nec potest aliter rerum summa 
 consistere, nisi ad unum cuncta referantur, nisi unus teneat 
 gubernaculum, nisi unus frena moderetur regatque uniuersa 
 membra tamquam mens una. si multi sint in examine 
 apum reges, peribunt aut dissipabuntur, dum 
 regibus incessit magno discordia motu; 
 si plures in armento duces, tam diu proeliabuntur, donec unus 
 optineat; si multi in exercitu inperatores, nec pareri poterit a 
 milite, cum diuersa iubeantur, nec ab iis ipsis unitas optineri, 
 cum sibi quisque pro moribus consulat.