Hierusalem ab Aelio Adriano Aelia uocitatur, nam post 
 subuersionem Titi conditoris Aelii nomen cum opere suscepit. 
 Natura loci edita adeuntibus eam qualibet ex parte haut dubie 
 ascendendum erit, diutino quippe, sed molli tractu adsurgit. 
 Situs ipse urbis paene in orbem circumactus est non paruo 
 murorum ambitu, quo etiam montem Sion quondam uicinum 
 iam intra se recipit, qui a meridie positus pro arce urbi 
 supereminet. Maior ciuitatis pars infra montem iacet in planitie 
 humilioris collis sita.