Quid, quod offendimur, si quis sermonem nostrum
imitatur, si quis incessum, si quis vitium aliquod
corporis aut linguae exprimit ? Quasi notiora illa
fiant alio imitante quam nobis facientibus ! Senectutem quidam inviti audiunt et canos et alia ad quae
voto pervenitur ; paupertatis maledictum quosdam
perussit, quam sibi obiecit quisquis abscondit. Itaque
materia petulantibus et per contumeliam urbanis
detrahitur, si ultro illam et prior occupes ; nemo
 risum praebuit qui ex se cepit.