Եւ արդ առեալ 'ի նմանէ զամանս, այսինքն զոգիս մարդկան, որք մոլորեալ եւ գայթակղեալ շրջէին ընդ ամենայն չարիս, առաքէ այնուհետեւ իբրեւ զիւր անօթս զոգիս մարդկան զթառամեալս յամենայն չարիս, ախոյեան սմին` յորմէ եհանն: Աման ճարեաց էր եւ հալածիչն Պաւղոս, թշնամանիչ եւ աստուածամարտ. քանզի աստուածամարտ էր` որ ընդ քնին մարտնչէր. որ զորդի ուրանայ, ասէ, եւ զհայր անարգէ: Մի'տ դիր, զիարդ եւ ինքն իսկ առաքեալ զվայրովք ածէ զկանխակալ անգիտութիւն յուր. հաւատարիմ է, ասէ, բանս զի Յիսուս Քրիստոս եկն յաշխարհս փրկել զմեղաւորս որոց առաջին ես իսկ եմ: Առնու զաստուածամարտն եւ զնախանձախնդիր օրիացն, որ ընդ Քրիստոսի յանգէտս տայր զպատերազմ, զամանն լի անգիտութեամբ եւ նախանձու, եւ կատարէ անօթ ընտրութեան. եւ լուր նմին իսկ` որ ասէ ցԱնանիա, թէ երթ, զի անօթ ընտրութենէ է նա ինձ: Տեսնե՞ս, զիարդ 'ի չարեաց ամանոց` արար անօթ ընտրութեան: Եւ այլուր Պաւղոս կոչէ զմարդիկ ամանս. եթէ կամէր, ասէ, աստուած ցուցնել զբարկութիւն, եւ յայտնի առնել զզօրութիւն, զոր համբեր բազում երկայնմտութեամբ ; ի վերայ ամանոցն բարկութեան: Ամանս բարկութեան` զանհաւանիցն ոգիսն կոչէ. զի ցուցցէ զմեծութիւն ողորմութեան իւրոյ 'ի վերայ ամանոցն ողորմութեան, զորս յառաջագոյն պատրաստեաց զմեզ անօթս ողորմութեան. զայնցանէ ասէ, որք արժանի մարդասիրութեան եղեն, եւ անոթ ընտրութեան. եւ այն իսկ է ելն 'ի բարձունս եւ գերեաց զգերութիւն: Նա եւ ինքն իսկ զնոյն ակնարկէ. ես, ասէ, յորժամ բարձրացայց, այս իսկ է` յորժամ 'ի խաչ ելից, զամենեսեան զգեցից առ իս: Ապա ուրեմն եհան 'ի յիւր զյափշտակելսն, եւ դարձոյց զգերեալսն. ազտեաց զվտարանդիսն, եւ բժշկեաց զախտացեալսն. եւ խզեաց զկապանս, զոր մեղքն կապեցին, եւ փոխանակ այնր` եդ պսակն 'ի գլուխ կապելոցն: Եւ զի մեղքն կապանք են, լուր գրոյն` որ ասէ, 'ի տոռունս մեղաց իւրոց, ասէ, կապի իւրաքանչիւր ոք: Եւ քանզի զմեղս եգիտ կապանս, խզեաց զմեղս գառն այ, որ եբարձ զմեղս աշխարհի: Ո~ մարդասիրութիւն բարերարին եւ տն: Տէր ոք յորժամ զծառայի փախուցելոյ զհետ երթիցէ եւ հասանէ, եթէ արձակ գտանիցէ` կապէ. եւ եթէ առողջ` գան հարկանէ. եւ եթէ 'ի լոյս` խաւարաբանդ արգել առնէ. եւ փրկիչն զհետ եղեւ փախստական բնութեան մարդկան 'ի ճշմարտութենէ եւ 'ի բարերարութենէ, եւ յօրինաց, եւ 'ի պատուիրանաց. եգիտ ոչ արձակ, այլ կապեալ, եւ արձակեաց. մերկ եւ զգեցոյց. որք միանգամ, ասէ, 'ի Քրիստոս մկրտեցայք` զՔրիստոս զգեցեալ էք: 'Ի բանդի եգիտ զամենեսեան, եւ եհան 'ի բանդէն. 'ի խաւարի, եւ լուսաւորեաց. երկիր, ասէ, Զաբողովնի եւ Նեփթաղիմայ խանապարհ ծովու` յայնկոյս Յորդանանու, ժողովուրդ որ նստէր 'ի խաւարի` ետես լոյս մեծ: Եւ ու՞ր եգիտ կապեալս, եւ արձակեաց: 'Ի բազմաստուածեան մոլորութեանն, իբրեւ 'ի գբի ինչ եւ 'ի ներքին վիրապի: Եւ զի գուբ` կռոցն երկրպագութիւնն է, լուր Երեմիայի մարգարէին, հիացան, ասէ, երկինք, եւ զարհուրեցաւ երկիր զերկու չարիս արար ժողովուրդն. զիս թողին, ասէ, զաղբիւրս ջուրց կենդանութեան, եւ փորեցին իւրեացն գուբս ծակոտկեանս: Աղբիւր կոչէ զանձն, զի աղբիւրն իւրոց ականցն բղխէ զջուրն. եւ գումն` մուրացածոյ եւ եկամուտ զջուրն ունի. եւ քանզի զբուն աստուածն թողին, եւ 'ի պիտակսն զառածան. եւ որպէս եւ Պաւղոս ասէ, եթէ մինչ ոչն գիտէիք զաստուած, ծառայէիք այնոցիկ` որ ոչ էին 'ի բնէ աստուածք. 'ի գբի անգիտութեան կապեալ կայիք 'ի կռապաշտութեան վիրապի: Ուստի Դաւիթ իսկ զբողոք բարձեալ աղաղակէ, թէ փրկեա զիս յայնցանէ` որք իջանեն 'ի գուբ: Ուստի եւ երանելին Եսային ասէ, եթէ ժողուուրդ, որ նստեր 'ի խաւարի` ետես լոյս մեծ. եւ զի մեկնէ իսկ` թէ յորում մթի էին, ածէ զնովիմբ, թէ ժողուուրդ` որ նստէր 'ի խաւարի եւ ստուերս մահու: Իսկ միւսն` եւ 'ի դեմս իսկ կենարարին խօսի, եթէ դու արեամբ ուխտի քո արձակեցեր զկապեալս 'ի գբոյ անջրդոյ: Արեան ուղտի զթողութիւն մեղացն ասէ. եւ կապեալս` որպէս Պաւղոս կապեալ Յիսուսի Քրիստոսի, ոչ 'ի գբոյ անջրդոյ. եւ զիա՞րդ արեամբ ուխտին. այն իսկ է, թէ այս է արիւն իմ նորոյ ուխտի` հեղեալ վասն ձեր 'ի թողութիւն մեղաց: Եւ մի'տ դիր հաւաստեաւ: Դաւիթ ասէ, թէ ել 'ի բարձրունս եւ գերեաց զգերութիւն, եւ ետ պարգեւս մարդկան. եւ պարտ է ամենայն իսկ մարգարէիցն միաբան խօսել, քանզի մի հոգի էր յամենեսին: Սա ասէ, թէ արձակեցեր զկապեալսն յանջրդի գբոյն. եւ միւս` թէ ուրախ լիցին առաջի քո, որպէս ուրախ լինի յաւուրս ամարայնոյ. արձակեալքն, ասէ, իբրեւ յամարայնոյ ուրախ լիցին: Ուստի եւ փրկիչն իսկ ասէր` եթէ հունձք բազում են եւ մշակք սակաւ, աղաչեցէ'ք զտէր հնձոց` զի հանցէ մշակս 'ի հունձ իւր 'ի գործ: Այնպէս, ասէ, ուրախ լինիցի փրկեալքն քո, որպէս որք ուրախ լինի 'ի հունձս, որ զպտուղս իւրեանց վաստակոցն ժողովեն, կամ իբրեւ որք զավարն բաժանեն: Բազում աւար առնուն բռնաւոր 'ի պատերազմի, ոսկի եւ արծաթ եւ հանդերձք. եւ ամենայն իսկ առն` աւար կոչի, քանզի ցիր եւ վայրավատին կայ ամենայն խառն, հանդերձքն զէնն եւ սուրն, ոսկին եւ արծաթն եւ հացն, եւ ամենայն զինչ եւ իցէ. նոյնպէս եւ սատանայի առեալ զամենեսեան, եւ ընդ միմեանս խառնակեալ: Եկն Քրիստոս, եւ խուռն զամենեսեան յափշտակեաց 'ի նմանէ, զարփեցողս եւ զագահս եւ զյափշտակողս. վասն այնորիկ ասէ, ուրախ լինիցին առաջի քո, զոր օրինակ ուրախ լինին յամարայնի, եւ զոր օրինակ որք բաժանեն զաւար. որպէս եւ Դաւիթ ասէ, թէ ցնծացայց ես 'ի բանս քո, որպէս զայն` որ գտանէ աւար բազում: Տե'ս զարմանալիս, զոր օրինակ որ յանգն յաղթիցէ, եւ զապաստամբսն կապիցէ եւ զըմռնեալսն յապստամէն թափիցէ, եւ ապստամբն միշտ զմահն առաջի աչաց նկարէ, եւ վտարանդիքն ուրախ լինի, զի 'ի բռնաւորութենէն արձակեցան, եւ 'ի թագաւորութիւն եկին: Բայց սակայն եւ ապստամբն, որ մեռանելոցն իցէ, եւ նոքա որ ազատելոցն իցէն, 'ի ցոյց շրջին վասն յաղթութեան թագաւորին. նոյնպէս եւ կենարան կալաւ զսատանայ 'ի պատերազմի եւ զդեւս, եւ զնոսա որ 'ի նմանէ ըմբռնեալ էին, եւ 'ի միասին 'ի ցոյց շրջեցուցանէ: Եւ զերկոսին Պաւղոս ասէ, Քրիստոսէ, ասէ, խաղաղութիւն մեր, որ արար զերկոսեան մի . եւ զկրճիմն ցանկոյն քակեաց զթշնամութիւն 'ի մարմնի իւրում, ելոյց եւ զօրենս պատւիրանաց իւրովք հրամանովքն, խափանեաց եւ եբարձ 'ի միջոյ զդատակնիքն մերոյ հակառակութեան եւ բեւեռեաց ընդ խաչին, եւ մերկեաց զիշխանութիւնսն եւ զպետութիւնսն, եւ յայտ յանդիման խայտառակեաց զնոսա: Որպէս զձողոյ ինչ նշան յաղթութեան կապիցեն, կամ սաղաւարտ կամ զրահս եւ կամ այլ ինչ զնշխարհ կոտորելոցն` եւ շրջեցուցանիցեն. նոյնպէս իբրեւ յարքունի նշանի կապեաց զզէն սատանայի. եւ արար խայտառակ զդեւս 'ի խաչին: Այլ դեւքն ձաղին եւ 'ի սպասումն պահին. նա' եւ յափտակեալքն նախ ձաղին, եւ ապա յազատութիւն ելանեն. եւ լո՛ւր Պաւղոսի, շնորհք, ասէ, աստուծոյ որ յամենայն ժամ հռչակն հարկանէ զմէնջ 'ի Քրիստոս, եւ բուրէ 'ի մէնջ զհոտ գիտութեան իւրոյ: Ձաղի ապստամբն, ձաղիմք եւ մեք որ ընդ ապստամբաւն էաք. զի յայտնի լիզի, թէ ո'վ յաղթեաց, եւ ո'վ ապստամբն էր, եւ ո' ոք ընդ ապստամբաւն. եւ քանզի զմին կալաւ եւ սպանանելոց է, եւ զայլսն թափեաց եւ ազատեաց, հա'րկ է եւ սոցա առ անգամ մի եւ ընդ նմին ձաղել` որ մահապարտն իցէ, եւ 'ի մահ երթայցէ: Եւ զայնպիսի զձաղելոցն եւ զկալանաւորացն` ասէ Եսայի, եթէ վաստսակ եղեւ երկիրն եգիպտացւոց, եւ վաճառականք եթոպացւոց, եւ սաբայացիքն` արք մեծամեծք առ քեզ եկեսցեն, եւ զկնի քո շրջեսցին կապեալք 'ի ձեռակապս, եւ 'ի քեզ աղօթս արասցեն: Զի ցուցցէ թէ գան 'ի գերութիւնն, ո'չ 'ի կորուստ, այլ 'ի դիւրութիւն. զկնի քո, ասէ, շրջեսցին կապեալք 'ի ձեռակապս, եւ 'ի քեզ յաղօթս կայցեն, զի 'ի քեզ աստուած գոյ, եւ չիք աստուած բայց 'ի քէն: Ձաղին դեւք, ձաղին եւ առաքեալք. նոքա ընդ պարտութիւնն զամօթի հարեալք, եւ սոքա զյաղթութիւն թագաւորին հռչակն հարկանել: Ձաղեցան յայնժամ դեւքն, ձաղին եւ այժմ հերձուածողք, որք 'ի դէմս ընտանեաց զթշնամեաց գործս գործեն: Զոր օրինակ քան զամենայն պատերազմ, ընտանի պատերազմն չար է. նոյնպէս քան զամենայն մոլորութիւնս` հերձուածողացն մոլորութիւն: Հեթանոսն եթէ թշնամանիցէ ինչ զՔրիստոս, չհամարիմ ինչ օտարուոթի, քանզի թշնամի' է խաչին. զհրեայն չգրեմ ինչ, քանզի յայտնի' իսկ թշնամի է: Հերձուածողն` որ պատճառի դաւանել զՔրիստոս, եւ ուրանայ 'ի Քրիստոսէ. որ բարրի քարոզել զհոգին սուրբ, եւ հայհոյէ զսուրբ հոգին, այն պատերազմ տագնապէ զիս իբրեւ զընտանի պատերազմ: Որպէս որ 'ի քաղաքի կռիւ լինիցի, քան զամենայն կռիւս չա'ր է. եւ քան զամենայն կռիւս քաղաքի` որ աղմուկ 'ի տանն լինիցի` դառն է. եւ քան զքաղաքին եւ զտան` այն չար խռովութիւն է, որ ընդ այր եւ ընդ կին կայցէ, եւ քան զայն եւս դժնդակ ծուխ` որ ընդ մէջ մորութիւնն եւ ըրջուաց ծխիցի. եւ եւս չար աաղմուկ այն` որ 'ի մէջ յօրային եւ խորթիցն կայցէ: 'Ի մի'տ առ զընտանի թշնամութիւնն: Զմտաւ աստուած զայր` որ 'ի հրապարակէ 'ի տուն գայցէ, եւ կարէձմեռն զերեսօք կայցէ. յորժամ սեղանոյն ժամ իցէ եւ ուրախութեան, յայնժամ 'ի պատերազմի հասանիցէ կալ. հոգք եւ տրտմութիւնք յաճախիցեն, եւ հողմակոծ զնաւահանգիստս առնիցեն, եւ իբրեւ 'ի ծովու կայցէ 'ի ծփանս 'ի տանն. զտունն թողուցուն, եւ 'ի հրապարակն իբրեւ 'ի նաւահանգիստ դիմեսցեն: Այնպիսի խռովութեանց տարան վասն Քրիստոսի արք աստուածապաշտք, զորոց ասէր Քրիստոս, եթէ մատնեսցէ եղբայր զեղբայր 'ի մահ, եւ հայր զորդի, եւ յարիցեն որդիք 'ի վերայ հարց: Բաժանեսցի որդի 'ի հօրէ, եւ հայր որդւոյ, մայր 'ի դստերէ, սկեսուր 'ի նուոյ, եւ նու 'ի զկեսրէ, եւ թշնամիք տանուտեառն` ընտանիք իւր իցեն: Զոր օրինակ քան զամենայն պատերազմ` տան պատերազմդժնդա'կ է, նոյնպէս քան զամենայն մոլորութիւն` հերձուածողացն մոլորութիւն. որ թուին թէ զնոյն ընտանութիւն ունիցի, եւ զնոյն խոստումն աստուածպաշտութեան, զգեցեալ զկերպարանս աստուածպաշտութեան, եւ մարտնչիցի ընդ ճշմարտութեանն. զորոց ասէ Պաւղոս, եթէ զկերպարանս ճշմարտութեանն ունին, եւ 'ի զօրու, թէ ուրացեալ են: