ܪܝܫܐ ܕܥܣܪ̈ܝܢ܆ ܕܡܢ ܒܬܪ ܕܐܬܟ̣ܬܒ ܐ̣ܝܕܝܩܛܘܢ ܒܩܬ̇ܪܐ ܥܣܪ̈ܝܢ ܐ̣̈ܝܣ̇ܐ܆ ܒܦܘܩܕܢܗ ܕܡ̇ܠܟܐ ܗ̇ܘ ܕܗ̣ܘܐ ܩܕܡܝܐ ܒܐܪܡ̣ܝ ܐ̣ܝܕܗ܆ ܫ̣ܕܪ ܠܗܠܝܢ ܕܚܒܝ̣ܫܝܢ ܗܘܘ. ܏ܟ ܡܢ ܒܬܪ ܓܝܪ ܕܐܝܟ ܕܦܩ̣ܕ ܡ̇ܠܟܐ ܐܬܟ̣ܬܒ ܐ̣ܝܕܝܩܛܘܢ ܒܩ̇ܬܪܐ܆ ܡ̣ܚܕܐ ܐܪܡ̣ܝ ܒܗ ܐ̣ܝܕܐ܆ ܘܫ̣ܕܪܗ ܠܐܦܝ̈ܣܩܘܦܐ ܗܠܝܢ ܕܒܒܝܬ ܐܦܝܣܩܦܝܘܢ ܗܘܘ. ܟܕ ܫܠ̣ܚ ܠܗܘܢ܆ ܕܗܐ ܠܡ ܐܝܟ ܕܒ̇ܥܝܢ ܐܢܬܘܢ ܥ̣ܒܕܢܢ ܚܕܝܘܬܐ܆ ܘܗܐ ܫ̣ܕܪܢ ܚܢܢ ܠܟܘܢ ܐ̣ܝܕܝܩܛܘܢ. ܘܡܟܝܠ ܠܝܬ ܠܟܘܢ ܕܬܬ̣ܚܪܘܢ ܠܡܬ̇ܚܝܕܘ ܠܢ. ܗܐ ܓܝܪ ܐܦ ܡܛܠܬܟܘܢ ܥ̣ܒܕܬܗ ܠܐ̣ܝܕܝܩܛܘܢ ܗܢܐ.܀.܀. ܗ̣ܢܘܢ ܕܝܢ ܐܦܝ̈ܣܩܘܦܐ: ܟܕ ܩ̣ܪܐܘܗܝ ܠܐ̣ܝܕܝܩܛܘܢ: ܘܚܙܘ ܕܬ̇ܘܪ̈ܨܐ ܗܠܝܢ ܕܥܒ̣ܕܘ ܠܝܬ ܒܗ: ܐܠܐ ܢܘ̈ܬܫܐ ܡܕܡ ܡܢܗܘܢ: ܐܝܟ ܨܒܝܢܗܘܢ ܕܗ̇ܢܘܢ ܕܢ̇ܬܫܘܢ ܐܬܬ̣ܣܝܡܘ܆ ܐܗ̣ܡܝܘ ܒܗ܆ ܡܛܘܠ ܗ̇ܝ ܕܗܠܝܢ ܕܠܩ̣ܘܒܠܐ ܒܠܒ̇ܠܘܗܝ ܘܕܘܕܘ̇ܗܝ ܐܝܟ ܨܒܝܢܗܘܢ. ܘܡܛܠ ܕܚܠ̣ܬܐ ܕܡ̇ܠܟܐ܆ ܠܐ ܐ̇ܡ̣ܪ̈ܚܘ ܕܢܪ̈ܝܡ̣ܘܢ ܐܢܘܢ ܡܢܗ܇ ܠܗܠܝܢ ܕܩ̣ܝܡܝܢ ܠܘܩܒܠ ܬܪ̈ܝܝ ܟܝ̈ܢܐ܆ ܐܠܐ ܗܠܝܢ ܕܝܠܗܘܢ ܐܬ̇ܦܪܣܘ ܟܡܐ ܕܐܬܡ̣ܨܝܘ ܕܢܣ̣ܝܡܘܢ ܒܗ. ܘܡܬܚ̣ܙܐ ܕܢܨ̇ܐ ܥܡ ܣܘܢܗܕܘܣ܆ ܘܬܘܒ ܕܚܠܦܝܗ̇ ܡܬ̇ܟܬܫ܆ ܘܕܡܢܗ̇ ܘܡܢ ܕܝܠܗ̇ ܡܬ̇ܚܙܝܢ ܒܗ.܀.܀.܀. ܗ̣ܢܘܢ ܕܝܢ ܐܦܝܣ̈ܩܘܦܐ܆ ܠܘܬ ܗ̇ܢܘܢ ܕܐܝ̇ܬܝܘܗܝ܆ ܕܐ̣ܝܬܘܗܝ ܦ̇ܢܝܘ ܦܬܓܡܐ̣ ܟܕ ܐܡ̇ܪܝܢ. ܕܐܢ ܐܪܐ ܥܠ̣ܬ݀ ܟܫ̣ܠܗ̇ ܘܕܠ̣ܘܚܝܗ̇ ܕܟܠܗ̇ ܥ̇ܕܬܐ: ܗ̇ܢܘ ܕܝܢ ܣܘܢܗܕܘܣ ܕܟܠܩܕܘܢܐ ܡܢ ܡ̇ܨܥܬܐ ܡܫܬ̇ܩܠܐ܆ ܐܦ ܠܐ ܣܢ̣ܝܩܐ ܥܕܬܐ ܥܠ ܗܢܐ. ܐܢ ܕܝܢ ܘܗ̣ܝ ܒܥܕܬܐ ܡܬ̇ܟܪܙܐ܆ ܐܦ ܠܐ ܐ̇ܠܦܐ ܚܕ ܕܐܝܟ ܗܢܐ: ܟܕ ܒܟܠ ܕܘ̈ܟܝܢ ܘܒܟܠ ܦܢ̣ܝ̈ܢ ܢܬ̇ܩܒܥܘܢ܆ ܚܕܝܘܬܐ ܡܢܗܘܢ̣ ܠܐ ܩܝ̣ܡܐ. ܘܣ̣ܕܩܐ ܥܕܟܝܠ ܥܠ ܕܘܟܬܗ̇ ܕܘܟܬܗ ܐ̣ܝܬܘܗܝ. ܗܢܐ ܓܝܪ ܘܠܘܩܒܠ ܣܘܢܗܕܣ̣ ܘܚܠܦܝܗ̇ ܡܬܚ̣ܙܐ ܕܟܬ̇ܫ. ܘܬܪ̈ܬܝܢ ܐܦ ܡ̈ܬܝ̇ܕܥܢ ܒܗ ܠܕܡ̣ܬܒܝܢ. ܪܝܫܐ ܕܥܣܪ̈ܝܢ ܘܚܕ܆ ܥܠ ܗ̇ܝ ܕܡܣ̇ܗܕ ܗܘܐ ܒܗܘܢ ܒܐ̈ܦܝܣܩܦܐ ܗ̣ܘ ܝܘܚܢܢ ܟܕ ܐܡ̇ܪ܇ ܕܗܐ ܠܡ ܚ̣ܙܘ ܕܐ̣ܢܬܘܢ ܡ̇ܒܛܠܝܢ ܐܢܬܘܢ ܠܗ̇ ܠܚܕܝܘܬܐ ܕܥܕܬܐ. ܏ܟܐ ܟܠ ܝܘܡ ܕܝܢ ܡܣ̇ܗܕ ܗܘܐ ܒܗܘܢ ܗ̣ܘ ܝܘܚܢܢ ܒܐ̈ܦܝܣܩܦܐ: ܥܡ ܗܠܝܢ ܕܡܢ ܦܪܨܘܦܐ ܕܡ̇ܠܟܐ ܠܘܬܗܘܢ ܡܫ̇ܬܕܪܝܢ ܗܘܘ̣ ܟܕ ܐܡ̇ܪܝܢ. ܕܗܐ ܚ̣ܙܘ ܠܡ̣ ܕܐ̣ܢܬܘܢ ܡ̇ܒܛܠܝܢ ܐܢܬܘܢ ܘܡ̇ܥܟܪܝܢ ܠܗ̇ ܠܚܕܝܘܬܐ ܕܥܕܬܐ ܕܐܠܗܐ. ܗܐ ܓܝܪ ܠܚܡܫܝܢ ܫ̈ܢܝܢ ܐܬ̣ܬ܆ ܘܐ̣ܢܬܘܢ ܗܫܐ ܕܚ̇ܩܝܢ ܐܢܬܘܢ ܘܟ̇ܠܝܢ ܘܡ̇ܥܘܟܝܢ ܠܗ̇܆ ܘܠܐ ܨ̇ܒܝܢ ܐܢܬܘܢ ܕܬ̇ܬܚܝܕܘܢ.܀. ܗ̣ܢܘܢ ܕܝܢ ܡ̇ܦܢܝܢ ܗܘܘ ܠܘܬܗܘܢ ܟܕ ܐܡ̇ܪܝܢ܆ ܐ̇ܝܟܢܐ ܚ̣̇ܢܢ ܡ̇ܒܛܠܝܢ ܚܢܢ ܚܕܝܘܬܐ܇ ܗܝ̇ ܕܐܢܬܘܢ ܐܦܠܐ ܒܚ̣ܕܐ ܡܢ ܨܒ̈ܥܬܟܘܢ ܩ̇ܪܒܝܢ ܐܢܬܘܢ ܠܗ̇܇ ܐܠܐ ܐܢ ܒܡ̈ܠܐ ܒ̇ܪ̈ܝܬܐ ܘܚ̇ܪܥܘܬܐ܇ ܐܝܟ ܕܬ̣ܬܚܙܘܢ ܘܬ̇ܣܬܒܪܘܢ ܡܢ ܒ̈ܢܝܢܫܐ܇ ܕܗܐ ܠܡ ܫ̇ܪܝܪܐܝܬ ܕܚܕܝܘܬܐ ܝܨ̇ܝܦܝܢ ܐܢܬܘܢ܇ ܘܠܟܠܗ ܥ̣ܕܠܝܐ ܕܡܢ ܟܠܢܫ܇ ܒܬܪܢ ܕܬ̇ܪܗܛܘ̣ܢܝܗܝ ܡܬ̇ܛܟܢܝܢ ܐ̣ܢܬܘܢ. ܐ̇ܝܕܐ ܐ̇ܢܘܣܝܣ ܐܪܐ ܝܨ̇ܝܦܝܢ ܐܢܬܘܢ ܕܬܥ̣ܒܕܘܢ. ܐ̇ܘ ܠ̣ܢ ܐ̇ܝܟܢܐ ܬܒ̇ܥܝܢ ܐܢܬܘܢ ܠܢ ܕܢܬ̇ܚܝܕ ܠܟܘܢ܇ ܟܕ ܠܣܘܢܗܕܘܣ ܥ̇ܩܘܪܬܗ̇ ܘܡ̇ܕܠܚܢܝܬܗ̇ ܕܟܠܗ̇ ܥܕܬܐ ܕܐܠܗܐ ܐ̇ܚ̣ܝܕܝܢ ܐܢܬܘܢ܇ ܘܡ̇ܟܪܙܝܢ ܘܡ̇ܚܒܒܝܢ ܠܗ̇. ܐܢ ܐܪܐ ܒܫܪܪܐ ܝܨ̇ܝܦܝܢ ܐܢܬܘܢ ܕܚܕܝܘܬܐ ܬܥ̣ܒܕܘܢ ܐܝܟ ܡ̈ܠܝܟܘܢ܆ ܐ̇ܪܝܡ̣ܘ ܬܘܩ̣ܠܬܐ ܘܥܠ̣ܬܐ ܕܟܫܠ̣ܐ ܡܢ ܐܘܪܚܗ̇ ܫܦܝ̣ܬܐ ܕܗܝܡܢܘܬܐ܆ ܘܐ̇ܦ̣ܩܘܗ̇ ܡܢ ܥܕܬܗ ܕܐܠܗܐ. ܕܗܟܢܐ ܠܘ ܚ̣ܢܢ ܒܠܚܘܕ܆ ܐܠܐ ܘܟܠܗܘܢ ܡܗ̈ܝܡܢܐ ܟܕ ܚ̇ܕܝܢ ܘܡܚ̣ܪܪܝܢ ܡܢ ܟܫܠ̣ܐ ܢܬ̇ܚܝܕܘܢ ܠܟܘܢ܆ ܥܡ ܣܓܝܐ̈ܬܐ ܕܕܐܝܟ ܗܠܝܢ ܕܠܐ ܣ̇ܦܩܝܢܢ ܠܡܣ̇ܝܟܘ ܐ̈ܢܝܢ ܒܥܘܒܛܐ ܣܓܝܐܐ ܕܟܪ̈ܛܝܣܐ܇ ܠܐܝܠܝܢ ܕܒܟܠ ܝܘܡ ܒܝܢܬܗܘܢ ܒܗ̈ܦ̇ܟܬܐ ܕܕܪܫ̇ܐ ܥܠ ܐ̈ܦܝ ܗܠܝܢ ܡ̈ܬ̇ܡܠܠܢ ܗ̈ܘܝ. ܐܝܠܝܢ ܕܡܛܠ ܣܘܓܐ̣ܐ ܕܡ̈ܠܐ ܘܥܘ̣ܒܛܐ ܕܟ̈ܬ̣ܝܒܬܐ ܡܢܗܝܢ ܐ̇ܦܝ̣ܫܢ ܘܐ̇ܗ̣ܡܝܢ܆ ܕܕܡ ܠܙܬ̣ܐ ܢܬܚܫ̈ܒܢ ܠܐܝܠܝܢ ܕܦܓ̇ܥܝܢ ܒܗܝܢ.܀. ܪܝܫܐ ܕܥܣܪ̈ܝܢ ܘܬܪ̈ܝܢ܆ ܥܠ ܗ̇ܝ ܕܗ̣ܢܘܢ ܐ̈ܦܝܣܩܦܐ܇ ܘܐܦ ܡܢ ܪ̈ܘܪܒܢܐ ܕܐܪ̈ܬܕܟܣܘ ܡܬ̣ܪܫܝܢ ܗܘܘ ܘܡܬ̣ܥܕܠܝܢ܇ ܡܛܠ ܩ̣ܫܝܘܬܗܘܢ ܘܠܐ ܡܬ̇ܢܚܬܢܘܬܗܘܢ ܕܡܛܠ ܚܕܝܘܬܐ. ܏ܟܒ ܩܕܡ ܙܒܢܐ ܗܟܝܠ ܕܪܕܘܦ̣ܝܐ ܗܢܐ: ܘܢܣ̣ܝ̈ܘܢܐ ܘܐܘ̈ܠܨܢܐ ܘܚܒ̣̈ܘܫܝܐ ܗܠܝܢ ܕܡܢ ܪ̈ܕܘ̇ܦܐ: ܥܡ ܗܠܝܢ ܬܘܒ ܡܢ ܫܪܟܐ ܕܐܪ̈ܬܕܟܣܘ ܗ̣ܢܘܢ ܐܦܝ̈ܣܩܘܦܐ ܡܬ̣ܪܫܝܢ ܗܘܘ ܩܫ̣ܝܐܝܬ܆ ܟܕ ܢܨ̇ܝܢ ܥܡܗܘܢ ܘܐܡ̇ܪܝܢ܇ ܕܥܠ ܡ̇ܢܐ ܠܡ ܒܚ̣ܪܝܢܐ ܘܒܩ̣ܫܝܘܬܐ ܗܟܢܐ ܩܝ̣ܡܝܢ ܐܢܬܘܢ܇ ܘܠܐ ܥ̇ܒܕܝܢ ܐܢܬܘܢ ܡ̇ܕܒܪܢܘܬܐ ܘܡܬܢܚܬܢܘܬܐ܇ ܐ̣ܝܟܢܐ ܕܬܗܘܐ ܚܕܝܘܬܐ ܒܥܕܬܗ ܕܐܠܗܐ. ܐܠܐ ܗܟܢܐ ܒܩܕܠܐ ܩ̣ܫܝܐ ܩܝ̣ܡܝܢ ܐܢܬܘܢ ܘܡܬ̣ܚܪܝܢ ܠܘܩܒܠ ܗܠܝܢ ܕܠܒ̣ܝܟܝܢ܆ ܘܠܐ ܪܡ̣ܐ ܠܟܘܢ܇ ܕܠܢ ܕܝܠܢ ܘܠܒ̈ܬܝܢ ܘܠܒ̈ܢܝܢ ܘܠܐܘ̈ܣܝܣ ܕܝܠܢ ܥ̣ܬܝܕܝܢ ܐܢܬܘܢ ܕܬ̇ܘܒܕܘܢ. ܘܠܟܘܢ ܡ̇ܢܐ ܪܡ̣ܐ ܠܟܘܢ܇ ܕܚ̣ܢܢ ܡ̇ܘܒܕܝܢ ܚܢܢ ܡ̇ܪ̈ܗܛܝܢ܇ ܘܗ̇ܘܝܢܢ ܚ̇ܕܘܪ̈ܐ.܀.܀. ܐ̣ܝܟܢܐ ܕܟܕ ܗܠܝܢ ܡܢ ܐܪ̈ܬܕܟܣܘ ܒܡ̇ܪ̈ܫܘܬܐ ܩ̈ܫ̣ܝܬܐ ܡܢ ܩܕܝܡ ܠܘܬܗܘܢ ܡܬ̇ܐܡܪ̈ܢ ܗ̈ܘܝ: ܟܕ ܫܚܝ̣ܩܝܢ ܗܘܘ ܡܛܠ ܥܘܬܪܗܘܢ: ܘܥܡ ܥܡ ܗܠܝܢ ܬܘܒ: ܘܐܦ ܐܝܠܝܢ ܕܡܢ ܣܘܢܗ̈ܕܝܛܐ ܒܗܘܢ ܡܣ̇ܬ̈ܗܕܢ ܗ̈ܘܝ ܒܟܠ ܝܘܡ: ܕܗܐ ܠܡ ܐܢܬܘܢ ܡܒܛܠܝܢ ܕܠܐ ܬܗܘܐ ܚܕܝܘܬܐ܆ ܠܚܫܐ ܘܠܒ̇ܟܬܐ ܡ̇ܪܝܪܬܐ ܒܐܝܡܡܐ ܘܒܠܠܝܐ ܐܬ̇ܝܢ ܗܘܘ܆ ܟܕ ܝܬ̇ܒܝܢ ܘܒ̇ܟܝܢ ܘܐ̇ܠܝܢ ܒܚ̈ܢ̣ܓܬܐ ܠܘܩܒܠ ܚ̈ܕܕܐ. ܘܒ̈ܩܠܐ ܕܐܠ̣ܝܐ ܐܡ̇ܪܝܢ ܗܘܘ܆ ܕܡ̇ܢܐ ܡܟܝܠ ܢܥܒ̣ܕ܇ ܕܗܐ ܡܢ ܬܪ̈ܝܗܘܢ ܓ̇ܒ̈ܐ ܡ̣ܬܪܫܝܢܢ܇ ܘܡ̇ܣܗ̣ܕܝܢ ܒܢ ܘܡܬ̇ܥܕܠܝܢ. ܘܟܕ ܗܫܐ ܗܐ ܚܒ̣ܝܫܝܢܢ ܒܐܘܠܨܢܐ܇ ܘܕܠܐܢܫ ܡܢ ܝ̇ܕܘ̈ܥܝܢ ܕܢܚ̣ܙܐ ܠܐ ܡܫܬ̇ܒܩܝܢܢ. ܘܗܠܝܢ ܘܗܠ‍ ܕܠܩ̣ܘܒܠܢ܆ ܗܠܝܢ ܝܬܝܪܐܝܬ ܠܘܬ ܪ̈ܘܪܒܢܐ ܘܐܝ̣̈ܕܝܥܐ ܕܡܢ ܕܝܠܢ ܐܡ̇ܪܝܢ܆ ܘܕܗ̣ܢܘܢ ܕܚܕܝܘܬܐ ܝܨ̇ܝܦܝܢ܇ ܠܟܠܢܫ ܢܟܝܠ̣ܐܝܬ ܐܡ̇ܪܝܢ ܘܡ̇ܣܒܪܝܢ. ܘܡܟܝܠ ܟܠܗ ܓ̇ܘܕܦܐ ܕܒܘ̇ܛܠܗ̇ ܕܚܕܝܘܬܐ: ܟܕ ܟܠܢܫ ܣ̇ܒܪ ܕܫܪ̈ܝܪܢ ܐ̈ܢܝܢ ܡ̈ܠܝܗܘܢ܆ ܒܬܪܢ̣ ܣ̇ܝܡܝܢ ܠܗ. ܘܚ̣ܢܢ ܗܫܐ ܗܐ ܐܬ̇ܡܨܥܢ̣ܢ ܒܝܬ ܬܪ̈ܝܗܘܢ ܓ̇ܒ̈ܝܢ. ܘܕܢܬ̣ܠ ܢܦܫܢ ܘܕܢܬ̇ܬܟ̣ܠ ܥܠ ܫܘ̈ܘ̇ܕܝܐ ܕܢܟ̣ܠܐ ܘܡ̈ܘܡܬܐ ܕܕܓ̇ܠܘܬܐ ܕܗܠܝܢ ܕܠܩܘ̣ܒܠܐ܆ ܝ̇ܕܥܝܢ ܚܢܢ ܕܫܪܪܐ ܠܘܬܗܘܢ ܠܝܬ܆ ܘܕܒܐ̣ܝ̈ܕܝܗܘܢ ܚܕܝܘܬܐ ܕܬ̇ܬܦܪܢܣ ܠܐ ܫ̇ܘܝ̣ܢ ܣܟ. ܘܕܬܘܒ ܢܩ̣ܘܡ ܒܚ̣ܪܝܢܐ ܠܘܩܒܠܗܘܢ܆ ܗܐ ܡܢ ܬܪ̈ܝܗܘܢ ܓ̈ܒܐ̣ ܥܕܡܐ ܠܕܪ̈ܝ ܥܠܡܐ ܡܬ̇ܚܪܡܝܢܢ܇ ܐܝܟ ܡ̈ܒ̇ܛܠܢܐ ܘܡ̈ܥܘ̇ܟܢܐ ܕܚܕܝܘܬܐ ܕܥܕܬܗ ܕܐܠܗܐ. ܘܬܘܒ ܘܐܦ ܡܣ̣ܒܪܢܘܬܐ ܕܫܪܪܐ ܥܠ ܫܘ̈ܘ̇ܕܝܗܘܢ ܢܟܝ̣̈ܠܐ ܕܗܠܝܢ: ܘܥܠ ܡ̈ܠܝܗܘܢ ܕܓ̈ܠܬܐ ܡ̇ܝܬܝܢ܆ ܐܝܟ ܗ̇ܘ ܕܗ̣ܢܘܢ ܡ̇ܛܝ̣ܒܝܢ ܗܘܘ ܕܢܥ̣ܒܕܘܢ ܚܕܝܘܬܐ܇ ܘܚ̣ܢܢ ܙܓ̣ܪܢܗ̇ ܠܚܕܝܘܬܐ ܡܢ ܥܕܬܐ. ܥܡ ܣܓܝܐ̈ܬܐ ܕܕܐܝܟ ܗܠܝܢ܇ ܕܒܝܢܬܗܘܢ ܒܕܡ̈ܥܐ ܚ̣ܢܝ̈ܓܬܐ ܝܘ̈ܡܬܐ ܣܓ̈ܝܐܐ ܡܬ̇ܐܡܪ̈ܢ ܗ̈ܘܝ. ܗܠܝܢ ܕܐܝܟ ܕܩܕܡ ܐܠܗܐ܆ ܚ̣ܢܢ ܣܗ̇ܕܝܢܢ ܠܫܪܪܗܝܢ܆ ܐܝܟ ܡ̇ܢ ܕܩ̇ܪ̈ܝܒܐ ܘܚ̈ܙ̇ܝܐ ܕܟܠܗܝܢ ܗ̣ܘܝܢ. ܪܝܫܐ ܕܥܣܪ̈ܝܢ ܘܬܠܬܐ܆ ܕܥܠ ܕܪܫ̇ܐ ܘܐܘܠܨܢܐ ܕܝܠܗܘܢ ܕܐ̈ܦܝܣܩܦܐ܇ ܘܕܐ̈ܢܫܐ ܕܝܠܗܘܢ܇ ܏ܟܓ ܟܕ ܓܝܪ ܝܘܡ̈ܬܐ ܬܠܬܝܢ ܘܬܠܬܐ: ܒܗ ܒܕܪܫ̇ܐ ܠܘܩܒܠ ܚ̈ܕܕܐ ܣ̣ܕܝܪ̈ܝܢ ܗܘܘ ܚ̇ܪܝܦܐܝܬ: ܗܠܝܢ ܕܣܘܢܗܕܘܣ ܕܐ̇ܚܝ̣ܕܝܢ ܫܘܠܛܢܐ: ܘܗܠܝܢ ܕܠܘܩܒܠ ܣܘ̣ܢܗܕܘܣ ܕܚܒܝܫܝܢ ܗܘܘ ܡܢܗܘܢ ܘܐܠ̣ܝܨܝܢ ܡ̇ܪܝܪܐܝܬ: ܟܠ ܐܡܬܝ ܕܡܫܬ̇ܕܪ ܗܘܐ ܒܬܪܗܘܢ: ܘܡܫ̣ܬܪܝܢ ܗܘܘ ܘܢܦ̇ܩܝܢ ܡܢ ܒܝܬ ܚܒ̣ܘܫܝܐ: ܘܐܬ̇ܝܢ ܗܘܘ ܠܣܝ̣ܩܪܝܛܘܢ ܕܦ̇ܛܪܝܪܟܐ ܝܬ̇ܒܝܢ ܗܘܘ ܘܕܪܫ̇ܝܢ̣ ܟܡܐ ܕܨ̇ܒܝܢ ܗܘܘ ܗܠܝܢ ܕܫܠܝܛܝܢ ܗܘܘ. ܘܡܐ ܕܐ̇ܘ ܡ̣ܙܕܟܝܢ ܗܘܘ ܡܢܗܘܢ: ܐ̇ܘ ܫܦ̇ܪ ܗܘܐ ܠܗܘܢ܆ ܢ̇ܦܩܝܢ ܗܘܘ ܗ̣ܢܘܢ ܐܦܝܣ̈ܩܦܐ ܥܡ ܢܛ̇ܘܪ̈ܝܗܘܢ܆ ܘܥܐ̇ܠܝܢ ܡܬ̇ܚܒܫܝܢ ܠܓܘ ܡܢ ܬܠܬ ܡ̇ܛܪ̈ܬܐ. ܚܕܐ ܕܐܦܝܣ̈ܩܦܝܢܐ̣ ܕܐܦܝܣܩܦܝܢܐ̣ ܘܚܕܐ ܕܐܣ̣ܩܘܒܝܛܪܘܣ. ܘܗ̇ܝ ܒ̇ܪܝܬܐ ܕܐܣ̣ܛܝܪ̈ܐ. ܟܕ ܐܢܫܐ ܕܟܠ ܚܕ ܚܕ ܡܢܗܘܢ ܡܢ ܟܠܕܘܟ: ܠܘ ܒܠܚܘܕ ܩ̣ܠܝܪ̈ܝܩܘ ܘܕܝܪ̈ܝܐ ܘܫܪܟܐ ܕܒ̈ܢܝ ܚ̣ܐܪ̈ܐ ܕܥܡܗܘܢ܆ ܐܠܐ ܘܐܦ ܛ̇ܠܝ̈ܝܗܘܢ ܟܠܗܘܢ܆ ܒܝܬ ܚܒ̣ܘ̈ܫܬܐ ܚ̈ܫ̣ܘܟܬܐ ܘܡ̇ܪ̈ܝܪܬܐ ܕܒܟܠ ܕܘ̈ܟܝܢ ܕܒܝܬ ܐܦܝܣܩܦܝܘܢ ܚܒ̣ܝܫܝܢ ܗܘܘ. ܟܕ ܡܬ̇ܢܛܪܝܢ ܟܠܗܘܢ܆ ܘܠܘ ܒܠܚܘܕ܆ ܐܠܐ ܘܡܫܬ̇ܠܚܝܢ ܐܝܟ ܕܡܢ ܠܣ̇ܛ̈ܝܐ܇ ܡܢ ܐܦ̣ܝܣ̈ܩܦܝܢܐ ܘܡܢ ܕܩ̈ܢܣܐ. ܘܐܢ ܡ̇ܐ̈ܢܐ ܠܒܝ̣ܫܝܢ ܗܘܘ ܡܫܬ̇ܠܚܝܢ ܗܘܘ܆ ܥܕܡܐ ܠܡܕܡ ܒܠ̣ܝܐ ܕܠܐ ܚ̇ܫܚ ܗܘܐ ܠܗܘܢ. ܘܐܢ ܣܐ̣ܘܢܐ ܘܐܢ ܙܘ̣ܢܪ̈ܐ. ܐ̇ܘ ܥ̇ܪ̈ܩܐ ܐ̇ܘ ܚܘ̣ܫܒܢܐ ܡܫ̣ܬܟܚ ܗܘܐ ܥܠ ܚܕ ܡܢܗܘܢ: ܐ̇ܘ ܡܕܡ ܐܚܪܝ̣ܢ ܠܓܡ̣ܪ ܡܫܬ̇ܠܚܝܢ ܗܘܘ. ܘܟܠ ܡܕܡ ܕܡܫ̣ܬܟܚ ܗܘܐ ܥܠܝܗܘܢ ܡܫܬ̣ܩܠ ܗܘܐ ܘܡܫ̣ܬܕܝܢ ܥܠ ܐܪܥܐ̣ ܟܕ ܡ̇ܫ̣ܠܚܝܢ ܘܐܠܝ̣ܨܝܢ ܘܐܦ ܠܣܝ̇ܒܪܬܐ. ܘܒ̈ܢܝ ܐܢܫܐ ܕܢܚ̣ܙܘܢ ܐܢܘܢ̣ ܐ̇ܘ ܕܢܘ̇ܫܛܘܢ ܠܗܘܢ ܡܕܡ: ܐ̇ܘ ܠܗܘܢ ܐ̇ܘ ܠܐ̈ܦܝܣܩܘܦܐ: ܠܓܡ̣ܪ̣ ܠܐ ܡܫܬ̇ܒܩܝܢ ܗܘܘ. ܘܚܠܦ ܫܘ̇ܘܕܝܐ ܕܚܕܝܘܬܐ܆ ܗܠܝܢ ܒܝ̣ܫ̈ܬܐ ܗ̣ܢܘܢ ܘܟܘܠܗܘܢ ܕܥܡܗܘܢ܆ ܘܗܠܝܢ ܥܩ̈ܬܐ ܘܢܣ̣̈ܝܘܢܐ ܣ̇ܒܠܝܢ ܗܘܘ ܘܡ̇ܣܝܒܪ̈ܝܢ. ܘܝܬܝܪܐܝܬ̣ ܡܛܠ ܗ̇ܝ ܕܡ̇ܟܣܝܢ ܗܘܘ ܓܠܝ̣ܐܝܬ ܠܗ̇ܢܘܢ ܕܡ̇ܫܢܩܝܢ ܗܘܘ ܠܗܘܢ. ܪܝܫܐ ܕܥܣܖ̈ܝܢ ܘܐܪ̈ܒܥܐ܆ ܕܥܠ ܕܪܫ̇ܐ ܕܚܪܬܐ ܘܡ̈ܘ̇ܡܬܐ ܕܢܟ̣ܠܐ ܘܕܕܓ̇ܠܘܬܐ.܀. ܏ܟܕ ܒܬܪ ܕܝܢ ܗܠܝܢ ܟܠܗܝܢ ܬܘܒ܆ ܒܚܪܬܐ ܐܫܬ̇ܕܪܘ ܘܐܬ̣ܕܒܪܘ ܐܦܝ̈ܣܩܦܐ ܡܢ ܒܝܬ ܚܒ̣ܘܫܝܗܘܢ܆ ܟܕ ܡܟܝܠ ܐܬܬ̣ܣܝܡܘ ܥܠܝܗܘܢ܆ ܩܫ̣ܝܐܝܬ ܘܚ̇ܨܝܦܐܝܬ. ܘܗ̣ܘ ܪܝܫ ܡ̇ܘܬܒܐ ܝܘܚܢܢ ܘܝܬ̇ܝܪ ܡܢܗ܆ ܘܗܠܝܢ ܕܡܢ ܡ̇ܠܟܐ ܡܫܬ̇ܕܪܝܢ ܗܘܘ ܘܦܪܨܘܦܗ ܥܒ̇ܕܝܢ ܗܘܘ. ܟܕ ܐܡ̇ܪܝܢ܆ ܕܥܕܡܐ ܠܐܡܬܝ ܗܟܢܐ ܡ̇ܫܕܝܢ ܡܕܫܝܢ ܐܢܬܘܢ ܘܡ̇ܒܛܠܝܢ ܠܗ̇ ܠܚܕܝܘܬܐ ܕܥܕܬܗ ܕܐܠܗܐ܇ ܗܕܐ ܕܡܪܢ ܡ̇ܠܟܐ ܘܚ̣ܢܢ ܝܨ̇ܝܦܝܢ ܚܢܢ ܠܡ̣ܥܒܕ܇ ܘܝܘܡ ܡܢ ܝܘܡ ܡ̇ܥܘܟܝܢ ܐܢܬܘܢ ܘܡ̇ܫܕܝܢ ܐܢܬܘܢ ܠܛܿܒܬܐ ܗܕܐ܇ ܘܠܐ ܡ̇ܚܘܝܢ ܐܢܬܘܢ ܢܦܫܟܘܢ ܓܠܝ̣ܐܝܬ ܠܟܠܗܘܢ ܒ̈ܢܝܢܫܐ܇ ܕܡ̇ܒ̈ܛܠܢܐ ܐ̣ܢܬܘܢ ܐܝ̣ܬܝܟܘܢ ܘܠܐ ܐܢܫ ܐܚܪܝܢ. ܡܟܝܠ ܗܫܐ ܒܦܣ̈ܝ̇ܩܬܐ܆ ܐ̇ܘ ܐܬ̇ܚܝܕܘ̣ ܐ̇ܘ ܐܬ̣ܓܠܘ܇ ܕܐܢܬܘܢ ܕ̇ܠܚܝܢ ܐ̣ܢܬܘܢ ܘܛ̇ܪܝܢ ܘܡ̇ܒܛܠܝܢ ܠܚܕܝܘܬܐ ܕܥܕܬܐ.܀. ܗ̣ܢܘܢ ܕܝܢ ܐܦܝ̈ܣܩܦܐ: ܟܕ ܒܐܒ̣ܠܐ ܘܚܫܐ ܐ̣ܝܬܝܗܘܢ ܗܘܘ̣ ܐܡ̇ܪܝܢ. ܕܐܢ ܟܐܢܐܝܬ ܡ̈ܬܬ̇ܕܝܢܢ ܨܒ̈ܘ̣ܬܐ: ܘܒܚ̣ܘ̈ܫܒܐ ܬܩ̈ܢ̣ܐ܆ ܠܘ ܚ̣ܢܢ ܐ̣ܝܬܝܢ ܡ̈ܥܘ̇ܟܢܝܗ̇ ܕܚܕܝܘܬܐ̣ ܐܠܐ ܐ̣ܢܬܘܢ. ܕܟܕ ܓܘܗ ܕܠܒܟܘܢ ܡ̇ܠ̣ܐ ܡܢ ܫܘܚ̣ܬܗ̇ ܕܣܩ̣ܘܒܠܝܘܬܐ ܘܦܠ̣ܝܓܘܬܐ ܟܠܩܕܘܢܝܬܐ܇ ܠܢ ܕܝܠܢ ܨ̇ܒܝܢ ܐܢܬܘܢ ܕܬܚ̇ܘܘܢ ܡܥ̇ܘ̈ܟܢܐ܇ ܟܕ ܐܢܬܘܢ ܠܓܡ̣ܪ ܒܢܦܫܟܘܢ ܠܐ ܣܡ̣ܬܘܢ ܘܠܐ ܚ̇ܘܝܬܘܢ ܘܐܦ ܠܐ ܛܠ̣ܢܝܬܗ̇ ܕܚܕܝܘܬܐ. ܐܠܐ ܡ̇ܠܘܢ ܕܢܬ̇ܚܝܕ ܠܟܠܗ̇ ܕܓ̇ܠܘܬܐ ܟܠܩܕܘܢܝܬܐ ܬܒ̇ܥܝܢ ܐܢܬܘܢ ܠܢ ܢܟܝ̣ܠܐܝܬ܆ ܘܠܘ ܚܕܝܘܬܐ ܫ̇ܪܝܪܬܐ ܕܥܕܬܐ ܝܨ̇ܝܦܝܢ ܐܢܬܘܢ ܕܬܥܒ̣ܕܘܢ ܟܐܢܐܝܬ ܘܬܪܝܨܐܝܬ.܀. ܘܗܫܐ ܐ̣ܝܟܢܐ ܕܡܢ ܫ̇ܘܪܝܐ ܐܡ̣ܪܢܢ܆ ܕܐܢ ܐܢ ܚܕܝܘܬܐ ܒ̇ܥܝܢ ܐܢܬܘܢ ܒܫܪܪܐ: ܘܠܘ ܡ̇ܛܥܝܢܘܬܐ ܢܟܝ̣ܠܬܐ ܘܚ̣ܪܥܘܬܐ ܒܝܫ̣ܬܐ ܕܬܥ̣ܒܕܘܢ ܚܦ̣ܝܛܝܢ ܐܢܬܘܢ܆ ܐܪ̈ܝܡ̣ܘ ܠܘܩܕܡ ܥܠ̣ܬܗ̇ ܕܦܠ̣ܝܓܘܬܐ ܡܢ ܡ̇ܨܥܬܐ܆ ܘܗܐ ܩܝ̣ܡܐ ܒܕܘܟܬܗ̇ ܚܕܝܘܬܐ. ܘܠܘ ܒܢ ܬ̇ܬܥܠܠܘܢ ܢܟ̣ܝܠܐܝܬ. ܘܗܫܐ ܘܐܦ ܟܕ ܥܠ ܪܥܝܢܟܘܢ ܠܓܡ̣ܪ ܠܐ ܣܠ̣ܩܬ݀ ܗܕܐ܆ ܠܡ̇ܢܐ ܠܢ ܟܠܝܘܡ ܛ̇ܠܡܝܢ ܐ̣ܢܬܘܢ ܘܥ̇ܫܩܝܢ ܐ̣ܢܬܘܢ܇ ܘܡ̇ܘܣܦܝܢ ܐ̣ܢܬܘܢ ܠܢ ܟܐ̣ܒܐ ܥܠ ܫ̣ܢ̈ܕܐ܇ ܘܐܘܠܨܢܗ̇ ܕܚܒܝܫ̣ܘܬܐ܇ ܘܫܪܟܐ ܕܐܘ̈ܠܨܢܐ ܕܕܠܐ ܕܚ̣ܠܬ ܐܠܗܐ ܡܢܟܘܢ ܣ̇ܒܠܝܢܢ܇ ܘܒܟܠ ܝܘܡ ܒܡ̈ܠܝܟܘܢ ܡܫ̇ܢܩܝܢ ܐܢܬܘܢ ܠܢ܇ ܘܟܘܒܐ ܒܫ̣̈ܘܚܢܝܢ ܡ̇ܚܝܢ ܐܢܬܘܢ܇ ܘܠܐ ܡܢ ܐܠܗܐ ܕܚ̇ܠܝܢ ܐܢܬܘܢ܇ ܕܚ̇ܙܝܢ ܐܢܬܘܢ ܕܗܐ ܡܢ ܟܕܘ ܐܘ̣ܦܝܘ ܠܗܘܢ ܚ̈ܝܝܢ܇ ܘܛܠ̣ܩܘ ܘܓܡ̣ܪܘ ܡܢ ܐܘ̈ܠܨܢܐ ܕܡܢ ܟܠ ܓ̇ܒ̈ܝܢ ܚ̣ܕܝܪܝܢ ܠܢ. ܐܢ ܐܪܐ ܚܕܝܘܬܐ ܣܝ̣ܡܝܢ ܐܢܬܘܢ ܐܝܟ ܡ̈ܠܝܟܘܢ ܒ̇ܪ̈ܝܬܐ ܠܡܥ̣ܒܕ܆ ܐ̇ܦܩ̣ܘ ܠܣܘܢܗܕܣ ܕܟܠܩܕܘܢܐ܇ ܕܗ̣ܝ ܕܠܚ̣ܬ݀ ܘܗ̣ܝ ܦܠܓ̣ܬ̇ܗ̇ ܘܣܕܩܬ̇ܗ̇ ܠܥܕܬܐ. ܐ̣ܝܟܢܐ ܕܐܦ ܠܐ ܐ̣ܢܬܘܢ ܡܫܟ̣ܚܝܢ ܟ̇ܦܪܝܢ܆ ܘܗܟܢܐ ܚܕܝܘܬܐ ܕܠܐ ܦܘ̇ܠܓܐ ܩܝ̣ܡܐ ܒܟܠܗ̇ ܥܕܬܗ ܕܐܠܗܐ.܀. ܬܘܒ ܝܘܚܢܢ ܘܕܥܡܗ ܐܡ̇ܪܝܢ܆ ܕܐܦ ܗ̣ܝ ܗܕܐ ܕܬ̇ܦ̣ܘܩ ܣܘܢܗܕܘܣ ܐܝܟ ܕܐܡ̇ܪܝܢ ܐܢܬܘܢ̣ ܐ̣ܢܬܘܢ ܡܒ̇ܛܠܝܢ. ܐܢ ܓܝܪ ܬܬ̇ܚܝܕܘܢ܆ ܡܚ̣ܕܐ ܢܦ̇ܩܐ ܘܐܦ ܣܘܢܗܕܘܣ܆ ܘܗ̇ܘܝܐ ܚܕܝܘܬܐ ܡ̇ܫܡ̣ܠܝܬܐ.܀.܀.܀. ܐܦ̈ܝܣܩܘܦܐ̣ ܐܡ̇ܪܝܢ܆ ܕܐܝܟ ܕܡܬ̇ܚܙܝܐ ܠܢ܆ ܠܣܘܢܗܕܘܣ ܕܝܠܟܘܢ ܕܬܥܒ̣ܕܘܢ ܠܢ ܕܢܬ̇ܚܝܕ ܝܨ̇ܝܦܝܢ ܐ̣ܢܬܘܢ. ܗܕܐ̣ ܕܠܐ ܬܛ̇ܥܝܟܘܢ ܐ̇ܘ ܠܐܚܪܝܢ. ܕܥܕܡܐ ܕܢܫܡ̣ܬܐ ܡܢ ܢܚܝ̣ܪ̈ܐ ܕܟܠ ܚܕ ܡܢܢ ܬ̇ܘܦܐ܆ ܚ̣ܪܡܗ̇ ܕܣܘܢܗܕܘܣ ܘܛܘܡ̣ܣܗ ܕܠܐܘܢ ܕܐܝܟ ܚ̣ܕܐ ܡ̇ܦܠܓܝܢ ܠܗ ܠܡܪܢ ܘܐܠܗܢ ܘܦܪܘܩܢ ܝܫܘܥ ܡܫܝܚܐ ܠܬܪ̈ܝܢ ܟܝ̈ܢܝܢ ܡܢ ܒܬܪ ܚܕܝܘܬܐ܆ ܠܐ ܡ̇ܘܦܐ ܡܢ ܦܘ̈ܡܝܢ.܀. ܝܘܚܢܢ ܘܕܥܡܗ ܐܡ̇ܪܝܢ܆ ܕܐܝܟ ܕܙܒ̈ܢܝܢ ܣܓ̈ܝܐܢ ܐܡ̣ܪܢ ܠܟܘܢ: ܕܚ̣ܢܢ ܘܡ̇ܪ̈ܝܢ ܡ̈ܠܟܐ܆ ܡܠܬܐ ܘܡ̈ܘ̇ܡܬܐ ܐܝܟ ܕܩܕܡ ܐܠܗܐ ܝܗ̇ܒܝܢ ܚܢܢ ܠܟܘܢ܆ ܕܒܡܬ̇ܚܝܕܢܘܬܟܘ̣ܢ ܡ̣ܚܕܐ ܡܬ̇ܒܛܠܐ ܣܘܢܗܕܘܣ. ܘܡܕܡ ܕܢ̇ܦܩ ܡܢ ܣܦ̈ܘܬܢ̣ ܠܐ ܢܫܬ̇ܚܠܦ.܀. ܐܦܝ̈ܣܩܘܦܐ ܐܡ̇ܪܝܢ. ܐܢ ܗܠܘܣ ܗܘ̈ܠܣ ܘܐܝܟ ܡ̇ܘܡ̈ܬܟܘܢ ܗܕܐ ܡ̇ܛܝ̣ܒܝܢ ܐܢܬܘܢ ܠܡܥ̣ܒܕ܆ ܠܡ̇ܢܐ ܡܕܝܢ ܡܚ̣ܕܐ ܠܐ ܥ̇ܒܕܝܢ ܐܢܬܘܢ ܠܗ̇܇ ܐ̣ܝܟܢܐ ܕܠܘ ܒܠܚܘܕ ܚܢ̣ܢ܇ ܐܠܐ ܘܟܠܢܫ ܕܠܐ ܟܫ̣ܠܐ ܢܬ̇ܚܝܕ. ܐܠܐ ܡ̇ܠܘܢ ܨ̇ܒܝܢ ܐܢܬܘܢ ܕܒܢ ܒܢܟܠ̣ܐ ܬ̇ܛܥܘܢ: ܘܕܠܗܪ̈ܣܝܣ ܕܬܪ̈ܝܝ ܟܝ̈ܢܐ ܢܬ̇ܚܝܕ܆ ܘܒܬܪܟܢ ܬܗ̣ܦܟܘܢ ܬܒ̇ܙܚܘܢ ܒܢ. ܗܕܐ ܕܐܢ ܬܣ̣ܒܪܘܢ܆ ܒܢܦܫܟܘܢ ܡܒ̇ܙܚܝܢ ܐܢܬܘܢ ܘܡ̇ܛܥܝܢ. ܚ̣ܢܢ ܓܝܪ ܝܕܥ̇ܝܢܢ܆ ܕܨܒܝܢܟܘܢ ܘܚܘ̣ܫ̈ܒܝܟܘܢ܆ ܕܠܘ ܕܚܕܝܘܬܐ ܐܢܘܢ. ܡܛܠ ܕܐܦܠܐ ܡܬ̣ܚܙܝܢ ܐܢܬܘܢ܇ ܕܫܪܪܐ ܡ̇ܡܠܠܝܢ ܐܢܬܘܢ܆ ܐܦܢ ܒܡ̈ܠܐ ܐܬ̇ܛܝܒܬܘܢ ܕܬܥ̣ܒܕܘܢ܇ ܕܢܣܬ̣ܒܪ ܡܢ ܟܠܢܫ܇ ܕܚ̣ܢܢ ܒ̇ܛܠܢܗ̇ ܠܚܕܝܘܬܐ. ܐ̣ܝܟܢܐ ܕܐܝܟ ܕܡܢ ܠܘܬܟܘܢ ܘܡܢ ܟܠܢܫ܆ ܚ̣ܢܢ ܢܬܚ̣ܪܡ ܐܝܟ ܡ̇ܒ̈ܛܠܢܐ. ܚ̣ܢܢ ܓܝܪ ܐܦ ܢܦܫ̈ܬܢ ܚܠܦ ܚܕܝܘܬܐ ܕܒ̇ܚܝܢܢ܆ ܕܟܕ ܕܐܢ ܐܪܐ ܥܠ ܡ̈ܠܝܟܘܢ ܘܫ̈ܘܘܕܝܟܘܢ ܡܬ̇ܬܟܠܝܢܢ܇ ܐܝܟ ܕܐܝܟ ܗ̇ܘ ܕܗܐ ܡܟܝܠ ܐܬܬܚ̣ܪܡܬ݀ ܠܗ̇ ܘܢܦ̣ܩܬ݀ ܣܘܢܗܕܣ܇ ܟܕ ܕܠܐ ܫܠ̣ܝܐ ܚ̣ܪܡܗ̇ ܒܦܘܡܢ ܡܫܬ̇ܘܬܦܝܢܢ ܠܟܘܢ܇ ܐܢ ܐܪܐ ܚܕܐ ܙܒ̣ܢ ܐ̇ܘ ܐܢ ܕܐܢ ܓܕ̣ܫ ܬܪ̈ܬܝܢ. ܗܝ̇ܕܝܢ ܕܬܠܬ܆ ܩܕܡ ܚ̣ܪܡܗ̇ ܘܡ̇ܦܩܬܗ̇ ܕܣܘܢܗܕܣ܆ ܠܝܬ ܠܢ ܥܡܟܘܢ ܡ̇ܢܬܐ ܘܫܘܬ̇ܦܘܬܐ̣ ܠܥܠܡ ܥܠܡܝܢ.܀.܀. ܚ̣ܢܢ ܕܝܢ ܝ̇ܕܥܝܢܢ܆ ܕܠܐ ܡܩ̣ܝܡܝܢ ܐܢܬܘܢ ܫܪܪܐ ܕܡ̈ܠܝܟܘܢ. ܘܡܛܠ ܕܬܬܓ̣ܠܐ ܘܬܬ̣ܝܕܥ ܠܟܠܢܫ: ܕܠܘ ܚܕܝܘܬܐ ܐܬ̇ܛܝܒܬܘܢ ܕܬܥܒ̣ܕܘܢ: ܐܠܐ ܕܬܣ̣ܒܪܘܢ ܕܒܢ ܘܒܟܠܢܫ ܬ̇ܛܥܘܢ܆ ܗܐ ܡܟܝܠ ܡ̇ܫܠܡ̣ܝܢܢ ܢܦܫ̣ܢ ܠܚ̣ܘܝܕܐ ܕܠܘܬܟܘܢ܇ ܐܢ ܐܪܐ ܥܕܡܐ ܠܬܪ̈ܬܝܢ ܙܒ̈ܢܝܢ. ܗܠܝܢ ܥܡ ܣܓܝܐ̈ܬܐ ܕܕܠܐ ܣ̣ܟܐ ܐ̈ܢܝܢ܆ ܘܐܬ̇ܡܠܠ̣ ܘܐܣܬ̣ܗܕ ܘܐܬ̇ܡܠܠܘ̣ ܘܐܣܬ̣ܗܕܘ ܒܝܢܬܗܘܢ. ܘܗܟܢܐ ܗ̣ܢܘܢ ܐ̈ܦܝܣܩܦܐ ܫܠܡ̣ܘ ܟܕ ܐܡ̇ܪܝܢ܆ ܕܚ̣ܢܢ ܡܛܠ ܥ̣ܫ̈ܘܩܝܐ ܕܥܠܝܢ ܕܡܢ ܣܘܢܗ̈ܕܝܛܐ܇ ܗܐ ܡ̇ܫܠܡܝܢܢ ܢܦܫ̈ܬܢ܆ ܕܬ̣ܬܝܕܥ̣ ܕܠܘ ܚ̣ܢܢ ܡܒ̇ܛܠܝܢܢ. ܟܠܢܫ ܓܝܪ ܥܠܝܗܘܢ ܡ̇ܓܕܦ ܗܘܐ: ܡܢ ܬܪ̈ܝܗܘܢ ܓ̇ܒ̈ܐ ܟܕ ܐܡ̇ܪܝܢ܆ ܕܗܐ ܠܡ ܡ̈ܠܟܐ ܘܦܛܪܝܪܟܐ ܝܨ̇ܝܦܝܢ ܘܚܦ̣ܝܛܝܢ ܘܡ̇ܛܝ̣ܒܝܢ ܕܢܥ̣ܒܕܘܢ ܚܕܝܘܬܐ܆ ܘܗܠܝܢ ܕܚܒܝ̣ܫܝܢ ܟ̇ܠܝ̣ܢ ܘܡ̇ܥܟܪܝܢ ܠܗܘܢ. ܐ̣ܝܟܢܐ ܕܡܛܠ ܗܠܝܢ ܟܘܠܗܝܢ܆ ܐܫܠܡ̣ܘ ܢܦ̈ܫܬܗܘܢ ܒܚܫܐ ܪܒܐ. ܘܟܕ ܒܩܠܐ ܪܡ̇ܐ ܡ̇ܚܪܡܝܢ ܠܣܘܢܗܕܘܣ ܕܟܠܩܕܘܢܐ܆ ܐܬ̣ܪ̈ܡܝܘ ܠܫܘܬ̇ܦܘܬܗܘܢ ܬܪ̈ܬܝܢ ܙܒ̈ܢܝܢ: ܐܝܟ ܕܐܫܬ̇ܘܕܝܘ ܘܐܦ̣ܣܘ܆ ܘܐܟ̣ܣܘ ܟܕ ܡܟܝܠ ܚ̣ܪܡܗ̇ ܘܡ̇ܦܩܬܗ̇ ܕܣܘܢܗܕܘܣ ܡܢ ܗܠܝܢ ܕܒܦܣ̇ܩܐ ܕܡ̈ܘ̇ܡܬܐ ܣܓܝܐ̈ܬܐ܇ ܒܟܠܗܘܢ ܗܠܝܢ ܬܠܬܝܢ ܘܬܠܬܐ ܝܘ̈ܡܝܢ܇ ܚ̇ܨܝܦܐܝܬ ܬܒ̇ܥܝܢ ܗܘܘ ܡܢ ܡ̇ܠܟܐ ܘܡܢ ܦܛܪܝܪܟܐ.܀. ܘܟܕ ܗܠܝܢ ܫ̇ܪܝܘ ܡ̇ܗܦܟܝܢ ܡ̈ܠܝܗܘܢ: ܘܒܥ̈ܠ̣ܠܬܐ ܪܡ̇ܝܢ ܗܘܘ ܠܗܘܢ ܟܕ ܐܡ̇ܪܝܢ: ܕܟܬ̇ܒܝܢ ܚܢܢ ܠܡ ܠܦܦܐ ܕܪܗܘܡܐ: ܘܐܢ ܡܩ̇ܒܠ܆ ܗ̇ܝ ܕܝܢ ܡ̇ܦܩܝܢܢ ܠܗ̇ ܠܣܘܢܗܕܣ: ܠܐ ܓܝܪ ܠܡ ܡܫ̣ܟܚܝܢܢ ܕܡܛܠܬܟܘܢ ܢܣ̣ܕܘܩ ܡܢ ܪܗܘܡܐ܆ ܘܗܝ̇ܕܝܢ ܦܢ̇ܝܘ ܠܗܘܢ̣ ܟܕ ܐܡ̇ܪܝܢ. ܕܡܟܝܠ ܙܒܢܐ ܘܐܦ ܠܢ ܕܡܠܬܗ ܕܝܘܢܢ ܢܒܝܐ ܢܬ̣ܢܐ܆ ܕܠܘ ܠܡ ܗܕܐ ܗܘܬ ܡܠܬܝ ܟܕ ܐܢܐ ܒܐܪܥܝ܆ ܘܗܟܢܐ ܐܬܝ̣ܕܥܬ݀ ܘܐܬܓܠ̣ܝܬ݀ ܠܟܠܢܫ܆ ܕܠܘ ܗܠܝܢ ܕܚܒ̣ܝܫܝܢ ܗܘܘ ܘܣ̇ܒܠܝܢ ܐܘ̈ܠܨܢܐ ܡ̇ܖ̈ܝܪܐ: ܐ̣ܝܬܝܗܘܢ ܗܘܘ ܡ̇ܒ̈ܛܠܢܝܗ̇ ܕܚܕܝܘܬܐ: ܐܠܐ̣ ܘܕܢܦܫܗܘܢ ܚܠܦܝܗ̇ ܐܫܠ̣ܡܘ. ܐܠܐ ܗܠܝܢ ܕܫܠܝܛܝܢ ܘܥܫ̇ܩܝܢ ܗܘܘ ܠܗܘܢ܇ ܕܓ̇ܠܘ ܒܫܘܘ̈ܕܝܝܗܘܢ ܘܒܡ̈ܘ̇ܡܬܗܘܢ ܕܠܘܬܗܘܢ܇ ܟܕ ܒ̇ܥܝܢ ܕܟܠܗ ܟܫܠ̣ܐ܇ ܘܠܘ ܒܠܚܘܕ ܕܗܠܝܢ ܒ̈ܢܝ ܙܒܢܐ܇ ܐܠܐ ܘܕܕܪ̈ܐ ܕܐܬ̇ܝܢ ܒܬܪܗܘܢ ܕܐܦܝ̈ܣܩܘܦܐ ܢܪܗ̇ܛܘܢ܇ ܐܝܟ ܗ̇ܘ ܕܗ̣ܢܘܢ ܥ̇ܟܪܘܗ̇ ܘܒ̇ܛܠܘܗ̇ ܠܚܕܝܘܬܐ ܕܥܕܬܗ ܕܐܠܗܐ܇ ܐܠܘ ܠܐ ܕܗܠܝܢ ܢܦܫܗܘܢ ܠܐ ܕܒ̣ܚܘܢ ܚܠܦܝܗ̇: ܐܦܢ ܐܬ̇ܕܓܠ ܒܗܘܢ.