Եւ զի 'ի կենարարն եհան զբանն Դաւիթ զերկնաւորն, եւ չէ բռնազբօսութիւն ինչ բանից, եւ ո'չ անուանց անուանակցութիւն, այլ արդեանց ճշմարտութեամբ վկայելոց միաբանութիւն, անդստին 'ի կարգէն ուսիր, զի զկենարարն կոչէ Դաւիթ երկնաւոր. 'ի զատանել, ասէ, երկնաւորին 'ի վերայ նորա` ձիւնասցի 'ի Սաղմոն, լեառն այ, լեառն պարարտ, լեառն մեծեալ, լեառն պարարտ; Ասացից զկարգն մի ըստ միոջէ, զի մի' բռնազբօսութիւն ինչ մտածին բանից կարծեսցի. վասն զի եւ 'ի կենարարն զանուն երկնաւորին հանեմք. յալ յայտնի եւ առանց խառնակ ինչ շփոթութեան յառաջ խաղասցէ կարգն եւ բանք ասողացս. եւ մի' ոք բռնազբոսութիւն կարծիցէ, այլ ճշմարիտ պատշաճութիւն: 'Ի զատանել, ասէ, երկնաւորին զթագաւորս 'ի վերայ նորա` ձիւնասցին, ասէ, եւ զի՞նչ զատանել երկնաւորին զթագաւորս 'ի վերայ երկրի: Թագաւորս երկրի կոչէ աստ` ո'չ զայնոսիկ, որ աշխարհական պատուովն են, այլ որ երկնային մտօք պայծառացեալ իցեն, զսուրբսն. զորոց ասէ Պաւղոս, եթէ չարչարիմք, ընդ նմին եւ թագաւորեսցուք: Ճառէ Պաւղոս զթագաւորութենէ սրբոցն, ո'չ վայրապար մեծամեծ ինչ բանիւք, եւ յաճախութեան պատուոյ` որ հպարտացուցանէ զլսողս. քանզի մարթի բազում անագամ աւելիս ինչ խօսել, զի զլսելիս լսողացն մեծամեծս կոտորելով խախտիցէ ածել յիրս ինչ որ առաջի կայցեն: Բայց Պաւղոս ո'չ եթէ մեծամեծս ինչ կոտորելով պատրէ: Նա' եւ արժանի ըստ խոստմանցն չէ' ատակ ասել. եւ վկայէ ինքն իսկ, եթէ զոր ակն ոչ ետես, եւ ունկն ո'չ լուաւ, եւ 'ի սիրտ մարդոյ ոչ անկաւ, պատրաստեաց աստուած սիրելեաց իւրոց: Արքայութիւն տալոց է սրբոց, ո'չ աշխարհականս, այլ զերկնաւորն. ըստ այնմ նմանութեան` զոր կենարարն ունի, որ հարցաւն 'ի Պիղատոսէ, եթէ դու՞ ես թագաւոր հրէից. եւ նա ասէ, արքայութիւն իմ չէ յայսմ աշխարհի. եթէ յայսմ աշխարհի էր, մարտնչէին վասն իմ պաշտօնեայքն իմ: Արքայութիւն տալոց է սրբոց, որպէս Պաւղոս ասէ, եւ Դանիէլ նմին միաբան. յետ այնորիկ, ասէ, յարուսցէ աստուած թագաւորութիւն մեծ եւ սաստիկ, որ կայցէ մնասցէ յաւիտեանս. եւ դարձեալ` եթէ առցեն զարքայութիւնն սուրբքն բարձրելոյն: Եւ աստ, ասէ, 'ի զատանել երկնաւորին զթագաւորս 'ի վերայ նորա: Զի՞նչ իցէ զատանելն. որոշել, մեկնել: Զիա՞րդ որոշեսցէ զթագաւորսն: Այն իսկ է, զի Պաւղոսի հրաման տուեալ լինել քարոզ արքայութեանն, յԵրուսաղեմէ մինչեւ 'ի կողմանս լիւրիկացւոց առաքեաց քարոզ արքայութեանն. եւ զոմն 'ի Հնդիկս, զոմն 'ի կողմանս արեւելից, զոմն 'ի կոմանս արեւմտից, զոմն 'ի հարաւ, եւ զայլսն 'ի հիւսիսի: 'Ի զատանելն, այսինքն յորոշել եւ 'ի մեկնել, թէ որո'ց կամ ո՛ւմ պարտ իցէ հաւանել, եւ ո'յք ո՛ւմ լսիցեն եւ հաւատասցեն. ըստ իւրաքանչիւր պատշաճից, նոյնպէս եւ զքարոզսն առաքեաց: 'Ի զատանել ասէ, երկնաւորին չթագաւորս 'ի վերայ նորա, ձիւնասցին 'ի Սաղմոն, այսինքն սպիտակասցին: Քանզի քարոզութիւն առաքելոցն սպիտակացոյց զտիեզերս, եւ առաւել քան զձիւն եցոյց սպիտակ զերկիր. քանզի լուաց բանիւ ճշմարտութեանն, եւ ջնջեալ մաքրեաց ըստ բանին, թէ լուասցես զիս, եւ քան զձիւն սպիտակ եղէց: Մի'տ դիր կարգին. 'ի զատանել երկնաւորին զթագաւորս 'ի վերայ նորա, ձիւնասցին 'ի Սաղմոն: Սաղմոն եբրայեցի է, եւ թարգմանի պաղաղութիւն, փոխանակ ասելոյ` թե սրբեսցին 'ի խաղաղութեան: Իբրեւ կոչեաց զկենարարն երկնաւոր, գուշակէ ապա եւ զմարմնաւոր տեսչութենէն, այնու` զի լեառն կոչէ զնա. լեառն այ, լեառն պարարտ: Զերկնաւոր անունն 'ի լերին անուն փոխեաց. ո'չ եթէ ինքն ինչ 'ի ճշմարտութենէն փոխեցաւ, այլ ըստ իւրում տնտեսութեանն, նոյնպէս եւ զանուանսն գումարէ յանձն: Կոչի կենարարն մեր` աստուած, եւ տէր, եւ արարիչ, եւ ամենակալ, եւ երկնաւոր, եւ թագաւոր, եւ լեառն: Զայսմ լեռնէ, ասէ, երանելին Եսայի մարգարէ, եթէ եղիցի յաւուրս յետինս, ասէ, տէր` յայտնի լեառն տն եւ տուն աստուծոյ 'ի վերայ գլխոց լերանց. եւ երթիցեն ազգք բազումք, եւ ասասցեն, եկա'յք երթիցուք 'ի լեառն տն, եւ 'ի տուն աստուծոյ Յակովբայ. զի 'ի Սիոնէ ելցեն օրէնք եւ բան տն յԵրուսաղեմէ, եւ դատեսցի 'ի մէջ ազգաց բազմաց: Զայս լեառն եւ երանելին Դանիէլ յառաջագոյն փառաւորէ, մինչ զպատկերն բազմախառն յազգի ազգի նիւթոց մեկնէր, որ յոսկւոյ եւ յարծաթոյ եւ 'ի պղնձոյ եւ յերկաթոյ եւ 'ի խեցոյ հաստատեալ կայր. եւ 'ի վախճանին ասէ, թէ հատաւ վէմ առանց ձեռին, հար զպատկերն եւ մանրեաց, եւ վէմն եղեւ լեառն մե, եւ ելից զամենայն տիեզերս: Տե'ս, զիա'րդ չմիաբանին բանք ինչ որ մանրապէս ասիցեն` հոգեւոր մեկնութեանց. զի եթէ զյայտնի ինչ լեռնէ ասէր, եթէ եղեւ վէմն 'ի լեառն մեծ, եւ ելից զտիեզերս, լնուլն արդիւնս ինչ յայտ առնէ. եւ լեառն յորժամ ամենայնի լինիցի, չլնու, այլ ծածկէ: Եւ յայտ է թէ զկենարարին տնտեսութիւնն կոչէ լեառն, զի քան զամենայն շահաւետ հնարս` այն բարձրագոյն է, քան զօրինացն եւ զմարգարէիցն առաւելութիւն, քան զաստուածախօսացն` որք զօրհնութիւնս գրեցին: Բարձրասցի, ասէ, քան զամենայն բլուրս; Եւ աստ իսկ կենարարին ճառեալ զեկեղեցւոյ` ասէզառաքեալսն, թէ ո'չ կարէ քաղաք թաքչել որ 'ի վերայ լերին կայցէ: Ո՞ր քաղաք. եկեղեցի. Երուսաղէմ շինեալ որպես քաղաք. զոր եւ մարգարէն տուն կոչէ 'ի վերայ գլխոց լերանց: Ո՞ր տուն. եկեղեցի: Այլ զգո'յշ լեր, գուցէ այլ այլս ինչ խօսիցիմք, եւ բռնազբօսիցեմք զճշմարտութիւնն. տեսցո՛ւք եւ վկայութիւն ինչ սմին պատշաճական, թէ արդարեւ տուն կոչի եկեղեցի: Լո՛ւր Պաւղոոսի որ գրէ առ Տիմոթէոս, զի գիտասցես` թէ ո'րպես պարտի իցէ քեզ 'ի տան աստուծոյ շրջել, որ է եկեղեցի աստուծոյ կենդանւոյ: Եւ եթէ տուն աստուծոյ կենդանւոյ է եկեղեցի, ապ ուրեմն բարիոք ասաց մարգարէն, թէ տուն աստուծոյ 'ի վերոց գլխոց լերանց. այս իսկ է, զի 'ի վերոյ քան զամենայն բարձրութիւնս է եկեղեցի: Եւ երթիցեն ազգք բազում 'ի տունն. քանզի ո'չ թէ 'ի հրեականն փափապն ընթանան ազգք բազումք, այլ յեկեղեցի: Եւ ասասցեն, եկաք ելցուք 'ի լեառն տն եւ 'ի տուն աստուծոյ Յակովբայ: Ասացաք բազում անգամ, թէ ո'վ է աստուածն Յակոբայ, ըստ մտաց բանին, զի երեւեցաւ աստուած Յակոբայ, աստուած եւ մարդ: Եւ արդ ասէ երանելլին Դաւիթ, եթէ 'ի զատանել երկնաւորին զթագաւորսն 'ի վերայ նորա` ձիւնասցի 'ի Սաղմոն, լեառն այ, լեառն պարարտ: Զտնտեսութիւն կենարարին կոչէ լեառն պարարտ, այն իսկ է, թէ գէր եւ զօրաւոր եւ ամենածաղիկ է. զի պարարտն զամենայն ծաղիկ ծննդական յայտ աառնէ, որպէս եւ 'ի միում վայրի ասէ, թէ պարարտասցի գեղեցկութիւն անապատի. եւ դարձեալ` թէ սոքա են որդիք պարարտութեան: Լեառն մածեալ կոչէ. զցիրն եւ զլոյծն եւ զջրին ժողովէ եւ հաստատէ. զոր օրինակ զկաթին զլոյծ բնութիւնն խախացն ժողովէ եւ պնդէ. եւ 'ի մի միաբանութիւն զմեղկն եւ զտարածն ածէ. եւ չէ հնար այնուհետեւ մեկնելոյ յայնմանէ յորում միացաւն, ո'չ սա 'ի նմանէ, եւ ո'չ սա 'ի սմանէ. նոյնպէս եւ Քրիստոս յորմէ հետէ միացաւ ընդ ոգիս մեր` իբրեւ խախաց ընդ կաթին, չքակի եւ չլուծանի: Այնպիսի' էր եւ Պաւղոսի ոգին. երբեմն էր իբրեւ զկաթն լոյծ, եւ յորմէ հետէ միացաւ ընդ Քրիստոսի` ասէր, ո~ մեկն է զմեզ 'ի սիրոյն Քրիստոսի: Լեառն այ, լեառն պարարտ, լեառն մածեալ: Լեառն պարարտ` զկենարարն կոչէ, որպէս եւ զմարգարէսն լերինս կոչեն գիրք: Հիմունք նորա, ասէ, 'ի լերինս սուրբս: Եւ 'ի միւսում վայրի` նոյն, թէ լուսատու ես դու սքնչելապէս լերանցն յաւիտենից: Լերինս զյաւիտենականս կոչէ զմարգարէսն. ըստ այնմ, թէ Օրհնեալ է տէր աստուած Իսրայէլի, զի յայց ել, եւ արար փրկութիւն ժողովրդեան իւրոյ, որպէս խօսեցաւ 'ի բերան մարգարէիցն` որք յաւիտենիցն էին: Եւ վասն այնորիկ լուսաւորես դու սքանչելապէս լերանցն յաւիւտենից: Հիմունք նորա. ո՞յր. կենարարին. 'ի լերինս սուրբս. քանզի հիմունք աւետարանական քարոզութեանս` մարգարէականքն են: Նմին իրի իսկ եւ առաքելոյ յայտնագոյն զբանն արարեալ` ասէ, դուք եք տաճար աստուծոյ կենդանւոյ, շինեալ 'ի վերայ հիման առաքելոց եւ մարգարէից, որոյ է գլուխ անկեան Յիսուս Քրիստոս: Եւ յայն սակս կոչին լերինք` մարգարէքն, զի որպէս լեառն յերկրէ է, եւ անցանէ բարձրութեամբ ըստ երկիր. 'ի նմանէ է, եւ 'ի վեր քան զնա. նոյնպէս եւ մարգարէքն, քանզի 'ի մարդկանէ էին, եւ 'ի վեր քան զմարդիկ, կոչէին լերինք: Ասի եւ կենարարն լեառն. քանզի ունի ազգակտութիւն ընդ նոսա ըստ մարմնոյ, եւ անցանէ ըստ ամենայն մարմին, եւ ըստ բնաւ միտս մարդկան աստուածութեամբն: Եւ զի մարգարէքն` լերինք կոչեցան, եւ կենարարն լեառն, համարեցան` եթէ մի ոք 'ի մարգարէիցն իցէ. որպէս եւ ինք ասէ, եթէ զո՞ ոք ասեն զինէն մարդիկ, թէ իցեմ, զորդիս մարդոյ: Եւ նոքա ասեն, եթէ ոմանք ասեն զՀովհաննէս մկրտիչ, եւ ոմանք զԵրեմիայ, եւ ոմանք զԵղիայ, եւ ոմանք զմի ոք 'ի մարգարէիցն. եւ կարծէին զսուրբ լեառն` եթէ մի ոք 'ի մարգարէիցն իցէ: Երանելին Դաւիթ ասէ յառաջագոյն, թէ զի՞ կարծէք լերինք մածեալս զլեառն յորում հաճեցաւ աստուած բնակիլ 'ի նմա: Զո՞ ասեն մարդիկն զորդւոյ մարդոյ: Պատասխանի ետուն եւ ասեն, ոմանք զԵրեմիայ, եւ ոմանք զԵղիայ, եւ ոմանք զՅովհաննէս մկրտիչ: Տեսանե՞ս, զիա'րդ յառաջագոյն ասէ մարգարէն զկարծիսն. զի՞, ասէ, կարծէք լերինս մածեալս զլեառն յորում աստուած հաճեցաւ բնակիլ 'ի նմա: Եւ զիա՞րդ բնակեաց. քանզի այսպէս 'ի մարգարէսն ո'չ բնակեաց, որպէս եւ աստ ասէ, թէ տէր բնակեսցէ 'ի նմա 'ի սպառ. անդ ժամանակաւ արար ասպնջականութիւն, եւ աստ յաւիտենական բնակութիւն: