ܪܝܫܐ ܕܬܖ̈ܥܣܖ̈܆ ܕܥܠ ܪ̈ܘܪܒ̇ܢܝܬܐ ܬܪ̈ܬܝܢ ܕܥ̈ܙܝܢ ܘܐܦ ܗ̣ܢܝܢ ܘܩ̈ܡ̣ܝܢ ܓܢܒܪܐܝܬ. ܏ܝܒ ܥܠ ܗܠܝܢ ܕܝܢ ܬܪ̈ܬܝܢ ܢܫ̈ܐ ܝ̣ܕܝ̈ܥܬܐ܇ ܥܡ ܐܚܪ̈ܢܝܬܐ ܣܓ̈ܝܐܬܐ ܦܛܪ̈ܝܩܝܐ ܘܫܪܟܐ܇ ܐܬܬܣ̣ܝܡ ܩܪܒܐ ܚ̇ܣܝܢܐ ܡܢ ܟܠ ܓ̇ܒ̈ܝܢ܇ ܒܓ̇ܙܡ̈ܐ ܩܫ̈ܝ̣ܐ ܕܢܘܪܐ ܢܫ̇ܡܝܢ ܗܘܘ ܘܡ̇ܘܬܐ ܡܬ̇ܠܚܡܝܢ. ܘܫܪܟܐ̣ ܡܢ ܥ̇ܙܝܙܘܬܗ ܕܐܘܠܨܢܐ ܕܪܕܘܦ̣ܝܐ ܬܥ̣̈ܫܝ ܒܐܓܘܢܐ. ܘܡܛܠ ܡ̇ܪ̈ܗܛܝܗܝܢ ܘܒ̈ܬܝܗܝܢ ܘܒ̈ܢܝܗܝܢ ܘܐ̈ܘܣܝܣ ܕܝܠܗܝܢ܆ ܐܬܪܡ̣ܝܢ ܠܫܘܬ̇ܦܘܬܐ̣ ܕܐܣܟܡܐ ܒܠܚܘܕ. ܗܠܝܢ ܕܝܢ ܬܪ̈ܬܝܢ ܥ̣̈ܙܝܢ ܘܩ̈ܡ̣ܝܢ ܠܡ̇ܘܬܐ: ܟܕ ܢܦܫܗܝܢ ܐܫܠ̣ܡܝܢ ܠܡ̇ܘܬܐ܆ ܘܥܠ ܩ̈ܢܝ̣ܢܐ ܘܒ̈ܢܝܐ ܘܒ̈ܬܐ̣ ܒܣ̇ܪ̈ܝ. ܚܕܐ ܕܝܢ ܡܢܗܝܢ ܕܫܡܗ̇ ܗܘܐ ܐ̇ܢܛܝܦܛܪܐ܆ ܗܕܐ̣ ܚܡ̇ܬܗ ܗܘܬ ܕܝܘܚܢܢ ܗܘܦܛܘܣ܇ ܗ̇ܘ ܕܒܫܪܒܐ ܕܩܕܡ ܗܢܐ ܐܬܐ̣ܡܪ ܥܡ ܒܪܬܗ̇ ܕܐܦ ܗ̣ܝ ܗܘܦܛܝܣܐ ܘܛ̇ܢܢܬܐ ܕܗܝܡܢܘܬܐ܇ ܕܫܡܗ̇ ܓܝܘܪܓܝܐ ܐܢܬܬܗ ܕܝܘܚܢܢ.܀.܀. ܗ̇ܝ ܕܝܢ ܐܚܪܬܐ ܕܫܡܗ̇ ܝܘ̇ܠܝܢܐ ܐ̣ܝܬܝܗ̇ ܗܘܬ ܒܪܬܗ ܕܡ̇ܓܢܐ ܗܘܦܛܘܣ܇ ܗ̇ܘ ܕܐܦ ܗ̣ܘ ܙܒܢܐ ܐܫ̣ܬܕܝ ܠܐܟ̣ܣܘܪܝܐ ܥܡ ܒ̈ܢܘܗܝ܇ ܘܗ̣ܝ ܝܘ̇ܠܝܢܐ ܥܡܗ. ܗ̣ܘܬ ܘܐܦ ܗܝ̣܇ ܕܐܦ ܗ̣ܘ ܡܢܗ ܕܓܢ̣ܣܗ ܕܐܢܣܛܣ ܡ̇ܠܟܐ ܐ̣ܝܬܘܗܝ ܗܘܐ. ܐܝܬܝܗ̇ ܗܘܬ ܕܝܢ ܘܐܦ ܟܠܬܗ ܕܝܠܗ ܕܡ̇ܠܟܐ ܝܘܣܛܝܢܐ ܐܢܬܬ ܐ̇ܚܘܗܝ. ܠܗܕܐ ܗܟܝܠ ܘܠܐܢܛܝܦܛܪܐ܆ ܡܢ ܒܬܪ ܬܟܬ̇ܘܫܐ ܣܓܝܐܐ ܘܐܓܘܢܐ ܕܓܢܒܪܘܬܐ܆ ܐܪ̣ܡܝܘܢ ܐ̈ܢܝܢ ܠܬܪ̈ܬܝܗܝ̣ܢ ܒܕܝܪ̈ܬܐ ܕܐ̣ܝܬܝܗܝܢ ܒܥܒ̣ܪܐ ܕܟܠܩܕܘܢܐ܇ ܟܕ ܐܬ̣ܦܩܕܘ ܐܬ̣ܦܩܕ ܥܠܝܗܝܢ ܦܘܩ̈ܕܢܐ ܩ̈ܫܝܐ܇ ܘܐܫܬ̣ܠܚ ܠܕܝܪ̈ܬܐ ܕܐܬܚ̣̈ܒܫܝܢ ܒܗܝܢ. ܕܐܢ ܗ̣ܘ ܕܠܐ ܡ̈ܬܛ̣ܦܝܣܢ ܕܢܬ̇ܩܪ̈ܒܢ܆ ܢܬ̇ܓܪ̈ܥܢ ܘܢ̈ܠܒܫܢ ܐܣܟܡܐ ܐ̣ܘܟܡܐ ܕܕܝܪܝܘܬܐ. ܘܢ̇ܗ̈ܘܝܢ ܡܬ̈ܬ̇ܒܥܢ܆ ܠܡܥ̣ܒܕ ܟܠܗ̇ ܚܫ̣ܚܬܐ ܨܥܝ̣ܪܬܐ ܕܕܝܪܝܘܬܐ. ܗܕܐ̣ ܕܐܦ ܐܬܬ̣̈ܣܝܡܢ ܥܠܝܗܝܢ ܗܠܝܢ ܕܩ̣̈ܫܝܢ ܡܢܗ̇. ܘܬ̇ܒ̈ܥܢ ܗ̈ܘܝ ܠܗܝܢ܆ ܕܢܟ̣̈ܢܫܢ ܕܝܪܐ̣ ܘܢ̈ܦ̇ܩܢ ܢܦ̣ܬܐ. ܘܢܓܖ̣̈ܦܢ ܘܢܫ̣̈ܝܓܢ ܒܝܬ ܣ̣ܠ̈ܝܐ ܕܝܠܗܝܢ܆ ܘܢܫ̈ܡ̇ܫܢ ܒܝܬ ܡ̇ܓܪܝܘܢ ܘܢܫ̣̈ܝܓܢ ܩ̈ܢ̇ܕܠܐ ܘܠ̈ܓܐ. ܘܫܪܟܐ ܕܕܐܝܟ ܗܠܝܢ ܕܡ̈ܬܬ̇ܒܥܢ ܗ̈ܘܝ̣ ܩܫ̣ܝܐܝܬ. ܐ̣ܝܟܢܐ ܕܟܕ ܠܐ ܐܫܟ̣ܚܝܢ ܗܠܝܢ ܟܠܗܘܢ ܐܘ̈ܠܨܢܐ ܠܡܩ̇ܒܠܘ    ܘܠܡܣ̇ܝܒܪܘ܆ ܐܬܪ̈ܡ̣ܝܢ ܘܐܦ ܗ̣ܢܝܢ ܐܝܟ ܕܠܐܣܟܡܐ ܠܫܘܬ̇ܦܘܬܐ ܟܠܩܕܘܢܝܬܐ܇ ܐ̣ܝܟܢܐ ܕܢܫ̣ܬܪ̈ܝܢ ܘܢ̈ܦ̣ܩܢ ܡܢ ܐܢܢܩܐ ܕܚܒ̣ܘܫܝܐ ܕܕܝܪ̈ܬܐ ܗܠܝܢ܇ ܐܢ ܕܐܢ ܐܪܐ ܕܝܪ̈ܬܐ ܙܕ̇ܩ ܕܢܫ̈ܬܡ̇ܗܢ. ܘܗܟܢܐ ܐܫ̣ܬܪ̈ܝܢ ܘܗ̈ܦ̣ܟܝܢ ܠܒ̈ܬܝܗܝܢ܆ ܟܕ ܡܟܝܠ̣ ܛܟ̣ܣܗܝܢ ܩܕܡܝܐ ܠܒ̈ܟ̣ܝ. ܘܐܕ̣ܪܟ ܙܒܢܐ ܕܡ̇ܪܕܘܬܐ ܕܡܢ ܐܠܗܐ ܕܒܬܪ̈ܝܗܘܢ ܓ̇ܒ̈ܐ܆ ܘܗܟܢܐ ܢܦܐ̣ܫܐ ܘܠܗܠܝܢ ܘܠܟܠܢܫ ܗܘ̣ܐ. ܪܝܫܐ ܕܬܠܬܥܣܪ̈܆ ܕܥܠ ܣܪܓܝܣ ܘܣܪܓܝܣ ܩܫ̈ܝܫܢܐ܆ ܘܥܠ ܐ̈ܓܘܢܐ ܕܐܬ̇ܟܬܫܘ. ܏ܝܓ ܣܪܓܝܣ ܗܟܝܠ ܗܢܐ ܩܫܝܫܐ ܘܣܘܢܩ̣ܠܣ ܕܝܠܗ ܕܡ̇ܟܬܒܢܐ ܐ̣ܝܬܘܗܝ: ܥܡ ܣܪܓܝܣ ܐܚܪܢܐ ܩܫܝܫܐ: ܘܐܦ ܗ̣ܘ ܬܠܡܝܕܗ: ܘܟܕ ܒܝܬ ܚܒܘ̣ܫܝܐ ܐ̣ܝܬܘܗܝ ܗ̣ܘ ܝܘܚܢܢ ܕܒܒܝܬ ܐ̈ܠ̇ܝܨ̣ܐ ܕܐܟ̣̇ܣܢܕܘܟܝܢ ܕܐܘ̣ܒܘܠܘ: ܕܐܘ̣ܒ̈ܠܘ ܡܢ ܒܬܪ ܕܙܒ̈ܢܝܢ ܣܓ̈ܝܐܢ ܐܬ̇ܟܬܫܘ ܘܐܬܠܒ̣ܟܘ ܘܐܬܚ̣ܒܫܘ܆ ܒܚܪܬܐ ܒܝܕ ܡܫܠܡ̣ܢܘܬܐ ܢܟܝ̣ܠܬܐ ܕܐܚܪ̈ܢܐ ܗ̇ܢܘ ܕܝܢ ܕܐܢܫ  ܩ̣ܪܝܒܗܘܢ ܘܕܥܡܗܘܢ ܒܐܣܟܡܐ ܚܒܝ̣ܫ ܗܘܐ ܠܗܘܢ: ܘܗ̣ܘ ܗܢܐ ܡܫ̣ܠܡܢܐ ܕܒܕܡ̣ܘܬܗ ܕܝܗܘܕܐ: ܘܬܘܒ ܘܗ̣ܘ ܐܬ̣ܠܒܟ ܘܐܬܚ̣ܛܦ ܠܒܝܬ ܐܦܝܣܩܦܝܘܢ: ܟܕ ܩܝܡ̣ܝܢ ܠܘܩܒܠ ܗܠܝܢ ܕܠܒܝ̣ܟܝܢ ܗܘܘ ܠܗܘܢ ܘܡܬ̣ܚܪܝܢ ܠܘܩܒܠܗܘܢ ܘܕܪܫ̇ܝܢ ܥܡܗܘܢ ܚ̇ܪܝܦܐܝܬ: ܘܐܬܡ̇ܪܡܪܘ ܥܠܝܗܘܢ: ܘܩܕܡ ܐܟ̣ܠܘܣ ܣܓܝܐܐ: ܐܫܠܚ̣ܘܢ ܘܡܬ̣ܚܘܢ ܐܢܘܢ܆ ܘܢܓ̇ܕܘ ܐܢܘܢ ܠܥܝܢ ܟܠܢܫ ܢܓ̣ܕ̈ܐ̣ ܩ̈ܫܝܐ. ܘܕܢܪ̈ܦܘܢ ܚܠܝ̣ܨܘܬܗܘܢ̣ ܠܐ ܐܬܡ̣ܨܝܘ. ܘܟܕ ܗܟܢܐ ܚܝܠܬܢܐܝܬ ܘܓܢܒܪܐܝܬ ܩܡ̣ܘ ܘܐܬ̇ܟܬܫܘ: ܐ̣ܝܟܢܐ ܕܐܦ ܗ̣ܢܘܢ ܪ̈ܕܘ̇ܦܐ ܒܗܘܢ ܢܬ̇ܕܡܪܘܢ܆ ܗܝ̇ ܕܝܢ ܐܘܒ̣ܠܘ ܚܒ̣ܫܘ ܐܢܘܢ ܒܝܬ ܕܝܩܢ̣ܝܩܘܢ܇ ܡܢ ܒܬܪ ܚܒ̈ܘܫ̣ܝܐ ܐܚܪ̈ܢܐ ܩܕ̈ܡܝܐ܇ ܐ̈ܠܝ̣ܨܐ ܘܩ̣̈ܫܝܐ ܕܒܒܝܬ ܐܦܝܣܩܦܝܘܢ܇ ܬܪ̈ܬܝܢ ܙܒ̈ܢܝܢ. ܘܚܕܐ̣ ܒܕܝܪܐ ܐ̇ܝܕܐ ܕܡܬ̇ܩܪܝܐ ܕܒܝܬ ܪܒ̇ܘܠܐ. ܗ̇ܢܘ ܕܝ̣ܢ ܣܪܓܝܣ  ܗܢܐ ܕܐܬܐ̣ܡܪ ܡܢ ܠܥܠ ܣܘܢܩܠܘܣ. ܘܗ̣ܘܘ ܬܡܢ ܒܝܘܡ̈ܬܐ ܩ̈ܫ̣ܝܐ ܕܥ̣ܪܝܐ ܘܓܠܝܕܐ ܕܒܫܒܛ ܝܘܡ̈ܬܐ̣ ܐܪ̈ܒܥܝܢ. ܟܕ ܠܗ ܠܣܪܓܝܣ ܣܘܢ̣ܩܠܘܣ ܡܫ̇ܕܪ ܗܘܐ ܗ̣ܘ ܝܘܚܢܢ ܦܛܪܝܪܟܐ܆ ܘܫ̇ܩܠ ܗܘܐ ܠܗ. ܘܡ̇ܪܬܐ ܘܡܫ̇ܓܫ ܘܡܦ̣ܝܣ ܗܘܐ ܠܗ̣ ܕܢܗܘܐ ܥܡܗ ܒܝܬ ܐܦܝܣܩܦܝܘܢ ܕܝܠܗ܆ ܘܢܗܘܐ ܠܗ ܩ̣ܠܪܝܛܝܣ܇ ܩ̣ܠܝܪܝܛܝܣ ܟܕ ܝܡ̇ܐ ܠܗ̣ ܕܠܐ ܥ̇ܨܐ ܐܢܐ ܠܟ ܕܬܬ̇ܩܪܒ ܥܡܢ. ܐܠܐ ܡܛܠ ܕܫܡ̣ܝܥ ܠܝ ܥܠܝܟ ܕܓܒܪܐ ܢܟ̣ܦܐ ܘܕܝܪܝܐ ܐ̣ܝܬܝܟ܆ ܟܬ̇ܪ ܠܘܬܢ. ܘܗܘ̣ܝ̣ ܐܝܟ ܕܨ̇ܒܝܬ. ܘܐܢ ܕܝܢ ܬܬܠ ܢܦܫܟ ܘܬܬ̇ܩܪܒ ܥܡܢ܆ ܡܚ̣ܕܐ ܥ̇ܒܕ ܐܢܐ ܠܟ ܐܦܝܣܩܦܐ܆ ܒܟܘܠ ܡܕܝܢܬܐ ܕܫ̇ܦܪܐ ܠܟ. ܘܟܕ ܗ̣ܘ ܓܢܒܪܐܝܬ ܐܬ̇ܟܬܫ: ܘܗܟܢܐ ܘܠܐ ܒܫܘ̈ܘ̇ܕܝܐ ܘܠܐ ܒܫ̈ܘ̇ܓܫܐ ܐܫܟ̣ܚ ܠܡ̇ܪܦܝܘܬܗ ܡܢ ܚܝ̣ܨܘܬܗ ܕܫܪܪܗ܆ ܐ̣ܝܟܢܐ ܕܟܕ ܚ̣ܙܐ ܚܠܝ̣ܨܘܬܗ ܘܠܐ ܡܨ̣ܛܠܝܢܘܬܗ܆ ܗܝ̇ ܕܝܢ ܫ̣ܕܪ ܚܒܫ̣ܗ ܒܕܝܪܐ ܕܡܬ̇ܩܪܝܐ ܕܒܝܬ ܪܒ̇ܘܠܐ. ܗܠܝܢ ܕܠܐ ܒܝ̣ܫܝܢ ܗܘܘ ܒܗܝܡܢܘܬܐ܇ ܐܝܟ ܗܠܝܢ  ܕܝܪ̈ܬܐ ܕܫܪܟܐ. ܘܠܐ ܪܚ̇ܡܝܢ ܗܘܘ ܠܣܘܢܗܕܣ ܕܟܠܩܕܘܢܐ܆ ܘܠܐ ܡ̇ܟܪܙܝܢ ܗܘܘ ܠܗ̣̇ ܠܓܡ̣ܪ.  ܪܝܫܐ ܕܐܪ̈ܒܬܥܣܪ̈܆ ܕܥܠ ܐܢܕܪܐܘܣ ܚܒ̣ܝܫܐ. ܏ܝܕ  ܟܕ ܗܟܝܠ ܬܘܒ ܐܢܕܪܐܘܣ ܗܢܐ ܩܫܝܫܐ: ܠܒܪ ܒܫ̣ܘܪܐ ܕܡܕܝܢܬܐ ܒܦܘܪܩܣܐ ܚܒܝ̣ܫ ܗܘܐ܆ ܫ̣ܕܪ ܥܠܘܗܝ ܩܠ̣ܝܪ̈ܩܘ ܘܪ̈ܗܘܡܝܐ܆ ܘܥܩ̣ܪ̈ܘ ܒܝܬ ܚܒܘ̣ܫܝܗ̣ ܘܐ̇ܦܩ̣ܘܗܝ. ܘܟܕ ܡ̇ܢܬܦܝܢ ܠܗ ܘܡ̇ܓܪ̈ܓܪܝܢ ܠܗ܆ ܕܒܝ̣ܪ̈ܝܢ ܗܘܘ ܠܗ ܘܥܐ̇ܠܝܢ ܒܡ̇ܣ̣ܐ ܕܡܕܝܢܬܐ. ܘܟܕ ܚ̣ܙܐ ܐܟܠ̣ܘܣ ܣܓܝܐܐ܆ ܫ̇ܪܝ ܩ̇ܥܐ܆ ܐܘ̣ܒܝܐ. ܐܘ̣ܒܝܐ. ܐ̣ܘ ܒܢܝ̈ܢܫܐ ܟܪܣܛܝܢܐ ܐ̣ܝܬܝ̣ ܘܐܦ ܐܪܬܕܟܣܐ. ܘܐܢ ܗܠܝܢ ܕܡ̇ܢܬܦܝܢ ܠܘ ܚ̈ܢܦܐ ܐ̣ܝܬܝܗܘܢ܆ ܘܟܪ̈ܣܛܝܢܐ ܐܡ̇ܪܝܢ ܕܐ̣ܝܬܝܗܘܢ܆ ܠܡܢܐ ܪ̈ܕܘ̇ܦܐ ܘ̇ܩ̈ܛܘܠܐ ܥܒ̣ܝܕܝܢ  ܠܟܪ̈ܣܛܝܢܐ. ܘܠܝ̣ ܠܡ̇ܢܐ ܓ̣ܪܝܪܝܢ ܘܥ̇ܒܪܝܢ ܒܝܢܬܟܘܢ܇ ܘܫܠ̣ܝܢ ܐ̣ܢܬܘܢ ܡܢ ܛܢ̣ܢܐ ܕܚܠܦ ܡܫܝܚܐ. ܥܡ ܣܓܝܐ̈ܬܐ ܐܚܪ̈ܢܝܬܐ ܕܐܝܟ ܗܠܝܢ ܕܩ̇ܥܐ ܕܕܐܝܟ ܗܠܝܢ ܩ̇ܥܐ ܗܘܐ. ܐ̣ܝܟܢܐ ܕܢܬ̇ܟܢܫ ܐܟܠܘܣ ܣܓܝܐܐ܆ ܘܢܚ̣ܘܪܘܢ ܥܠ ܗܠܝܢ ܕܠܒܝ̣ܟܝܢ ܗܘܘ ܠܗ܇ ܒܛܢ̣ܢܐ ܚ̇ܪܝܦܐ ܐܝܟ ܕܢܩ̣ܛܠܘܢ ܐܢܘܢ. ܗ̣ܢܘܢ ܕܝܢ ܟܕ ܚ̣ܙܘ ܪܘܓܙܗ ܘܛܢ̣ܢܗ ܕܐܟܠ̣ܘܣ ܟܠܗ ܕܥܠܝܗܘܢ ܥ̣ܪܩܘ̣ ܘܐܬ̇ܛܫܝܘ. ܘܗܟܢܐ ܦܠܛ̇ܘܗܝ ܡܢܗܘܢ ܠܛ̇ܘܒܢܐ ܐܢܕܪܐܘܣ. ܒܚܪܬܐ ܕܝܢ ܬܘܒ̣ ܠܒܟ̣ܘܗܝ ܘܫ̇ܕܪܘ ܚܒܫ̣ܘܗܝ ܒܕܝܪܐ ܕܐܩ̣ܝܡܝܛܘܢ. ܕܐܝܩ̣ܝܡܝܛܘܢ ܘܟܕ ܙܒܢܐ ܗ̣ܘܐ ܬܡܢ ܘܣܓܝܐ̈ܬܐ ܗ̈ܘ̣ܝ܆ ܥ̣ܪܩ ܐܦ ܡܢ ܬܡܢ܆ ܘܬܘܒ ܒܬܪܟܢ ܢܛ̣ܖ̈ܘ ܘܠܒܟ̣ܘܗܝ̣ ܘܚܒܫ̣ܘܗܝ ܒܝܬ ܐܦܝܣܩܦܝܘܢ. ܘܒܬܪ ܕܪܫ̇ܐ ܣܓܝܐܐ܆ ܥ̣ܪܩ̣ ܘܐܦ ܡܢ ܬܡܢ.܀. ܪܝܫܐ ܕܚܡܫܬܥܣܪ̈܆ ܕܥܠ ܕܝܩܢ̣ܝܐ ܕܗܠܝܢ ܕܡܣ̣ܚܝܢ ܟ̣ܪ̈ܝܗܐ܇ ܗܠܝܢ ܕܫ̣ܕܝܢ ܒܫ̈ܘܩܐ ܕܡܕܝܢܬܐ. ܏ܝܗ ܟܕ ܓܝܪ ܕܝܩ̈ܘܢܝܣ ܡܫ̈ܚܠ̣ܦܬܐ ܕܓܒܪ̈ܐ ܘܕܢܫ̈ܐ ܐܝܬ  ܠܡ̣ܚܙܐ ܒܡܕܝܢܬܐ ܗܕܐ ܪܒܬܐ ܕܡ̇ܠܟܘܬܐ܆ ܬܪ̈ܬܝܢ ܐ̣ܝܬܝܗܝܢ ܗ̈ܘܝ܇ ܕܝܩ̣̈ܘܢܝܣ ܕܪ̈ܘܪܒܢ ܘܝ̣̈ܕܝܥܢ. ܘܐ̣ܝܬܝܗܝܢ ܗ̈ܘܝ ܟܠܗܝ̣ܢ ܕܐܪ̈ܬܕܟܣܘ. ܚܕܐ ܩܕܡܝܬܐ ܘܪܒܬܐ܆ ܘܗܝ̇ ܕܐܬܩܝ̣ܡܬ݀ ܡܢ ܦܘܠܐ ܐܠܗܝܐ ܐܢܛܝܘܟܝܐ܇ ܗܢܐ ܕܒܛܢ̣ܢܐ ܪܒܐ ܘܐܦ ܒܡ̈ܕܝܢܬܐ ܪ̈ܘܪܒܬܐ ܘܝ̣ܕܝܥ̈ܬܐ ܕܒܡܕܢܚܐ ܘܒܡܥܪܒܐ܇ ܥܒ̣ܕ ܗܘܐ ܘܐ̇ܩ̣ܝܡ ܕܝܩ̣̈ܘܝܣ܇ ܗܠܝܢ ܕܒܗܝܢ ܡܬ̇ܚܙܝܐ ܘܡܫܬ̇ܡܠܝܐ ܡܠܬܗ ܕܡܪܢ܇ ܕܗܕܐ ܗܝ ܢܝ̣ܚܬܝ̣ ܕܐ̇ܢ̣ܝܚ ܕܐ̇ܢ̣ܝܚܘ ܠܡ̇ܛܪ̈ܦܐ. ܕܣܟ ܠܓܡ̣ܪ̣ ܚܕ ܡܢ ܐܝܠܝܢ ܕܫ̇ܠܡܝܢ ܠܣܘܢܗܕܘܣ ܕܟܠܩܕܘܢܐ ܒܚܕܐ ܡܢܗܝ̣ܢ ܠܐ ܡܬ̇ܩܒܠ ܗܘܐ. ܟܕ ܗܟܝܠ ܙܒܢܐ ܗܢܐ ܕܪܕܘܦ̣ܝܐ ܐܕ̣ܪܟ: ܟܕ ܒܪܝܫܗ̇ ܕܚܕܐ: ܐܢܫ ܪܒܐ ܘܡܫ̣ܡܗܐ ܘܝ̣ܕܝܥܐ ܩܐ̇ܡ ܗܘܐ: ܕܫܡܗ ܗܘܐ ܬ̇ܠܘܣ: ܗܢܐ ܕܝܬܝܪܐܝܬ ܦܬ̇ܝ̣ܗ̇ ܗܘܐ ܘܐ̇ܘܪ̣ܒܗ̇ ܠܬܫܡ̣ܫܬܐ ܗܕܐ ܒܣܓܝܐ̈ܬܐ ܪ̈ܘܚܢܝܬܐ ܘܐܠܗ̈ܝܬܐ: ܐܝܠܝܢ ܕܣܓܝܐ̈ܬܐ ܐܝܬ ܗܘܐ ܥܠܝܗܝܢ ܠܡܬ̇ܢܝܘ ܘܠܡܟ̣ܬܒ܆ ܗܕܐ ܕܟܕ ܗܟܢܐ ܢܨ̇ܚܐ ܘܐܦ ܥܕ ܗܫܐ܆ ܐ̣ܝܟܢܐ ܕܒܝܕ ܚܣ̣ܡܗ ܕܐܟ̇ܠ ܩܪܨܐ̣ ܐܬܩ̣ܛܪܓܬ݀ ܩܕܡ ܡ̇ܠܟܐ ܘܐܦܝܣܩܦܐ. ܕܟܠܗܘܢ ܕܠܘܩܒܠ ܣܘܢܗܕܘܣ ܕܟܠܩܕܘܢܐ ܐ̣ܝܬܝܗܘܢ: ܘܕܝܪ̈ܝܐ ܘܩܠ̣ܝܪ̈ܩܘ ܣܓ̈ܝܐܐ ܒܗܘܢ ܚܒܝ̣ܟܝܢ܆ ܘܟܢ̣ܫ̈ܐ ܘܟ̈ܢ̣ܘܫܝܐ ܘܪ̈ܘܚ̇ܦܐ ܒܗ̇ ܗ̇ܘܝܢ: ܘܡܢ ܗܝ̇ܕܝܢ ܐܬܐ̣ܠܨ ܛ̇ܘܒܢܐ ܬ̇ܐܠܘܣ܆ ܕܕܠܐ ܢܬ̣ܠ ܥܠ̣ܬܐ ܠܣ̇ܢ̈ܝܝ ܛ̇ܒ̈ܬܐ: ܕܢ̇ܦܩ ܐܢܘܢ ܠܟܠܗܘܢ ܩܠ̣ܝܪ̈ܩܘ ܘܕܝܪ̈ܝܐ ܕܥܡܗ܆ ܘܗܟܢܐ ܗ̣ܢܘܢ ܥ̇ܠܡ̈ܝܐ̣ ܒܠܚܘܕܝܗܘܢ ܡ̇ܫܡܫܝܢ ܗܘܘ. ܐ̣ܝܟܢܐ ܕܟܕ ܗܠܝܢ ܐܬ̣̈ܝܕܥܝ ܠܗܠܝܢ ܕܫ̣ܠܝܛܝܢ ܗܘܘ: ܘܐܦ ܡܛܠ ܕܢܝ̇ܩܪܘܢܝܗܝ ܕܬ̇ܡܝܗܝܢ ܗܘܘ ܒܕܘܒ̇ܪ̈ܘܗܝ ܕܓܒܪܐ܆ ܫܠ̣ܝܘ ܡܢܗ ܟܠܗ ܙܒܢܐ ܕܚܝ̈ܘܗܝ. ܗܢܐ ܕܗܘ̣ܐ ܫܘܠܡ ܚܝ̈ܘܗܝ܆ ܗܫܐ ܒܫܢܬ ܬܡܢܡܐܐ ܘܬܡܢܐܝܢ ܘܬܡ̈ܢܐ. ܟܕ ܩܡ̣ ܡܢ ܒܬܪܗ܆ ܐܢܫ ܐܪܓܘܪܦܪܛܐ ܕܫܡܗ̣ ܪܘܡܢܘܣ. ‏ ܪܝܫܐ ܕܫܬܬܥܣܪ̈܆ ܕܥܠ ܕܝܩ̣ܢܝܐ ܬܘܒ ܗ̇ܝ ܐܚܪܬܐ ܕܬܪ̈ܬܝܢ. ܏ܝܘ ܒܗ ܒܙܒܢܐ ܗܢܐ: ܒܪܝܫܗ̇ ܕܕܝܩ̣ܘܢܝܐ ܗ̇ܝ ܐܚܪܬܐ ܕܬܪ̈ܬܝܢ: ܩܐ̇ܡ ܗܘܐ ܐܢܫ ܩܠ̣ܝܪܝܩܐ܆ ܗܢܐ ܕܫܡܗ ܗܘܐ ܘܐܦ ܠܗ̣ ܩܘܡ̣ܝܛܐ. ܕܐܦ ܗ̣ܘ ܚܦܝ̣ܛܐ̣ ܘܡ̇ܝܬܪܐ ܗܘܐ. ܐ̣ܝܬܘܗܝ ܗܘܐ ܕܝܢ ܩܠ̣ܝܪܝܩܐ̣ ܒܝܬ ܡܪܬܝ ܡ̇ܪܝܐ ܕܒܠ̣ܩܪܢܐ. ܕܒܠ̣ܝܩܪܢܐ ܘܢܦ̣ܩ ܡܛܠ ܗܝܡܢܘܬܐ ܥܡ ܐܚܪ̈ܢܐ ܕܐܦ ܣܓ̈ܝܐܐ ܟ̇ܢ̣ܫ ܗܘܐ܆ ܘܐܝܟ ܛܟ̣ܣܐ ܕܕܝܪܝܘܬܐ ܬ̇ܒܥ ܗܘܐ ܠܗܘܢ ܠܡܬ̇ܕܒܪܘ܇ ܟܕ ܗ̣ܘ ܒܟܠܡܕܡ ܝܨ̇ܦ ܗܘܐ ܕܝܠܗܘܢ. ܠܗܢܐ ܗܟܝܠ ܐܫܬܒܩ̣ܬ݀ ܠܗ ܒܝܪܬܘܬܐ ܕܪܬܐ ܚܕܐ ܪܒܬܐ܆ ܡܛܠ ܕܒܗ̇ ܬܗܘܐ ܕܝܩ̣ܢܝܐ. ܗܕܐ̣ ܕܐܦ ܗܘ̣ܬ. ܘܒܗ̇ ܒܕܪܬܐ ܗ̇ܝ̣ ܡܫܬ̇ܡܠܝܐ ܗ̣ܘܬ ܟܠܗ̇ ܬܫܡ̣ܫܬܐ ܕܡ̣̈ܣܟܢܐ. ܒܗ ܕܝܢ ܒܙܒܢܐ ܕܪܕܘܦ̣ܝܐ܆  ܐܬ̇ܩܛܪܓ ܐܦ ܗ̇ܘ ܕܟ̈ܢܘܫ̣ܝܐ ܥ̇ܒܕ܆ ܘܐܫܬܩ̣ܠܬ݀ ܡܢܗ ܕܪܬܐ ܗ̇ܝ. ܘܐܬܬ̣ܠܝܬ݀ ܒܗ̣̇ ܒܘܠ̣ܐ̈ܣ ܕܣ̈ܦ̣ܘܛܝܩܐ܆ ܒܝܠ̣ܐ̈ܘܣ ܕܘܣ̣̈ܦܛܝܩܐ ܘܐܬܥ̣ܩܪܬ݀ ܡܢܗ̇ ܕܝܩܘ̣ܢܝܐ. ܘܗ̣ܘ ܐܫ̣ܬܕܝ ܠܐܟ̣ܣܘܪܝܐ܆ ܠܓ̇ܙܪܬܐ ܚܕܐ ܕܝܡܐ. ܘܟܠܗܘܢ ܕܥܡܗ ܥܕܡܐ ܠܙܥܘܪ̈ܐ̣ ܐܬܒ̇ܕܪ̈ܘ. ܡܢܗܘܢ ܕܝܢ ܙܥܘܪ̈ܐ ܚܡ̇ܣܢܘ܆ ܘܐ̣ܙܠܘ ܫܩ̣ܠܘ ܠܗܘܢ ܕܘܟܬܐ ܐܚܪܬܐ. ܘܐܝܟ ܕܒܛܟ̣ܣܐ ܡ̇ܫܡܫܝܢ ܗܘܘ̣ ܘܡܣ̣ܚܝܢ ܠܡ̈ܣܟܢܐ.܀.