ܠܚܡܫ ܗܟܝܠ ܡܢ̈ܘܬܐ ܡܿܦܠܓܝܢ ܠܗ ܒܢ̈ܝܐ ܕܥܒܖ̈ܝܐ ܠܟܠܗ ܟܬܒܐ ܕܡܙܡܘܖ̈ܐ܆ ܕܡܢܗܝܢ ܗܿܝ ܡܿܢ ܩܕܡܝܬܐ ܐܝܬܝܗܿ܆ ܡܢ ܗܿܘ ܩܕܡܝܐܼ ܥܕܡܐ ܠܗܿܘ ܕܡ̄܀ ܕܬܖ̈ܬܝܢ ܕܝܢ܆ ܡܢ ܗܿܘ ܕܡ̄ܐ̄܆ ܥܕܡܐ ܠܗܿܘ ܕܥ̄ܐ̄܀ ܕܬܠܬ ܕܝܢ܆ ܡܢ ܗܿܘ ܕܥ̄ܒ̄܆ ܥܕܡܐ ܠܗܿܘ ܕܦ̄ܚ̄܀ ܕܐܖ̈ܒܥ ܕܝܢ܆ ܡܢ ܗܿܘ ܕܦ̄ܛ̄܆ ܥܕܡܐ ܠܗܿܘ ܕܩ̄ܗ̄܀܀܀ ܕܚܡܫ ܕܝܢ܆ ܡܢ ܗܿܘ ܕܩ̄ܘܼ̄ ܥܕܡܐ ܠܫܘܠܡܗ ܕܟܬܒܐ܀ 
						ܙܿܕܩ ܕܝܢ ܠܡܛܪ܆ ܕܠܘ ܒܢܩܝܦܘܬܐ ܕܬܫܥܝܬܐ ܕܙܒ̈ܢܐ܇ ܗܼܘ ܛܟܼܣܐ ܕܡܙܡܘܖ̈ܐ ܡܼܪܟܒ ܘܣܝܼܡ. ܡܫܚܼܠܦ ܕܝܢ ܗܢܐ ܒܣܘܓܐܐ ܕܙܒ̈ܢܐ܆ ܐܝܟܢܐ ܕܟܬܒܐ ܗܿܘ ܕܡ̈ܠܟܘܬܐ ܡܫܘܕܥ.
					 
						ܥܙܪܐ ܗܟܝܠ: ܗܿܘ ܕܥܡ ܟ̈ܬܒܐ ܐܚܖ̈ܢܐ ܕܢܒ̈ܝܐ: ܐܦ ܡܛܠ ܟܘܿܢܫܐ ܕܡܙܡܘܖ̈ܐ ܗܘܼܬ ܠܗ ܝܨܝܦܘܬܐ܆ ܠܘ ܒܚܕ ܙܒܢܐ ܐܫܟܚ ܐܢܘܢ ܠܟܠܗܘܢ܆ ܐܠܐܼ ܒܙܒ̈ܢܐ ܡܫܚ̈ܠܦܐ. ܘܡܛܠ ܗܕܐ܆ ܩܕܡ̈ܝܐ ܡܿܛܟܣܼ ܠܗܠܝܢ ܕܐܫܟܚ ܩܕܡ̈ܝܐ. ܘܒܬܪܗܘܢ܆ ܠܗܠܝܢ ܕܒܐܝܼܕܐ ܒܐܝܼܕܐ ܡܫܬܟܚܝܢ ܗܘܘ.
					 
						ܡܛܠ ܗܕܐ܆ ܐܦܠܐ ܟܠܗܘܢ ܗܠܝܢ ܕܕܘܝܕ܆ ܒܬܪ ܚ̈ܕܕܐ ܐܬܬܣܝܡܘ. ܐܠܐ ܒܡܨܥܬܐ ܡܿܢ ܡܢ ܗܠܝܢ ܕܒܢ̈ܘܗܝ ܕܩܘܪܚ ܐܣܦ ܘܐܬܢ: ܘܬܘܒ ܐܦ ܕܡܘܫܐ ܘܕܫܠܝܡܘܢ܆ ܘܒܬܪܟܢ ܕܝܢ܆ ܐܦ ܕܕܘܝܕ ܬܘܒ ܢܫܬܟܚܘܢ ܕܡܛܟܣܝܢ ܚܒܝܟܐܝܬ ܒܗ ܒܟܬܒܐ. ܘܠܘ ܐܝܟ ܙܒ̈ܢܐ ܕܒܗܘܢ ܐܬܐܡܪܘ܆ ܐܠܐ ܐܝܟ ܙܒ̈ܢܐ ܕܒܗܘܢ ܐܫܬܟܚܘ.
					 
						ܘܡܢ ܗܪܟܐ ܓܕܫܼܬܿ܇ ܕܗܠܝܢ ܩܕܡ̈ܝܐ ܒܙܒܢܐ܇ ܕܟܕ ܒܬܪܟܢ ܡܫܬܟܚܝܢ܇ ܬܖ̈ܝܢܐ ܒܡܢܝܢܐ ܢܬܛܿܟܣܘܢ܀
					 
						ܠܗܿ ܕܝܢ ܐܦ ܠܗܿ ܠܗܕܐ ܡܫܟܚ ܐܢܬ ܕܗܼܘܬ܆ ܘܐܦ ܒܟ̈ܬܒܐ ܕܢܒ̈ܝܐ. ܕܗܕܐ ܡܿܢ ܬܫܥܝܬܐ ܢܩܝܦܘܬܐ ܐܝܬ ܠܗܿ܆ ܗܕܐ ܕܝܢ ܡܫܚܠܦܐ܆ ܡܛܠ ܙܒܢܐ ܕܫܟܚܬܐ. ܘܗܕܐ ܝܕܝܥܐ܆ ܡܢ ܬܫ̈ܥܝܬܐ ܗܠܝܢ ܕܡܛܠܬܗܝܢ ܐܡܝܪܝܢ ܡܙܡܘܖ̈ܐ ܗܠܝܢ. ܗܿܘ ܡܿܢ ܓܝܪ ܡܙܡܘܪܐ ܕܢ̄ܚ̄܆ ܥܠ ܗܿܝ ܕܟܕ ܫܿܕܪ ܫܐܘܠ ܠܡܩܛܠܗ ܠܕܘܝܕ ܐܡܝܪ܀
					 
						ܡܙܡܘܪܐ ܕܝܢ ܕܢ̄ܓ̄܆ ܡܛܠ ܗܿܝ ܕܟܕ ܐܬܼܐ ܕܘܝܕ ܠܢܟܚ ܠܘܬ ܐܚܝܡܠܟ ܟܗܢܐ܀
					 
						ܕܢ̄ܘ̄ ܕܝܢ܆ ܒܡܥܪܬܐ ܕܥܪܠܡ܀
					 
						ܕܢ̄ܐ̄܆ ܡܛܠ ܕܘܐܓ ܐܕܘܡܝܐ ܟܕ ܐܟܼܠ ܩܖ̈ܨܘܗܝ ܕܕܘܝܕ ܘܕܐܚܝܡܠܟ܀
					 
						ܕܣ̄ܒ̄܆ ܟܕ ܒܡܕܒܪܐ ܕܐܕܘܡ ܥܿܪܩ ܗܘܐ ܕܘܝܕ܀
					 
						ܕܢ̄ܕ̄܆ ܟܕ ܐܟܠܘ ܩܖ̈ܨܘܗܝ ܕܕܘܝܕ ܙܝ̈ܦܝܐ܀
					 
						ܕܢ̄ܗ̄. ܟܕ ܦܠܫ̈ܬܝܐ ܐܚܕܘܗܝ ܒܓܬ܀
					 
						ܗܿܘ ܕܛ̄ ܘܗܿܘ
					 
						ܕܢ̄܆ ܟܕ ܐܬܼܐ ܠܘܬܗ ܢܬܢ ܢܒܝܐ ܘܐܟܣܗ܀
					 
						ܕܓ̄ ܬܘܒ ܘܗܿܘ ܕܝ̄܆ ܟܕ ܥܿܪܩ ܗܘܐ ܡܢ ܩܕܡ ܐܒܝܫܠܘܡ ܒܪܗ܀
					 
						ܕܙ̄ ܕܝܢ ܘܕܝ̄ܐ̄܆ ܚܠܦ ܡ̈ܠܐ ܕܚܘܫܝ ܒܪܗ ܕܝܡܢܝ܇ ܟܕ ܐܙܼܠ ܒܿܛܠ ܠܡܼܠܟܗ ܕܐܚܝܬܘܦܝܠ܀
					 
						ܗܐ ܡܢ ܬܫܥ̈ܝܬܐ ܗܠܝܢ ܘܡܢ ܐܝܠܝܢ ܕܐܟܘܬܗܝܢ ܝܕܝܥܐ܆ ܕܠܘ ܐܝܟܢܐ ܕܐܬܟܬܼܒܘ ܡܙܡܘܖ̈ܐ ܡܢ ܫܘܪܝܐ܇ ܘܐܝܟ ܙܒܢܐ ܕܒܗ ܐܬܐܡܪܘ ܚܕ ܚܕ ܡܢܗܘܢ ܡܛܟܣܝܢ ܒܟܬܒܐ ܕܡܙܡܘܖ̈ܐ܀