Ἡγοῦμαι δὲ καὶ διὰ τοῦτο τὴν περιτομὴν δεδόσθαι·
 Τοῦ γὰρ Ἀδὰμ ἀκούσαντος· Γῆ εἶ, καὶ εἰς γῆν ἀπελεύσῃ, 
 ἔθνησκε, καὶ διεφθείρετο τὸ σῶμα·
 Ὅθεν μέρος τι τοῦ σώματος καὶ τοῦτο τούτου τὸ αἴτιον τῆς τοῦ σώματος γενέσεως προσετάχθησαν ἐκτιννύειν, προδιδασκόμενοι τὴν τοῦ ὅλου ἀπέκδυσιν, ἵν’, ὥσπερ ἀποδιδόντες τὸ κατακριθέν, διασωθῆναι δυνηθῶσι.
 Καὶ ὥσπερ αἱ θυσίαι σκιαὶ ἦσαν τῶν μελλόντων, 
 
 οὕτως καὶ ἡ ἐκ μέρους περιτομὴ τοῦ ὅλου ἦν σκιά.
 
 Τοῦτο δὲ καὶ ἐν τῷ Ἰησοῦ τῷ τοῦ Ναυῆ φανερῶς ὁ λόγος σημαίνει·
 Τοῦ γὰρ Ἰησοῦ κατὰ πρόσταξιν τοῦ θεοῦ περιτέμνοντος τὸν λαὸν ἐν Γαλγάλοις πέραν τοῦ Ἰορδάνου , εἶπε ὁ κύριος τῷ Ἰησοῦ υἱῷ Ναυῆ · 
 Ἐν τῇ σήμερον ἡμέρᾳ ἀφεῖλον τὸν ὀνειδισμὸν Αἰγύπτου 
 ἀφ’ ὑμῶν . Καὶ ἐκάλεσε, φησίν, τὸ ὄνομα τοῦ τόπου ἐκείνου Γάλγαλα . 
 
 Εἰ γὰρ ἡ περιτομὴ ἀφαίρεσίς ἐστι τῆς ἐν Αἰγύπτῳ γενέσεως, δηλονότι ἡ ἀκροβυστία Αἰγυπτιακῆς σχέσεως καὶ γενέσεως γνώρισμά ἐστι.
 Τοῦτο δὲ ἀφεῖλεν ὁ θεὸς, ἵνα μηκέτι ὡς ἐν Αἰγύπτῳ γεννηθέντες ὦσιν, ἀλλὰ τῆς ἐπαγγελίας, εἰς ἣν εἰσῆξεν αὐτοὺς ὁ κύριος, τέκνα λογίζωνται.
 
 Τούτων δὲ οὕτως ὄντων, φαίνεται καθόλου ἡ περιτομὴ δοθεῖσα, ἵν’ ἀφαιρεθῇ ὁ ὀνειδισμὸς τῆς γηΐνης γενέσεως ἀπὸ τῶν Ἀβραμιαίων καὶ μηκέτι ὑπεύθυνοι ὦμεν τῷ τὸ 
 Γῆ εἶ, καὶ εἰς γῆν ἀπελεύσῃ. 
 
 Ἀφῃρέθη γὰρ ὁ ὀνειδισμὸς τοῦ παραπτώματος.
 
 Τοῦτο δὲ ἐγίνετο τότε εἰς τύπον τοῦ διὰ τοῦ 
 Χριστοῦ βαπτίσματος.
 Τότε γὰρ ἐκ μέρους 
 ἐγίνετο, ὡς ἐν σκιᾷ.
 Νῦν δέ, ὥσπερ εἶπεν ὁ Ἀπόστολος , ὅλην τὴν γηΐνην γένεσιν ἀπεκδιδυσκόμεθα. 
 
 
 
 Διὰ τοῦ λουτροῦ ἀναγεννώμενοι, ἵνα μηκέτι κατὰ τὴν πρώτην γένεσιν ἀποθνήσκωμεν, ἀλλὰ κατὰ τὴν περιτομὴν τῆς ἀπεκδύσεως τοῦ σώματος, ἣν διὰ τοῦ λουτροῦ ἀπεκδιδυσκόμεθα, ζήσωμεν. 
 
 Ὥσπερ δὲ εἶπεν ὁ κύριος τῷ Ἰησοῦ · Ἀφεῖλον τὸν ὀνειδισμὸν Αἰγύπτου ἐν τῇ σήμερον ἡμέρᾳ ἀφ’ ὑμῶν, 
 οὕτως πολλῷ πλέον λεχθείη ἂν ἑκάστῳ τῶν νῦν βαπτιζομένων·
 Ἐν τῇ ἡμέρᾳ ταύτῃ ἀφεῖλον τὸν ὀνειδισμὸν τῆς γηΐνης γενέσεως καὶ τὸν ὀνειδισμὸν τῆς τοῦ θανάτου φθορᾶς ἀπὸ σοῦ, ἐν τῇ σήμερον ἡμέρᾳ.