itaque cum per uniuersam conuictus 
 nostri et familiaritatis aetatem mea cogitatio uolueretur, m illo 
 praecipue sermone eius mentis meae resedit intentio, quo Caecilium 
 superstitiosis uanitatibus etiamnunc inhaerentem disputatione 
 grauissima ad ueram religionem reformauit .
 

 Nam negotii et uisendi mei gratia Romam contenderat, relicta 
 domo, coniuge, liberis, et quod est in liberis amabilius, adhuc 
 annis innocentibus et adhuc dimidiata uerba temptantibus, 
 loquellam ipso offensantis linguae fragmine dulciorem.