ܪܝܫܐ ܕܚܡܫܬܥܣܪ̈܆ ܕܥܠ ܐܠܝܫܥ ܐܦܝܣܩܘܦܐ. ܏ܝܗ ܬܘܒ ܕܝܢ ܟܕ ܐܦ ܠܣܒܐ ܗܢܐ ܐܠܝܫܥ ܐܦܝܣܩܦܐ: ܫ̣ܕܪ ܘܕܒ̣ܪܗ ܡܢ ܕܝܪܐ ܕܚܒ̣ܝܫ ܗܘܐ ܒܗ̇ ܕܡܬ̇ܩܪܝܐ ܕܒܝܬ ܕܝܘ̣ܣ: ܘܚܒ̣ܫܗ ܐܦ ܠܗ ܒܒܝܬ ܐܦܝܣܩܦܝܘܢ ܕܝܠܗ: ܘܡܢ ܐܘܠܨܢܐ ܣܓܝܐܐ ܕܢܬܬ̣ܪܡܐ ܠܫܘܬ̇ܦܘܬܗ ܡܢ ܐ̇ܢܢܩܐ ܥܒ̣ܕܘܗܝ: ܗܝܕܝܢ ܗ̣ܘ ܡܬܦܪܣ ܗܘܐ܆ ܕܐܦܢ ܗܟܢܐ ܐܢ ܡܨ̣ܝܐ̣ ܠܡܬ̇ܦܠܛܘ ܡܢ ܐ̣ܝ̈ܕܘܗܝ. ܗ̣ܘ ܕܝܢ ܨܒ̣ܐ ܕܢܫ̇ܕܪܗ܆ ܠܣ̣ܪܕܐ ܠܣ̣ܕܪܐ ܡܛܪ̣ܦܘܠܝܣ ܕܠܘܕܝܐ. ܘܟܕ ܨܒ̣ܐ ܕܢܫ̣ܪܝܘܗܝ ܡܢ ܐܦܝܣܩܘܦܘܬܗ: ܘܡܢ ܕܪܝܫ ܢܥܒ̣ܕܝܘܗܝ ܐܦ ܠܗ܆ ܗ̣ܘ ܐܬܚ̣ܪܝ ܠܩܘܒܠܗ̣ ܟܕ ܐܡ̇ܪ. ܕܐܢܐ ܐܦܢ ܠܐ ܫ̇ܘܐ ܐܢܐ܆ ܐܦܝܣܩܦܐ ܥܒ̣ܝܕ ܐܢܐ ܡܢ ܐܪ̈ܬܕܘܟܣܘ. ܘܐܢܬ ܠܝ ܠܓܡ̣ܪ ܡܢ ܕܪܝܫ ܠܐ ܥ̇ܒܕܬ. ܐܢ ܕܝܢ ܘܣ̇ܒܪܬ ܕܕܛܟ̣ܣܐ ܐ̣ܝܬܝܗ̇ ܗܕܐ: ܕܬܫ̣ܪܝܢܝ ܘܬ̇ܥܒ̣ܕܢܝ ܡܢ ܕܪܝܫ܆ ܡܕܝܢ ܫ̣ܪܝܢܝ ܠܘܩܕܡ ܡܢ ܡ̇ܥܡܘܕܝܬܐ ܕܥ̇ܡܝܕ ܐܢܐ܆ ܘܗ̇ܝܕܝ̣ܢ ܒܗܝ̇ ܕܬܪ̈ܬܝܢ ܐܬ̇ܚܫܚ. ܐܡ̇ܪ ܠܗ ܗ̣ܘ ܢܟܝ̣ܠܐܝܬ. ܕܐܢܐ ܠܡ ܡܥ̣ܦܪܐ ܒܠܚܘܕ ܪܡ̇ܐ ܐܢܐ ܠܟ.܀ ܗ̣ܘ ܕܝܢ ܟܕ ܠܓܡ̣ܪ ܠܐ ܐܬ̣ܛܦܝܣ ܘܐܬ̣ܪܡܝ ܠܗ ܘܠܐ ܩ̇ܒܠ ܡ̈ܠܘܗܝ܆ ܪܓ̣ܙ ܥܠܘܗܝ ܘܫ̣ܕܪ ܚܒ̣ܫܗ ܒܕܝܪܐ ܐܚܪܬܐ ܕܡܬ̇ܩܪܝܐ ܕܒܝܬ ܐܒܪܗܡ܆ ܘܓ̣ܙܪ ܕܝܢ̣ܐ ܩܫ̣ܝܐ ܐܬ̣ܓܙܪ ܥܠܘܗܝ. ܘܗ̣ܘܐ ܬܡ̇ܢ ܒܐܘܠܨܢܐ̣ ܙܒܢܐ ܣܓܝܐܐ. ܘܗܟܢܐ ܒܟ̣ܘܪܗܢܐ ܩܫ̣ܝܐ ܢܦ̣ܠ܆ ܘܫ̣ܐܠ ܕܢ̣ܐܙܠ ܠܚܡ̇ܝܡܬܐ܆ ܘܐܫ̣ܬܪܝ ܥܡ ܢ̇ܛܘܪ̈ܐ. ܪܝܫܐ ܕܫܬܬܥܣܪ̈܆ ܕܥܠ ܐܣ̣ܛܦܢܐ ܐܦܝܣܩܦܐ܇ ܕܨ̣ܒܐ ܗ̣ܘ ܝܘܚܢܢ ܕܢܫ̣ܪܝܘܗܝ ܬܘܒ܇ ܘܐܦ ܠܗ ܡܢ ܕܪܝܫ ܢܥܒ̣ܕܝܘܗܝ. ܏ܝܘ ܟܕ ܗܟܝܠ ܗ̣ܘ ܥܫܝܢܐ ܝܘܚܢܢ ܡܫ̇ܩܠܐܝܬ ܡܬ̣ܬܪܝܡ ܗܘܐ: ܠܡ̣ܕܫ ܘܠܡܥ̣ܒܪ ܠܟܠܗܘܢ ܛܟ̈ܣ̣ܐ ܥܕ̈ܬܢܝܐ: ܫ̣ܕܪ ܠܓܙܪܬܐ ܕܡܬ̇ܩܪܝܐ ܦܠ̣ܛܝܐ: ܕܒܗ̇ ܐܫ̣ܬܕܝ ܗܘܐ ܡܢܗ ܗ̣ܘ ܐ̣ܣܛܦܢܐ ܐܦܝܣܩܘܦܐ: ܚܕ ܡܢ ܗܠܝܢ ܕܚܠܝ̣ܡܐܝܬ ܐ̇ܟ̣ܣܘܗܝ ܗܘܘ ܩܕܡ ܩܠܝܠ: ܡܛܘܠ ܫ̇ܪܝܐ ܕܟܪܛܘܢܝܐ܆ ܥܠ ܗܢܐ ܫ̣ܕܪ ܩܠ̣ܝܪ̈ܝܩܘ ܘܣܩ̣ܘܒܝܛܘܪ̈ܣ. ܘܦܩ̣ܕ ܠܗܘܢ܆ ܕܐܣ̣ܦܪܣܬܝܢܐ α ܢܥܒ̣ܕܘܢܝܗܝ̣ ܥܕܡܐ ܕܓ̇ܣܐ ܕܡܐ܇ ܐܠܐ ܡܬ̣ܛܦܝܣ ܠܫܘܬ̇ܦܘܬܗܘܢ. ܘܗܟܢܐ ܡܢ ܬܪܥܣܪ̈ ܐܣܩ̣ܘܒܝܛܘܪ̈ܣ ܐܣ̣ܦܪܣܬܝܢܐ ܐܣ̣ܦܖ̈ܣܬܝܢܐ ܗ̣ܘܐ ܗܘܐ܆ ܥܕܡܐ ܕܢܦ̣ܠ ܒܝܢܬܗܘܢ ܘܐܫܬ̇ܬܩ܇ ܘܡܢ ܟܕܘ ܡ̣ܝܬ ܗܘܐ ܠܗ. ܐ̣ܝܟܢܐ ܕܟܕ ܚ̣ܙܘ ܕܢܦ̣ܠ ܗܘܐ ܘܐܫܬ̇ܬܩ ܘܡ̇ܛܝ ܥܕܡܐ ܠܡ̇ܘܬܐ܆ ܪ̈ܗ̣ܛܘ ܘܐܝܬ̣ܝܘ ܐܪ̈ܒܥ ܩ̈ܘܠܐ ܡ̈ܝܐ܆ ܘܢܦ̣ܨܘ ܠܥܠ ܡܢܗ. ܘܗ̇ܝ ܕܝܢ ܡܢ ܒܬܪ ܥܕܢܐ ܣܓܝܐܐ܆ ܐܬ̣ܬ ܥܠܘܗܝ ܢܦܫܗ܇ ܘܐܝܟ ܕܡܢ ܡ̈ܝ̣ܬܐ ܚ̣ܝܐ. ܘܗܟܢܐ ܡܢ ܐ̇ܢܢܩܐ܇ ܐܬܬ̣ܪܡܝ ܠܫܘܬ̇ܦܘܬܐ ܕܥܡܗܘܢ. ܘܝܬ̇ܝܪܐܝܬ ܕܐܬܝ̣ܕܥܬ݀ ܐܢ̈ܫܝܢ ܡܢ ܡܗ̈ܝܡܢܐ ܕܡ̇ܫܕܪܝܢ ܗܘܘ ܠܗ ܣܘܢ̣ܩܢܗ܇ ܘܐܬܠ̣ܒܟܘ ܘܐܬܚ̣ܒܫܘ ܡܛܠܬܗ܇ ܘܡ̇ܛܝ̣ܒܝܢ ܗܘܘ ܕܢܦ̣ܠܘܢ ܥܠܝܗܘܢ ܘܢܒ̣ܙܘܢ ܐܢܘܢ. ܘܗܟܢ ܫܩܠ̣ܘܗܝ ܘܥܠ̣ܘ ܠܡܕܝܢܬܐ܆ ܘܣܓܝܐ̈ܬܐ ܐܬܬܙܝܥ ܐܬܬܙܝܥܘ ܒܝܢܬܗܘܢ. ܘܡܢ ܐ̈ܢܢܩܐ ܐܫܬ̇ܘܬܦ ܥܡܗܘܢ. ܘܒܬܪܟܢ ܬܒ̇ܥ ܗܘܐ ܠܗ ܗ̣ܘ ܝܘܚܢܢ ܕܢܫ̣ܪܝܘܗܝ܆ ܘܡܢ ܕܪܝܫ ܢܥܒ̣ܕܝܘܗܝ ܐܦܝܣܩܦܐ ܠܩ̣ܘܦܪܘܣ ܓܙܪܬܐ. ܗ̣ܘ ܕܝܢ ܟܕ ܢܨ̇ܐ ܥܡܗ: ܘܡܬܚ̣ܪܐ ܠܩ̣ܘܒܠܗ܆ ܥܒ̣ܕ ܣ̣ܛܣܝܣ ܘܫ̇ܪܝ ܩ̇ܥܐ ܐ̣ܘܒܝܐ. ܕܐܢ ܕܬܫ̣ܪܝܢܝ ܠܡ ܡܢ ܟܗܢܘܬܐ ܕܐܪ̈ܬܕܟܣܘ ܘܬܥܒ̣ܕܢܝ ܡܢ ܕܪܝܫ ܨ̇ܒܝܬ܆ ܫ̣ܪܝܢܝ ܠܘܩܕܡ ܘܐܦ ܡܢ ܡ̇ܥܡܘܕܝܬܐ܆ ܘܐ̇ܥܡ̣ܕܝܢܝ ܡܢ ܕܪܝܫ ܠܘܩܕܡ܆ ܘܗ̇ܝܕܝܢ ܬܫ̣ܪܝܢܝ ܡܢ ܟܗܢܘܬܐ܇ ܘܟܗܢܐ ܡܢ ܕܪܝܫ ܬܥܒ̣ܕܝܢܝ. ܚ̣ܝ ܗܘ ܓܝܪ ܡܪܝܐ ܐܠܗܐ܆ ܕܐܠܐ ܐܢ ܐ̇ܥܡ̣ܕܬܢܝ ܡܢ ܕܪܝܫ܆ ܠܥܠܡ ܥܠܡܝ̣ܢ ܠܐ ܡܩ̇ܒܠ ܐܢܐ.܀.܀. ܘܗܟܢܐ ܟܕ ܣ̣ܛܣܝܣ ܪܒܬܐ ܗܘ̣ܬ ܒܝܢܬܗܘܢ ܒܥܕܬܐ: ܘܟܢ̣ܫܘ ܣܓ̈ܝܐܐ܆ ܗ̣ܘ ܐܣ̣ܛܦܢܐ ܒܚܐ̣ܦܐ ܪܗ̣ܛ ܘܥ̣ܠ ܠܘܬ ܡ̇ܠܟܐ. ܟܕ ܫ̇ܓܫ ܘܐܦ ܥܠܘܗܝ ܘܩ̇ܥܐ ܐ̣ܘܒܝܐ̣ ܘܐܡ̇ܪ. ܕܐ̣ܒܕܬ݀ ܠܗ̇ ܟܪܣܛܝܢܘܬܐ. ܐܬܚ̣̇ܒܠܘ ܠܗܘܢ ܛܟ̣ܣ̈ܝܗ̇ ܕܥܕܬܐ ܕܟܪ̈ܣܛܝܢܐ. ܐܬ̇ܒ̣ܠܒܠܘ ܘܐܬ̣ܕܝܫܘ ܘܐܬ̇ܚܒܠܘ ܟܘܠܗܘܢ ܛܟ̣ܣ̈ܝܗ̇ ܘܩ̈ܢܘܢܝܗ̇ ܕܥܕܬܐ ܕܐܠܗܐ.܀. ܡ̇ܢܐ ܗܘ ܪܘܫ̣ܥܐ ܗܢܐ܇ ܕܕܠܐ ܢܡ̇ܘܣ܇ ܕܟܗܢܘܬܐ ܕܟܪ̈ܣܛܝܢܐ ܐܪ̈ܬܕܟܣܘ ܡܫܬ̇ܪܝܐ܇ ܡܢ ܗܠܝܢ ܕܗܫܐ ܐ̇ܚ̣ܝܕܝܢ܇ ܘܐܚܪܬܐ ܡܢ ܕܪܝܫ ܚܠܦܝܗ̇ ܡܬ̇ܥܒܕܐ. ܗܐ ܓܝܪ ܥܣܪ̈ܝܢ ܠܝ ܫ̈ܢܝܢ܇ ܕܟܕ ܠܐ ܫ̇ܘܐ ܐܢܐ ܥܒ̣ܝܕ ܐܢܐ ܡܢ ܐܪ̈ܬܕܟܣܘ ܩܢܘܢܐܝܬ ܐܦܝܣܩܦܐ܇ ܒܦܘܩܕܢܗ ܕܬܐܕܘܣܝܘܣ ܦܛܪܝܪܟܐ ܕܐ̣ܠܟܣܢܕܪܝܐ. ܘܗܫܐ ܕܝܗ̇ܒܬ ܢܦܫܝ ܘܐܬ̣ܪܡܝܬ ܠܟܘܢ: ܟܕ ܡ̇ܪܫܥ ܗܢܐ ܐܝܟ ܕܐܦ ܠܣ̈ܓܝܐܐ ܥܒ̣ܕ܆ ܨ̇ܒܐ ܕܐܦ ܠܝ ܢܫ̇ܪܝܢܝ ܡܢ ܟܗܢܘܬܐ ܕܐܪ̈ܬܕܘܟܣܐ̣ ܘܒܕܝܠܗ ܡܢ ܕܪܝܫ ܢܥ̣ܒܕܢܝ. ܢܚ̇ܘܐ ܡܢ ܐܝܠܝܢ ܩ̈ܢܘܢܐ ܗܢܐ ܝܠ̣ܦ ܗܕܐ܆ ܐ̇ܘ ܕܟܕ ܠܐ ܐ̣ܪܓܫ ܘܐ̣ܝܕܥ ܐܢܘܢ ܠܩ̈ܢܘܢܐ ܥܕ̈ܬܢܝܐ܆ ܐ̇ܘ ܕܐܦ ܟܕ ܝ̣ܕܥ ܐܢܘܢ ܦܣ̇ܥ ܥܠܝܗܘܢ ܘܕܐ̇ܫ ܠܗܘܢ ܒܡ̇ܫܩܠܘܬܗ ܘܒܚ̣ܬܝܪܘܬܗ ܘܒܛ̇ܥܝܘܬܗ. ܘܐܢ ܡܢܟ ܗܘ ܗܢܐ ܦܘܩܕܢܐ: ܘܒܐܝ̣ܕܥܬܟ ܗܠܝܢ ܥ̇ܒܕ܆ ܢ̣ܕܥ ܟܠܢܫ. ܕܬܗܘܐ ܬܗܘܐ ܝ̇ܕܥ ܕܝܢ܆ ܕܐܦ ܒܬܪ ܡ̇ܠܟܘܬܟ ܒ̇ܥܐ ܕܢ̇ܪܗ̣ܛ ܥ̣ܕ̈ܠܝܐ ܘܡ̇ܪ̈ܫܘܬܐ ܕܩ̈ܢܘܢܐ܇ ܘܥܡܗ ܕܢܚܫ̣ܒܟ ܕܢܚܒ̣ܫܟ ܡܬ̇ܛܟܢ܇ ܒܥ̣ܒܪ ܢܡ̈ܘܣܐ ܥܕ̈ܬܢܝܐ. ܘܐܢ ܡ̇ܢ ܒܐ̣ܝܕܥܬܟ ܘܒܦܘܩܕܢܟ ܫ̇ܪܐ ܟܗܢܘܬܐ: ܘܡܢ ܕܪܝܫ ܗ̣ܘ ܐܚܪܬܐ ܥ̇ܒܕ܆ ܦܩ̣ܘܕ ܠܗ ܡܕܝܢ܆ ܕܐܦ ܡ̇ܥܡܘܕܝܬܐ ܢܫ̣ܪܐ܆ ܘܡܢ ܕܪܝܫ ܢܥ̇ܡܕ܆ ܘܗ̇ܝ ܕܝܢ ܡܢ ܕܪܝܫ̣ ܢܥ̣ܒܕ ܟܗ̈ܢܐ. ܐܦ ܓܝܪ ܩܢܘܢܐ ܕܬܫܬܥܣܪ̈ ܕܬܠܬܡܐܐ ܘܬܡܢܬܥܣܪ̈ ܐܒܗ̈ܬܐ: ܥܠ ܗܪܣܝܣ ܡ̇ܚܒܠܬܐ ܕܒܝܬ ܦܘܠܐ ܫܡܝ̣ܫܛܝܐ ܘܫܪܟܐ ܕܐܟܘܬܗ: ܕܡܢ ܕܪܝܫ ܢܥ̣ܡܕܘܢ ܦܩ̇ܕ܆ ܘܗܝ̇ܕܝܢ ܡܢ ܕܪܝܫ ܐܝܠܝܢ ܕܫ̇ܘܝܢ ܡܢܗܘܢ ܕܢܗܘܘܢ ܟܗ̈ܢܐ. ܘܗܕܐ ܡܛܠ ܒܝ̣ܫܘܬܗ̇ ܕܗܪܣܝܣ ܕܝܠܗܘܢ. ܗܫܐ ܕܝܢ ܗܢܐ܆ ܢܚ̇ܘܐ ܡ̇ܢ ܠܘܩܕܡ ܕܐܝܟ ܕܡܢ ܐ̇ܝܕܐ ܥܠ̣ܬܐ ܐܬ̣ܐ ܠܗܕܐ܇ ܘܕܢܫ̣ܪܐ ܘܢܥܒ̣ܕ ܠܢ ܡܢ ܕܪܝܫ ܐܙܕܘ̣ܙܝ ܒܡ̇ܫܩܠܘܬܗ.܀܀܀ ܐ̣ܝܟܢܐ ܕܟܕ ܗܠܝܢ ܫܡ̣ܥ ܡ̇ܠܟܐ: ܘܐ̇ܕܪ̣ܟ ܕܒܘ̇ܠܝܬܐ ܪܫ̇ܐ: ܘܩܢܘܢܐܝܬ ܡ̣ܪܝܒ ܥܠܘܗܝ ܐܣ̣ܛܦܢܐ܆ ܬܘ̣ܗ ܬܘ̣ܗ̇ ܐܝܟ ܕܡܢ ܫܢ̣ܬܐ ܥܡܝ̣ܩܬܐ܆ ܘܥ̣ܕܠ ܘܐܦ ܗ̣ܘ ܘܐ̇ܣ̣ܠܝܗ ܠܥܒ̇ܕܐ ܗܢܐ̣ ܟܕ ܐܡ̇ܪ. ܕܒܫܪܪܐ ܕܒܝ̣ܫܐܝܬ ܘܕܠܐ ܢܡ̇ܘܣ܆ ܘܠܒܪ ܡܢ ܟܠܗ ܛܟ̣ܣܐ ܕܥܕܬܐ ܐ̣ܝܬܝܗ̇ ܗܕܐ܇ ܕܟܗܢܘܬܐ ܬܫ̣ܬܪܐ ܘܡܢ ܕܪܝܫ ܬ̇ܗܘܐ܆ ܘܫܟܝ̣ܪܐ ܗܝ̣ ܘܛܒ ܢܘܟܪܝܐ ܠܟܠܗܘܢ ܛ̣ܟ̈ܣܝܗ̇ ܕܥܕܬܐ. ܘܗ̇ܝܕܝܢ ܦܩ̣ܕ܆ ܕܬܘܒ ܗܕܐ ܒܥܕܬܗ ܕܐܠܗܐ ܠܓܡ̣ܪ̣ ܠܐ ܬܗܘܐ. ܘܡ̣ܚܕܐ ܘܛܘ̣ܦܘܣ ܦܪܓܡ̇ܛܝܩܘܢ ܥ̣ܒܕ܇ ܕܠܐ ܢܗܘܐ ܫܠܝܛ ܠܐܢܫ ܕܬܘܒ ܢܡ̇ܪܚ ܥܠ ܫ̣ܪܝܐ ܕܟܗܢܘܬܐ܇ ܐܠܐ ܐܢ ܓ̣ܕܫ ܕܠܗܪ̈ܣܝܣ ܐܝܠܝܢ ܕܦܩ̇ܕܝܢ ܩ̈ܢܘܢܐ. ܘܐܢ ܡܫܬ̇ܟܚܝܢ ܐܦܝ̈ܣܩܘܦܐ ܕܥ̇ܒܕܝܢ ܠܗ̇ ܠܗܕܐ܆ ܬ̇ܗܘܐ ܩ̇ܬܪܣܝܣ ܕܝܠܗܘܢ̣ ܘܢ̇ܫ̣ܬܕܘܢ ܠܐܟ̣ܣܘܪܝܐ. ܐ̣ܝܟܢܐ ܕܟܕ ܗܕܐ ܗܘ̣ܬ: ܘܝ̣ܕܥ ܕܦܘܩܕܢܐ ܚ̇ܪܝܦܐ ܐܬܦ̣ܩܕ܆ ܐܬ̇ܦܪܣ ܗ̣ܘ ܝܘܚܢܢ ܘܒ̈ܢܝ ܡܠ̣ܟܗ ܕܢܬ̣ܠܘܢ ܫܘܚܕܐ܆ ܕܢܫܬ̣ܩܠ ܛܘ̣ܦܘܣ ܗ̇ܘ ܕܡܛܠ ܗܕܐ ܗ̣ܘܐ ܡܢ ܡ̇ܨܥܬܐ܆ ܘܠܐ ܬܘܒ ܢܬܚ̣ܙܐ.܀.܀.܀. ܒܥܠܕܒܒܘܬܐ ܕܝܢ ܪܒܬܐ ܗ̣ܘܬ ܒܝܬ ܝܘܚܢܢ ܠܐܣ̣ܛܦܢܐ ܡܢ ܥ̣ܠܬܐ ܗܕܐ̣ ܟܠܗܘܢ ܝܘܡ̈ܬܗܘܢ. ܪܝܫܐ ܕܫܒܬܥܣܪ̈܆ ܥܠ ܗ̇ܝ ܕܐܫܬܕܪܘ ܘܐܬܩ̣ܪܝܘ ܐܦܝ̈ܣܩܦܐ ܡܢ ܕܝܪ̈ܬܐ ܘܕܘ̈ܟܝܬܐ ܕܚܒ̣ܝܫܝܢ ܗܘܘ ܒܗܝܢ. ܏ܝܙ ܒܚ̣ܘܫܒܐ ܗܟܝܠ ܢܟܝ̣ܠܐ ܘܕܕܓ̇ܠܘܬܐ ܡ̇ܛܥܝܢܝܬܐ܇ ܐܝܟ ܡܐ ܕܗ̣ܘ ܣܘ̣ܥܪܢܐ ܐ̇ܠ̣ܦ ܒܚܪܬܐ܇ ܫ̣ܕܪ ܗ̣ܘ ܝܘܚܢܢ ܥܡ ܟܠܗܘܢ ܒ̈ܢܝ ܡܠ̣ܟܗ܆ ܘܐܝܬ̣ܝܘ ܐܢܘܢ ܠܐܦܝ̈ܣܩܘܦܐ ܗܠܝܢ ܕܡܢܗ ܫ̣ܕܝܢ ܗܘܘ ܠܐܟ̣ܣܘܪܝܐ܇ ܒܕܝܪ̈ܬܐ ܘܒܕܘ̈ܟܝܬܐ ܐܚܪ̈ܢܝܬܐ. ܟܕ ܡ̇ܛܥ̣ܝܢ ܒܗܘܢ܆ ܕܐܝܟ ܕܢܡ̇ܠܠܘܢ ܥܡܗܘܢ ܡܛܠ ܚܕܝܘܬܐ ܐܝܬ̣ܝܘ ܐܢܘܢ. ܟܕ ܠܘܩܕܡ ܠܦܘܠܘܣ ܦܛܪܝܪܟܐ܆ ܡܢ ܕܝܪܐ ܕܐܩ̣ܝܡܛܘܢ ܫ̣ܕܪ ܫܩ̣ܠ܆ ܘܚܒ̣ܫܗ ܒܒܝܬ ܐܦܝܣܩܦܝܘܢ ܕܝܠܗ. ܘܠܗܠܝܢ ܕܫܪܟܐ܆ ܚܕ ܒܬܪ ܚܕ ܐܝܬ̣ܝ ܘܚܒ̣ܫ ܐܢܘܢ ܠܘܬܗ. ܗ̇ܢܘ ܕܝ̣ܢ. ܠܦܘܠܘܣ ܘܠܝܘܚܢܢ ܘܠܐܣ̣ܛܦܢܐ̣ ܘܠܐ̣ܠܝܫܥ. ܟܕ ܠܘܩܕܡ ܐܨܛ̇ܢܥܘ ܘܐܬ̇ܡܠܟܘ܆ ܘܫ̣ܕܪܘܢ ܠܗܘܢ ܟܪܛܝܣܐ ܚܕ ܕܟܬ̣ܝܒ ܗܘܐ ܒܗ܇ ܥܠ ܚܕܝܘܬܐ ܕܗ̣ܘܬ ܒܝܬ ܩܘܪܝܠܘܣ ܕܐܠ̣ܟܣܢܕܪܝܐ ܘܠܝܘܚܢܢ ܕܐܢܛܝܟܝܐ. ܟܕ ܫܠ̣ܚܘܢ ܠܘܬܗܘܢ ܠܒܝܬ ܚܒܘ̣ܫܝܗܘܢ܆ ܕܐ̇ܢܢܩܐ ܠܟܘܢ̣ ܕܐܝܟ ܗܕܐ ܚܕܝܘܬܐ ܕܗ̣ܘܬ ܒܝܬ ܩܘܪܝܠܘܣ ܘܠܝܘܚܢܢ܆ ܕܐܦ ܐ̣ܢܬܘܢ ܬ̇ܬܚܝܕܘܢ ܥܡܢ.܀. ܐ̣ܝܟܢܐ ܕܟܕ ܗܠܝܢ ܩ̇ܒܠܘܢ ܘܐܬ̇ܒܝܢܘ ܒܝܢܬܗܘܢ ܘܐ̇ܗ̣ܠܘ ܒܛ̇ܪܟܢܘܬܗܘܢ܆ ܫܠ̣ܚܘ ܠܗܘܢ̣ ܕܫܦܝܪ ܐܬ̇ܡܠܟܬܘܢ. ܘܚ̣ܢܢ ܗܟܝܠ ܡܐ ܕܥ̣ܒܕܢ ܘܫ̇ܡܠܝ̣ܢ ܐܝܟ ܕܥܒ̣ܕ ܩܘܪܝܠܘܣ: ܘܐ̇ܚ̣ܪܡܢ ܘܐ̇ܦ̣ܩܢ ܘܫ̣ܕܝܢܗ̇ ܠܒܪ ܡܢ ܥܕܬܗ ܕܐܠܗܐ ܠܣܘܢܗܕܣ ܕܟܠܩܕܘܢܐ: ܐܝܟ ܡܐ ܕܐܦ ܩܘܪܝܠܘܣ ܠܪܫ̣ܝܥܐ ܢܣܛܘܪܝܘܣ܆ ܥܠ ܗܠܝܢ ܕܫ̣ܪܟܐ ܕܗ̈ܘ̣ܝ ܒܝܢ̣ܝܢ ܘܠܟܘܢ̣ ܠܐ ܡܬܚ̣ܪܝܢ ܚܢܢ ܥܡܟܘܢ. ܐܠܐ̣ ܘܕܠܐ ܟ̣ܠܝܢ ܡ̇ܬܚܝܕܝܢܢ ܠܟܘܢ. ܐܢ ܕܝܢ ܘܗ̇ܝ ܕܥܒ̣ܕ ܩܘܪܝܠܘܣ ܠܐ ܫܦܝܪܐ ܠܟܘܢ ܕܬܣܬ̣ܥܪ ܡܢܢ܆ ܐ̇ܝܟܢܐ ܘܒܐ̇ܝܢܐ ܙܢ̣ܐ ܐܪܐ܇ ܡܬ̇ܛܟܢܝܢ ܐܢܬܘܢ ܠܢ ܕܚܕܝܘܬܐ ܕܝܠܗ ܘܕܝܘܚܢܢ ܕܗܘ̣ܬ ܒܚܪܬܐ ܬܬܒ̣ܥܘܢ ܡܢܢ܇ ܟܕ ܗ̇ܝ ܩܕܡܝܬܐ ܕܩܘܪܝܠܘܣ܇ ܠܥܒ̇ܕܐ ܠܐ ܢܦ̣ܩܬ݀. ܪܝܫܐ ܕܬܡܢܬܥܣܪ̈܆ ܕܥܠ ܟܐ̇ܬܐ ܘܡ̇ܪܫܘܬܐ ܕܩ̇ܒ̣ܠ ܗ̣ܘ ܝܘܚܢܢ ܡܢܗܘܢ ܕܐܦܝ̈ܣܩܦܐ ܕܟ̇ܢ̣ܫ ܘܚ̣ܒܫ܇ ܡܛܘܠ ܫ̇ܪܝܐ ܕܟܪܛܘܢܝܐ ܘܗ̇ܘ̣ܝܐ ܕܡܢ ܕܪܝܫ ܘܕܠܐ ܢܡ̇ܘܣ܇ ܘܕܠܒܪ ܡܢ ܟܘܠܗܘܢ ܬܚ̈ܘܡܝܗ̇ ܘܛ̣ܟ̈ܣܝܗ̇ ܘܛ̣ܟ̈ܣܝܗ ܕܥܕܬܐ ܕܐܠܗܐ.܀. ܏ܝܚ ܡܢ ܒܬܪ ܗܠܝܢ ܕܝܢ܆ ܟܕ ܡܢ ܐܦܝ̈ܣܩܘܦܐ ܗܠܝܢ ܕܠܗ ܠܝܘܚܢܢ ܚܒܝܫ̣ܝܢ ܗܘܘ ܒܒܝܬ ܐܦܝܣܩܦܝܘܢ ܕܝܠܗ ܡܬ̣ܪܫܐ ܗܘܐ܆ ܠܕܪܫ̇ܐ ܕܥܠ ܐ̈ܦܝ ܗܝܡܢܘܬܐ: ܘܡܛܘܠ ܚܒ̇ܠܐ ܕܣܘܢܗܕܣ ܕܟܠܩܕܘܢܐ ܘܥܠ ܐܝܠܝܢ ܕܡܢܗ̇ ܐܣܬ̣ܥܪ: ܟܠܝܘܡ ܥܡܗ ܥܐ̇ܠܝܢ ܗܘܘ܆ ܟܕ ܫ̇ܪܝܘ ܪܫ̇ܝܢ ܠܗ ܚܠܝ̣ܡܐܝܬ܇ ܘܕܝ̇ܢܝܢ ܥܡܗ ܘܡ̇ܟܣܝܢ ܠܗ ܚܝܠܬܢܐܝܬ. ܟܕ ܐܝܟ ܕܒܫ̈ܘܐ̣ܠܐ ܐܙ̣ܝܥܘ ܠܘܬܗ ܟܕ ܐܡ̇ܪܝܢ ܠܗ܆ ܕܚ̇ܘܐ ܠܢ ܐܘ ܪܒܐ ܘܐ̇ܚ̣ܝܕ ܪܝܫ̣ܢܘܬܐ ܕܥܕܬܐ܆ ܕܡܢ ܐ̇ܝܢܐ ܩܢܘܢܐ ܘܛܟ̣ܣܐ ܥܕܬܢܝܐ܇ ܝܠ̣ܦܬ ܘܩܒ̇ܠܬ ܕܬܫ̣ܪܐ ܟܗܢܘܬܐ ܕܐܦܝ̈ܣܩܘܦܐ ܐܪ̈ܬܕܟܣܘ܇ ܘܫܪܟܐ ܕܟܗ̈ܢܐ ܗܠܝܢ ܕܩ̇ܫܝܫܝܢ ܗܘܘ ܐܦ ܡܢ ܐܒܘܟ ܒܝ̈ܘܡܝ ܟܗܢܘܬܗܘܢ܇ ܘܐܢܬ ܬܫ̣ܪܐ ܘܬܥ̣ܒܕ ܐܢܘܢ ܡܢ ܕܪܝܫ܇ ܒܟܗܢܘܬܐ ܕܬܪ̈ܝܝ ܟ̈ܝܢܐ. ܗܠ̣ܝܢ ܕܪܒܝܥ̣ܝܘܬܐ ܡ̇ܟܪܙܝܢ ܘܡ̇ܠܦܝܢ܇ ܚܠܦ ܬܠܝܬܝܘܬܐ ܓܢ̣ܝܙܬܐ ܘܩܕܫܬܐ. ܘܒܐ̇ܝܢܐ ܛܟ̣ܣܐ ܥܕܬܢܝܐ ܐܫܟ̣ܚܬ ܗܕܐ ܘܠܗ̇ ܐܬܕܢ̣ܝܬ܇ ܕܬܫ̣ܪܐ ܟܗܢܘܬܐ ܕܐܪ̈ܬܕܟܣܘ ܫܪ̈ܝܪܐ܇ ܘܬܥܒ̣ܕ ܚܠܦܝܗ̇ ܡܢ ܕܪܝܫ ܐܚܪܬܐ ܕܣܘܢܗ̈ܕܝܛܐ. ܡܛܘܠ ܐܝ̇ܕܐ ܥܠ̣ܬܐ܆ ܐ̇ܘ ܡܛܠ ܐܝ̇ܕܐ ܡܪܫܘܬܐ܆ ܘܐܝܟ ܕܡܢ ܐ̇ܝܕܐ ܗܪ̈ܣܝܣ܇ ܐܝܟ ܕܦܩ̣ܝܕ ܕܦ̇ܩܕ ܒܩ̈ܢܘܢܐ܇ ܩ̇ܒܠܬ ܘܫ̣ܪܝܬ ܐܢܘܢ ܠܗܠܝܢ܇ ܕܗ̣ܢܘܢ ܡܛܠ ܗܪܣܝܣ ܗܪ̈ܣܝܣ ܕܬܪ̈ܝܝ ܟ̈ܝܢܐ܇ ܪܫ̇ܝܢ ܠܟ ܘܥ̇ܪܩܝܢ ܡܢ ܫܘܬ̇ܦܘܬܟ܇ ܘܡܛܠ ܓ̇ܘܕ̈ܦܝܗ̇ ܕܣܘܢܗܕܣ ܘܛܘܡ̣ܣܐ ܕܠܐܘܢ܇ ܕܡ̇ܟܪܙܝܢ ܘܡ̇ܠܦܝܢ ܪܒܝܥ̣ܝܘܬܐ ܚܠܦ ܬܠܝܬܝܘܬܐ ܩܕܝܫܬܐ. ܠܟܘܢ ܕܝ̣ܢ ܠܝܬ ܠܟܘܢ ܠܓܡ̣ܪ܇ ܕܡܛܠ ܗܪܣܝܣ ܬ̣ܪܫܘܢ ܘܬܚ̇ܝܒܘܢ ܐܢܘܢ܇ ܘܗ̇ܝ ܕܝܢ ܬܥ̣ܒܕܘܢ ܫ̇ܪܝܐ ܕܟܗܢܘܬܗܘܢ. ܐܢ ܕܝܢ ܐܪܐ: ܘܐ̣ܝܬ ܠܟ ܥܠ ܗܠܝܢ ܕܫ̣ܪܝܬ ܠܐ ܢܡܘܣܐܝܬ ܡܢ ܟܗܢܘܬܐ܆ ܐ̇ܘ̣ܕܥ ܠܢ ܗܫܐ܆ ܘܢܫܠ̣ܐ ܡܢ ܕܝܢ̣ܐ ܘܪܫܝܢ̣ܐ ܕܥܠ ܐ̈ܦܝ ܗܠܝܢ.܀. ܐܢ ܓܝܪ ܐ̣ܢܬܘܢ ܠܟܘܢ ܠܒܪ ܡܢ ܟܠܗܘܢ ܛܟ̣ܣ̈ܝܗ̇ ܘܩܢܘ̈ܢܝܗ̇ ܘܩܢܘ̈ܢܝܗ ܕܥܕܬܐ: ܐ̇ܦܣ̣ܬܘܢ ܕܒܗܠܝܢ ܬܬ̇ܚܫܚܘܢ ܘܬܫ̣ܪܘܢ ܟܗ̈ܢܐ ܫܪ̈ܝܪܐ: ܘܡܢ ܕܪܝܫ ܬܥ̣ܒܕܘܢ ܐܢܘܢ܆ ܕܦ̇ܚܡܐ ܗܘܬ ܠܗܕܐ ܕܐ̣ܝܬܝܗ̇܆ ܕܐܦ ܡ̇ܥܡܘܕܝܬܗܘܢ ܬܫ̣ܪܘܢ ܗܘܝܬܘܢ܇ ܘܡܢ ܕܪܝܫ ܬ̇ܥܡܕܘܢ ܐܢܘܢ ܐܝܟ ܚܝ̇ܠܐ ܕܦܘ̈ܩܕܢܐ ܕܩ̈ܢܘܢܐ. ܗܐ ܓܝܪ ܩܢܘܢܐ ܗ̇ܘ ܕܬܫܬܥܣܪ̈ ܕܫܬܬܥܣܪ̈ ܕܬܠܬܡܐܐ ܘܬܡܢܬܥܣܪ̈܆ ܥܠ ܗܪܣܝܣ ܡ̇ܚܒܠܬܐ ܕܒܝܬ ܦܘܠܐ ܫܡܝ̣ܫܛܝܐ܆ ܕܡܢ ܕܪܝܫ ܠܘܩܕܡ ܕܢܥܡ̣ܕܘܢ ܦܩ̣ܕ܆ ܘܗܝ̇ ܕܝܢ ܕܐܝܠܝܢ ܕܡܬ̣ܚܙܝܢ ܕܫ̇ܘܝ̣ܢ ܕܢܗܘܘܢ ܟܗ̈ܢܐ ܡܢ ܕܪܝܫ. ܘܐܢ ܐ̣ܢܬܘܢ ܗܫܐ ܣ̇ܒܪܝܢ ܐܢܬܘܢ ܒܢܦܫܟܘܢ: ܕܐܝܟ ܕܡܢ ܗܪܣܝܣ ܩ̇ܒܠܬܘܢ ܐܢܘܢ: ܠܗ̇ܢܘܢ ܕܐܝܟ ܕܒܫ̣ܒܝܐ ܡܢ ܩܛܝ̣ܪ ܕܒ̣ܪܬܘܢ: ܘܥܒ̣ܕܬܘܢ ܐܢܘܢ ܟܗ̈ܢܐ ܡܢ ܕܪܝܫ܆ ܐ̇ܝܟܢܐ ܚܕܐ ܡ̇ܫܡܠܝܢ ܐܢܬܘܢ܇ ܗܝ̇ ܕܝܢ ܩܕܡܝܬܐ ܒ̇ܨܪܬܘܢ.܀. ܗ̣ܘ ܕܝܢ ܝܘܚܢܢ ܒܫܠ̣ܝܐ ܗܠܝܢ ܟܠܗܝܢ ܫ̇ܡܥ ܗܘܐ ܘܝ̇ܕܥ ܕܥ̣̈ܕܝܠܢ ܐ̈ܢܝܢ܆ ܟܕ ܠܝܬ ܗܘܐ ܠܗ ܕܒܐ̇ܝܢܐ ܡ̣ܦܩ ܒܪܘܚܐ ܕܚܠܦܝܗܝܢ ܢܬ̇ܚܫܚ.܀. ܒܚܪܬܐ ܕܝܢ ܦ̇ܢܝ ܦܬܓܡܐ ܟܕ ܐܡ̇ܪ܆ ܡܛܠ ܠܡ ܕܚ̇ܙܐ ܐܢܐ ܕܡܛܠ ܗܕܐ ܕܟܪܛܘܢܝܐ: ܛ̣ܪܝܢ ܐܢܬܘܢ ܘܟܫ̣ܝܠܝܢ ܐܢܬܘܢ: ܐ̣ܝܟܢܐ ܕܐܦ ܗܠܝܢ ܟܠܗܝܢ: ܟܕ ܐܢܐ ܫܠ̣ܐ ܐܢܐ ܫܡ̇ܥܬ ܡܢܟܘܢ ܐܢܗ̣ܘ ܕܡܬ̇ܬܪܨܐ ܗܕܐ ܕܗ̇ܘܝܐ ܒܟܝܪܛܘܢܝܐ ܘܒ̇ܛܠܐ: ܣܦ̇ܩܐ ܠܟܘܢ ܘܡܬ̇ܚܝܕܝܢ ܐܢܬܘܢ ܥܡܢ.܀.܀. ܗ̣ܢܘܢ ܕܝ̣ܢ ܐܡ̇ܪܝܢ ܠܗ. ܐ̇ܝܢܐ ܐܪܐ ܬ̇ܘܪܨܐ ܐܝܬ ܠܟܘܢ ܠܡܥ̣ܒܕ܇ ܡܢ ܒܬܪ ܗܢܐ ܟܠܗ ܣ̣ܘܪܚܢܐ ܘܚܒ̇ܠܐ܇ ܘܥ̇ܒܕܐ ܕܠܐ ܢܡ̇ܘܣ ܕܥܒ̣ܕܬܘܢ. ܐ̣ܝܟܢܐ ܕܠܐ ܗܘܐ ܒܠܚܘܕ ܗܪܟܐ ܗܕܐ ܡܢܟܘܢ ܐܣܬܥ̣ܪܬ݀: ܘܟܠ̣ܝܬܘܢ ܚܐ̣ܦܐ ܕܚܡ̣ܬܟܘܢ ܘܕܣܢ̣ܐܬܟܘܢ܆ ܐܠܐ ܘܐܦ ܥܕܡܐ ܠܐܬܪ̈ܘܬܐ ܐܚܪ̈ܢܐ ܡܬ̣ܚܬܘܢܝܗܝ ܠܥ̣ܒܪ ܢܡܘܣܐ ܗܢܐ܇ ܘܠܣܩ̣ܘܒܠܝܘܬܐ ܕܟܠܗܘܢ ܛܟ̣ܣ̈ܐ ܘܕܟܠܗܘܢ ܩ̈ܢܘܢܐ ܥܕܬ̈ܢܝܐ. ܗܠܝܢ ܕܐ̇ܘ ܟܕ ܠܐ ܝܕܝ̣ܥܝܢ ܠܟܘܢ: ܗܟܢܐ ܬܪܥ̣ܬܘܢ ܐܢܘܢ ܘܢܦ̣ܩܬܘܢ: ܘܕܫ̇ܬܘܢ ܐܢܘܢ ܘܥܒ̣ܪܬܘܢ܆ ܐ̇ܘ ܟܕ ܡܦ̣ܣܝܢ ܐܢܬܘܢ ܒܗܘܢ ܫܛܬ̣ܘܢ ܐܢܘܢ ܘܐ̇ܡ̣ܣܪܬܘܢ ܥܠܝܗܘܢ܇ ܘܠܗܢܐ ܟܘܠܗ ܥܒ̣ܪ ܢܡܘܣܐ ܐܫܬ̇ܪܓܠ̣ܬܘܢ ܘܢܦ̣ܩܬܘܢ. ܘܗܕܐ ܠܐ ܬܗܘܐ ܛ̇ܥܝܐ ܠܟܘܢ. ܕܒܙܒܢܐ ܐ̇ܝܢܐ ܕܗ̣ܘ ܐܡܬܝ ܕܢܩ̣ܪܐ: ܐ̇ܘ ܒܚܝ̣̈ܝܟܘܢ ܐ̇ܘ ܐܢ ܕܐܢ ܓ̣ܕܫ ܕܡܢ ܒܬܪ ܡ̇ܘܬܟܘܢ܆ ܠܒ̣ܨܬܐ ܚܠ̣ܝܡܬܐ ܘܒ̇ܥܬܐ ܩܢܘܢܝܬܐ ܐܝܬ ܠܗܝܢ ܠܟܠܗܝܢ ܕܢܐ̣ܬ̈ܝܢ܇ ܐܢ ܚ̣ܝ ܥܠܡܐ ܘܩܝ̇ܡܐ ܥܕܬܗ ܕܐܠܗܐ.܀.܀. ܬܘܒ ܕܝܢ ܕܚ̇ܫܚܐ ܠܬܡ̣ܗܐ ܘܠܡ̇ܬܠܐ ܘܠܬ̇ܘܢܝܐ ܕܦܘ̇ܫܟ ܐ̣ܝ̈ܕܝܐ ܐ̣ܝܬܝܗ̇܆ ܘܗܝ̇ ܐܚܪܬܐ ܕܒܚܪܬܐ ܣܥ̣ܪܬܘܢ. ܗܝ̇ ܕܐܦܢ ܒܚܐ̣ܦܐ ܕܚ̣ܡܬܐ ܐ̇ܘ ܕܣܢ̣ܐܬܐ ܐ̇ܘ ܒܡ̇ܫܩܠܘܬܐ ܕܫܘܠܛܢܐ: ܐ̇ܘ ܒܐ̇ܝܢܐ ܕܗ̣ܘ ܢܝ̣ܫܐ ܡܢܟܘܢ ܗܕܐ ܐܣܬ̣ܥܪܬ݀܆ ܐ̣ܢܬܘܢ ܒܬܪܥ̣ܝܬܟܘܢ ܗܫܐ ܕܘ̣ܢܘ̣ ܘܐܬ̇ܒܝܢܘ܇ ܐܢ ܒܘ̇ܠܝܬܐ ܘܒܒܘܚ̇ܢܐ ܬܩ̣ܢܐ ܡܢܟܘܢ ܐܣܬ̣ܥܪܬ݀܇ ܕܡܢ ܒܬܪ ܕܐܝܟ ܕܕܐܝܟ ܕܒܫܒ̣ܝܬܐ ܢܦ̣ܠܬܘܢ ܥܠ ܗܠܝܢ ܕܫܒ̣ܝܬܘܢ ܐܝܟ ܕܒܓܝ̣ܣܐ܇ ܘܟܒ̣ܫܬܘܢ ܘܫܥ̇ܒܕܬܘܢ ܐܢܘܢ ܠܫܘܬ̇ܦܘܬܐ ܕܥܡܟܘܢ܇ ܘܡܢ ܒܬܪ ܬܠܬܝܢ ܘܫܬܐ ܩ̈ܘ̇ܕܫܝܢ܇ ܘܠܝ̣ܛܘܪ̈ܓܝܣ ܘܠܝ̣ܛܘܪܓܝܣ ܕܒܟܠܗ̇ ܥܐܕܐ ܕܦܛܝܪ̈ܐ܇ ܘܐܦ ܡܢ ܒܬܪܟܢ ܥܒ̣ܕܘ ܥܡܟܘܢ܇ ܟܕ ܒܗ̇ ܒܟܗܢܘܬܗܘܢ ܩܕܡܝܬܐ ܩ̇ܒܠܬܘܢ ܐܢܘܢ܇ ܘܠܩܫ̈ܝܫܐ ܥܡ ܩܫ̈ܝܫܐ ܕܝܠܟܘܢ ܒܐܝ̣ܪܛܝܘܢ ܐܘܬ̣ܒܬܘܢ܇ ܟܠܗܘܢ ܗܠܝܢ ܝܘܡ̈ܬܐ ܕܪܘܚ̇ܦܐ ܕܐܬܐ̣ܡܪܘ܇ ܘܠܡ̇ܫܡ̈ܫܢܐ ܬܘܒ ܒܗ ܒܛܟ̣ܣܐ ܕܡ̇ܫܡܫܢܘܬܗܘܢ ܥܡ ܫܪܟܐ ܕܡ̇ܫ̈ܡܫܢܐ ܩܒ̇ܠܬܘܢ ܐܢܘܢ ܘܐ̇ܩܝ̣ܡܬܘܢ ܐܢܘܢ ܒܕܪܓܗܘܢ܇ ܘܗܝ̇ ܕܝܢ ܒܚܪܬܐ ܡܢ ܒܬܪ ܗܠܝܢ ܟܠܗܝܢ܇ ܠܫ̇ܪܝܐ ܕܟܗܢܘܬܗܘܢ ܩܕܡܝܬܐ܇ ܒܡ̇ܥܪܡܘܬܐ ܡܕܡ ܢܘܟܪܝܬܐ ܐܬܪܡ̣ܝܬܘܢ ܕܠܐ ܒ̣ܘܝܢ. ܗܝ̇ ܕܚ̣ܢܢ ܗܫܐ܆ ܠܕܝܢ̣ܐ ܕܝܠܟܘܢ̣ ܘܠܒ̇ܘܚܢܐ ܕܬܪܥ̣ܝܬܟܘܢ ܫܒ̣ܩܢܢ ܕܬܬ̇ܒܝܢܘܢ܇ ܕܥܠ ܡ̣ܢ ܡܢ ܟܗܢܘܬܐ ܬܫ̣ܪܘܢ ܐܢܘܢ܇ ܘܡܢ ܕܪܝܫ ܬܥܒ̣ܕܘܢ ܐܢܘܢ. ܗܕܐ ܗܕܐ܆ ܕܐܢ ܐܪܐ ܗܟܢ ܫܦ̣ܪ ܠܟܘܢ: ܕܕܠܐ ܛܟ̣ܣܐ ܘܩ̈ܢܘܢܐ ܥܕ̈ܬܢܝܐ ܥܕܬܢܝܐ ܗܟܢܐ ܬܬ̇ܚܫܚܘܢ܆ ܩܕܡ ܕܒܬܫ̣ܡܫܬܐ ܕܩ̇ܘܕܫܐ ܥܡܟܘܢ ܬܩ̇ܒܠܘܢ ܐܢܘܢ܇ ܐܝܬ ܗܘܐ ܠܟܘܢ ܕܗܕܐ ܬܣ̣ܥܪܘܢ܆ ܘܠܘ ܡܢ ܒܬܪ ܗܠܝܢ ܠܝܛܘ̣ܪ̈ܓܝܘܣ ܠܝܛܘ̣ܪܓܝܘܣ ܟܘܠܗܝܢ ܕܥܡܟܘܢ ܐܬ̇ܗܦܟܘ ܘܐܫܬ̇ܘܬܦܘ ܒܗ̇ ܒܟܗܢܘܬܗܘܢ ܩܕܡܝܬܐ܇ ܬܗ̣ܦܟܘܢ ܬܫ̣ܪܘܢ ܐܢܘܢ܇ ܘܡܢ ܕܪܝܫ ܬܥ̣ܒܕܘܢ ܐܢܘܢ.܀.܀.܀. ܘܟܕ ܣܓܝܐ̈ܬܐ ܕܡܢ ܬܪ̈ܝܗܘܢ ܓ̇ܒ̈ܐ ܐܬ̣̈ܡܠܠܝܢ: ܗܠܝܢ ܕܡܢ ܣܘܓܐ̣ܗܝܢ ܘܡܢ ܡ̣ܬܚܐ ܕܬܫ̣ܥܝܬܐ ܕܥܠܝܗܝܢ ܡܢܗܝܢ ܡ̇ܗܡܝܢܢ܆ ܝܕܥ̣ ܒܢܦܫܗ ܗ̇ܘ ܕܡ̣ܬܪܫܐ ܕܩ̇ܪܝܒ ܗܘ ܠܥ̣ܕܠܝܐ܆ ܘܕܠܐ ܡܚ̣ܪܪ ܡܢ ܡ̇ܪܫܘܬܐ܇ ܐܢ ܡܒ̇ܚܢ ܐܝܠܝܢ ܕܣܥ̣ܪ. ܘܝܬܝܪܐܝܬ ܕܝܢ܆ ܐܝܠܝܢ ܕܒܚܪܬܐ ܐܣܬ̣ܥܪ ܡܢܗ: ܒܫ̇ܪܝܐ ܕܗܠܝܢ ܕܡܢ ܒܬܪܟܢ ܡܢܗ ܐܬ̇ܩܒܠܘ ܒܬܫ̣ܡܫܬܐ܇ ܘܗ̇ܝܕܝܢ ܗܦ̣ܟ ܫ̣ܪܐ ܐܢܘܢ. ܕܡܛܠ ܗܠܝܢ ܡܬ̣ܚܙܐ ܗܘܐ ܒܝܕ ܫܠ̣ܝܗ܆ ܕܗ̣ܘ ܒܢܦܫܗ ܡܬ̇ܥܕܠ ܗܘܐ܇ ܟܕ ܒܡ̈ܠܐ ܛ̇ܢ̈ܦܬܐ ܘܦ̇ܚ̈ܝܚܬܐ ܕܠܐ ܛܟ̣ܣܐ ܠܘܩܒܠ ܗܠܝܢ ܡܬ̇ܚܫܚ ܗܘܐ. ܪܝܫܐ ܕܬܫܬܥܣܪ̈܆ ܕܥܠ ܐܝ̣ܕܝܩܛܘܢ ܕܥ̣ܒܕ ܡ̇ܠܟܐ ܙܟ̇ܝܐ ܝܘܣܛܝܢܐ. ܏ܝܛ ܟܕ ܓܝܪ ܚ̣ܙܘ ܗܠܝܢ ܕܣܘܢܗܕܣ: ܕܡܢ ܗܠܝܢ ܕܐܨܛ̇ܢܥܘ ܢܦ̣ܠܘ ܗܘܘ ܠܗܘܢ ܡܟܝܠ܆ ܙܟ̇ܝܐ ܡ̇ܠܟܐ ܝܘܣܛܝܢܐ܆ ܐܬ̣ܐ ܠܗܝ̇ ܕܢܥ̣ܒܕ ܐ̣ܝܕܝܩܛܘܢ܇ ܐܝܟ ܕܣ̇ܒܪ ܕܢܥ̣ܒܕ ܒܗ ܚܕܝܘܬܐ. ܘܟܕ ܠܗܢܐ ܚܦܝ̣ܛܐܝܬ ܐ̇ܨܚ̣ܗ܆ ܡܚ̣ܕܐ ܫ̣ܕܪܗ ܠܗܘܢ ܠܐܦܝ̈ܣܩܘܦܐ܇ ܗܠܝܢ ܕܚܒ̣ܝܫܝܢ ܗܘܘ ܒܒܝܬ ܐܦܝܣܩܦܝܘܢ܇ ܒܝܕ ܙܟܪܝܐ ܐܢܫ ܣܘ̣ܦܣܛܐ ܘܐ̇ܪܟܝܛܪܣ ܕܦܠܛܝܢ܇ ܕܒܓܢܣ̣ܗ ܡܢ ܫܘ̣ܪܐ ܕܪ̈ܗܘܡܝܐ ܐ̣ܝܬܘܗܝ ܗܘܐ܇ ܘܐܪܬܕܘܟܣܐ ܡܢ ܩܕܝܡ ܐܝܟ ܕܣ̣ܒܝܪ ܗܘܐ. ܗܢܐ ܗܟܝܠ ܡܢ ܡ̇ܠܟܐ ܠܘܬܗܘܢ ܐܫܬ̇ܕܪ܆ ܥܡ ܨܚܚ̣ܐ ܗ̇ܘ ܕܐ̣ܝܕܝܩܛܘܢ ܕܐܨ̣ܚ. ܕܐܨ̣ܚܘ ܘܐܡ̣ܪ ܠܗܘܢ܆ ܕܗܢܐ ܐܝ̣ܕܝܩܛܘܢ ܫܠ̣ܚ ܠܟܘܢ ܡ̇ܪܚܡܢܐ ܡ̇ܠܟܐ܆ ܕܡܛܘܠܬܟܘܢ ܐ̇ܨ̣ܚܗ. ܕܒܗ ܐܦ ܐܢܬܘܢ ܥܡ ܟܠܗܘܢ ܒ̈ܢܝ ܓ̇ܒܐ ܕܝܠܟܘܢ ܬܬ̇ܚܝܕܘܢ. ܘܐܦ̣ܣ ܠܟܘܢ ܘܦܩ̣ܕ ܘܐܦ ܗܕܐ܆ ܕܡܐ ܕܩܪܝܬܘܢܝܗܝ ܠܡ܆ ܟܠܡܕܡ ܕܚ̇ܙܝܢ ܐܢܬܘܢ ܕܚ̇ܣܝܪ ܒܗ ܘܣܢ̣ܝܩ ܥܠ ܬ̇ܘܪܨܐ܆ ܬܬ̇ܪܨܘܢ ܒܗ. ܘܐܢ ܚ̇ܣܝܪ ܡܕܡ ܕܚܫ̇ܚ ܠܬܘܕܝܬܐ ܬܪܝܨܬܐ: ܗܝ̇ ܕܒ̇ܥܝܢ ܐܢܬܘܢ ܕܬ̇ܐܚܘܕ܆ ܗܘ̣ܘ ܡ̇ܘܣܦܝܢ ܒܗ̣ ܕܠܐ ܕܚܠ̣ܬܐ. ܐ̣ܝܟܢܐ ܕܟܕ ܗܢܐ ܦܘܩܕܢܐ ܩ̇ܒܠܘ ܐܦܝܣ̈ܩܘܦܐ܆ ܫܩ̣ܠܘ̣ ܘܩ̣ܪܐܘܗܝ. ܘܚܙܘ ܕܠܐ ܡ̇ܫܡ̣ܠܝ܆ ܐܦܢ ܡܕܡ ܡܕܡ ܐܝܬ ܒܗ܇ ܕܢܨ̇ܐ ܥܡ ܣܘܢܗܕܣ ܕܟܠܩܕܘܢܐ. ܘܬܘܒ̣ ܘܐܦ ܡܢ ܕܝܠܗ̇ ܘܚܠܦܝܗ̇ ܫܟܝ̣ܚ ܒܗ. ܡܛܠ ܕܝܢ ܕܐܬ̇ܦܩܕܘ ܘܥܒ̣ܕܘܢ ܪ̈ܝܫܐ ܗ̇ܢܘ ܕܝܢ ܬ̇ܘܪ̈ܨܐ: ܗܠܝܢ ܕܐܠܘ ܐܫܬܒ̣ܩܘ ܡܢ ܗܠܝܢ ܕܠܩ̣ܘܒܠܐ ܠܡܬܬ̣ܣܡܘ ܒܗ: ܚܕܝܘܬܐ ܕܠܐ ܦܘ̇ܠܓ ܡܫ̣ܬܟܚ ܗܘܐ ܥ̇ܒܕ. ܥ̇ܒ̣ܕ ܫܩ̣ܠ ܐܢܘܢ ܕܝܢ ܠܬ̇ܘܪ̈ܨܐ ܗ̇ܘ ܕܐ̇ܝܬ̣ܝܗ܆ ܘܐ̇ܘ̣ܒܠ ܚ̇ܘܝ ܐܢܘܢ ܠܒܪ ܪܐܙܗ ܘܒܪ ܡܠܟ̣ܗ ܝܘܚܢ̣ܢ ܘܠܫܪܟܐ ܕܟܠܗ ܣ̣ܢܕܪܝܘܢ ܕܝܠܗܘܢ. ܗܠܝܢ ܕܟܕ ܫܡ̣ܥܘ ܐܢܘܢ ܠܬ̇ܘܪ̈ܨܐ܆ ܐܬܪܗ̣ܒܘ ܘܙܥ̣ܘ܆ ܘܕܚܠ̣ܬܐ ܪܒܬܐ ܢܦܠ̣ܬ݀ ܥܠܝܗܘܢ. ܐ̣ܝܟܢܐ ܕܐܠܘ ܐ̇ܚܝ̣ܕܝܢ ܗܘܘ܆ ܡܢ ܫ̣ܪ̈ܫܝܗ̇ ܥ̇ܩܪܝܢ ܗܘܘ ܠܗ̇ ܠܟܠܗ̇ ܗܪܣܝܣ ܕܬܪ̈ܝܝ ܟܝ̈ܢܐ. ܐܬ̣ܪܗܒܘ ܕܝܢ ܬܘܒ ܘܐܫܬ̣ܓܫܘ ܝܬܝܪ ܡܢ ܦ̣ܠܓܘܬ ܢܣܛܘܪ̈ܝܢܘ܆ ܗ̣ܢܘܢ ܢܣܛܘܪ̈ܝܢܘ ܚ̇ܬܝ̈ܬܐ. ܘܗ̣ܢܘܢ ܫܓ̣ܫܘ ܘܥܒ̣ܕܘ ܪܘܒ̣ܐ ܒܟܠܗ̇ ܥܕܬܐ. ܟܕ ܪܗ̇ܛܝܢ ܘܫ̇ܓܫܝܢ ܠܩܠ̣ܝܪܘܣ ܘܠܥܡܐ ܘܐܡ̇ܪܝܢ܆ ܕܐܢ ܗܠܝܢ ܬܘܣ̇ܦ̈ܬܐ ܠܒ̈ܟ̇ܢ܆ ܟܘܠܗ̇ ܥܕܬܐ ܡܬ̇ܕܠܚܐ ܘܚ̇ܪܒܐ.܀.܀. ܘܗܟܢܐ ܒܚܪܬܐ ܟܢ̇ܫ̣ܘ ܟܘܠܗ̇ ܩܘ̣ܢܝܢ ܕܝܠܗܘܢ ܐܟܚܕܐ܆ ܘܥ̣ܠܘܢ ܠܘܬ ܡ̇ܠܟܐ ܕܢܦܝ̣ܣܘܢܝܗܝ܇ ܕܠܐ ܢܬ̇ܬ̣ܣܝܡܘܢ ܬ̇ܘܪ̈ܨܐ ܗܠܝܢ ܒܐ̣ܝܕܝܩܛܘܢ ܕܝܠܗ. ܟܕ ܫܓ̣ܫܘ ܘܐܦ ܠܗܠܝܢ ܕܦܠܛܝܢ܇ ܕܐܦ ܗ̣ܢܘܢ ܣܓ̈ܝܐܐ ܡܢܗܘܢ܇ ܠܐ ܬܪ̈ܝ̣ܨܝܢ ܗܘܘ ܒܟܪܣܛܝܢܘܬܐ. ܘܝܬ̇ܝܪܐܝܬ̣ ܩܣ̣ܛܘܪ. ܕܥܡ ܗ̇ܝ ܕܚܢܦܐ ܐܦ ܫܡ̇ܪܝܐ ܐ̣ܝܬܘܗܝ ܗܘܐ܆ ܕܫܡܗ ܗܘܐ ܐ̣ܢܣܛܣ ܦܠܣܛܝܢܝܐ.܀. ܟܕ ܗܟܝܠ ܥܠ̣ܘܢ ܩܕܡ ܡ̇ܠܟܐ ܘܐܬܩ̣ܪܝܘ ܠܗ ܗܠܝܢ ܬ̇ܘܪ̈ܨܐ܆ ܫܦ̣ܪ̈ܘܢ ܠܗ ܘܫ̇ܒܚ ܐܢܘܢ̣ ܛܒ. ܘܦܩ̣ܕ ܕܢܬ̇ܬ̣ܣܝܡܘܢ ܒܐܝܕܝܩܛܘܢ̣ ܘܢܬ̇ܟܬܒܘܢ ܒܩܬ̇ܪܐ. ܗܝ̇ܕܝܢ ܟܠܗܘܢ ܗܠܝܢ ܕܥ̣ܠܘ: ܩܠ̣ܝܪ̈ܝܩܘ ܘܥ̇ܠܡ̈ܝܐ ܘܫܪܟܐ ܕܣܘܢ̣ܩܠܝܛܘܣ܆ ܐܖ̣̈ܝܒܘ ܥܠܘܗܝ̣ ܟܕ ܐܡ̇ܪܝܢ. ܕܐܢ ܗܠܝܢ ܡܪܝ ܪ̈ܝܫܐ ܣ̇ܝܡܬ ܒܐ̣ܝܕܝܩܛܘܢ ܕܝܠܟ: ܘܥܐ̇ܠܝܢ ܗܠܝܢ ܠܥܕܬܐ܆ ܡܚ̣ܕܐ ܡܬ̇ܗ̣ܦܟܐ ܘܚ̇ܪܒܐ. ܘܟܕ ܒ̇ܥ̣ܝܬ ܕܬܥܠ ܙܥܘܪ̈ܐ ܘܬ̇ܐ̣ܚܘܕ܆ ܘܙܥܘܖ̈ܐ ܕܬܥܠ ܬ̇ܐ̣ܚܘܕ܆ ܪ̈ܒ̣ܘܬܐ ܢ̈ܦ̇ܩܢ ܡܢ ܥܕܬܐ. ܐ̣ܝܟܢܐ ܕܟܕ ܫ̇ܓܫܝܢ ܡܢܗܘܢ ܥܠܘܗܝ܆ ܐܬ̇ܚܡܬ ܘܗܦ̣ܟ ܒܗܘܢ ܐ̈ܦܘܗܝ ܟܕ ܐܡ̇ܪ܆ ܕܗܠܝܢ ܩ̈ܦܠܐܐ̣ ܬ̣ܪ̈ܝܨܐ ܐܢܘܢ. ܐ̣ܢܬܘܢ ܕܝܢ ܟܠܟܘܢ ܝ̇ܕܥ ܐܢܐ ܗܘ ܕܢܣܛܘܪ̈ܝܢܘ ܐܢܬܘܢ܆ ܘܟ̣ܪ̈ܝܗܝ̣ ܒ̣ܬ̣ܐܪܬܟܘܢ̣ ܘܠܐ ܚ̇ܕܝܢ ܐܢܬܘܢ ܒܗܝܡܢܘܬܐ ܬܪܝܨܬܐ. ܘܐܢ ܠܐ ܬܫ̣ܠܘܢ܆ ܫ̇ܪܐ ܐܢܐ ܘܡ̇ܦܩ ܐܢܐ ܠܗܘܢ ܠܐܦܝ̈ܣܩܦܐ܆ ܘܡܫ̇ܡܪ ܐܢܐ ܠܗܘܢ ܥܠܝܟܘܢ. ܕܐܝܟ ܕܐ̣ܒ̈ܐ ܢܦ̇ܠܝܢ ܥܠܝܟܘܢ܆ ܘܡܢܬܫܝܢ ܠܟܘܢ̣ ܘܠܐ ܩܝ̣ܡܝܢ ܐܢܬܘܢ ܩܕܡܝܗܘܢ.܀. ܗܝ̇ܕܝܢ ܦܩ̣ܕ ܠܩ̣ܣܛܘܪ̣ ܟܕ ܐܡ̇ܪ. ܕܐܢ ܠܐ ܬ̇ܝܬܐ ܠܝ ܡܚ̣ܕܐ ܡܢ ܪܡܫܐ ܥܣܪ̈ܝܢ ܐ̣ܝ̈ܣ̇ܐ ܕܐ̣ܝܕܝܩܛܘܢ: ܟܕ ܐܝܬ ܒܗܘܢ ܗܠܝܢ ܬ̇ܘܪ̈ܨܐ܆ ܩܪܩܦܬܟ ܡ̣ܪܝܡ ܐܢܐ.܀. ܘܗܟܢܐ ܟܠܗ̇ ܩܘ̣ܢܝܢ ܕܢܣܛܘܪ̈ܝܢܘ ܘܕܦ̣ܠܓܘܬ ܢܣܛܘܪ̈ܝܢܘ ܐܬ̣ܪܗܒܘ܆ ܘܐܝܟ ܕܒ̣ܘܪ̈ܐ ܡ̈ܬ̇ܚܐ ܡ̈ܬ̇ܢܢܐ ܙܐ̇ܡܝܢ ܗܘܘ. ܘܗܟܢܐ ܐܬܡ̣ܨܝܘ ܕܢܬ̇ܟܫܦܘܢ ܠܗ ܘܢܕܚ̇ܠܘܢܝܗܝ ܡܢ ܕܠܘ̣ܚܝܐ ܕܥܕܬܐ. ܘܟܕ ܣ̇ܓܝ ܐ̇ܠܙ̣ܘܢܝܗܝ܆ ܐܬܛܦܝܣ ܠܗܘܢ̣ ܘܫܒܩ̣ܗ ܠܣ̣ܘܥܪܢܐ ܠܨܒܝܢܗܘܢ. ܟܕ ܡܕܡ ܡܕܡ ܙܥܘܪ̈ܝܬܐ ܒܠܚܘܕ ܫܒܩ̣ܘܗܝ ܠܡ̣ܣܡ ܡܢ ܬ̇ܘܪ̈ܨܐ ܗܠܝܢ. ܟܕ ܗܪܛܝܩܐܝܬ ܗ̣ܢܘܢ ܡܢ ܕܝܠܗܘܢ ܣܡ̣ܘ ܒܫܘܠܡܗ ܕܐ̣ܝܕܝܩܛܘܢ܆ ܕܥ̇ܝ̈ܕܝܗ̇ ܠܡ ܕܥܕܬܐ ܢܬ̇ܢܛܪܘܢ ܠܗ̇. ܐܝܟ ܕܡܛܘܠ ܣܘܢܗܕܘܣ܆ ܕܐܝܟ ܥܝ̇ܕܗܘܢ ܢܗܘܘܢ ܡ̇ܟܪܙܝܢ ܠܗ̇. ܗܕܐ ܐܬ̇ܛܟܢܘ ܘܣ̣ܡܘ ܚ̣ܪܥܐܝܬ܆ ܐܝܟ ܕܠܐ ܬܗܘܐ ܚܕܝܘܬܐ܇ ܘܬ̇ܗܦ̣ܘܟ ܥܠܝܗܘܢ ܓܝܓ̣ܠܐ܇ ܐܝܟ ܢܣܛܘܪ̈ܝܢܘ.