ܪܝܫܐ ܕܥܣܪ̈ܝܢ ܘܚܡܫܐ܆ ܥܠ ܐܒ̣ܠܐ ܘܬܒ̇ܪܐ ܕܪܘܚܐ ܕܐܕܪ̣ܟ ܐܢܘܢ ܠܐ̈ܦܝܣܩܦܐ܇ ܥܠ ܗ̇ܝ ܕܐܬܪ̈ܡ̣ܝܘ ܘܐܬ̇ܚܝܕܘ ܒܫܘ̈ܬ̇ܦܘܬܗܘܢ ܕܝܘܚܢܢ ܘܕܫܪܟܐ ܕܬܪ̈ܝܝ ܟܝ̈ܢܐ ܕܥܡܗ. ܏ܟܗ ܡܢ̣ܘ ܓܝܪ ܣ̇ܦܩ ܠܡܟ̣ܬܒ ܘܠܡܬ̇ܢܝܘ ܥܠ ܥܩ̈ܬܐ ܘܐܒ̣ܠܐ ܘܐܠܝ̣ܐ ܘܬܒ̇ܪܐ ܕܠܒܐ܇ ܕܐ̣ܕܪܟ ܐܢܘܢ ܠܗܠܝܢ ܕܒܫܘܬ̇ܦܘܬܐ ܢܦ̣ܠܘ ܕܗܠܝܢ ܕܐܬܢܟ̣ܠܘ ܥܠܝܗܘܢ ܘܐܬ̇ܚܝܕܘ ܠܗܘܢ܇ ܟܕ ܣ̣ܟ ܠܐ ܐܬ̇ܚܝܕܘ. ܐ̣ܝܟܢܐ ܕܡܟܝܠ ܛܠܩ̣ܘ ܗܘܘ ܠܗܘܢ̣ ܘܐܘܦ̣ܝܘ. ܘܥ̈ܝܢܝܗܘܢ ܐ̇ܬ̣ܪ̈ܒܠܝ ܗ̈ܘܝ ܘܚ̈ܫ̣ܟܝܢ ܡܢ ܒ̇ܟܬܐ ܘܐܠܝ̣ܐ ܕܠܠܝܐ ܘܕܐܝܡܡܐ ܕܠܘܩܒܠ ܚ̈ܕܕܐ܆ ܟܕ ܙܥܘܪܝܐ ܗܝ ܬܚܘܝܬܐ ܕܐܒ̣ܠܐ ܕܐܢܬܬܐ ܕܥܠ ܒܥ̣ܠ ܛܠܝܘܬܗ̇܇ ܕܒܐܒ̣ܠܗܘܢ ܕܗܠܝܢ ܬ̇ܬܦܚܡ. ܐ̣ܝܟܢܐ ܕܡܟܝܠ̣ ܘܐܦ ܡܢ ܡܐ̣ܟܘܠܬܐ ܕܥ̇ܝܕܐ ܦܣ̣ܩܘ ܗܘܘ܆ ܘܕܠܐ ܣܝ̇ܒܪܬܐ ܘܕܠܐ ܒ̇ܘܝܐܐ ܢܟܬ̇ܪ̈ܘܢ܆ ܘܕܠܐ ܫܠ̣ܝܐ ܐ̇ܘ ܦܣܩ̇ܐ ܕܕܡ̈ܥܐ ܐ̣ܝܬܝܗܘܢ. ܟܕ ܐ̈ܦܘܗܝ ܟܠ ܢܢܕ ܡܢܗܘܢ ܡ̇ܚܦܝܢ ܗܘܘ܆ ܘܝܬ̇ܒܝܢ ܘܐ̇ܠܝܢ ܒܩ̈ܠܐ ܚ̣ܢܝ̈ܓܐ ܘܡ̇ܪ̈ܝܪܐ ܚܕ ܠܘܩܒܠ ܚܕ. ܘܡܟܝܠ ܝܬ̇ܝܪܐܝܬ ܥܠ ܢܦܫܗܘܢ܇ ܕܒܬܪ ܗܠܝܢ ܟܠܗܘܢ ܐ̈ܓܘܢܐ ܘܚܒ̣̈ܘܫܝܐ ܘܐܘ̈ܠܨܢܐ܇ ܗܟܢܐ ܒܢܟ̣ܠܐ ܕܕܓ̇ܠܘܬܐ ܐܬܬܚ̣ܕܘ ܘܐܬ̇ܬܚܬܝܘ ܘܢܦ̣ܠܘ܇ ܟܕ ܚܕܝܘܬܐ ܡܢ ܩܒ̣ܘܠ ܩ̇ܝܡܐ ܗܘܬ܇ ܘܠܥ̇ܒܕܐ ܐܝܟ ܫܘ̇ܘܕܝܐ ܠܐ ܐܬ̣ܬ. ܐ̇ܝܟܢܐ ܕܡܟܝܠ ܗ̇ܢܘܢ ܕܢ̣ܟܠܘ ܐܢܘܢ: ܟܕ ܚ̣ܙܘ ܕܐܬ̇ܛܠܩܘ ܗܘܘ ܠܗܘܢ ܡܢ ܟܕܘ ܘܫ̣ܪ̈ܟܘ ܠܚܒ̇ܠܐ܆ ܐܡ̇ܪܝܢ ܗܘܘ ܠܘܬܗܘܢ܆ ܕܥܠ ܡ̇ܢܐ ܗܟܢܐ ܢܦܫܟܘܢ ܥܡ ܦܓܪܟܘܢ ܩ̇ܛܠܝܢ ܐܢܬܘܢ܇ ܐܝܟ ܗ̇ܘ ܕܠܦܬܟܪ̈ܐ ܕܒ̇ܚܬܘܢ. ܠܡ̇ܢܐ ܗܟܝܠ ܥܠ ܢܦܫܟܘܢ ܦܣܩ̣ܬܘܢ܇ ܘܩܡ̣ܬܘܢ ܒܗܢܐ ܟܠܗ ܒܟ̣ܝܐ ܘܐܠܝ̣ܐ܇ ܘܐܡ̣ܝܢܐܝܬ ܚ̇ܢܩܝܢ ܐܢܬܘܢ ܢܦܫܟܘܢ. ܣܒ̣ܘ ܡܐ̣ܟܘܠܬܐ ܘܐܬ̇ܒܝܐܘ܆ ܘܚ̣ܝܘ̣ ܘܠܐ ܬܡ̣ܘܬܘܢ. ܥܡ ܣܓܝܐ̈ܬܐ ܕܐܬܐ̣ܡܪ̈ܝܢ ܡܢ ܗܠܝܢ ܕܠܘ̣ܩܒܠܗܘܢ܆ ܗ̣ܢܘܢ ܕܝ̣ܢ ܕܠܐ ܒ̇ܘܝܐܐ ܡܟܬ̇ܪܝܢ ܗܘܘ.܀.܀. ܘܗܟܢܐ ܐܦ ܝܬ̇ܝܪܐܝܬ ܝܬ̣ܒܘ ܒܐܒ̣ܠܐ ܘܒܒܟ̣ܝܐ܆ ܘܡܬ̇ܡܪܡܪܝܢ ܗܘܘ ܥܕܡܐ ܠܝܘܡ̈ܬܐ ܣ̈ܓܝܐܐ܆ ܐܦ ܡܢ ܒܬܪ ܕܡܢ ܒܝܬ ܚܒ̣ܘܫܝܐ ܐܫܬ̣ܪ̈ܝܘ ܘܢܦ̣ܩܘ. ܘܗܝ̇ܕܝܢ ܗܦ̣ܟܘ ܘܩܡ̣ܘ ܓܢܒܪܐܝܬ܆ ܟܕ ܡܟܝܠ ܒܦܪܗܣܝܐ ܝܬܝܪܐܝܬ ܡ̇ܟܣܝܢ ܗܘܘ ܘܢܨ̇ܝܢ ܥܡܗܘܢ܆ ܘܡ̇ܚܣܕܝܢ ܐܝܟ ܕ̈ܓ̇ܠܐ ܘܢܟ̣̈ܝܠܐ. ܘܗܟܢܐ ܬܘܒ̣ ܠܚܒ̣̈ܘܫܝܐ ܘܫ̈ܢ̣ܕܐ ܕܩ̣ܫܝܢ ܡܢ ܩ̈ܕܡܝܐ ܐܫܬ̣ܠܡܘ. ܘܒܬܪܟܢ ܠܐܟ̣ܣܘܪ̈ܝܣ ܡ̇ܫ̣̈ܚܠܦܬܐ ܟܠ ܚܕ ܚܕ ܡܢܗܘܢ ܐܫ̣ܬܕܝ̣ ܒܟܒ̣ܕܐ ܡ̇ܪܝܪܬܐ. ܪܝܫܐ ܕܥܣܪ̈ܝܢ ܘܫܬܐ܆ ܕܥܠ ܗܝ̇ ܕܟܕ ܥܠ ܗܠܝܢ ܝܠ̣ܦ ܡ̇ܠܟܐ܇ ܫ̣ܕܪ ܕܒ̣ܪ ܐܢܘܢ ܠܦܠܛܝܢ ܘܡܒ̇ܝܐܐ ܗܘܐ ܠܗܘܢ. ܏ܟܘ ܟܕ ܓܝܪ ܥܠ ܗܢܐ ܐܒܠ̣ܐ ܟܘܠܗ ܩܫܝ̣ܐ ܘܚ̇ܫܐ ܡ̇ܪܝܪܐ ܡ̈ܠܟܐ ܝܠ̣ܦܘܢ܆ ܫ̣ܕܪܘ ܘܕܒ̣ܪ̈ܘ ܐܢܘܢ ܠܐܦܝ̈ܣܩܘܦܐ ܠܦܠܛܝܢ ܘܡ̇ܒܝܐܝܢ ܗܘܘ ܠܗܘܢ ܟܕ ܐܡ̇ܪܝܢ܆ ܕܠܡ̇ܢܐ ܠܡ ܠܗܕܐ ܟܠܗ̇ ܐ̇ܢܢܩܐ ܕܐܒܠ̣ܐ ܐܬ̣ܝܬܘܢ܇ ܥܕܡܐ ܕܗܟܢܐ ܬܫܬ̇ܦܠܘܢ ܘܬܗܘܘܢ ܐܝܟ ܡ̈ܝ̣ܬܐ. ܐܬ̇ܠܒܒܘ̇ ܘܐܬ̇ܒܝܐܘ. ܡܣ̇ܒܪܝܢܢ ܓܝܪ ܒܐܠܗܐ܆ ܕܢܝ̇ܚܟܘܢ ܥ̇ܒܕܝܢ ܚܢܢ܆ ܘܒܚܕܝܘܬܐ ܡ̇ܫܡ̣ܠܝܬܐ ܡܚ̇ܝܕܝܢܢ ܠܟܘܢ. ܠܐ ܬܬܥ̣ܝܩܘܢ. ܘܟܕ ܒܣܓܝܐ̈ܬܐ ܪܫ̇ܝܢ ܗܘܘ ܠܗ ܥܡܗ ܠܗ ܥܠ ܐܝܠܝܢ ܕܐܬ̈ܡ̣̇ܠܠܝ ܒܝܢ̣ܬܗܘܢ: ܘܐܬ̈ܕܓܠ̣ܝ ܘܠܐ ܐܬ̣̈ܝ ܠܥܒ̇ܕܐ܆ ܐܡ̣ܪ ܠܗܘܢ. ܕܡܛܠ ܠܡ ܕܡ̇ܛܝ̣ܒܝܢ ܚܢܢ ܕܢܐ̣ܙܠ ܠܚܡ̇ܝܡܬܐ܆ ܟܬ̇ܪ̈ܘܢ ܠܝ ܥܣܪ̈ܝܢ ܐ̇ܘ ܬܠܬܝܢ ܝܘ̈ܡܝܢ܆ ܘܬܗܘܘܢ ܝ̇ܕܥܝܢ܆ ܕܡܛܠܬܟܘ̣ܢ ܡܚ̣ܕܐ ܗܦ̇ܟܝܢܢ. ܘܒܗ̇ ܒܨ̣ܒܘܬܐ ܡ̇ܛܝ̣ܒܝܢ ܚܢܢ ܕܢܡ̇ܠܠ܆ ܘܢܝ̇ܚܟܘܢ ܢܥ̣ܒܕ. ܘܬܗܘܐ ܟܠܗ̇ ܥܕܬܐ ܚ̣ܕܐ܆ ܘܢܚ̣ܕܐ ܟܠܢ. ܘܗܟܢܐ ܐܫܬ̣ܪܝܘ ܡܢܗ܆ ܟܕ ܒܡܟܣ̈ܢܘܬܐ ܣܓܝܐ̈ܬܐ ܠܘܬܗ ܐܬ̇ܚܫܚܘ.܀. ܪܝܫܐ ܕܥܣܪ̈ܝܢ ܘܫܒܥܐ܆ ܕܥܠ ܗ̇ܝ ܕܡܢ ܒܬܪ ܕܗܦ̣ܟ ܡ̇ܠܟܐ ܡܢ ܚܡ̇ܝܡܬܐ̣ ܘܥܠ ܓܢܘ̣ܣܝܘܣ ܕܐܫ̣ܬܕܪܬ݀ ܘܫܪܟܐ.܀. ܏ܟܙ ܒܬܪ ܕܝܢ ܬܠܬܝܢ ܝܘ̈ܡܝܢ܆ ܗܦ̣ܟ ܡ̇ܠܟܐ ܡܢ ܚܡ̇ܝܡܬܐ ܐܝܟ ܕܐܫܬ̇ܘܕܝ. ܘܟܕ ܥܕܟܝܠ ܠܐ ܥ̣ܠ ܗܘܐ ܠܡܕܝܢܬܐ: ܐܠܐ ܒܥܒ̣ܪܐ ܐ̣ܝܬܘܗܝ ܗܘܐ ܕܟܠܩܕܘܢܐ܆ ܕܒ̣ܪ ܝܘܚܢܢ ܒ̈ܢܝ ܡܠ̣ܟܗ̣ ܘܢܦ̣ܩ ܠܘܬܗ. ܐܝܟ ܕܐܬܚ̣ܙܝܬ݀ ܬܘܒ܆ ܘܩܘ̣ܛܪ̈ܓܐ ܡ̇ܘܣܦ ܗܘܐ܇ ܕܗܠܝܢ ܕܚܒ̣ܝܫܝܢ ܗܘܘ̣ ܟܕ ܐܡ̇ܪ. ܕܗܠܝܢ ܠܡ̣ ܦܣ̣ܩܘ ܠܗܘܢ ܡܢܢ. ܘܗܦ̣ܟܘ ܡܢ ܥܕܬܐ̣ ܠܓܡ̣ܪ. ܗܝ̇ܕܝܢ ܐܬܡ̇ܠܟܘ ܕܐܝܟ ܕܢܓ̣ܫܘܢ ܨܒܝܢܗܘܢ܆ ܘܬܘܒ ܢܛ̇ܥܘܢ ܒܗܘܢ. ܘܥܒ̣ܕܘܢ ܓ̣ܢܘܣܝܘܣ ܕܡ̈ܕܝܢܬܐ ܪ̈ܘܪܒܬܐ̣ ܘܫܕ̣ܪܘ ܠܗܘܢ ܒܝܕ ܩ̣ܐܣܛܘܪ ܟܕ ܫܠ̣ܚ ܠܗܘܢ܆ ܕܡܛܠ ܠܡ ܕܪܡ̇ܐ̣ ܠܢ ܕܢܝ̇ܚܟܘܢ ܘܝܨ̇ܝܦܝܢ ܚܢܢ ܕܐܝܩܪܟܘܢ: ܘܒ̇ܥܝܢ ܚܢܢ ܕܣܘ̣ܢܩܪܛܝܣܐ ܢܥܒ̣ܕ ܠܟܘܢ܆ ܗܐ ܫ̇ܕܪܢ ܠܟܘܢ ܓ̣ܢܣܝܘܣ ܗܕܐ ܕܡ̈ܕܝܢܬܐ ܝܕܝ̈ܥܬܐ܆ ܟܕ ܠܐ ܫ̇ܡܗܢܢ ܡܢ ܢܦܫܢ ܕܟܠ ܚܕ ܡܢܟܘܢ ܒܐ̇ܝܕܐ ܡܕܝܢܬܐ ܢܗܘܐ. ܐܠܐ ܗܕܐ ܫܒ̣ܩܢܗ̇ ܠܨܒܝܢܟܘܢ܆ ܕܐܢ̣ܬܘܢ ܬܓ̣ܒܘܢ ܠܟܘܢ ܟܠ ܚܕ ܡܢܟܘܢ ܡܕܝܢܬܐ ܐ̇ܝܕܐ ܕܫ̇ܦܪܐ ܠܗ.܀. ܟܕ ܕܝܢ ܫܩ̣ܠܗ̇ ܗ̣ܘ ܡ̇ܫܒܚܐ ܩ̣ܐܣܛܘܪ ܠܓܢ̣ܣܝܘܣ ܘܥ̣ܠ ܠܡܕܝܢܬܐ܆ ܫ̇ܕܪ ܩ̣ܪܐ ܐܢܘܢ ܠܐ̈ܦܝܣܩܦܐ ܕܢܬ̣ܠܗ̇ ܠܗܘܢ ܠܓܢܣ̣ܝܘܣ ܟܕ ܗܠܝܢ ܟܠܗܝܢ܆ ܥܡ ܣܓܝܐ̈ܬܐ ܐܚܪ̈ܢܝܬܐ ܐܡ̣ܪ ܠܗܘܢ܇ ܐܝܟ ܕܡܢ ܦܪܨܘܦܐ ܕܡ̇ܠܟܐ. ܗ̣ܢܘܢ ܕܝܢ ܠܐ ܚ̣ܪ̈ܘ ܒܗ̇ ܒܓܢ̣ܣܝܘܣ܆ ܘܠܐ ܨܒ̣ܘ ܕܢܩܒ̇ܠܘܢܗ̇ ܡܢܗ. ܟܕ ܐܡ̇ܪܝܢ܆ ܕܚܢ̣ܢ ܠܘ ܡܛܘܠ ܕܢܗܘܐ ܐܦܝ̈ܣܩܘܦܐ ܒܡ̈ܕܝܢܬܐ ܕܒ̇ܚܝܢܢ ܢܦܫ̈ܬܢ: ܐܡ̣ܪ ܠܗ ܠܙܟܝ̇ܐ ܡ̇ܠܟܐ܆ ܐܠܐ̣ ܥܠ ܣ̣ܒܪܐ ܕܫܘ̈ܘ̇ܕܝܐ ܕܚܕܝܘܬܐ. ܐܦܝ̈ܣܩܘܦܐ ܓܝܪ ܐܝ̣ܬܝ̣ܢ ܘܐܦܢ ܠܐ ܫ̇ܘܝܢܢ. ܐܠܐ ܐܢ ܡܫܬܡܠܝܢ ܐܢ ܡܫܬܡܠܝܢ ܐܝܟ ܕܢܫܬܠܡܘܢ ܠܘܬܢ ܫܘ̈ܘ̇ܕܝܐ ܕܚܕܝܘܬܐ܇ ܘܡ̈ܘ̇ܡܬܐ ܕܒܡ̣ܬܚܐ ܕܝܘܡ̈ܬܐ ܣܓ̈ܝܐܐ ܗ̣ܘܘ ܠܘܬܢ. ܘܚܢ̣ܢ ܡܛܠ ܗܠܝܢ ܘܡܛܠ ܕܠܐ ܢܫܬ̇ܪܪܘܢ ܥ̣̈ܫܘܩܝܐ ܕܥܠܝܢ܇ ܕܚ̣ܢܢ ܠܡ ܡܒ̇ܛܠܝܢܢ ܠܗ̇ ܠܚܕܝܘܬܐ܇ ܝܗ̣ܒܢܢ ܢܦܫܢ ܠܫܘܬ̇ܦܘܬܐ ܕܗܠܝܢ ܕܢܟܠ̣ܘܢ܇ ܕܢܟܠ̣ܘܢܝ܇ ܘܣܒ̣ܪ̈ܘ ܕܒܢ ܐ̇ܛܥ̣ܝܘ܇ ܘܠܐ ܝܕܥ̣ܘ ܕܒܢܦܫܗܘܢ ܐ̇ܛܥ̣ܝܘ̣ ܘܠܘ ܒܢ. ܘܗܫܐ ܐܢ ܐܝܟ ܫܘ̈ܘ̇ܕܝܐ ܘܡ̈̇ܘܡܬܐ ܣܘܢܗܕܘܣ ܠܐ ܢ̇ܦܩܐ ܘܗ̇ܘܝܐ ܚܕܝܘܬܐ܆ ܫܘܬ̇ܦܘܬܐ ܬܘܒ ܥܡ ܐܝܠܝܢ ܕܫܡܗ̇ ܡܬ̇ܕܟܪܝ̣ܢ ܠܥܠܡ ܥܠܡܝ̣ܢ ܚܣ ܕܬ̇ܗܘܐ ܠܢ.܀.܀.܀. ܐ̣ܝܟܢܐ ܕܟܕ ܗܟܢܐ ܓܪܝܡ̣ܐܝܬ ܦ̣ܣܩܘ: ܘܠܐ ܨܒ̣ܘ ܩ̇ܒ̣ܠܘ܆ ܪܓ̣̇ܙ ܩ̣ܐܣܛܘܪ̣ ܘܐ̣ܙܠ ܐ̇ܘ̣ܕܥ ܗܠܝܢ ܠܡ̇ܠܟܐ. ܘܐܦ ܗ̣ܘ ܪܓ̣ܙ ܘܐܬܬ̣ܥܝܪ ܒܚܡ̣ܬܐ ܪܒܬܐ܆ ܘܡܬ̇ܠܚܡ ܗܘܐ ܥܠܝܗܘܢ ܘܓ̇ܙܡ ܩܫ̣ܝܐܝܬ܆ ܗ̇ܝ̣ ܕܐܦ ܣܥ̣ܪ ܒܚܪܬܐ. ܪܝܫܐ ܕܥܣܪ̈ܝܢ ܘܬܡܢܝܐ܆ ܥܠ ܗ̇ܝ ܕܟܕ ܗܠܝܢ ܐܬ̣ܝܕܥ ܠܡ̇ܠܟܐ ܘܐܬ̣ܚܡܬ̇܆ ܦܩ̣ܕ ܕܢܥ̣ܠܘܢ ܟܠܗܘܢ ܪ̈ܝܫ̣ܢܐ܇ ܘܢܬ̣ܬܕܝܢܘܢ ܐܦܝܣ̈ܩܘܦܐ ܒܒܝܬ ܐܦܝܣܩܘܦܝܘܢ. ܏ܟܚ ܟܕ ܗܟܝܠ ܐܬܡ̣ܠܝ ܡ̇ܠܟܐ ܚܡ̣ܬܐ܆ ܫ̣ܕܪ ܩ̣ܪܝܗܝ ܠܦܛܪܝܪܟܐ ܕܡܕܝܢܬܐ܆ ܘܦܓ̣ܥ ܒܗ ܩܫ̣ܝܐܝܬ̣ ܒܨܥܪܐ ܩܫ̣ܝܐ. ܟܕ ܐܡ̇ܪ܆ ܕܐܢܬ ܠܡ ܐ̇ܗܦ̣ܟܬ ܐܢܘܢ ܠܐ̈ܦܝܣܩܘܦܐ܇ ܗܠܝܢ ܕܒܕܘ̣ܥܬܐ ܣܓܝܐܬܐ ܠܡ̣ܚܣܢ ܐܫܬ̇ܘܕܝܘ ܐܫܬ̇ܘܕܥܘ ܕܢܫܬ̇ܘܬܦܘܢ ܠܢ. ܘܐܢܬ̣ ܗܐ ܐܗܦ̣ܟܬ ܐܢܘܢ ܡܢܢ. ܘܗܟܢܐ ܟܕ ܡ̣ܕܠܚ܆ ܦܩ̣ܕ ܕܬܥ̣ܘܠ ܣܘܢܩ̣ܠܝܛܘܣ ܠܒܝܬ ܐܦܝܣܩܘܦܝܘܢ܆ ܘܢܬܬ̣ܕܝܢܘܢ ܣ̣ܘܥܪ̈ܢܐ ܕܗܘ̣ܘ ܒܝܢܬܗܘܢ. ܟܕ ܐܦ ܗ̣ܘ̣ ܢܬ̣ܕܝܢ. ܘܐܢ ܡ̇ܟܣܝܢ ܠܗ ܢܗܘܐ ܡ̣ܚܝܒ ܐܦ ܗ̣ܘ. .ܪܝܫܐ ܕܥܣܪ̈ܝܢ ܘܬܫܥܐ܆ ܕܥܠ ܗ̇ܝ ܕܐܝܟ ܕܐܬܦ̣ܩܕܘܢ ܐܬ̇ܟܢܫܘ ܠܒܝܬ ܐܦܝܣܩܘܦܝܘܢ ܘܐܬܩ̣ܪ̈ܝܘ ܐܦܝ̈ܣܩܘܦܐ ܠܕܝܢ̣ܐ ܏ܟܛ ܟܕ ܓܝܪ ܐܝܟ ܦܘܩܕܢܐ ܠܝܘܡܐ ܕܡ̣ܚܪ܆ ܥܠ̣ܘ ܡܢ ܣ̣ܘܢܩܠܝܛܘܣ ܥܡ ܩ̣ܐܣܛܘܪ ܠܒܝܬ ܐܦܝܣܩܦܝܘܢ: ܘܐܬܩ̣ܪ̈ܝܘ ܐܦܝܣ̈ܩܘܦܐ ܠܕܝܢ̣ܐ: ܟܕ ܡܬ̇ܬܒܥܝܢ ܐܝܟ ܕܡܢ ܦܘܩܕܢܐ܆ ܕܢܟ̇ܬܪ̈ܘܢ ܒܫܘܬ̇ܦܘܬܐ ܕܗܠܝܢ ܕܣܘܢܗܕܘܣ܆ ܟܕ ܫܠ̣ܝܢ ܘܠܐ ܬܒ̇ܥܝܢ ܡܕܡ ܐܚܪܝܢ.܀.܀. ܗܝ̇ ܕܝܢ ܗ̣ܢܘܢ ܩܡ̣ܘ ܘܐܬ̇ܟܬܫܘ ܒܐܓܘܢܐ ܚܝܠܬܢܐܝܬ ܘܓܢܒܪܐܝܬ܆ ܘܕܠܐ ܕܚ̣ܠܬܐ ܐ̇ܟ̣ܣܘ ܓܠܝ̣ܐܝܬ܇ ܥܠ ܟܠܗܘܢ ܫܘ̈ܘ̇ܕܝܐ ܕܢܟ̣ܠܐ܇ ܘܥܠ ܟܠܗܝܢ ܡ̇ܘܡ̈ܬܐ ܕܐܬ̣̈ܕܓܠܝ܇ ܘܥܠ ܫܪܪܐ ܕܐܬ̣ܛܠܡ ܘܐܬ̣ܕܝܫ܇ ܘܥܠ ܫܪܟܐ ܕܕܐܝܟ ܗܠܝܢ. ܥܡ ܗ̇ܝ ܕܒܚ̣ܪܡܐ ܕܟܠܗ̇ ܗܪܣܝܣ ܕܬܪ̈ܝܝ ܟܝ̈ܢܐ܆ ܓܠ̣ܝܐܝܬ ܠܣܘܢܩ̣ܠܝܛܘܣ ܐܬ̇ܚܫܚܘ ܒܦܪܗܣܝܐ ܣܓܝܐܬܐ. ܐܝܟ ܕܒܫܘ̇ܪܝܐ ܘܒܡ̇ܨܥܬܐ ܘܐܦ ܗ̇ܝ ܕܝܢ ܒܚܪܬܐ̣ ܚܠܝ̣ܡܐܝܬ ܐܬ̇ܚܫܚܘ܆ ܟܕ ܘܐܦ ܬܘܒ ܒܦܣ̇ܩܐ ܓܡ̣ܝܪܐ ܕܠܥܠܡ ܕܡܢ ܫܘܬ̇ܦܘܬܗܘܢ ܦܣ̣ܩܘ ܘܓܡ̣ܪ̈ܘ. ܥܡ ܫܪܟܐ ܕܣܓܝܐ̈ܬܐ ܕܐܣܬ̣ܥܪ̈ ܘܐܬ̇ܡ̈ܠܠܝ ܬܡ̇ܢ ܒܐܓܘܢܐ ܕܬܟܬ̇ܘܫܐ ܕܓܢܒܪܘܬܐ. ܥܕܡܐ ܠܐ̇ܝܟܐ ܕܢܬ̇ܚܡܬ ܪܘܓܙܗܘܢ ܕܣܘ̣ܢܩ̈ܠܝܛܩܘ ܘܕܦܛܪܝܪܟܐ ܥܠܝܗܘܢ ܕܐܦܝܣ̈ܩܦܐ܇ ܘܦ̣ܩܕܘܢ ܕܒܓ̇ܪܪܐ ܢ̇ܦܩܘܢ ܐܢܘܢ ܡܢ ܩܕܡܝܗܘܢ܇ ܘܢܬ̇ܦܪܫܘܢ ܡܢ ܚ̈ܕܕܐ ܘܢܫ̣ܬܕܘܢ ܠܐܟ̣ܣܘܪܝܐ. ܗܕܐ̣ ܕܒܥܓܠ ܐܣܬ̣ܥܪܬ݀. ܘܢܦ̣ܩܘ̣ ܘܐܬܦ̣ܪ̈ܫܘ. ܘܬܘܒ ܠܚ̈ܕܕܐ̣ ܠܐ ܚ̣ܙܘ. ܘܐܫܬ̇ܕܪܘ ܠܐ̣ܟܣܘܪܝܐ. ܡܢܗܘܢ ܠܕܝܪ̈ܬܐ܆ ܘܡܢܗܘܢ ܠܓܙܪ̈ܬܐ ܕܝܡܐ܆ ܘܡܢܗܘܢ ܠܚ̣ܒ̈ܘܫܝܐ ܐ̈ܠܝ̣ܨܐ ܘܡ̇ܪ̈ܝܪܐ ܕܒܐܟ̣ܣ̈ܢܕܟܘܣ. ܟܕ ܐܬܓ̣ܙܪܬ݀ ܥܠܝܗܘܢ ܕܢܬ̇ܚܒܫܘܢ܆ ܘܕܠܐ ܢܬܝ̣ܗܒ ܠܗܘܢ ܐܢܫ ܡܢ ܕܝܠܗܘܢ ܐ̇ܘ ܡܢ ܐܚܪܝܢ ܐܚܪܢܝܢ ܠܡܚ̣ܙܐ ܐܢܘܢ ܠܚܕ ܡܢܗܘܢ. ܘܫܪܟܐ ܕܣܓ̈ܝܐܬܐ ܕܣܓ̈ܝܐܐ ܕܚ̇ܪܡܐܝܬ ܘܩܫ̣ܝܐܝܬ ܘܕܠܐ ܪ̈ܚ̣ܡܐ܇ ܒܟܒ̣ܕܐ ܡ̇ܪܝܪܬܐ ܘܒܩܛ̣ܪ̈ܐ ܕܥ̣ܘܠܐ܇ ܐܝܟ ܕܥܠ ܩ̈ܛ̇ܘܠܐ ܥܠܝܗܘܢ ܐܬܓ̣ܙܪ.