐܝܟܢܐ ܕܟܕ ܠܡ ܗܠܝܢ ܥܡ ܐܚܪ̈ܢܝܬܐ ܣܓ̈ܝܐܬܐ ܕܫ̈ܘܝܢ ܗ̈ܘܝ ܠܣܗܕܘܬܗܘܢ ܕܐܦܣ̈ܩܦܐ ܫܡ̣ܥ ܡ̇ܠܟܐ܆ ܦܩ̣ܕ ܘܒܪ ܫܥ̣ܬܗ ܐܬܢ̣ܫܛܘ̣ ܘܡ̣ܝܬܘ. ܥܡ ܒܝ̣ܫ̈ܬܐ ܐܚܪ̈ܢܝܬܐ ܣܓܝܐ̈ܬܐ ܕܣ̣ܥܪ ܒܟܪ̈ܣܛܝܢܐ܇ ܘܥܩ̣ܪ ܕܝܪ̈ܬܐ ܘܥܕ̈ܬܐ ܣܓܝܐ̈ܬܐ. ܘܠܣܓ̈ܝܐܐ ܐܣ̣ܪ ܘܚܒ̣ܫ̣ ܘܐܬ̣ܬܪܝܡ ܠܒܗ. ܟܕ ܡ̇ܓܕܦ ܥܠ ܡܫܝܚܐ ܘܐܡ̇ܪ܆ ܕܢ̇ܚ̣ܙܐ ܠܡ ܡ̇ܢܐ ܥ̇ܒܕ ܠܝ ܡܫܝܚܐ ܐܠܗܗܘܢ ܕܟܪ̈ܣܛܝܢܐ. ܕܐܢܐ ܠܡ̣ ܠܐ ܝ̇ܕܥ ܐܢܐ ܕܡ̣ܢܘ ܐ̇ܘ ܡ̇ܢܐ ܐ̣ܝܬܘܗܝ. ܗܠܝ̣ܢ ܥܡ ܣܓܝܐ̈ܬܐ ܡܬ̇ܢܝܢ ܗܘܘ ܐܦܝܣ̈ܩܦܐ ܗܠܝܢ܇ ܕܐܬ̇ܡܠܠ ܘܐܣ̣ܬܥܪ ܒܙܒܢܐ ܗܢܐ ܡܢ ܡ̇ܠܟܐ ܕܦܪ̈ܣܝܐ܇ ܩܕܡ ܕܬ̇ܫܠܡ ܐ̇ܪܡܝܢ ܠܪ̈ܗܘܡܝܐ. ܘܡܢܗ̇ ܠܡ ܕܥܠ̣ܬܐ ܗܕܐ ܦܩ̣ܕ܆ ܕܒܝܬ ܢܘܪ̈ܐ ܢܬ̣ܒܢܘܢ ܒܟܠܗ̇ ܐ̇ܪܡܝܢ ܕܦܪ̈ܣܝܐ.  ܪܝܫܐ ܕܥܣܪ̈ܝܢ܆ ܕܥܠ ܫ̇ܘܪܝ ܡܬ̇ܓܪܝܢܘܬܐ ܕܡ̇ܠܟܐ ܕܦܪ̈ܣܝܐ ܕܥܠ ܟܪ̈ܣܛܝܢܐ ܕܒܐ̇ܪܡܢܝܐ ܪܒܬܐ܆ ܘܫܪܟܐ. ܏ܟ ܒܬܪ ܠܡ ܗܠܝܢ ܟܠܗܝ̣ܢ ܐܡ̣ܪ ܗܘܐ ܩܬܘܠܝܩܐ ܘܗܠܝܢ ܕܥܡܗ܆ ܗ̇ܝ ܕܝܢ ܫ̣ܕܪ ܡ̇ܪܙܒܢܐ ܚܕ ܠܐܬܪܢ̣ ܥܡ ܬܪ̈ܝܢ ܐ̈ܠܦܝܢ ܦܪ̈ܫܐ ܡ̈ܙ̣ܝܢܐ ܕܥܡܗ܆ ܕܠܘܩܕܡ ܠܡ ܠܘܬܢ ܠܡܕܝܢܬܢ ܐܬ̣ܐ܆ ܟܕ ܛܥ̣ܝܢ ܦܘܩܕܢܐ܇ ܕܢܒ̣ܢܐ ܬܡܢ ܒܝܬ ܢܘܪܐ̣ ܐܝܟ ܕܠܣ̣ܓܕܬܐ ܕܡ̇ܠܟܐ.  ܐ̣ܝܟܢܐ ܕܐܝܟ ܕܡܬ̇ܢܐ ܘܐܡ̇ܪ ܗܘܐ ܩܬܘܠܝܩܐ܆ ܕܟܕ ܠܡ ܚ̇ܘܝ ܠܝ ܘܠܒ̈ܢܝ ܡܕܝܢܬܐ ܦܘܩܕܢܐ܆ ܪܬ̇ܚܬ ܒܛܢ̣ܢܐ ܘܩ̇ܡܬ ܠܩ̣ܘܒܠܗ ܐܢܐ ܘܟܠܗܘܢ ܒ̈ܢܝ ܡܕܝܢܬܐ܆ ܘܐܡ̇ܪܝܢ ܚܢ̣ܢ ܕܥܒ̣̈ܕܐ ܚ̣ܢܢ ܕܡܠ̣ܟ ܡ̈ܠܟܐ. ܘܣܘ̣ܢܛܠܝܐ̣ ܠܗ ܡ̇ܣܩܝܢܢ. ܟܪ̈ܣܛܝܢܐ ܕܝܢ ܐܝ̣ܬܝܢ. ܘܒܫܪܒܐ ܕܗܝܡܢܘܬܐ̣ ܠܐ ܡܫܬ̇ܥܒܕܝܢܢ܇ ܐܦܢ ܐܝܬ ܠܢ ܠܡܡ̣ܬ ܚܠܦ ܫܪܪܐ ܕܗܝܡܢܘܬܢ. ܐܦ ܓܝܪ ܘܒܙܒ̈ܢܝ ܫ̇ܒܘܪ ܡ̣ܠܟ ܡ̈ܠܟܐ̣ ܗܕܐ ܗܘ̣ܬ. ܘܒܥ̣ܐ ܕܢܒ̣ܢܐ ܒܝܬ ܣ̣ܓܕܬܐ ܗܪܟܐ܆ ܘܐܬ̇ܟܢܫܘ ܒ̈ܢܝ ܐܬܪܐ. ܘܗܘܐ ܩܪܒܐ̣ ܫܒܥ ܫ̈ܢܝܢ. ܘܗ̇ܝܕܝܢ ܣ̣ܡ ܢܡܘܣܐ ܘܥܒ̣ܕ ܠܢ ܦܘܩܕܢܐ܆ ܕܬܘܒ ܫܪܒܐ ܕܟܪܣܛܝܢܘܬܐ̣ ܠܐ ܢܬܬܒ̣ܥ ܐ̇ܘ ܢܬ̇ܥܩܒ̣ ܠܥܠܡ. ܚ̇ܘܝܢܢ ܠܗ ܕܝܢ܆ ܘܐܦ ܛܘ̣ܦܣ ܕܦܘܩܕܢܐ ܗ̇ܘ ܕܫ̇ܒܘܪ ܡ̇ܠܟܐ܆ ܘܠܐ ܠܡ ܐܬܛܦ̣ܝܣ. ܐܠܐ ܐܝܟ ܕܦܩ̣ܝܕ ܗܘܐ ܡܢ ܩ̣ܛܝܪ܆ ܐܪܡ̣ܝ ܐܝ̣ܕܐ ܕܢܪܫ̣ܘܡ ܘܢܚܦ̣ܘܪ ܘܢܣ̣ܝܡ ܫܬ̣̈ܐܣܐ܆ ܘܫ̇ܪܝ ܒ̇ܢܐ ܟܕ ܐܦ ܠܬܟܬ̇ܘܫܐ ܕܩܪܒܐ ܡ̇ܥܬܕ ܗܘܐ̣ ܚܠܝ̣ܡܐܝܬ. ܟܕ ܐܦ ܒܣܓܝܐ̈ܬܐ ܠܡ ܐ̇ܦܝ̣ܣܬܗ̣ ܘܠܐ ܐܬܛܦ̣ܝܣ ܠܝ ܐ̇ܘ ܚ̣ܪ ܒ̣ܝ ܣܟ. ܒܚܪܬܐ ܕܝܢ ܫ̇ܠܚܬ ܠܟܠ ܕܘܟ̇ ܗܝ̣ ܗܕܐ̣ ܠܟܠܗܘܢ ܒ̈ܢܝ ܐܬܪܐ. ܐ̣ܝܟܢܐ ܕܟܕ ܫܡ̣ܥܘ܆ ܪ̈ܬܚ̣ܘ ܒܛܢܢ̣ܐ ܕܚܠܦ ܗܝܡܢܘܬܐ ܕܒܡܫܝܚܐ. ܘܐܬ̇ܟܢܫܘ ܟܠܗܘܢ ܐܝܟ ܚܕ ܓܒܪܐ܆ ܐܝܟ ܥܣܪ̈ܐ ܐ̈ܠܦܝܢ ܟܕ ܡ̣ܙܝܢܝܢ ܠܩܪܒܐ. ܕܐ̇ܘ ܕܢܐ̣ܚܘܢ̣ ܐ̇ܘ ܕܢܡ̣ܘܬܘܢ ܚܠܦ ܡܫܝܚܐ܆ ܘܠܐ ܢܫܒ̣ܩܘܢ ܠܓܡ̣ܪ ܕܒܝܬ ܡܓܘ̣ܫܘܬܐ ܘܚܢܦܘܬܐ܇ ܕܒܐܬܪܗܘܢ ܢܬܒ̣ܢܐ.܀. ܐ̣ܝܟܢܐ ܕܟܕ ܟܢ̇ܫ̣ܘ ܟܠܗܘܢ ܪ̈ܘܪܒܢܐ ܘܪ̈ܝܫܝ ܐܬܪܐ: ܘܐ̇ܙܠܢ ܘܐ̇ܙܠܝܢ ܠܘܬ ܡ̇ܪܙܒܢܐ ܗ̇ܘ ܠܐ̣ܝܟܐ ܕܫ̇ܪܝ ܗܘܐ ܒܒܢܝܢܐ ܕܒܝܬ ܢܘܪܐ: ܘܐܡ̣ܪܢ ܥܡܗ ܣܓܝܐ̈ܬܐ ܟܕ ܩܡ̣ܢܢ ܠܩܘܒ̣ܠܗ ܘܐܡ̇ܪܝܢ ܚܢܢ:  ܕܚܢ̣ܢ ܠܡ ܟܪ̈ܣܛܝܢܐ ܚܢ̣ܢ ܘܡ̈ܫܥ̣ܒܕܝ ܠܡ̣ܠܟ ܡ̈ܠܟܐ: ܒܫܪܒܐ ܕܝܢ ܕܗܝܡܢܘܬܐ ܕܠܒ̈ܢܝܢܫܐ ܕܢܫܬ̇ܥ̣ܒܕ ܠܐ ܡ̣ܨܝܢܢ ܘܠܐ ܡܩ̇ܒܠܝܢܢ: ܘܒܝܬ ܚܢܦܘܬܐ ܒܐܬܪܢ  ܗ̣ܘ ܡ̇ܠܟܐ ܐܠܘ ܐܬ̣ܐ: ܩܕܡ ܕܟܠܢ ܢܡ̣ܘܬ܆ ܠܥܠܡ ܥܠܡܝܢ ܠܐ ܡܬܒ̣ܢܐ.܀. ܐܠܐ ܕܠܐ ܩܪܒܐ ܘܕܠܐ ܚ̣ܪܒܐ܆ ܦܘ̣ܩ ܡܢ ܐܬܪܐ̣ ܘܙ̣ܠ ܠܘܬ ܡ̇ܠܟܐ. ܘܐ̇ܘ̣ܕܥ ܠܗ ܥܠ ܛܘ̣ܝܒܗ ܕܨܒ̣ܝܢܢ܇ ܕܥܠ ܐ̈ܦܝ ܗܝܡܢܘܬܢ. ܘܡܕܡ ܕܦܩ̇ܕ ܕܢܥ̣ܒܕ ܫܠܝ̣ܛ. ܥܕܡܐ ܓܝܪ ܕܟܠܢ ܡ̇ܝܬܝܢܢ܇ ܒܝܬܐ ܕܡܓܘ̣ܫܘܬܐ ܒܐܬܪܢ ܕܢܬܒ̣ܢܐ̣ ܠܐ ܫ̇ܒܩܝܢܢ.܀. ܘܟܕ ܒܣܓܝܐ̈ܬܐ ܠܡ ܐܬ̇ܚܫܚܘ ܠܘܬ ܚ̈ܕܕܐ: ܘܡ̇ܪܙܒܢܐ ܐܝܟ ܕܐܬ̇ܦ̣ܩܕ ܡܛܝ̣ܒ ܗܘܐ ܠܒܢܝ̣ܢܐ܆ ܡܬܚ̣ܪܐ ܗܘܐ ܥܡ ܒ̈ܢܝ ܐܬܪܐ̇ ܘܡܣ̇ܗܕ ܗܘܐ ܒܗܘܢ̣ ܟܕ ܐܡ̇ܪ. ܕܚ̣ܙܘ ܠܡ ܕܠܘܩܒܠ ܦܘܩܕܢܐ ܕܡ̣ܠܟ ܡ̈ܠܟܐ ܩܝ̣ܡܝܢ ܐܢܬܘܢ̣ ܘܠܗ ܡܨ̇ܥܪܝܢ ܐܢܬܘܢ. ܘܡ̇ܘܬܐ ܒܝܫ̣ܐ ܐܝܬ ܠܗ ܕܢܦܩ̣ܘܕ ܥܠܝܟܘܢ. ܚ̣ܙܘ ܡ̇ܢܐ ܥ̇ܒܕܝܢ ܐܢܬܘܢ. ܟܕ ܕܝܢ ܠܡ ܚ̣ܙܐ ܡ̇ܪܙܒܢܐ ܛܘܝ̣ܒܗܘܢ ܘܥܘ̇ܬܕܗܘܢ ܕܠܩ̣ܘܒܠܗ: ܘܚ̣ܙܐ ܬܘܒ ܕܥܫܝܢܝܢ ܐܢܘܢ ܡܢܗ܆ ܢܦ̣ܩ ܟܕ ܓ̇ܙܡ ܘܡܣ̇ܗܕ ܒܗܘܢ܆ ܘܒܪܘܓܙܐ ܪܒܐ ܐܙ̣ܠ ܐ̇ܘܕܥ ܗܠܝܢ ܟܘܠܗܝܢ ܠܡ̇ܠܟܐ. ܗܘ̣ ܕܝܢ ܟܕ ܝܠ̣ܦ܆ ܐܬܬ̣ܥܝܪ ܒܪܘܓܙܐ ܘܐܬ̇ܚܡܬ̣ ܩܫܝ̣ܐܝܬ. ܘܟܕ ܓ̣ܙܪ ܡ̇ܘܬܐ ܥܠ ܟܠܗܘܢ ܒ̈ܢܝ ܐܬܪܐ܆ ܫ̣ܕܪ ܥܠܝܗܘܢ ܥܡܗ ܕܡ̇ܪܙܒܢܐ܆ ܚܡܫܬܥܣܪ̈ ܐ̈ܠܦܝܢ ܠܩܪܒܐ. ܘܦܩ̣ܕ ܕܐܢ ܡܬܚ̣ܪܝܢ ܠܘܩܒܠ ܦܘܩܕܢܗ ܢܬ̇ܚܪ̈ܒܘܢ܆ ܘܢ̇ܬܒܢ̣ܐ ܬܡܢ ܢܘ̇ܣܐ ܕܒܝܬ ܢܘܪܐ.܀. ܗ̣ܢܘܢ ܕܝܢ ܒ̈ܢܝ ܐܬܪܐ̣ ܟܕ ܗܠܝܢ ܝܠ̣ܦܘ܆ ܐܬܟ̇ܢܫܘ ܟܠܗܘܢ ܐܝܟ ܚܕܐ̣ ܐܝܟ ܥܣܪ̈ܝܢ ܐ̈ܠܦܝܢ ܕܐܬ̇ܥܬܕܘ ܠܩܪܒܐ܇ ܕܚܠܦ ܟܪܣܛܝܢܘܬܗܘܢ ܕܥܕܡܐ ܠܡ̇ܘܬܐ ܢܬ̇ܟܬܫܘܢ. ܘܟܕ ܗܠܝܢ ܡ̇ܛܝܘ܆ ܘܐܣ̣ܬܕܪ̈ܘ ܟܠܗܘܢ ܥܠܝܗܘܢ ܠܩܪܒܐ܆ ܗܠܝܢ ܩ̣ܪ̈ܘ܆ ܒܫܡܗ ܕܡܪܝܐ ܝܫܘܥ ܡܫܝܚܐ̣ ܘܢܦ̣ܩܘ ܥܠܝܗܘܢ. ܘܬܒ̣ܪ ܐܢܘܢ ܡܫܝܚܐ ܩܕܡܝܗܘܢ ܕܒ̈ܢܝ ܐܬܪܐ. ܘܚ̣ܪܒܘ ܐܢܘܢ ܠܟܠܗܘܢ̣ ܐܝܟ ܓܒܪܐ ܚܕ. ܩܛܠ̣ܘܗܝ ܠܡ̇ܪܙܒܢܐ܆ ܘܫܩ̣ܠܘ ܪܝܫܗ̣ ܘܐܘܒܠ̣ܘܗܝ ܠܦܛܪܝܩܝܘܣ ܝܘܣܛܝܢܝܢܘܣ  ܕܝܬ̇ܒ ܗܘܐ ܒܗ̇ܘ ܙܒܢܐ ܒܬܚܘܡܐ ܒܬܐܕܐܘܣܦܘܠܝܣ ܡܕܝܢܬܐ. ܘܗ̈ܘܝ ܗܠܝܢ ܟܘܠܗܝܢ܆ ܘܫܪܟܐ ܕܡܢ ܒܬܪܟܢ܇ ܕܣܓܝܐܐ ܗܝ ܡܠܬܐ ܘܬ̇ܘܢܝܐ ܕܗܫܐ ܥܠܝܗܝܢ.  ܪܝܫܐ ܕܥܣܪ̈ܝܢ ܘܚܕ܆ ܕܥܠ ܐܝܠܝܢ ܕܡܢ ܒܬܪܟܢ ܐܣܬ̣ܥܪ ܡܢܗ ܕܟܣ̣ܪܘܢ ܒܐ̇ܪܡܢܝܐ ܕܦܪ̈ܣܝܐ܆ ܘܕܗ̣ܦܟܘܢ ܡܢܗ ܘܫܠ̣ܡ ܟܠܗ ܐܬܪܐ ܠܪ̈ܗܘܡܝܐ. ܏ܟܐ ܟܕ ܓܝܪ ܗܠܝܢ ܗ̈ܘ̣ܝ܆ ܘܟܠܗ ܐܬܪܐ ܕܐ̇ܪܡܢܝܐ ܪܒܬܐ: ܚ̣ܙܘ ܕܐܬ̣ܬܥܝܪ ܥܠܝܗܘܢ ܩܪܒܐ ܚ̇ܣܝܢܐ ܡܢ ܡ̇ܠܟܘܬܐ ܪܫܝ̣ܥܬܐ ܕܦܪ̈ܣܝܐ: ܐܬ̇ܟܢܫ ܟܠܗ ܐܬܪܐ ܡܢ ܣ̣ܟܗ ܐܝܟ ܟܪ̈ܣܛܝܢܐ: ܘܪܗ̣ܛܘܢ ܐܚ̣ܕܘܢ ܓܘ̇ܣܐ ܒܡ̇ܠܟܘܬܐ ܕܟܪ̈ܣܛܝܢܐ ܟܕ ܐܡ̇ܪܝܢ܆ ܕܚ̣ܢܢ ܠܡ ܡܢ ܗܫܐ܆ ܥ̣ܒ̈ܕܐ ܚܢ̣ܢ ܕܡ̇ܠܟܘܬܐ ܕܟܪ̈ܣܛܝܢܐ܆ ܘܪܗ̣ܛܢ ܠܡܬ̇ܓܘܣܘ ܒܡ̇ܠܟܘܬܐ ܕܪ̈ܗܘܡܝܐ܇ ܕܬܦ̣ܪܩܢ ܡܢ ܒܥ̇ܪܝܪܝܘܬܗ̇ ܕܡܓܘ̣ܫܘܬܐ. ܥܡ ܣܓܝܐ̈ܬܐ ܐܚܪ̈ܢܝܬܐ ܕܠܥ̣ܝܢ ܡ̇ܪ̈ܚܡܢܐ ܡ̈ܠܟܐ ܕܝܠܢ܇ ܘܠܥ̣ܝܢ ܟܠܗ̇ ܟܠܗ ܣܘܢܩ̣ܠܝܛܘܣ ܗ̣ܘ ܩܬܘܠܝܩܐ ܘܫܪܟܐ ܕܐܦܝ̈ܣܩܦܐ ܕܥܡܗ ܡܬ̇ܢܝܢ ܗܘܘ ܗܠܝܢ܇ ܕܒܥܘܗ̈ܕܢܐ ܙܥܘܪ̈ܐ ܕܡܢܗܝܢ ܒܠܚܘܕ ܐܬ̇ܚܫܚܢ. ܟܕ ܡܢ ܗܕܐ ܕܬ̇ܟ̈ܬܘܫܐ ܕܩܪܒܐ ܘܚ̣ܪܒܐ ܪܒܬܐ ܕܒ̇ܙܒ̈ܢܝܢ ܗܘ̣ܬ ܬܡܢ ܡ̇ܬܢܝܢ ܗܘܘ܇ ܘܗ̇ܝ ܕܡܢ ܒܬܪܟܢ ܬܘܒ ܢܦ̣ܠܘ ܚܝ̈ܠܘܬܐ ܒܚ̈ܕܕܐ܇ ܘܙܒ̣̈ܢܝܢ ܣܓ̈ܝܐܢ ܐܙܕܟܝ̣ܘ ܦܪ̈ܣܝܐ ܘܐܫܬ̣ܩܠܘ ܡܢܗܘ̣ܢ ܦܝ̣̈ܠܐ. ܚ̣ܢܢ ܕܝܢ ܕܫܥ̣ܬܐ ܐ̇ܗܡ̣ܝܢ ܚܢ̣ܢ ܡܛܠ ܣܓܝܐܘܬܗܝܢ.