ܪܝܫܐ ܕܬܠܬܝܢ܆ ܥܠ ܡ̣ܦܩ ܒܪܘܚܐ ܕܥܠܘܗܝ ܕܝܠܗ ܕܡ̇ܟܬܒܢܐ܇ ܕܠܘܬ ܐܝܠܝܢ ܕܢ̇ܦܠܝܢ ܒܡܣ̣ܒܪܢܘܬܐ ܣ̣ܪܝܩܬܐ ܕܥܠܘܗܝ܀. ܏ܠ ܟܒܪ ܕܝܢ ܢܣܬ̣ܒܪ̈ܢ ܗܠܝܢ ܟܠܗܝܢ ܕܐܬܐ̣ܡܪ ܘܐܬܟ̣ܬܒ ܠܡ̈ܠ̣ܝܛܝ ܒܐ̣ܝܕܥܬܐ ܪܡ̇ܬܐ: ܘܚ̇ܪ̈ܝܦܝ ܒܗܘܢܐ ܕܕܝ̇ܢܝܢ ܠܗܠܝܢ ܡ̈ܠܐ ܩ̇ܛܝܢܐܝܬ܆ ܕܗܠܝܢ ܕܐܬܐܡ̣ܪ ܘܐܬ̣ܟܬܒ ܡܢ ܗ̇ܘ ܕܐ̇ܟ̣ܬܒ܆ ܕܐܝܟ ܝܬܝܪ̈ܬܐ ܘܒܛܟ̣ܣܐ ܕܣ̇ܝܘܡܘܬܐ ܐܬ̇ܚܫܚ ܗ̇ܘ ܕܐܟ̣ܬܒ. ܐܝܟ ܗ̇ܘ ܕܒܨ̣ܘܒܬ ܡ̈ܠܐ ܐܝܟ ܕܐܝܟ ܕܡܢܗ ܐܬܟ̣ܬܒ ܗܠܝܢ. ܘܐܢ ܕܝܢ ܠܐ܆ ܡܢ ܐ̇ܝܟܐ ܗܟܢܐ ܣ̣ܕܝܪܐܝܬ܇ ܗܠܝܢ ܟܠܗܝܢ ܕܗ̈ܘ̣ܝ ܘܐܬ̈ܡ̇ܠܠܝ܇ ܒܝܢܬ ܬܪ̈ܝܢ ܓ̇ܒ̈ܝܢ ܝ̇ܕܥ ܗܘܐ ܠܡ̣ܬܢܐ ܘܠܡ̣ܟܬܒ܇ ܘܠܡܫ̣ܠܡܘ ܐ̈ܢܝܢ ܠܗܠܝܢ ܟܠܗܝܢ ܒܟܬ̣̈ܝܒܬܐ. ܘܬܘܒ ܐܝܟ ܕܡܬܚ̣ܙܐ܆ ܒܚܕ ܓ̇ܒܐ ܣ̣ܕܝܪ ܒܗ̇ ܒܡܠܬܗ܆ ܘܠܘܩܒܠ ܚܕ ܓ̇ܒܐ ܟܫ̇ܛ܆ ܘܚܠܦ ܚܕ ܡ̇ܬܟܬܫ.܀. ܐܠܐ ܡܟܝܠ ܗܕܐ ܬܬܝ̣ܕܥ ܠܐܝܠܝܢ ܕܒܡܣܒ̣ܪܢܘܬܐ ܗܕܐ ܡܬ̇ܬܚܕܝܢ܆ ܕܡ̇ܟܬܒܢܐ ܕܗܠܝܢ ܟܠܗܝܢ܆ ܠܐ ܡ̇ܒܪܝ ܗܘܐ ܡܢܗ ܕܐܓܘܢܐ܆ ܘܠܐ ܪܚ̣ܝܩ ܗܘܐ ܡܢܗ ܕܬܟܬܘܫܐ܇ ܕܗܠܝܢ ܒܫ̣ܡܥܐ ܕܒܫ̣ܡܥܐ ܕܡܢ ܪܘܚ̣ܩܐ ܘܕܡܢ ܐܚܪ̈ܢܐ ܢܩ̇ܒܠ ܗܘܐ܇ ܘܢܟ̇ܬܘܒ ܘܢܫ̇ܠܡ ܐ̈ܢܝܢ ܒܟܬܒܗ܆ ܐܠܐ ܚܕ ܡܢܗܘܢ ܕܗܠܝܢ ܕܣ̣ܕܝܪܝܢ ܗܘܘ ܒܗ ܒܐܓܘܢܐ܆ ܗ̣ܘ ܐ̣ܝܬܘܗܝ ܗܘܐ. ܘܒܬ̇ܟܬܘܫܐ ܪܒܐ̣ ܥܡ ܗܠܝܢ ܕܫܪܟܐ ܐ̇ܘ ܝܬܝܪ ܣܒ̣ܠ ܐܢܘܢ ܠܚ̈ܫܐ ܓܢܒܪܐܝܬ܇ ܘܣ̇ܝܒܪ ܐܢܘܢ ܠܐܘ̈ܠܨܢܐ ܕܖ̈ܕܘܦ̣ܝܐ ܘܕܚܒ̣̈ܘܫܝܐ. ܘܡܢܗ ܘܡܢ ܫܪܟܐ ܐܬ̈ܡ̇ܠܠܝ ܘܐܬ̣ܕܪܫ ܠܘܬ ܡ̇ܠܟܐ ܘܠܘܬ ܦܛܪܝܪܟܐ܆ ܠܘ ܒܠܚܘܕ ܗܠܝܢ ܥܘܗ̈ܕܢܐ ܙܥܘܪ̈ܐ ܕܐܫ̣ܠܡ ܒܟܬܒܐ ܗܢܐ܆ ܐܠܐ̣ ܘܒܡܐܐ ܥ̈ܦ̣ܝܢ ܐܚܪ̈ܢܝܢ. ܗܠܝܢ ܕܡܛܠ ܡ̣ܬܚܐ ܣܓܝܐܐ ܕܬܫܥ̣ܝܬܐ: ܘܥܘ̣ܒܛܐ ܕܡ̈ܠܐ ܕܠܐ ܣܟ̣ܐ: ܟܕ ܡܢ ܣܓܝܐܘܬܗܝܢ ܐܗ̣ܡܝ܆ ܒܙܥܘܪ̈ܝܬܐ ܕܡܢܗܝܢ ܒܠܚܘܕ ܐܬ̇ܚܫܚ. ܘܬܘܒ ܟܕ ܛܒ ܕܡܢ ܓ̇ܒܐ ܗܘܐ ܕܠܘܩܒܠ ܬܪ̈ܝܝ ܟܝ̈ܢܐ ܕܣ̣ܕܝܪ ܗܘܐ ܠܘܩܒܠܗܘܢ: ܐ̣ܝܟܢܐ ܕܐܦ ܗ̣ܝ ܡܠܬܗ ܡ̇ܘܕܥܐ: ܗ̇ܢܘ ܕܝܢ ܛܟ̣ܣܐ ܕܡ̇ܟܬܒܢܘܬܐ܆ ܢܛ̇ܪ̣ ܕܠܐ ܡ̣ܨܛܠܝܢܘܬܐ. ܐ̇ܘ ܛ̇ܠܘܡܘܬܐ ܘܥ̇ܫܘܩܘܬܐ ܕܚܕ ܓ̇ܒܐ ܕܠܩ̣ܘܒܠܗ: ܐܝܟ ܕܠܩ̣ܘܝܡܐ ܕܓܒܐ ܕܝܠܗ܆ ܐܠܐ ܐ̇ܝܟܢܐ ܕܒܪܝ̣ܫܗ ܕܣܦ̣ܪܐ ܗܢܐ ܕܡ̇ܟܬܒܢܘܬܗ܇ ܐ̇ܘ ܐܝܟ ܕܩ̣̇ܕܡ ܐܡ̣ܪ ܘܐܫ̣ܬܘܕܝ܇ ܗܟܢܐ ܣܢܐ̣ܓܪܐ ܠܫܪܪܐ ܗ̣ܘܐ܇ ܘܛܒ̣ܥܐ ܕܫܪܪܐ ܕܠܬܪ̈ܝܗܘܢ ܓ̈ܒ̇ܐ ܢܛ̣ܪ܇ ܠܘܬ ܐܝܠܝܢ ܕܐܬ̈ܡ̇ܠܠܝ ܘܣ̣ܡ ܘܐܬ̇ܕܪܫ. ܐܦܢ ܒܙܥܘܪ̈ܝܬܐ ܕܡܢܗܝܢ ܐܬ̇ܚܫܚ. ܟܕ ܐܦܠܐ ܚܕܐ ܡܢ ܡܐܐ ܡ̣̈ܢܘܢ ܕܐܝܠܝܢ ܕܐܬ̈ܡ̇ܠܠܝ ܘܐܣܬ̣ܥܪ܇ ܣܦ̣ܩ ܕܠܘܬ ܪܘܫܡ̣ܐ ܢܝ̇ܬܐ. ܪܝܫܐ ܕܬܠܬܝܢ ܘܚܕ܆ ܥܠ ܩܢܘܢ ܪܝܫܗ̇ ܕܗܪܣܝܣ ܕܛ̣ܪ̈ܝܬܐܝܛܐ. ܏ܠܐ ܒܗ ܗܟܝܠ ܒܙܒܢܐ ܐܬܠ̣ܒܟ ܗܘܐ ܐܦ ܩܢܘܢ ܪܝܫܗ̇ ܕܗܪܣܝܣ܇ ܕܗܠܝܢ ܕܡ̇ܡܪܚܝܢ ܕܢ̣ܡܢܘܢ ܟܝ̈ܢܐ ܘܐܘ̈ܣܝܣ ܘܐܠܗ̈ܘܬܐ ܘܐ̈ܠܗܐ ܒܬܠܝܬܝܘܬܐ ܩܕܝܫܬܐ ܘܫܘ̣ܝܬ ܒܐܘܣܝܐ. ܘܗ̣ܘ ܗܢܐ ܐܬܠ̣ܒܟ ܘܐܬܚ̣ܒܫ ܘܐܦ ܗ̣ܘ ܒܒܝܬ ܐܦܝܣܩܘܦܝܘܢ ܙܒܢܐ̣ ܥܡ ܫܪܟܐ ܕܐܚܪ̈ܢܐ. ܬ̇ܒܥܝܢ ܗܘܘ ܠܗ ܕܝܢ܆ ܠܝ̣ܒܠܘܢ ܕܢܥ̣ܒܕ ܐܝܟ ܗܪܛܝܩܐ. ܘܐܬܚ̣ܪܝ ܠܘܩܒܠ ܗܕܐ̣ ܘܠܐ ܥܒ̣ܕ. ܐ̣ܝܟܢܐ ܕܟܕ ܝܠ̣ܦ ܙܟ̇ܝܐ ܡ̇ܠܟܐ܆ ܝܡ̣ܐ ܒܝ̇ܠܕܬ ܐܠܗܐ̣ ܟܕ ܐܡ̇ܪ. ܕܐ̇ܦܢ ܡܦ̣ܝܣ܆ ܘܥܐ̇ܠ ܘܡܬ̇ܩܪܒ ܒܥܕܬܐ ܟܕ ܠܐ ܥ̇ܒܕ ܠܝ̣ܒܠܘܢ ܕܬܝܒܘܬܐ܆ ܐܢܐ̣ ܠܐ ܥܐ̇ܠ ܐܢܐ ܠܗ̇ ܘܡܬ̇ܩܪܒ ܐܢܐ ܒܗ̇. ܘܗܟܢܐ ܡܛܠ ܕܗܪܛܝܩܐ ܗܘ ܘܡ̇ܓܕܦܢܐ܆ ܟܕ ܦ̣ܘܛܝܘܣ ܒܪ ܐܢܬܬܗ ܕܒ̣ܠܣܪܝܣ ܐܬ̣ܐ ܠܡܕܝܢܬ ܡ̇ܠܟܘܬܐ ܒܗ̇ܘ ܙܒܢܐ܆ ܐܬ̣ܝܗܒ ܠܗ ܗ̣ܘ ܩܢܘܢ̣ ܘܫܩ̣ܠܗ ܥܡܗ ܠܦܠܣܛܝܢܐ. ܘܚܒܫܗ ܒܕܝܪܐ ܕܡܬ̇ܩܪܝܐ̣ ܚ̇ܕܬܐ. ܘܗܘ̣ܐ ܒܗ̇ ܙܒܢܐ ܕܬܠܬ̣ ܫ̈ܢܝܢ. ܘܗܟܢܐ ܐܫ̣ܬܪܝ ܘܐ̣ܙܠ ܠܐܬܪܐ ܕܩܝܠܝܩܝܐ. ܪܝܫܐ ܕܬܠܬܝܢ ܘܬܪ̈ܝܢ܆ ܥܠ ܦ̣ܘܛܝܣ ܘܥܠ ܣܥܘܪܘܬܐ ܕܡܢܗ܀. ܏ܠܒ ܦ̣ܘܛܝܣ ܗܢܐ ܐܝܬܘܗܝ ܗܘܐ ܒܪ ܐܢܬܬܗ ܕܒ̣ܝܠܝܣܪܝܣ ܦ̣ܛܪܝܩܝܘܣ ܗ̇ܝ ܕܫܡܗ̣̇ ܗܘܐ ܐ̇ܢܛܘܢܝܢܐ. ܗܢܐ ܗܟܝܠ ܟܕ ܒܐ̣ܣܬܪܛܝܐ ܐ̣ܝܬܘܗܝ ܗܘܐ: ܘܒܩܪ̈ܒܐ ܥܡܗ ܕܒܝ̣ܠܝܣܪܝܣ ܐܬ̇ܢ̇ܦܩ ܗܘܐ܆ ܒܚܪܬܐ ܡܢ ܥܠ̣ܬܐ ܡܕܡ ܐ̣ܙܠ ܣ̇ܦ̣ܪ ܣܥܪܗ̣ ܘܠܒ̣ܫ ܐܣܟܡܐ ܕܕܝܪܝܘܬܐ. ܟܕ ܠܕܘܒܪ̈ܐ ܣܟ̣ ܠܐ ܐܬ̇ܩܪܒ. ܐܠܐ ܐܣܟܡܐ ܕܕܝܪܝܐ ܒܫܡܐ ܫܐ̣ܝܠܐ̣ ܠܒ̣ܫ ܗܘܐ. ܡܢ ܒܬܪ ܙܒܢܐ ܕܝܢ ܩܠܝܠ܆ ܟܕ ܒܥ̇ܪܝܕ̇ܝܘܬܗ ܒܕܚܠ̣ܬ ܐܠܗܐ ܕܢ̇ܟܒܫ ܠܐ ܐܬܡ̣ܨܝ܆ ܠܘܬ ܡ̇ܠܟܐ ܪܗ̣ܛ. ܗܢܐ ܗܟܝܠ: ܟܕ ܐܣ̣ܛܠܐ ܕܕܝܪܝܘܬܐ ܒܐܣܟܡܐ ܒ̇ܪܝܐ ܡ̇ܥܛܦ ܗܘܐ܆ ܡܢ ܥܠ̣ܬ ܫܡ̇ܪ̈ܝܐ ܕܡ̣ܪ̈ܕܘ ܗܘܘ܆ ܠܐܬܪ̈ܘܬܐ ܕܣܘܪܝܐ ܐܫܬ̇ܕܪ. ܘܟܕ ܨ̇ܒܐ ܕܢܫܦ̣ܪ ܠܒ̈ܢܝܢܫܐ: ܢ̇ܪܓܙ ܕܝܢ ܠܐܠܗܐ ܥ̇ܒܘܕܗ: ܟܕ ܘܐܦ ܗ̣ܘ ܒܬܪ ܝܘܬܪ̈ܢܐ ܛ̈ܢ̣ܦܐ ܒܝܕ ܥ̈ܠ̣ܠܬܐ ܪܗ̣ܛ܆ ܐܬܪܡ̣ܝ ܠܒ̣ܙܬܐ ܘܠܚܛܘ̣ܦܝܐ ܘܠܛܠ̣ܘܡܝܐ ܕܒ̈ܢܝܢܫܐ܇ ܘܥܩ̣ܘܪܝܐ ܘܐܒ̇ܕܢܐ. ܕܐܝܟ ܕܡܢ ܫܒ̈ܝ̇ܐ ܒܖ̈ܒ̣ܪܝܐ ܕܟܠܗܘܢ ܐܬܪ̈ܘܬܐ ܕܡܕܢܚܐ ܪ̈ܘܪܒܐ ܘܙܥܘܪ̈ܐ܆ ܘܕܙܥܘܪ̈ܐ ܥܕܡܐ ܕܐܦ ܐܦܝ̈ܣܩܘܦܐ ܘܩܠ̣ܝܪ̈ܝܩܘ ܕܡ̈ܕܝܢܬܐ ܟܠܗܝ̣ܢ ܢܥ̣ܪܩܘܢ ܡܢ ܩܕܡܘܗܝ. ܐܠܐ ܘܟܠ ܡ̇ܢ ܕܗ̣ܘ ܕܐ̣ܝܬܘܗܝ ܗܘܐ: ܘܐܢ ܒܡܕܝܢܬܐ ܘܐܢ ܒܟ̣ܘܪܐ: ܕܝ̇ܠܦ ܗܘܐ ܕܡܫ̣ܪܬܚܝܢ ܗܘܘ ܠܚܡܐ ܕܝܘܡܐ܆ ܠܒ̇ܟ ܗܘܐ ܠܗܘܢ̣ ܘܒܐ̇ܙ ܘܚܒ̇ܫ ܘܬ̇ܠܐ ܘܡܫܬ̇ܢܕ ܗܘܐ ܒܗܘܢ. ܘܦܣ̇ܩ ܗܘܐ ܥܠܝܗܘܢ ܦܣ̇ܩܐ ܕܠܝ̣ܛܪ̈ܐ ܕܕܗܒܐ. ܥܠ ܡ̇ܢ ܕܗ̣ܘ܆ ܘܐܢ ܩ̇ܢ̣ܐ̣ ܘܐܢ ܠܐ ܩ̇ܢ̣ܐ. ܘܐܢ ܡ̇ܙܒܢ ܗܘܐ ܢܦܫܗ ܘܒ̈ܢܘܗܝ ܘܒܝܬܗ ܘܩܢܝ̣ܢܗ܆ ܦܘܪܣܐ ܕܐܢܫ ܢܗ̣ܦܘܟ ܗܘܐ ܡܠܬ ܦܘܡܗ̣ ܠܝܬ ܗܘܐ. ܟܕ ܓܝܪ ܠܒ̣ܟ ܗܘܐ ܠܡ̇ܢ ܕܗ̣ܘ܆ ܐܡ̇ܪ ܗܘܐ ܕܗ̣ܒ ܙܦܠܢ ܠܝ̣ܛܪ̈ܐ܆ ܕܡ̇ܠܟܐ ܣܢ̣ܝܩ ܥܠ ܕܗܒܐ ܕܢܦ̇ܩ ܥܠ ܩܪ̈ܒܐ. ܘܗܟܢܐ ܡ̇ܟܢܫ ܗܘܐ ܩ̇ܢܛܝܢܪ̈ܐ ܘܡܫ̇ܕܪ. ܐ̇ܝܟܢܐ ܕܡܢ ܗܕܐ ܫܘܠܛܢܐ ܢܬܝ̣ܗܒ ܠܗ: ܕܠܡ̇ܢ ܕܨ̇ܒܐ ܡܕܡ ܕܨ̇ܒܐ ܢܥܒ̣ܕ܆ ܘܠܐ ܢܩ̣ܘܡܘܢ ܒ̈ܢܝܢܫܐ ܩܕܡܘܗܝ. ܐܦ ܓܝܪ ܠܐܦܝ̈ܣܩܘܦܐ ܬܘܒ ܗܟܢܐ܆ ܬܒ̇ܥ̈ܬܐ ܪ̈ܘܪܒܬܐ ܬ̇ܒܥ ܗܘܐ. ܘܐܢ ܐܢܫ ܡܬ̇ܥ̣ܣܩ ܗܘܐ ܥܡܗ܆ ܡܚ̣ܕܐ ܕܠܐ ܦܘ̇ܫܐ ܣ̇ܠܩ ܗܘܐ ܠܚܒ̇ܠܐ. ܐ̇ܘ ܒܬܪ ܪܝܫܗ܆ ܐ̇ܘ ܒܪ̈ܦܫܐ ܕܕܪ̈ܥܘܗܝ܆ ܐ̇ܘ ܒܚܕ ܕܪܥܗ. ܐ̣ܝܟܢܐ ܕܐܝܟ ܕܡܬ̇ܐܡܪܐ܆ ܥܠ ܐܦܝܣܩܘܦܐ ܕܐ̇ܫܩܠܘܢ܆ ܦܣ̣ܩ̣ ܬܠܬܐ ܩ̇ܢܛܝܢܪ̈ܐ. ܘܟܕ ܗ̣ܘ ܡ̇ܝܠܠ ܘܡ̇ܚܪܡ ܕܠܝܬ ܠܗ܆ ܦܩ̣ܕ̣ ܘܐܬ̣ܬܠܝ ܒܚ̇ܒܠܐ. ܘܫܒ̣ܩܗ ܟܕ ܬܠ̣ܐ̣ ܘܐܪܚ̣ܩ. ܟܕ ܦܩ̣ܕ ܕܬܠܬܐ ܝܘ̈ܡܝܢ ܐܢ ܗ̇ܘܐ ܬܠ̣ܐ܆ ܠܐ ܢܚ̇ܬ ܡܢ ܬܡܢ܇ ܥܕܡܐ ܕܐܬ̇ܝܢ ܩ̇ܢܛܝܢܪ̈ܐ. ܗܟܢܐ̣ ܘܠܐ ܢܚ̣ܬ ܡܢ ܚܒ̇ܠܐ܇ ܥܕܡܐ ܕܐܬ̣ܘ ܬܠܬܐ ܩ̇ܢܛܝܢܪ̈ܐ. ܗܟܢܐ ܘܠܫܪܟܐ ܕܣܓ̈ܝܐܐ ܥ̇ܒܕ ܗܘܐ܆ ܥܕܡܐ ܕܙܥ̣ܬ݀ ܐܪܥܐ ܡܢ ܩܕܡܘܗܝ܇ ܘܟܠܗܘܢ ܐ̇ܪ̈ܟܢ̣ܛܘܣ ܘܗܓ̣̈ܡܘܢܐ ܘܫܪܟܐ ܕܡ̇ܪ̈ܘܬܐ. ܘܟܕ ܣܓ̈ܝܐܐ ܡܒ̇ܓܢܝܢ ܩܕܡ ܡ̇ܠܟܐ܆ ܟܬ̣ܒ ܗܘܐ ܠܗ̣ ܕܚܛܝ̣ܬܐ ܐ̣ܝܬܝܗ̇܇ ܕܡܢ ܒ̣ܙܬܐ ܬܫ̇ܕܪ ܠܢ. ܗ̣ܘ ܕܝܢ ܟܬ̇ܒ ܗܘܐ ܠܗ܆ ܕܐܢܬ ܡܪܝ̣ ܠܐ ܬܕܚ̣ܠ ܡܢ ܚܛܗܐ ܡܛܠ ܕܗܒܐ ܕܡ̇ܫܕܪ ܐܢܐ. ܚܛܗܐ ܗܢܐ̣ ܒܪܝܫ̣ܝ ܕܝܠܝ. ܒܪܝܫ̣ܗ ܕܝܠܗ ܗܘ̣ܘ ܠܗ ܕܝܢ ܥܡܗ ܣܝܥ̣ܬܐ ܕܕܝܪ̈ܝܐ ܕܠܗܠܝܢ ܚ̇ܫܚܝܢ ܗܘܘ. ܘܐܦ ܕܘ̈ܣ̣ܦܘܛܝܩܐ ܘܕܡ̣̈ܣܬܝܩܐ ܘܐܣ̣ܦܬܪ̈ܐ̣ ܘܐܦ ܚ̇ܝܠܐ ܕܪ̈ܗܘܡܝܐ. ܐ̣ܝܟܢܐ ܕܟܕ ܒܗܢܐ ܛܟ̣ܣܐ ܫܟ̣ܝܪܐ ܕܐܒ̇ܕܢܐ: ܘܡ̇ܥܪܡܘܬܐ ܘܒܥ̇ܪܝܪܝܘܬܐ ܕܠܒܪ ܡܢ ܟܘܠܗ̇ ܕܚ̣ܠܬ ܐܠܗܐ: ܡ̇ܠ̣ܝ ܙܒܢܐ ܕܫ̈ܢܝܐ ܬܪ̈ܬܥܣܪܐ܆ ܐܕܪܟ̣ܗ ܩ̣ܨܗ ܘܩ̇ܒ̣ܠ ܚܦ̣ܪܗ܆ ܒܚܪܬܐ ܒܝܫ̣ܬܐ̣ ܘܕܘܟܪܢܐ ܕܠܘܛܬܐ. ܘܩ̣ܡ ܡܢ ܒܬܪܗ ܐܚܪܢܐ ܪܝܫ ܕܝܪܐ ܕܕܝܪܐ ܗ̇ܝ ܕܡܬ̇ܩܪܝܐ ܚ̇ܕܬܐ ܕܒܐܘܪܫܠܡ܆ ܕܫܡܗ̣ ܐܒܪܗܡ.܀. ܪܝܫܐ ܕܬܠܬܝܢ ܘܬܠܬܐ܆ ܕܥܠ ܣܘ̈ܦ̣ܣܛܐ ܘܣ̣ܟܘ̈ܠܣܬܝܩܐ ܘܢܘ̣ܩܠܝܪ̈ܐ܇ ܘܫܪܟܐ ܕܒܡ̇ܨܥܬܗ ܕܪܕܘܦ̣ܝܐ ܐܬܩ̣ܪ̈ܝܘ ܘܣܠ̣ܩܘ ܡܢ ܐܠܟ̣ܣܢܕܪܝܐ. ܏ܠܓ ܒܡ̇ܨܥܬܗ ܗܟܝܠ ܕܪܕܘܦܝ̣ܐ ܐܬܟ̣ܬܒ ܘܐܫܬ̇ܕܪ ܠܐܠ̣ܟܣܢܕܪܝܐ܇ ܘܣܠ̣ܩܘ ܣܘ̈ܦ̣ܝܣܛܐ ܘܣܟ̈ܘ̣ܠܣܬܝܩܐ ܘܣܟ̈ܠܘ̣ܣܬܝܩܐ ܘܢܘܩ̣ܠܝܪ̈ܐ܇ ܘܫܪܟܐ ܕܣܓ̈ܝܐܐ. ܒܚܘ̣ܫܒܐ ܡ̇ܢ ܟܣ̣ܝܐ܆ ܐܝܟ ܕܢܬ̇ܒܥܘܢ ܐܢܘܢ ܕܢܬ̇ܩܪܒܘܢ ܒܣܘܢܗܕܣ. ܒܐܣܟܡܐ ܕܝܢ ܒ̇ܪܝܐ܆ ܘܡܛܘܠ ܚܕܝܘܬܐ. ܐ̣ܝܟܢܐ ܕܐܦ ܒܥ̇ܒܕܐ̣ ܒܝܕ ܬܪ̈ܬܝܗܝܢ ܐܬ̇ܚܫܚܘ ܠܘܬܗܘܢ. ܟܕ ܒܚܪܬܐ̣ ܕܢܬ̇ܩܪܒܘܢ ܡܬ̇ܬܒܥܝܢ ܗܘܘ. ܗ̣ܢܘܢ ܕܝܢ ܐܬܚ̣ܪ̈ܝܘ ܘܕܪ̈ܫ̣ܘ ܝܘܡ̈ܬܐ ܣܓ̈ܝܐܐ: ܐܝܟ ܫ̇ܢܬܐ ܚܕܐ̣ ܓܢܒܪܐܝܬ. ܟܕ ܣܟ̣ ܠܐ ܡܬ̇ܪܦܝܢ ܐ̇ܘ ܡܬ̣ܪܡܝܢ ܗܘܘ. ܒܚܪܬܐ ܕܝܢ ܡܢܗܘܢ ܐܫ̣ܬܪܝܘ܆ ܡܛܠ ܕܕܚ̣ܠܘ ܗܠܝܢ ܕܫܠܝܛܝܢ ܠܡܥ̣ܒܕ ܐܢܘܢ ܒܩ̣ܛܝܪܐ܇ ܡܛܘܠ ܡ̇ܣܩܬܐ ܕܚ̈ܛܐ ܕܡܢ ܬܡ̇ܢ ܠܡܕܝܢܬ ܡ̇ܠܟܘܬܐ ܡܫܬ̇ܕܪ̈ܢ. ܘܡܢܗܘܢ ܐܬܠܒ̣ܟܘ̣ ܥܕܡܐ ܠܬܠܬ ܫ̈ܢܝܢ. ܘܡܕܡ̣ ܠܐ ܗ̣ܘܐ. ܘܗܟܢܐ̣ ܟܠܗܘܢ ܐܫܬ̣ܪܝܘ. ܪܝܫܐ ܕܬܠܬܝܢ ܘܐܪ̈ܒܥܐ܆ ܥܠ ܟܠܗܘܢ ܪ̈ܝܫܝ ܩ̣ܠܝܪ̈ܘܣ ܕܐܪ̈ܬܕܟܣܘ ܕܐܬܠܒ̣ܟܘ ܒܬܪ ܗܠܝܢ܇ ܘܐܫܬ̇ܕܪܘ ܠܡܕܝܢܬ ܡ̇ܠܟܘܬܐ܀. ܏ܠܕ ܒܬܪ ܗܠܝܢ ܕܝܢ܆ ܐܬܟ̣ܬܒ ܠܡ̇ܠܟܐ܆ ܕܐ̈ܦܝܣܩܦܐ ܐܪ̈ܬܕܟܣܘ܆ ܥܒ̣ܕܘ ܚܠܦ ܛ̇ܘܒܢ̣ܐ ܬܐܕܘܣܝܘܣ. ܠܘ ܒܠܚܘܕ ܚܕ ܐܦܝܣܩܘܦܐ܆ ܐܠܐ̣ ܬܪ̈ܝܢ. ܘܐܬ̇ܚܡܬ̣ ܩܫ̣ܝܐܝܬ. ܘܦܩ̣ܕ ܕܟܠܗܘܢ ܪ̈ܝܫܝ ܩܠܝ̣ܪ̈ܘܣ ܢܬ̇ܠܒܟܘܢ̣ ܘܢܫܬ̇ܕܪ̈ܘܢ. ܗܕܐ̣ ܕܗܘ̣ܬ. ܘܐܬܠܒ̣ܟܘ ܘܣܠ̣ܩܘ܆ ܥܕܡܐ ܠܒܬܪ ܡ̇ܘܬܗ ܕܝܘܚܢܢ ܦܛܪܝܪܟܐ. ܘܗܝܕܝܢ ܐ̣ܘܛܘܟ ܗܘ̣ܐ܇ ܕܐ̣ܝܬܘܗܝ ܗܘܐ ܩܕܡܘܗܝ. ܘܥ̣ܠ ܒܬܪ ܡ̇ܘܬܗ ܘܫ̣ܪܐ ܫ̣ܪܐ ܐܢܘܢ܆ ܒܬܪ ܫ̇ܢܬܐ ܚܕܐ.